Sookhumelela Sa Mookumini

Tthiri Yehova Ookikhaliherya

Elavuliwe ni Kenneth Little

Miyo vamosa ni mwaara aka Evelyn naahiphiya ni kamboyi, muttetthe wa Hornepayne, epantte enikela epheyo ya Ontario, oCanada. Waari vaasisu oxaaka okathi wooriirya vanceene. Munna a mapuro ale, aahirwa khonikuxa mpakha vapuwani vawe, khunivaha yoolya ya vaasiisu yooviha, nto naahikhuma ni owo, mwanawe ni amwaarawe, nirowaka olaleerya khuta enupa muttetthe wowaatta eneevi. Nto emakaaripi yeele kaahilavula mwaha aka woopacerya ntoko mutokweene a esirkwiitu. Muthukumano ole yaari-vo atthu 5 paahi, khuuvo-tho arwiiye.

MASI nkaakhulumunwe mwaha wa atthu vakhaani yaarwiiye owiriyana mwaha aka ole mwaakha wa 1957. Munnisuwela nthowa naya? Okhala wira miyo ka mutthu oowuuliwa muru vanceene. Tthiri, okathi kaaryaaka mwaana, kaaniipitha yaaphiyaka aletto owaani, hata yaari atthu yaasuwela aka.

Tivonto, woonasa wene, vanrowa aya wootikinihani, osuwela wira miteko sinceene sivanre aka munikhuuruni na Yehova, ti seiye sinimwiiriha mutthu olavula ni atthu anceene apatthani ni ale ahikhanle apatthani. Nlelo kinovikaniha owanana ni wuuliwa muru ni ohiiroromela, tivonto vahinireerela aka wiittottopa okhumela waka saana mmiteko sa Muluku sinivara aka. Kihoona yiireyaka yoolaiherya ya Yehova yoowi: “Muhové! Miyo kiri ni nyuwo. Muhivelavelé! Miyo ki Muluku anyu. Miyo kinnolipihani, kinnokhaliheryani. Ayo! Kinnovarelani ni ntata naka”. (Yes. 41:10) Enamuna emosa yootepexa oreera Yehova ekikhalihenrye awe, ti anna anikikhaliherya. Kinimooleelani masina aya anna awo, masi kinrowa opacerya okathi waryaaka mwammiravo.

OWO AAMURUMEELA BIIBILIYA NI ELIIVURU YAAMUKHAANI YOORIIPA

Ettiminku vaasiisu nihiku nooviha iyaakha sa 1940, Elsie Huntingford, aahirwa owaani omatta wahu, epantte ya onikhuma epheyo ya Ontario. Amaama yaahirowa ohula mukhora, masi apaapa vamosa ni miyo naahanle mpaani okhala wira oowanli ahu naari oowuuliwa muru, nnaamwi naawiriyana ele yaahimmwa. Hiyo nuupuwela wira Murokora Huntingford aarwaale otumiha itthu ni wira amaama yaarowa othuma etthu yahaaphavela ahu, nto apaapa yaahikhuma wira amuleele wira hiyo khinaaphavela othuma etthu. Masi Murokora Huntingford aahimukoha so: “Nyuwo khamuntthuna omusoma Biibiliya?” Apaapa yaahaakhula wira “Yakhala yeeyo ninniphavela”.

Murokora Huntingford aanixukunrye okathi wooreerela. Nnaamwi yaari atthu yaakhalela nthiti weetta okerexa, anamuyari aka yiira ahiyale ene niinano ekerexa United Church ya oCanada. Exeeni yaawiirinhe ohiya? Waari mwaha wa ahooleli a ekerexa ele yaapakale elista ya masina a atthu attharihelaka mwaattelo wa musurukhu khuta mutthu aavaha awe; nto aapaceriwe tuule aavanhe musurukhu munceene. Okhala wira anamuyari aka yaari atthu oothoiwa, okhala wene nsina naya naakhala vathi va elista; nto amahoolela a ekerexa yaamakela waakhanyererya wira yahaana ovaha musurukhu munceene. Mukhulupale mukina a ekerexa yeele aahimuhimeerya paapa aka wira owo khaakupali itthu saaxuttiha awe, masi khaaphavela oyeleela muteko ole wa mukerexa. Nnaamwi naahiyale weetta okerexa wahu, nlelo naaniphavela enamuna ekina ya omulompa Muluku.

Okhala wira miteko sa Anamoona a Yehova siira sikhoottihiwa oCanada, Murokora Huntingford aaniniiriha yoosoma ya Biibiliya omurumeelaka Biibiliya paahi ni eliivuru yaamukhaani yooriipa yaalempe awe ni matata. Nuuvira okathi owo aahikupali wira khinaarowa onvariha tivonto aahipacerya oruuha iliivuru sikina saamutthokiherya Biibiliya. Hiyo naanittukuttherya oratteene iliivuru iye wuumalani wa khula yoosoma.a

Nnaamwi wakhoottihiwa ovara miteko sa Yehova, Murokora Huntingford aanilaleerya mwa nthiti. Nthiti nawe naahikiiriha ovarexexa ekeekhai. Nuuvira eyaakha emosa anamuyari aka abatiziwe ene khukhala Anamoona a Yehova, nto miyo kaahiivahererya wa Yehova. Kibatiziwe 27 a Feverero 1949, yaari etanki ya eyuuma yaaheliwa maasi wira awuryeke alimi a muttetthe ole vamosa ni inama saya. Okathi ole kaarina iyaakha 17 paahi. Nuumala obatiziwa kaaphavela okela muteko wa orummwa wa okathi wotheene.

YEHOVA OOKIKHALIHERYA OKHALA OOLIPA MURIMA

Kaanoovelela orowa ovara muteko wa opioneero muttetthe wa ottaiwene. Mwa okathi vakhaani kaanivara muteko obanko ni oskritoorio, maana kaakupali wira kahaana ophwanya musurukhu wooruumeelana ntoko pioneero. Masi, mwaha woohisuwela orumeela saana musurukhu, musurukhu aka waanimala mowaakuveya. Nto munna aitthaniwa Ted Sargent, aahikitumererya okhala oolipa murima ni omuroromela Yehova. (1 Wah. 28:10) Mwaha wa nikhaliheryo nawe noophenta, mweeri wa Novembro 1951, kaahipacerya opioneero. Kaarina idoolare 40 paahi, moskaleeta a khalai ni maala masya. Masi Yehova aahikikhaliherya ophwanya khula etthu yaakithowa. Kinnimuxukhuru vanceene munna Ted aakitumerenrye okela muteko wa opioneero! Eyo yokiiriha ophwanya mareeliho manceene.

Emakaaripi emosa wuukiseryani wa mweeri wa Agosto 1952, anna oofiliyaali ya oToronto yaahikiligarela. Efiliyaale ya oCanada ya Anamoona a Yehova, yaahikilattula wira karumeeleke oBetheli, opacerya mweeri wa Setembro. Vanaamwi kaari mutthu oowuuliwa muru, ni kahaatonko oxukurya eBetheli, kaari ootteeliwa murima okhala wira mapioneero makina yaanihimya itthu soohakalaliha sa oBetheli. Nto kaahikhuma owaani.

“NWOONIHERYEKE ANNA WIRA MUNNATHOKORERYA”

Nuuvira iyaakha piili kirye ene oBetheli, Kaahirummwa omuranttela Bill Yacos ntoko murumeyi a muloko (yoowo olelo-va oniitthaniwa mutokweene onuuraaniha nikhuuru na axitokweene) a muloko wa Shaw Unit oToronto.b Okathi ole kaarina iyaakha 23 paahi, kiixoona okhala mmiravo pahi, mulimi ohinisuwela itthu sinceene. Masi Munna Yacos moowiiyeviha aahikitthokiherya moota woovara muteko ole. Nave Yehova aahikikhaliherya.

Munna Yacos, aari mutthu oohakalala ni ootheya-theya aasiveliwa waathokorerya atthu. Owo aanaaphenta anna, nave anna yaanimphenta. Owo aanaaxukurya anna awo mmawannyeya, khaawehererya okhumelela muxankiho wira aaxukurye. Bill Yacos aahikitumererya wira kivareke muteko woolaleerya ni anna ni arokora ntoko siira awe. Owo aahimmye so: “Ken nwooniheryeke anna wira munnaaphenta. Eyo enoomala-maliha mixankiho sinceene”.

MWAARAKA AARI OOROROMELEYA

Yehova aahikikhaliherya mwa enamuna ekina ya vameekhaya okhuma Janero 1957. Mweeri ole naahithelana ni Evelyn, yoowo aasomme eturma ya 14 ya Exikola ya oGileadi. Nihinatthi othelana owo aarumeela muloko onilavula eFransexi eprovinsia ya Quebec. Mahiku ale, muttetthe wa Quebec, waakhaliwa ni atthu yeettela eKerexa Katoolika ya oRoma. Nto Evelyn aavara muteko muttetthe wootepa ovila, masi owo aahimuroromela Yehova khuvikaniha.

Evelyn aari oororomeleya-tho wa miyo. (aÉf. 5:31) Masi ororomeleya wawe waheehereriwa nithelanaka-ru! Hiyo naahimpaka palano orowa oFlorida, EUA, masi mmeeloni mwaha nuumala othelana, efiliyaale yaahikileela wira kaahaana orowa omuthukumanoni wa esumana ntero oBetheli ya oCanada. Ekeekhai wira muthukumano ole waahihonona ipalano sahu, masi Evelyn ni miyo naaphavela opaka khula etthu Yehova aaniruma awe. Nto naahinteelela mukwaha ahu woweetta nuumala othelana. Esumana ele Evelyn aavara muteko woolaleerya vakhiviru ni oBetheli. Nnaamwi muttetthe ole waari woovirikana ni Quebec, owo aahiwerya.

Wuumalani wa esumana yeele, kaahithanliwa mootutuxerya wira kavareke muteko wa mutokweene a esirkwitu epantte enikela epheyo ya Ontario. Miyo keera kithenlene niinaano, tthiri kaarina iyaakha 25 paahi ni kihisuwelaka itthu sinceene, masi naahirowa nimuroromelaka Yehova wira aamunikhaliherya. Eriyari ya eyiita ya oCanada, hiyo naahinwela kaamboyi ni axitokweene oweetteetta anceene yaapancenrye khalai, yaawo vano yaatthikela muttetthe waathanleliwa aya. Awo yaahinilipiha vanceene! Munna mmosa aahinikhanyererya orowa orupa mukaaroni yaalinve awe wira arupe-mo, khwiira hiyo khinaareerela orupa nikilaathale ene nvagawuni. Mmeeloni mwaya, mahiku 15 nuumala othelana, naahirowa oxekurya egrupu yaamukhaani ya Hornepayne ntoko sihimyale aka wanipacerya.

Nto saahikhala mirukunuxo saatthuneya ahu opaka miyo ni Evelyn. Okathi waarumeela ahu ntoko mutokweene a eDistritu, kaahaakhela epaphelo yaakilattula wiirela mpantta eturma ya 36 ya Exikola ya oGileadi, kurso yoowo oniiriwa myeeri 10, nto aarowa opacerya Feverero 1961, oBrooklyn, Nova York. Ekeekhai wira kaahihakalala, masi okathi omosaru kaahiriipiwa murima okhala wira amwaaraka Evelyn yaahaana ohala owaani. Okhala wene athiyana yaalattuliwa axiiyaaya, yaanikohiwa akhala wira yaaneemererya wira aiyaaya aroweke, nto yaahaana olepa epaphelo yaahimya wira yaanaakhulela wira avalaane ni aiyaaya myeeri 10. Evelyn aahimoroxa maithori, masi aaheemererya wira kirooke oxikola, nave aahisiveliwa okhala wira kaarowa wiinihiwa nikuruta oGileadi.

Okathi owo Evelyn aahirowa orumeela ofiliyaali ya oCanada. Evelyn aahikhalana eparakha ya okhala ekwarto emosa ni murokora mmosa owoottihiwa oreera murima Margaret Lovell. Tthiri naahinkhelana mukina ni mukhwaawe. Nikhaliheriwaka ni Yehova naahiwerya waakhwaniherya miteko saavahiwe ahu. Weemererya wawe Evelyn ovalaanyihiwa ni miyo okathi munceene wira kaixuttihiwe oratteene enamuna yoomurimeela Yehova moomalela waahikivara murima vanceene.

Nuuvira myeeri 3 kiri oGileadi, munna Nathan Knorr yoowo ahoolela muteko wa olumwenku wotheene, aahikivaha nlattulo na vameekhaaya. Owo aahikikoha akhala wira kanwerya wunteelela Exikola ya oGileadi, khutthikela oCanada orowa orumeela mwa okathi vakhaani ntoko mwiixuttihi a Exikola ya Orummwa wa Omwene. Munna Knorr aahikihimeerya wira khaakikhanyererya waakhulela muteko ole. Miyo kanwerya ovikaniha osoma oGileadi mpakha omaliha, owehasa wene kikeleke muteko wa omisionaario. Nave owo aahikileela wira kahiyaru exikola ya oGileadi kirowaka oCanada, nkaakhala-khala kiitthaniwaka-tho, owehasa wene kaarowa ovahiwa muteko mukina oCanada weiwo. Owo aakihimeeryale wira kimwaakhule nuumala olavula ni amwaaraka.

Okhala wira Evelyn aahikileela khalairu yoolakela awe voohimya sa soothanleliwa sa muteko wa Muluku, kaahimwaakhula naananoru Munna Knorr wira: “Wa khula etthu nikhuuru na Yehova ninnivekela aya opaka, hiyo ninneemererya moohakalala”. Hiyo naahiiwanana wira voohicikha etthu sa ele yaanisivela, naarowa weemya orowa khula nipuro nikhuuru na Yehova naarowa aya oniruma.

Tthiri, mweeri wa Abril 1961, kaahikhuma oBrooklyn kitthikelaka oCanada wira kasomihe Exikola ya Orummwa wa Omwene. Nuumala exikola ele naahipacerya orumeela oBetheli ya oCanada. Nto, kahaakhela epaphelo ekilattulaka wira kasome Exikola ya oGileadi eturma 40 yeeyo yaarowa opacerya mwaakha wa 1965. Evelyn aahaana olepa-tho epaphelo ya weemererya ovalaanihiwa ni miyo. Masi isumana vakhaani nuumala olepa, nahaakhela epaphelo yaari yoonihakaliha owanli ahu, yeeyo yiira Evelyn aahaana orowa oxikola ni miyo.

Niphiyakaru Oxikola ya oGileadi, Munna Knorr aahinileela wira atthu yaale yaalavula eFransexi ntoko hiyo yaaroihiwa wAfrika yamaliha osoma. Nihiku nimalinhe ahu osoma, naahittikiheriwa oCanada! Nto kaahithanliwa okhala mutokweene onihoolela efeliyaali. Keera kireneene iyaakha 34 paahi, kaahimupuxerya Munna Knorr wira “Miyo kootepa oyeva”. Masi owo aahikiroromeliha. Nto okhuma woopaceryani, kaaneererya waakoha anna aalupale, yaasuwela itthu sinceene oBetheli kihinatthi opaka yoothanla yuulupale.

OBETHELI—NIPURO NA WIIXUTTA NI WIIXUTTIHA

Orumeela oBetheli wookiphwanyiha eparakha ya wiixuttihiwa ni anna akina. Miyo kaanaattittimiha vanceene anna akina yiirela mpantta nikhuuru na Ekomisau Enihoolela Efiliyaali. Nave kihiixuttihiwa itthu sinceene sooloka ni imiya sinceene sa maKristau alopwana ni athiyana—amiravo ni owunnuwela—yaawo atonko ahu ovarana muteko hoothe ofiliyaali hata miloko soovirikana sivinre ahu.

Orumeela oBetheeli wookiphwanyiha eparakha ya waaxuttiha ni waalipiha atthu akina. Murummwa Paulo aahimuleela Timootheyo wira: “Vano nyuwo mulipiheryeke sothene sixuttalyanyu”. Aahimuleela-tho wira “Ikekhai sikíwalyanyu kihimyaka oholo w’atthu anjene, mwahimerye atthu òroromeleya, ansuwela owixuttiha atthu akina-tho”. (2 Tim. 2:2; 3:14) Okathi mukina Anna annikikoha wira etthu xeeni yiixuntte aka muhina mwa iyaakha iya 57 sivirinhe aka kirumeelaka oBetheli. Waakhula waka ti wookhweya kiniira “Mweemererye khula etthu nikhuuuru na Yehova nnoorumaayani ovara ni muroromeleke nikhaliheryo nawe”.

Vanikhala ntoko nsuri, nihiku nenle kaari aka oowuuliwa muru ni kahaasuwela aka etthu kiphiyaka oBetheli. Iyaakha iya sotheene tthiri Yehova ‘onnikivarela moono aka woolopwana’. Vanceenexa mwaha wa oreera murima wa anna yaawo annikhaliherya khula okathi, nto ninnoona wira Yehova onninihimeerya wira: “Muhové: ti miyo kinokhaliheryani”.​—Yes. 41:13.

[Inoota]