Nyuwo Anamuyari Mwaakukhuleke Aniinyu

“Musuwele orattene makhalelo a ipwittipwitthi sanyu”.​—MIR. 27:23.

MWAAROWA WAAKHULA SAI?

Anitaphulela exeeni masu oowi anamuyari anikhala ntoko amakampusi?

Exeeni enrowa waakhaliherya anamuyari waalyiha anaaya yoolya ya omunepani?

Etthu xeeni yaasivenle amiravo anceene voohimya sa omulompa Muluku vatthokoni?

1, 2. (a) Miritti xeeni saarina aya amakampusi wIsarayeeli khalai? (b) Mwa inamuna xeeni anamuyari anilikana aya ni amakampusi?

MUTEKO wa makampusi wIsarayeli khalai waari woovila ni wooxankiha. Awo yaahaana ovilela oriirya ni oviha, ni yaahaana waakiherya inama saya wira sihivarakasiwe ni inama wala anawiiye. Amakampusi yaanivarerya saana ipwittipwitthi saya wira yoone ele yaatthuneya olooliwa wala yaawereiwa. Awo yaanakhapelela mooreerela axaana okhala wira awo khiyaarina ikuru sirina aya ipwittipwitthi suulupale.​—Maph. 33:13.

² Mwa inamuna sinceene, anamuyari ari maKristau annilikana ni amakampusi, ahaana okhalana makhalelo ooloka ntoko makampusi a ipwittipwitthi. Awo aakhalana muritti wa waahuwa anaaya ‘awettihaka ni yalakaka n’ikano sa Yehova’. (aÉf. 6:4) Nto niireke owo muteko wookhweya? Nnaari! Anamwane mahiku ala annilupatthiwa vowoopiha ni Satana ni anniwanana sootteettheya saya mwaha wa okhala atthu oohimalela. (2 Tim. 2:22; 1 Yoh. 2:16) Vakhala wira nyuwo mookhalana anamwane, nto munrowa waakhaliherya sai? Nrowe nithokorerye itthu tthaaru mukhanle anyu oopaka wira mwaakukhule; eyo piiyo, mwaasuwele aniinyu, mwaalyihe aniinyu ni mwaalakiheryeke aniinyu.

MWAASUWELEKE ANIINYU

3. Wa anamuyari, anitaphulela exeeni masu oowi ‘musuwele orattene makhalelo’ a aniinyu?

³ Makampusi ooloka, onnivarerya ipwittipwitthi sawe wira oone saari sikumi. Nyuwo muhaana waakhapelela mwa enamuna eyo aniinyu. Biibiliya onihimya so: “Musuwele orattene makhalelo a ipwittipwitthi sanyu”. (Mir. 27:23) Wira nwerye opaka eyo, nyuwo munitthuneya osuwela ele aniinyu enipaka aya ni muupuwelelo aya. Nto munrowa owerya sai opaka eyo? Enamuna emosa ori okhalana yoolimalela ya ovaanela ni aniinyu awo khula okathi.

4, 5. (a) Malakiheryo xeeni oovareleya muteko akhanle oowaakhaliherya anamuyari owiiriha anaaya ohimya itthu siri vamurimani vaya? (Nwehe elatarato yoopacerya.) (b) Etthu xeeni epanke anyu wira mooneke okhweya olavulihana ni aniinyu?

⁴ Anamuyari akina annoona wira ti voovila olavulihana oratteene ni anamwane vaavo vaninnuwa aya, okhala wira awo annipacerya wuuliwa muru nto khiyoovelela ohimya ele eri vamurimani vaya. Vakhala wira mwaninyu onnipaka eyo, nto nyuwo munrowa wira sai? Ohiya omukhanyererya mwaninyu owo mwaamuthiyana wala mulopwana wira wooleelekeni sotheene sinitthuna anyu osuwela mukwaha mmosa paahi, mweererye ovaanelana moohimukhanyererya vaavo vanikhumelela aya okathi wooreerela. (Otum. 6:6, 7) Mwiimananihe oviriha okathi munceene nvaraka muteko ni aniinyu. Mwaakuxeke wira mwapasiyari, weetta mukwaha ni ekaaro, ompaka xooku, wala ovara muteko mukina wa vatthokoni muryeene hoothe ni aniinyu awo. Okathi owo pooti okumiherya makhalelo oreerela anirowa waakhweiherya amiravo otthukula murima aya ni ohimya ele enuupuwela aya.

⁵ Ankhi vakhala wira nyuwo munnipaka itthu iyo sotheene masi mwaninyu khiyavikaniha ohitthuna olavula? Nyuwo muhaana weererya enamuna ekina enireerela. Mwa ntakiheryo, ohiya omukoha mwaninyu mwaamuthiyana itthu simwiiranenle nihiku nlo, nyuwo pooti omuleela itthu siwiiranenleni. Woonasa wene, owo onrowa opacerya ohimya ele emukhumelenle nihiku nlo. Wala mwaaphavelaka osuwela moonelo awe mwaninyu voohimya sa mwaha mmosa, mmukoheke mwa enamuna yoohimululuwanya mwaninyu owo mwaamuthiyana. Nyuwo pooti omukoha so, apatthani anyu anoonela sai mwaha ola. Nuumala-vo pooti omukoha-tho muriki, miruku xeeni saarowa anyu waavaha apatthani anyu mmwaha ola.

6. Onitaphulela exeeni okhala mutthu ookhweya olavulana?

⁶ Masi, wira aniinyu awerye ohimya itthu siri vamurimani vaya, awo ahaana woonaka wira nyuwo munniphavela tthiri owiriyana ni okhala ookhweya olavulana. Vakhala wira anamuyari annooniherya wira khareere waatteliwa miteko vahinaweryaneya olavulaniwa, anamwane annikhittelela mixankiho saya okhala wira khanimoona mutthu oomuleela. Nto onitaphulela exeeni okhala mutthu ookhweya olavulana? Eyo enihela muhina itthu sinceene ohiya paahi ohimya wira, “khula okathi munikhalana anyu muxankiho mukileeleke”. Aniinyu ahaana woona wira nyuwo munnivaha efaita mixankiho saya ni munnaakhapelela tthiri. Anamuyari anceene annivaha ntakiheryo nooloka voohimya sa mwaha ola. Kayla yoowo orina iyaakha 19 onihimya so: “Miyo kinniwerya omuleela paapa aka khula etthu enikixankiha. Owo khonikivaanyiha, ni khonikiphukela, tthiri onnikiwiriyana saana. Khula okathi onniwerya okivaha miruku sooloka”.

7. (a) Enamuna xeeni yookhalela anamuyari akhanle aya otthara okathi onilavula aya sa wuuryana wa anaaya? (b) Vaniweryaneya sai anamuyari waanyoonyiha anaaya hata ahilakelaka?

⁷ Hata okathi onilavula anyu myaha sowaakuva okumiherya ohiiwanana ntoko wuuryana wa amiravo, mukhalane ephoole wira muhimakeleke waaleela itthu sookhoottihiwa mpakha oliyalela waavaha miruku sookhalela sinivarihana ni mwaha owo. Mwa ntakiheryo: Mwaakhanle wira muronwe nipuro nintumihiwa yoolya yoowapeiwa, nto okathi oniweha anyu yoolya eyo munaphwanya alempwale ene masu ani khula yoolya ti yoohapala. Woonasa wene nyuwo mwaamukhuma opuro owo wira mwaavyeke nipuro nikina nooreerela olya. Aniinyu nave pooti opaka etthu emosaru, vakhala wira annoorwa woovekelani miruku nto nyuwo khiyaapwapwela khula okathi. (Mmusome aKolosi 3:21.) Ohiya-vo mmananiheke okhala mutthu ookhweya olavulana. Murokora mmosa mwali oniireliwa Emily onihimya so: “Okathi anamuyari aka anikilakiherya aya voohimya sa wuuryana, awo khanilavula mwaha owo ntoko etthu yootakhala okhala wene. Awo annittittimiherya ohakalaliha waya omusuwela mutthu ooreerela othelana. Eyo yookikhaliherya waaleelaka khula etthu enikikhumelela. Tthiri khula okathi onikhumelela awe mutthu onikuurya nkinaavitherya etthu anamuyari aka”.

8, 9. (a) Mireerelo xeeni sinikhumelela vakhala wira anamuyari annaawiriyana anaaya moohaavanyiha? (b) Yowiiraneya xeeni yoohakalaliha erina anyu mwaha wa waawiriyana oratteene aniinyu?

⁸ Moovarihana ni ele ehimmye awe Kayla, nyuwo muhaana wooniherya wira mutthu ookhweya olavulana ni oopixa murima ni aniinyu. (Mmusome Yakobo 1:19.) Mayi mmosa oohitheliwa oniireliwa Katia onihimya so: “Khalai, miyo nkaawerya olavulana mwanaka mwaamuthiyana moopixa murima. Nkaawerya onwiriyana mpakha omaliha ele yaahimya awe. Miyo kaakhala ookhulumuwa vanceene ni nkaaphavela onyoonyihiwa ni mutthu mukina. Nuumala oturuka makhalelo aka awo, nto mwanaka nave ooturuka makhalelo awe. Mahiku ala ninniiwanana saana”.

⁹ Tiithi mmosa oniireliwa Ronald yaahimukhumelela etthu yoolikana ni eyo. Owo onihimya so: “Vaavo mwanaka waakihimenrye awe wira aahipacerya osivelana ni mmiravo mmosa oxikola, miyo kaahisareya owali vanceene. Masi okathi waapacenrye aka wuupuwelela moota Yehova sinikhala awe oopixa murima ni arumeyi awe, kaahoona wira vaamuloka miyo onvaha okathi mwanaka ole wira ohimye ele yaari vamurimani vawe kihinatthi opacerya omulaka. Vano kinnihakalala okhala wira kaahiwerya opaka eyo! Tthiri ole waari okathi woopacerya kaawenrye aka osuwela muupuwelelo wa mwanaka ole. Nuumala owo omaliha olavula, nto vaahikikhweyerya onvaha miruku mwa enamuna yoophenta. Nave owo ahaakhela mooreerela miruku iye. Owo aahihimya wira aarowa ottharuwa mweettelo owo woohiloka”. Olavulana moohihiyererya aniinyu onimoovahani eparakha yuulupale ya osuwela muupuwelelo ni moonelo aya. Eyo enimookhaliheryani waavaha malakiheryo ooloka anrowa aya ottharaka mweekumini mwaya.a

MWAALYIHEKE ANIINYU

10, 11. Munrowa waakhaliherya sai aniinyu wira ahithweelelihiwe?

¹⁰ Khula makampusi ooloka onnisuwela wira khula epwittipwitthi ya nikoto nawe pooti okhumela ota wa nikoto. Owehasa wene eyo pooti ovariwaka murima ni munyepu wooripelela ori sivaavale nto khiyaweha munyepu mukina ori ottaiwene, khiyapacerya orowa ottaiwene wa nikoto nlo. Mwa enamuna emosaru, mwanamwane pooti ohapuxiwa vakhaani-vakhaani onakela ephiro yootakhala, mwaha wa wataana ni atthu oohiloka wala orumeela inamuna sa otthekula soohiloka. (Mir. 13:20) Munrowa okhoottiherya sai makhalelo awo okhumelela vatthokoni vanyu?

¹¹ Okathi oniwiixuttiha anyu aniinyu, mukhaleke oowaakuvela waakhaliherya vakhala wira munnoona etthu yoohiloka. Mmananihe olipiha makhalelo aya a eKristau arina aya, masi ahinikhalela aya nthiti. (2 Ped. 1:5-8) Okathi wa omulompa Muluku vatthokoni tokhanle wooreerela opaka eyo. Moophavela okhaliherya olokiherya eyo, Orummwa Ahu wa Omwene wa Outubro 2008, onihimya so: “Anamahoolela a imusi annilipihiwa wira avareke muteko aya avahiwe aya ni Yehova wa okhalana eprograma yooloka ya omulompa Muluku vatthokoni”. Niireke nyuwo munnittottela mureerelo marehereryo ala a Yehova wira mwaakukhule aniinyu? Mwaamini wira aniinyu annisiveliwa wiilipiherya wanyu wotheene wira mwaakhaliherye.​—Math. 5:3; aFil. 1:10.

12. (a) Moota xeeni amiravo anceene aphwannye aya mireerelo sinceene mwaha wa omulompa Muluku vatthokoni? (Muhele Muhina ekaaxa eni “Eyo Yanaasivela”.) (b) Mureerelo xeeni ophwannye anyu?

¹² Muthokorerye ele ehimmye awe mwali mmosa oniireliwa Carissa, voohimya sa moota aattottenle awe mureerelo Omulompa Muluku Vatthokoni. Owo onihimya so: “Vaanikisivela okilaathi ni emusi khiyavaanela. Okathi onipaka ahu eyo ninnilipihana ni ninnikhalana itthu sinirowa ahu wuupuwelaka moohakalala muhoolo. Paapa aka khonihiyererya niviraka nihiku nahu na omulompa Muluku vatthokoni. Tivoolipiha omoona moota onikhalela awe nthiti ni eyo ennikiiriha miyo nave okhalela nthiti. Eyo ennikiiriha-tho omuttittimiha ntoko paapa aka ni mukukhuli aka a omunepani”. Murokora mmosa yoowo orina iyaakha 23, oniireliwa Brittney onihimya so: “Omulompa Muluku vatthokoni wookiiriha miyo wataana vanceene ni anamuyari aka. Eyo ennikiiriha woona wira awo anniphavela tthiri okiwiriyana ni okikhaliherya ophuka mixankiho saka. Eyo ennikhaliherya emusi ahu okhala yoolipa ni yowiiraana”. Mpakha-va nihiiwexexa otthuneya waya waalyiha aniinyu yoolya ya omunepani, murumeelaka oratteene okathi woomulompa Muluku Vatthokoni okhala wira tekhanle enamuna yuulupale ya waakukhula aniinyu.b

MWAALAKIHERYEKE ANIINYU

13. Anitumereriwa sai anamwane wira amurumeeleke Yehova?

¹³ Makampusi ooloka onnikhalana ekopo enirumeela awe wira ohoolele ni waakiherya nikoto nawe. Yoolakela awe yoopacerya weettiherya ipwittipwitthi sawe oroihaka mapuro “òwatta munyepu”. (Ezek. 34:13, 14) Nyuwo anamuyari niireke yoolakela anyu ti yeeyo? Nyuwo munnaalakiherya aniinyu wira amurumeeleke Yehova. Tthiri nyuwo munniphavela wira aniinyu akhalane moonelo mmosaru aarina awe nasaalimu mmosa yoowo aalempe so: “Muluku aka! Wira otthuna wanyu t’unkisivela. Kinnettela ikano sanyu ni murim’aka wothene”. (Esa. 40:9) Amiravo arina muupuwelo woolikana ni owo annivahererya ekumi aya wa Yehova ni annibatiziwa. Ekeekhai wira ahaana opaka eyo okathi anrowa aya okhala aalupale, vaniwerya aya opaka soothanla ni okhalana yoolakela yooloka ya omurumeela Yehova.

14, 15. (a) Tiivi ekhanle yoolakela ya anamuyari yaawo ari maKristau? (b) Etthu xeeni ekhanle oomooceeliha mwaninyu owunnuwela weemererya okokhorela wa ekeekhai?

¹⁴ Vano munrowa opaka exeeni vakhala wira aniinyu anikhala ntoko khaninnuwa omunepani wala annikhootta omwaamini Yehova? Mmananihe waakhaliherya awo opacerya omphenta Yehova ni oxukhurela sotheene opanke awe wa awo. (Wis. 4:11) Nto waphiya okathi aya awo anoowerya opaka yoothanla voohimya sa omukokhorela Yehova Muluku.

¹⁵ Munrowa opaka exeeni vakhala wira mwaaninyu khoneemerya omurumeela Yehova? Munrowa waakukhula sai wira mwaakhaliherye woona efaita ya omurumeela Yehova ni wira eyo tekhanle enamuna enikumiherya ohakalala wa ekeekhai? Mmananihe osuwela ele enimwiiriha oheemererya ele enikupali anyu. Mwa ntakiheryo niireke mwaninyu owo khonaamini itthu sotheene siniixuttihiwa mBiibiliyani, wala ohinisuwela waatthokiherya apatthani awe ele enikupali awe? Niireke mwaninyu mwaamuthiyana onnisuwela tthiri malamulo a mBiibiliyani, wala onoona wira akina khanimphavela mwaha wa sookupali sawe?

16, 17. Mwa inamuna xeeni anamuyari akhanle aya oowaakhaliherya anaaya woonaka ekeekhai okhala yawaya?

¹⁶ Moohicikha etthu sa ele enimwiiriha mwaninyu oheemya ekeekhai nyuwo pooti omukhaliherya ovikana muxankiho owo. Moota xeeni? Malakiheryo ooloka anrowa waakhaliherya anamuyari ori ophavela osuwela ele mwaana owo enuupuwela awe amukohaka so: “Munoonela sai okhala muKristau? Mireerelo xeeni sinirowa anyu ophwanya mwakhala Kristau? Etthu xeeni eniwerya anyu oleva wira nwerye okhala muKristau? Nyuwo munoona wira itthu sinivekeliwa wira mutthu okhale muKristau ti soovila vanaamwi niphwanyaka mareeliho nenna-va ni ahimmwaka wira aakhala mareeliho makina muhoolo? Moota xeeni?” Masi muhaana opaka makoho ala murumeelaka masu anyu mwa enamuna yooreerela murima, oopatthaneya ni muhikhaleke ntoko munitokosa mulattu. Okathi onirowa anyu ovaanelaka nyuwo pooti othokorerya yoolepa ya Marko 10:29, 30. Amiravo akina pooti ophavelaka olepa ele enuupuwela aya alepaka iliinya piili, emosa enihimya ele enivekeliwa wira mutthu okhale muKristau, ekina ehimyaka mireerelo sinikhumelela. Oweha ele enirowa aya olepa vapapheloni pooti wookhaliheryani woona muxankiho orina aya ni waavya enamuna ya waakhaliherya ovikana muxankiho aya owo. Akhala wira hiyo ninnaasomiha atthu Biibiliya nirumeelaka iliivuru ntoko Biibiliya Oniixuttiha Exeeni ni ‘Omphenta Muluku’, nto khamunoona oreerela waaxuttiha nave aniinyu iliivuru iyo? Niireke nyuwo munnipaka eyo?

¹⁷ Waphiya okathi aya, aniinyu anoowerya opaka soothanla saya voohimya sa ole onirowa aya omurumeelaka. Muhuupuweleke wira aniinyu awo ekeekhai anrowa waamwela mmapeleni. Awo ahaana wiixuttihiwa wira yooneke ekeekhai okhala yawaya. (Mir. 3:1, 2) Vakhala wira munnoona wira mwaninyu khoniwerya opaka soothanla sooloka, xeeni vahinitthuneya aya otthikela omusomiha itthu seiye soopacerya sa Biibiliya? Mmukhaliherye mwaninyu owo wuupuwelela mmukohaka makoho ntoko ala: “Munrowa osuwela sai wira Muluku ookhala? Exeeni enikooniherya miyo wira Yehova Muluku onnikivaha efaita? Xeeni vanikupali aka wira malamulo a Yehova tthiri tooloka?” Mukhale mukukhuli ooloka mwaakhaliheryaka aniinyu moopixa murima wira alokiherye makhalelo aya ni woona wira omwiiwelela Yehova tekhanle ephiro yooloka otthara.c​—aRom. 12:2.

18. Moota xeeni anamuyari akhanle aya omutakiha Yehova, yoowo okhanle Mukukhuli Muulupalexa?

¹⁸ MaKristau otheene oororomeleya aniphavela omutakiha Mukukhuli Muulupale. (eÉf. 5:1; 1 Ped. 2:25) Anamuyari ahaana osuwela makhalelo a nikoto naya, eyo piiyo, anaaya, ni opaka sotheene aniwerya aya wira yaalakiherye wira aphwanye mareeliho a Yehova. Mwa inamuna sotheene mpake eniwerya anyu wira mwaahuwe ni yeemye ekeekhai!

[Inoota]

[Ekaaxa epaaxina 21]

Eyo Yanaasivela

Moone ikomentaario sa amiravo anli owunnuwela yaawo anilavula voohimya sa mureerelo aphwannye aya okathi wa omulompa Muluku vatthokoni.

“Omulompa Muluku vatthokoni onimookhaliheryani wiiraana ni emusi anyu vamosa ni Yehova. Mutthu onniwerya wiixutta itthu sinceene voohimya sa makhalelo awe omunepani. Onnimukhaliherya mutthu osuwela ele enireerela olokiherya”.

“Omulompa Muluku vatthokoni onninivaha eparakha ya khula mutthu ohimya ele enuupuwela awe ni omaliha ele enimuxankiha. Owo, okathi onihiya ahu wuupuwelela mixankiho sa khula nihiku wira nuupuwele itthu soomunepani. Okathi ohinimulompa ahu Muluku Vatthokoni ninnipweteiwa. Tthiri ala mareliho manceene!”