MWAHA WOOPACERYA | NIIREKE MULUKU ONNIWOONANI OKHALA A FAITA?

Muluku Onnisuwela Ele Eri Vamurimani Vanyu

“Apwiya! [Yehova] Nyuwo motokosa murim’aka, mokisuwela”.​—ESALIMO 139:1.

XEENI ATTHU AKINA ANIHOVERYA AYA? Anamunceene anuupuwela wira Muluku oniwoona atthu ntoko anamattheka paahi, atthu oohiloka ni ahiniphwanela othokoreriwa. Muthiyana oniitthaniwa Kendra, aaniriipiwa murima uupuwelaka wira khaawerya opaka etthu yooloka moovarihana ni malamulo a Muluku. Nto mwaha wa yeeyo, owo ‘aahihiya ovekela’.

ELE BIIBILIYA ONIIXUTTIHA AWE: Yehova khoniweha ohimalela wanyu. Masi oniweha ele eri vamurimani vanyu. Biibiliya onihimya so: ‘Owo onnisuwela orattene mùpeliwo ahu: onnisuwela wira hiyo ná ntthupi pahi’. Nto Muluku khonicalela “itampi sahu”, masi oninlevelela okathi ninttharuwa ahu.​—Esalimo 103:10, 14.

Moone ntakiheryo na mwene Davidi, oromoliwe mmwaha woopacerya. Onvekelaka Muluku, aahimmye so: “Maitho anyu yahikòna kihinatthi oyariwa. Mahiku othene yarowaka ovira yahilempwa mulivuruni mwanyu . . . Muluku! Mutokose murim’aka, musuwele”. (Esalimo 139:16, 23) Davidi aanisuwela wira hata aatthenke vanceene, Yehova aarowa oweha murima awe woottharuwa.

Yehova onnoosuwelani saana ovikana ele apinaatamu anipaka aya. Biibiliya oni: “Atthu anona erutthu, masi Apwiya aniweha murima”. (1 Samuweli 16:7) Muluku onnisuwela mukhalelo anyu, eyo piiyo, mayareliwo, moota munnunwe anyu, miyuupuwelo sanyu, ni omutthu anyu wotheene. Owo onniweha ni ovaha efaita wiimananiha wanyu wira mukhalane mweettelo wooloka, nnaamwi nvonyaka okathi mukina.

Nto, moota xeeni Muluku onirumeela awe osuwela wawe wuulupale wa ‘omutthu anyu’ wira ookhaliheryeni?