Owo ‘Aanisuwela Ephiro’

GUY HOLLIS PIERCE, Munna a Nikhuuru Noolamulela na Anamoona a Yehova, oomaliha muteko awe wa valaponi namanli, nihiku na 18 a Março 2014. Owo aarina iyaakha 79, okathi waakhwanihenrye awe yoolipelela awe ya ohihimuxiwa ni okhala munnawe Kristu oomunepani​—aHéb. 2:10-12; 1 Ped. 3:18.

Guy Pierce aayariwe muttetthe wa Auburn, California EUA, nihiku 6 a Novembro 1934, ni aabatiziwe mwaakha wa 1955. Owo aahaathela amwaarawe yaaphenta awe aniireliwa Penny, mwaakha wa 1977, ni aanikhapelela saana etthoko awe. Osuwela wawe okhapelela emusi awe waanooneya mmakhalelo awe ntoko tiithi. Mwaakha wa 1982, owo ni amwaarawe Penny yaanivarasa muteko wa opioneero, ni mwaakha wa 1986 owo aahikela muteko wa esirkwitu yoowo aavanre awe iyaakha 11 wEstados Unidos.

Mwaakha wa 1997, Guy ni Penny Pierce, yaahipacerya orumeela oBetheli ya wEstados Unidos. Munna Pierce aavara eDepartamento ya Muteko, ni mwaakha wa 1998, owo aahithanliwa orowa okhala namakhaliherya a Comissão de Pessoal ya Nikhuuru Noolamulela. Munna Pierce aahilaleiwa nihiku na 2 a Outubro wira aahipacerya wiirela mpantta Nikhuuru Noolamulela, okathi wa muthukumano oniiriwa vamosa khula mwaakha wa Watch Tower Bible and Tract Society of Pennsylvania, wa 1999. Iyaakha iya sookiserya, owo oorumeela vamosa ni Comissão do Pessoal, Comissão de Redação, Comissão Editora ni Comissão dos Coordenadores.

Atthu a makhalelo ni mahuweliwo oovirikana yaanimphenta Munna Pierce mwaha wa oreera wawe murima ni otheya-theya ni ootheiha wawe wooloka. Masi makhalelo yaawiirinhe anna anceene waasivela munna ola ti niphento nawe, wiiyeviha, ottittimiha wawe malamulo a xariya ni miruku sa mBiibiliyani ni omuroromela wawe moomalela Yehova. Munna Guy Pierce aahimya wira vanniweryaneya ohikhuma nsuwa na meelo, ohiya ohimya wira soolaiherya sa Yehova khisaarowa wiiraneya; nto aahimananiha olaleerya waamini wawe olumwenku wotheene.

Munna Pierce khoolowela omurumeela Yehova, aavenya vahixiye khiyavara muteko, mahiku makina mpakha ohiyu eriyari. Moophavela waalipiha anna ni arokora, aaheetta mikwaha orowaka mapuro manceene orukurerya olumwenku, ni owo khaixoona waatteliwa muteko vahaaweryaneya aya ovaanela ni khula munna oBetheli ni akina yaaphavela nikhaliheryo, miruku ni ovaanelaka paahi. Hata atthu yaale yaatonko awe olavulana khalai, nlelo khanimuliyala mwaha wa osuwela wawe owaakhela aletto, opatthaneya ni miruku sa mBiibiliyani saavaha awe mwa enamuna yooreerela ni yoolipiha.

Munnihu ni mpatthani ahu owo, ohaahiya amwaarawe ni anaawe 6, waahela muhina axisulu awe ni osuulu aya. Ni owo ohaahiya anamwane anceene oomunepani. Mwaha wa masikho wa Munna Pierce waalavuliwe oBethel ya Brooklyn, Saabadu, nihiku na 22 a Março 2014 ni Munna Mark Sanderson, yoowo aari mwaapara awe a Nikhuuru Noolamulela. Eriyari ya itthu sinceene saalavuliwe voohimya sa Munna  Pierce, yaari yoolipelela awe ya orowa wiirimu ni yaahisommwa masu a Yesu yaawo ani: “Owannyeya Atithi aka, kharere-wo mapuro òkhala. . . . Karowá, kòlokiheryani nipuro, kinohokolowa-tho kokuxeni, wira nipuro ninrowaka okhala, ni nyuwo-tho mwakhaleke nipuro nenlo. Vano weiwo onrowaka, nyuwo mosuwela ephiro ene”.​—Yoh. 14:2-4.

Ekeekhai wira Munna Pierce onrowa oninkhelaka vanceene. Hata vari siiso, ninnitteeliwa murima okhala wira ‘owo anisuwela ephiro ya nipuro naarowa awe okhalaka voohimala’.