MWAHA WOOPACERYA | MUNOOWERYA OKHALA MPATTHANI A MULUKU

Niireke Munnipaka Ele Muluku Enoovekelaweni?

“Muhixanke, mukileele paahi ele eniphavela anyu, nto miyo kinimookhaliheryani”. Woonasa wene, khimwaarowa olavula masu awo wa mutthu ohinimusuwela anyu. Masi, mwaamulavula ohoolo wa mpatthani anyu. Okhala wene, apatthani eekeekhai annipaka ele anivekeliwa aya ni mukhwaaya.

Biibiliya onihimya wira Yehova onnipaka itthu mmureerelo wa arumeyi awe. Mwa ntakiheryo, Mwene Davidi yoowo aarina wataana wekeekhai ni Muluku, aahimmye so: “Apwiya, Muluku aka! Sotikiniha ni mirirya sinìrenlyanyu ti sulupale. . . . Kaphavela olaleya n’uvuwiha sothene seiyo: masi sinnikàttela, kihinawerya walikela”. (Esalimo 40:6) Ohiya-vo, Yehova onnaakhaliherya ale ahinimusuwela, ‘aavahaka solya, ni waasariha otteliwa murima’.​—Miteko 14:17.

Okhala wira Yehova onnimusivela opaka itthu sinaahakalaliha akina, nto ti vookhalela wira ale aniphavela okhala apatthani awe apakeke itthu ‘sinitteeliha murima awe’. (Miruku 27:11) Nto exeeni mukhanle anyu oopaka? Biibiliya onaakhula so: “Muhiliyalé owirela sorera akhw’inyu, mwakawelaka sirinanyu, mana mikuttho iyo ti sinimusivela Muluku”. (aHéberi 13:16) Masi niireke nnoomuhakalaliha Yehova niwiirelaka sooreera atthu ni waakawela sirina ahu paahi?

Biibiliya onaakhula so: “Khavo mutthu onwerya omusiveliha Muluku, ahaminiki”. (aHéberi 11:6) Tthiri, Abrahamu ‘aahikhalihiwa mpatthani a Muluku’ nuumala “òmwamini Muluku”. (Yakobo 2:23) Nave, Yesu Kristu aahittittimiherya wira nihaana ‘omwaamini Muluku’ wira naakhele mareeliho a Muluku. (Yohani 14:1) Nto munrowa okhalana sai waamini? Musomeke Nuulumo na Muluku, Biibiliya, voohihiyererya. Opaka eyo onimoophwanyihani ‘osuwela vomalela otthuna wawe’ ni wiixutta waasiveliha “Apwiya mwa itthu sothene”. Nave, mwancererya omusuwela wanyu saana Yehova ni weettela ele muniixutta anyu voohimya sa malamulo awe, waamini wanyu onimunnuwa nto Muluku onoowaattamelani.​—aKolosi 1:9, 10.