‘Mumphenteke Yehova Muluku Anyu’
“Mwaphenteke Apwiya Muluku anyu ni murim’anyu wothene n’iroho anyu yothene n’usuwela wanyu wothene”.—MATH. 22:37.
MUNIROWA WAAKHULA SAI?
Onitaphulela exeeni omphenta Muluku?
Xeeni vanitthuneya ahu omphenta Yehova?
Moota xeeni ninrowa ahu wooniherya omphenta wahu Yehova Muluku?
1. Xeeni ophentana wa Muluku ni Mwanawe oryaaya wuulupale?
MWAANA a Yehova, Yesu Kristu, aahimmye so: “Miyo kinnaphenta Atithi”. (Yoh. 14:31) Yesu aahihimya-tho so: “Atithi annimphenta Mwana”. (Yoh. 5:20) Eyo khenivila wiiwexexa. Tthiri, okhuma khalai Yesu ohinatthi orwa elapo ya vathi, ‘aninvarela muteko’ Muluku. (Mir. 8:30) Okathi Yehova ni Yesu yaavara aya muteko hoothe, Mwaana ahiixutta itthu sinceene voohimya sa mikhalelo sa Atithi awe, nto eyo yaanimwiiriha waaphenta vanceene. Tthiri wataana iwo okathi munceene wookumiherya ophentana iwo wuulupale.
2. (a) Exeeni enihimmwa okhala omphenta mutthu? (b) Makoho xeeni anirowa waakhuliwa muru ola?
2 Omphenta mutthu onihela muhina muupuwelo ni moonelo voohimya sa mutthu owo oniphentiwa. Nasaalimo Davidi iipale so: “Apwiya! Miyo kinnophentexani: Nyuwo mòkivaha ikurù”. (Esal. 18:2) Nto ola ti moonelo onireerela ahu okhalana voohimya sa Muluku, okhala wira owo onniniphenta hiyo. Akhala wira hiyo nnoomwiiwelela Yehova, owo onirowa oniphentaka. (Mmusome Otumererya 7:12, 13.) Masi hiyo ninrowa omphenta sai Muluku nihiweryaka omoona? Onitaphulela exeeni omphenta Yehova? Xeeni vanitthuneya ahu omphenta Yehova? Nto ninrowa wooniherya sai omphenta wahu?
XEENI VANITTHUNEYA AHU OMPHENTA MULUKU?
3, 4. Xeeni vanihimmwa aya wira vanniweryaneya omphenta Yehova?
3 ‘Muluku munepa’; tivo vahiniwerya ahu omoona. (Yoh. 4:24) Hata vari siiso, vanniweryaneya omphenta, ni Biibiliya onnitumererya wira hiyo nimphenteke. Mwa ntakiheryo, Moise ahaaleela aIsarayeeli so: “Mwaphenteke Apwiya Muluku anyu ni murim’anyu wothene n’iroho anyu yothene n’ikuru sanyu sothene”.—Otum. 6:5.
4 Xeeni vanitthuneya ahu omphenta vanceene Muluku? Okhala wira owo onipattuxale ni yoophavela ya omurumeela yoowo ni oonipaka wira niweryeke wooniherya ophenta. Vaavo vanimurumeela ahu Muluku mwa enamuna yookhalela, omphenta wahu onnincerereya ni ninnikhalana mathowa manceene anniiriha ohakalala. Yesu aahimyale so: “Òreriwa t’ale ari amasikhini murohoni mwaya, okhala wira Omwene wa wirimu ti wawaya”. (Math. 5:3) Voohimya sa ele atthu anceene aniihaniha aya okhala ephattu ya apinaatamu ophavela waya okokhorela etthu, eliivuru Man Does Not Stand Alone, ya A. C. Morrison, enihimya so: “Hiyo ninnitikinihiwa vaavo vanoona ahu wira apinaatamu otheene annaavya waamini wira yookhala etthu enitthuneya okokhoreliwa”.
5. Ninsuwela sai wira omphavelasa Muluku khahiyo etthu ya ethiru?
5 Niireke omphavelasa Muluku etthu ya ethiru? Nnaari, okhala wira owo oniphavela wira hiyo nimphwanye. Murummwa Paulo, aahiiwanyeiha oratteene okathi aalaleerya awe atthu yaathukumanne wAreopago, nipuro nnooneya etemplo ya Pártenon, muluku mwaamuthiyana a atthu a wAthena a khalai. Nkahaya muupuwele, nyuwo munari vaavo, okathi Paulo aalavula awe voohimya sa Muluku “opattunxe olumwenku ni sothene siri memmo”, nuumala-vo kiyatthokiherya wira Owo “khankhala empa etekiwe n’atthu”. Murummwa owo aahihimya-tho wira: “Mwa mutthu mmosaru Muluku ahakumiha atthu a maloko othene, khwakhaliha mulaponi mothene mwa vathí, ehinatthi atthu okhala, ahathanlela okathi aya ni mikano sa mapuro mwarowaya okhalaka, ahìra siso, wira atthu emphaveleke Muluku, yìlipiheryeke wira emphwanye, tthiri Muluku khankhala ottaiwene ni hiyo”. (Mit. 17:24-27) Tthiri apinaatamu anoowerya omphwanya Muluku. Anamoona a Yehova anivikana imilyau 7.5 ‘amphwanya Muluku’—ni annimphenta tthiri.
ELE ENITAPHULELA AYA OMPHENTA MULUKU
6. Yooruma xeeni Yesu aahimmye awe okhala “yulupalexa ni yopajerya”?
6 Omphenta wahu Yehova ohaana okhuma vamurimani vahu. Yesu aahiiwanyeiha saana mwaha owo vaavo aamwakhula awe mFarisi yoole aamukonhe so: “Mwixuttihi, mwa soruma sothene yulupalexa pivi?” Nto Yesu aakhunle so: “‘Mwaphenteke Apwiya Muluku anyu, ni murim’nyu wothene, n’iroho anyu yothene, n’usuwela wanyu wothene’. Ela ti yoruma yulupalexa ni yopajerya”.—Math. 22:34-38.
7. Onitaphulela exeeni omphenta Muluku ni (a) “murima ahu wotheene”? (b) “n’iroho ahu yothene”? (c) “n’usuwela wahu wothene”?
7 Anitaphulela exeeni masu a Yesu oowi nihaana omphenta Muluku ni ‘murima ahu wothene’? Owo aaphavela ohimya wira hiyo nihaana omphenta Yehova ni murima ahu wa ntakiheryo wotheene, eyo enihela muhina sootthuna, muupuwelelo ni moonelo ahu. Hiyo nihaana-tho omphenta “n’iroho yothene” wala ekumi ni emutthu ahu yotheene. Ohiya-vo, hiyo nihaana omphenta Muluku “n’usuwela wothene” wala muupuwelo ahu wotheene. Sotheene iyo sinooniherya wira hiyo nihaana omphenta Yehova moomalela.
8. Omphenta Muluku moomalela onrowa onikhaliherya opaka exeeni?
8 Akhala wira hiyo ninnimphenta Muluku ni murima, ekumi ni muupuwelelo ahu wotheene, ninrowa okhala alipa oosoma Nuulumo nawe mwa nthiti, wiiwelela ni murima ahu soolakela sawe ni olaleya mwa nthiti ihapari sooreera sa Omwene. (Math. 24:14; aRom. 12:1, 2) Omphenta Yehova mwa ekeekhai onrowa oniiriha omwaattamela owo. (Yak. 4:8) Tthiri, hiyo khanniwerya waalikelela mathowa otheene anniiriha omphenta Muluku. Hata vari siiso, nrowe nithokorerye mathowa vakhaani anniiriha omphenta.
ELE ENNIIRIHA OMPHENTA YEHOVA
9. Xeeni vanitthuneya ahu omphenta Yehova yoowo ori Mpattuxa ni Namakhaliherya ahu?
9 Yehova mpattuxa ahu ni Tonnikhapelela. Paulo aahimmye so: “hiyo nokhalana ekumi mwa yowo, ninnetta mwa yowo, nokhala mwa yowo”. (Mit. 17:28) Yehova oonivaha elapo ya vathi wira nikhaleke. (Esal. 115:16) Owo onninivaha-tho yoolya ni itthu sikina sinitthuneya wira nivikanihe okhala akumi. Ti maana aya, Paulo aahimeryale awe atthu ale yaakokhorela ilatarato oListra wira: “Muluku mukumi, . . . arimwiraru siso, ahiwoniherya mahiku othene orera wawe murima, awirelaka sorera: tthirí osulu oryawe, onnorupihelani epula, onnovahani sohepha okathi aya, onnoruwerihani solya, onnosarihani otteliwa murima”. (Mit. 14:15-17) Nto awo khahiyo mathowa aniphiyerya oniiriha omphenta Mpattuxa ahu Muulupale ni Namakhaliherya ahu oophenta?—Mus. 12:1.
10. Nooneleke sai marehereryo a Muluku a onoopola yoottheka ni okhwa?
10 Muluku oopaka malokiheryo wira hiyo noopoliwe yoottheka ni okhwa weiwo oravihiwe ahu ni Adamu. (aRom. 5:12) Mwekeekhai “Muluku ònithonyerya khuluwi oniphenta wawe, tthiri Kristu ònikhwela hiyo, varyahu nlelo anatampi”. (aRom. 5:8) Moohaaniherya, murima ahu onnisareya ohakalala vaavo vanisuwela ahu wira owo oopaka marehereryo wira hiyo nileveleliwe itampi sahu akhala wira nnoottharuwa ni ororomela yoowoopola ya Yesu.—Yoh. 3:16.
11, 12. Mwa enamuna xeeni Yehova onnivaha awe nlipelelo?
11 Yehova ‘onninivaha nlipelelo, nenlo ninnisarya otteliwa murima ni murettele’. (aRom. 15:13) Nlipelelo ninvahiwa ahu ni Yehova, ninninikhaliherya oxintta sooweeha. MaKristau oowoottihiwa yaawo anrowa okhala ‘òroromeleya mpakha okhwa, anotthuveliwa ni ekumi wirimu’. (Wis. 2:10) Ale anirowa ovikaniha okhala oororomeleya animwaakhela mareeliho ahinimala mParayiisu olumwenku wotheene. (Luk. 23:43) Nooneleke sai sooleiheriwa iyo? Khannisareya ohakalala, murettele ni omphenta Muluku yoowo onnivaha “sovahiwa sothene sorera”?—Yak. 1:17.
12 Muluku onninivaha nlipelelo na ohihimuxiwa wa atthu. (Mit. 24:15) Hiyo, tthiri ninniriipiwa murima vaavo ninkhweliwa ahu ni ole onimphenta ahu, masi mwaha wookhalana nlipelelo na ohihimuxiwa anamukhwa, ‘khanniripiwa murima ntoko sinripiwaya atthu akina ahinroromela’. (1 aTes. 4:13) Mwaha wa niphento nuulupale, Yehova oolakela waahihimuxa atthu ookhwa, otepexa wene ale ari oororomeleya ntoko Yobi. (Yob 14:15) Mmananihe wuupuwela ohakalala onirowa okhumelela vaavo vanirowa aya waakheliwaka alipa oohihimuxiwa wira atthikele okhala akumi valaponi. Tthiri mirima sahu sinnisareya omphenta Tiithi ahu a wiirimu, yoowo onnivaha nlipelelo noohakalaliha na ohihimuxiwa wa atthu!
13. Etthu xeeni enooniherya wira Muluku onniniphenta tthiri?
13 Yehova onninikhapelela tthiri. (Musome Esalimo 34:7, 19, 20; 1 Pedru 5:6, 7.) Mwaha wa osuwela wira Muluku ahu oophenta ori oolikaneene khula okathi wira aakhaliherye atthu otheene animuroromela, onniniiriha okhala oovareleleya ntoko ‘ipwittipwitthi sa nikoto nawe’. (Esal. 79:13) Mwa sotheene, oniphenta wa Yehova onirowa wooneya oratteene mwa ele enirowa awe opaka Moomweneni wa Mesiya. Nuumala Mwene oothanliwa, Yesu Kristu, omala-maliha ohaawa, ohaaxana ni itthu sootakhala, apinaatamu owiiwelela anirowa oreelihiwa ni murettele ohinimala ni mmaaleleyo. (Esal. 72:7, 12-14, 16) Nto nyuwo khamunikupali wira sooleiherya iyo sinninivaha mathowa wira nimphenteke Muluku ahu ni murima, ekumi, ikuru ni osuwela wahu wotheene?—Luka 10:27.
14. Eparakha xeeni yuulupale Muluku onivanhe awe?
14 Yehova oonivaha eparakha ya okhala Anamoona awe. (Yes. 43:10-12) Hiyo ninniphenta Muluku mwaha wa onivaha eparakha ya okhaliherya ehakhi awe ni olaleya nlipelelo na ekeekhai olumwenku ola wootakhala. Ohiya-vo, hiyo ninnilavula ni nroromelo ni okupaleela okhala wira ninlaleya ihapari isya sinikhuma muNuulumoni na Muluku, yoowo sooleiherya sawe sotheene sinaakhwanela. (Mmusome Yoxuwa 21:45; 23:14.) Masi, aakhala mareeliho manceene a Yehova anniiriha omphenta vanceene. Nto ninrowa wooniherya sai omphenta wahu Yehova?
NINROWA WOONIHERYA SAI WIRA NINNIMPHENTA MULUKU?
15. Moota xeeni osoma ni ovarihela muteko Nuulumo na Muluku okhanle aya oonikhaliherya?
15 Musomeke ni ovarihela muteko Nuulumo na Muluku. Wira siiso onimooniherya wira ninnimphenta Yehova ni wira ninniphavela wira nuulumo nawe nikhale ‘muthuko onnettiha’. (Esal. 119:105) Vaavo sinnikhumelela aya mixankiho, hiyo pooti ophwanya yoomaaliha enikhuma mu yoolaiherya ela yoophenta eni: “Apwiya! Muhinyoholé murima wophweya ni wowiyeviha”. “Vano nyuwo, Muluku, mokilipiha n’ukiphenta wanyu. Ovelavela n’uxanka wahìniha murim’aka, vano nyuwo mokihakalaliha, khukitteliha murima”. (Esal. 51:19; 94:18, 19) Yehova onnaamorela ikharari ale anihaawa, ni Yesu onniwoonela othunku atthu. (Yes. 49:13; Math. 15:32) Yoosoma ya Biibiliya enoononiherya oratteene ophenta wa Yehova, nto eyo enooniiriha omphenta nave owo.
16. Moota xeeni onvekela Yehova moohihiyererya oninnuuherya aya omphenta wahu Muluku?
16 Munvekeleke Muluku khula nihiku. Mavekelo ahu anniniiriha omwaattamela ole ‘oniwiwa ale aninvekela’. (Esal. 65:3) Vaavo vanisuwela ahu wira Muluku onnaakhula mavekelo ahu, omphenta wahu onnincerereya. Mwa ntakiheryo, hiyo ninniwerya woona wira khasinikhumelela soweeha sihiniwerya ahu oxintta. (1 aKor. 10:13) Akhala wira nookhalana mixankiho nto khiyanvekela Yehova nimuroromelaka nnoophwanya “murettele wa Muluku”. (aFil. 4:6, 7) Okathi mukina, hiyo pooti opaka mavekelo ohiiwanyeya ntoko Nehemiya, nto khiyoona wira awo anaakhuliwa. (Neh. 2:1-6) Vaavo ‘vanilipiherya ahu olompa’ ni osuwela wira anaakhuliwa ni Yehova mavekelo awo, ophenta wahu onirowa wunnuwa ni omuroromela wahu onirowa onikhaliherya owanana mixankiho.—aRom. 12:12.
17. Akhala wira ninnimphenta Muluku, ninrowa woonelaka sai orowa omuthukumanoni?
17 Mukhalane yoolema ya orowa mithukumano sa mmulokoni, asembeleya ni kongresu. (aHéb. 10:24, 25) AnaIsarayeeli yaanithukumana wira awiriyane ni wiixutta voohimya sa Yehova wira amooveke ni wiiwelela Nlamulo nawe. (Otum. 31:12) Eyo khahiyo etthu yoovila ekhanle ahu omukhupanya Muluku akhala wira ninnimphenta tthiri. (Mmusome 1 Yohani 5:3.) Ti maana aya, vahinitthuneya ahu opeepheihaka mithukumano sahu. Hiyo khanniphavela weemererya wira ekhumelele etthu enirowa oniiriha oyeleela omphenta wahu Yehova woopacerya.—Wis. 2:4.
18. Omphenta wahu Muluku onrowa onikhaliherya opaka exeeni voohimya sa ihapari isya?
18 Oluttuweliwa waalaleerya “ekhweli y’Ehapari Yorera” atthu akina. (aGal. 2:5) Omphenta wahu Muluku onooniiriha olaleya Omwene wa Omesiya onirowa olamuleliwaka ni Mwaana oophentiwa a Muluku, yoowo onrowa ‘owanela ekekhai’ okathi wa Harmagedoni. (Esal. 45:5; Wis. 16:14, 16) Tthiri ninnihakalala vaavo vaniirela ahu mpantta muteko woowaapaka awiixutti, naakhaliheryaka atthu omusuwela Muluku oophenta ni yoolaiherya awe ya elapo esya!—Math. 28:19, 20.
19. Xeeni vanitthuneya ahu oxukhurela marehereryo a Yehova a waakhapela atthu awe?
19 Mooniherye oxukhurela marehereryo a Muluku a waakukhula atthu awe. (Mit. 20:28) Axitokweene a eKristau yoovaha ya Yehova, yoowo oniphavela onikhaliherya khula okathi. Axitokweene ari ntoko “ntthyawelo okathi onòpaya epheyo yorirya, okathi onrupaya epula ya mwanamukhaya, anolikana ni màsi anvira nipuro nowuma, ni muttutthi worirya nihiku novihexa”. (Yes. 32:1, 2) Tthiri khuuvo ahaarowa osiveliwa okhalana ntthyawelo okathi wa epheyo yuulupale wala yooriirya! Vaavo vanivya ahu ni nsuwa, vanninisivela ophwanya muuttutthi wa mwiri muulupale. Malikanyiho ala anninooniherya wira axitokweene anninivaha nikhaliheryo na omunepani ni nimaaliho okathi wooreerela. Vaavo vaniwiiwelela ahu ale annihoolela, ninnooniherya oxukhurela wahu soovaha sa Muluku ni wooniiherya wira ninnimphenta Muluku ni Kristu yoowo okhanle Muru wa muloko.—aÉf. 4:8; 5:23; aHéb. 13:17.
NVIKANIHE WUNNUUHERYA OMPHENTA WANYU MULUKU
20. Akhala wira munnimphenta Muluku, munrowa waakhwaniherya sai yooruma eri mu Yakobo 1:22-25?
20 Akhala wira nyuwo munnimphenta Yehova, nto nyuwo munrowa ‘wettela masu awe ohiya paahi owiriyana’. (Mmusome Yakobo 1:22-25.) Ole “oneettela masu”, ookhalana nroromelo nenlo ninkumiherya nthiti na olaleerya ni orowa mithukumano sa mmulokoni. Akhala wira nyuwo munnimphenta tthiri Yehova, munrowa ophavela wiiwelela ‘soruma sorera’, seiyo sinihela muhina itthu sotheene sinniruma awe Yehova.—Esal. 19:8-12
21. Anilikanyihiwa ni exeeni mavekelo anipaka anyu ni murima wotheene?
21 Omphenta wanyu Yehova Muluku, onoowiirihani ovikanihaka onvekelaka ni murima wotheene. Olavulaka sa opahiwa erupani moovarihana ni Nlamulo na wataana, nasalimo Davidi iipale so: “Ovekela waka olikane ni erupani entthuwa oholo wanyu: matat’aka òvenxiwa elikaneke ni mukuttho wa makáripi”. (Esal. 141:2; Okh. 30:7, 8) Vaavo vanipaka anyu mavekello mowiiyeviha, oxonttela wekeekhai, ni munavekela ni masu oovara murima, aninvuwiha Muluku, nto awo anrowa okhala ntoko muhiriri wooreera wa erupani, eyo ethoonyeryo yoowi mavekelo awo toweemerereya wa Muluku.—Wis. 5:8.
22. Niphento na mukhalelo xeeni ninrowa ahu otthokorerya mwaha onitharelana?
22 Yesu aahimmye wira nihaana omphenta Muluku ni namwaattamanana ahu. (Math. 22:37-39) Okathi onirowa ahu othokorerya soohimmwa sikina sa mwaha ola, omphenta wahu Yehova ni malamulo awe onoonikhaliherya waakhapelela mwa enamuna yooloka apinaatamu akwiihu ni waaphenta ale yaattamanne ahu.