Mmutthapeleke Yehova Wira Ooreeliheni

‘Mmutthapele Yehova, mana t’òrera murima’.​—ESAL. 106:1.

MWAAROWA WAAKHULA SAI?

Etthu xeeni enniixuttiha aya oxukhuru wa murummwa Paulo?

Moota xeeni mavekelo ni wuupuwelela ele enisoma ahu onnikhaliherya aya okhala ooxukhuru?

Moota xeeni wuupuwelela mareeliho yaakhenle ahu onrowa aya onikhaliherya oxintta mixankiho?

1. Xeeni Yehova onireerela awe otthapeliwaka?

YEHOVA, yoowo ori Namavaha a “eparakha yothene yophaveleya ni sovahiwa sothene sorera”, toniphwanela oxukhureliwa. (Yak. 1:17) Okhala wira owo Mukukhuli ahu, nto onninikhapelela weerutthuni ni omunepani. (Esal. 23:1-3) Owo ohooniherya okhala “ntthyawelo nahu nolipa”, vanceenexa okathi wa mixankiho! (Esal. 46:2) Tivonto hiyo nookhalana mathowa manceene anniiriha okupaleela masu yaalempwale ni nasaalimo mmosa oriki: ‘Mmutthapele Yehova, mana t’òrera murima, oniphenta wawe ti wohimala’.​—Esal. 106:1.

2, 3. (a) Etthu xeeni ekhanle oonikhumelela vakhala wira khannivaha efaita mareeliho arina ahu? (b) Makoho xeeni anrowa ahu othokorerya muru ola?

² Xeeni varyaaya vooreerela othokorerya mwaha ola wa omutthapela wala omuxukhuru Yehova? Ntoko saahimmwale aya vahinatthi, atthu a mahiku ala ookiserya khanixukhuru. (2 Tim. 3:2) Anamunceene khanivaha efaita mareeliho arina aya. Atumereriwaka ni alipa animulaleya nakoso, imilyau sa atthu olelo-va anniphavela okhalana itthu sinceene ovikana iye sinitthuneya mweekumini mwaya. Nto vanniweryaneya hiyo-tho opahuliwa ni munepa woohixukhuru. Ntoko aIsarayeli khalai, hiyo pooti opaceryaka okhala oohixukhuru ni ohivaha efaita wataana wahu ni Yehova ni mareeliho anivanhe awe.​—Esal. 106:7, 11-13.

³ Tivonto, vanireerela ahu wuupuwelela etthu ekhanle ookhumelela okathi oniwanana ahu mixankiho. Okathi wa mixankiho hiyo pooti waakuvaka oliyala mareeliho avahiwe ahu ni Yehova. (Esal. 116:3) Nto ninrowa owerya sai okhalana murima woomutthapela Yehova? Etthu xeeni enrowa onikhaliherya okhalana moonelo wooloka okathi wa mixankiho? Nrowe noone.

‘ITTHU SULUPALE YEHOVA SIWIRENLYAWENI’

4. Ninrowa owerya sai okhalana murima woomutthapela Yehova?

⁴ Naaphavelaka okhalana murima wooxukhuru, nihaana woona ni wuupuwelela mareeliho atonko ahu ovahiwa ni Yehova, ni onikhapelela wawe woororomeleya. Okathi nasaalimo aapakale awe eyo, owo aanoona itthu suulupale Yehova aamwiirenle awe.​—Musome Esalimo 40:6; 107:43.

5. Etthu xeeni enniixuttiha aya oxukhuru wa murummwa Paulo?

⁵ Hiyo nnoowerya wiixutta itthu sinceene sa murummwa Paulo voohimya sa okhala mutthu ooxukhuru. Woonasa wene owo anuupuwelela mareeliho aavahiwe awe, tivonto aamakela awe oxukhurela itthu sotheene ni murima awe wotheene. Paulo aanisuwela wira khalai aari mutthu ‘anvirikanya, omulupattha ni omuhaxa Yesu’. Vano owo aanixukhurela itthu iyo voohicikha etthu sa mweettelo awe wa khalai, mwaha woowi Muluku ni Yesu yaahimmorela ikharari ni yaahinvaha muteko wa olaleya ihapari. (Mmusome 1 Timótheyo 1:12-14.) Paulo aanaaxukhurela-tho annawe, ni ikwaha sinceene aanimuxukhuru Yehova mwaha wa makhalelo ni waamini waya. (aFil. 1:3-5, 7; 1 aTes. 1:2, 3) Nave okathi saamukhumelela aya mixankiho, Paulo aanaakuvela omuxukhuru Yehova okhala wira aanimukhaliherya aatumereryaka annawe wira yamukhaliherye. (Mit. 28:15; 2 aKor. 7:5-7) Tivonto vanoona ahu wira ikwaha sinceene Paulo aalepa awe, aanaalipiha maKristau oriki: “Mukhale atthu òxukhuru . . . , mutthapeleni Muluku Tithi”.​—aKol. 3:15-17.

WUUPUWELELA MAREELIHO ARINA AHU NI OPAKA MAVEKELO ONOONIKHALIHERYA OKHALA OOXUKHURU

6. Itthu xeeni sikhanle anyu oomuxukhurela Yehova?

⁶ Ninrowa otthara sai ntakiheryo nooloka na Paulo voohimya sa okhala mutthu ooxukhuru? Sintoko Paulo, hiyo nihaana wuupuwelelaka itthu sotheene Yehova siniirenle awe. (Esal. 116:12) Vaakhanle wira mookohiwa so: ‘Mareeliho xeeni atonko anyu ovahiwa ni Yehova?’, mwaarowa waakhula sai? Niireke mwaarowa oromola wataana wanyu ni Yehova? Wala oleveleliwa wahu oniweryaneya mwaha wa ororomela wanyu mukuttho wa Kristu? Mwanwerya waalikelela masina a anna ni arokora yaakhalihenryeni okathi wa muxankiho? Tthiri khamunirowa omuliyala ole othelanne anyu wala aniinyu anaaphenta anyu. Nto oviriha okathi muupuwelelaka mareeliho awo avahiwe anyu ni Tiithi ahu oophenta, Yehova, onimwiiriha murima anyu okhala woohakalala ni onoowiirihani omuttottopela yena khula nihiku.​—Musome Esalimo 92:2, 3.

7. (a) Xeeni hiyo vanitthuneya ahu opaka mavekelo ni omuxukhuru Yehova? (b) Mureerelo xeeni onirowa anyu ophwanya vakhala wira munnooniherya wira munnixukhuru okathi onipaka anyu mavekelo?

⁷ Vaavo vanuupuwela ahu mareeliho avahiwe ahu, nnoowerya onvekela Yehova khula nihiku ni omuxukhurela. (Esal. 95:2; 100:4, 5) Anamunceene annoona nivekelo okhala enamuna ya onvekela Muluku itthu siniphavela aya paahi. Hiyo noosuwela wira Yehova onnitteeliwa murima vaavo vanivekela ahu nixukhurelaka ele erina ahu. Nave mBiibiliyani aakhala mavekelo manceene yaapakiwe ni murima wotheene oxukhureliwaka Yehova, awo anihela muhina nle naapakiwe ni Ana ni Ezekiya. (1 Sam. 2:1-10; Yes. 38:9-20) Nto nihaana waatakihaka arumeyi awo a Yehova oororomeleya yaawo yoonihenrye okhala atthu ooxukhuru. Tthiri, nihaana omuxukhurela Yehova mwaha wa mareeliho anivanhe awe. (1 aTes. 5:17, 18) Neera siiso nnoophwanya mareeliho manceene. Munimunnuwa omunepani, onimuncerereya omphenta wanyu Yehova ni munoowerya omwaattamela yena.​—Yak. 4:8.

8. Etthu xeeni ekhanle ooniiriha ohixukhurela itthu sinivanhe awe Yehova?

⁸ Xeeni vanitthuneya ahu osyaka khula etthu yaarowa onooceeliha omuxukhuru Yehova mwaha wa oreera wawe murima? Mwaha wooyariwa ni murima ohimphavela oxukhuru. Muupuwele moota saarya aya Adamu ni Eva anamuyari ahu oopacerya, yaawo yaapwehiwe mparayiisu. Awo yaahivahiwa khula etthu yaatthuneya, ni yanwerya okhalaka wa mahiku otheene ni murettele. (Maph. 1:28) Masi awo khiyaaxukhurenle mareeliho ale otheene yaarina aya. Awo yahooniherya nrima aphavelaka itthu sinceene. Mwaha waivaavo awo yaahiyeleela itthu sotheene yaarina aya. (Maph. 3:6, 7, 17-19) Hiyo olelo-va nirukureriwe ni atthu arina munepa woohixukhuru, nto awo anoowerya onipahula wira nihooneke mareeliho anivahiwa ahu ni Yehova. Hiyo pooti opacerya ohivaha efaita wataana wahu ni Yehova. Woonasa wene hiyo pooti ohiya ovaha efaita eparakha erina ahu ya wiirela mpantta nikhuuru na olumwenku wotheene na arumeyi a Yehova. Hiyo pooti opaceryaka osiveliwa ni itthu sa olumwenku ola, yoowo ohanle omalihiwa. (1 Yoh. 2:15-17) Wira nisyake opahuliwa, hiyo nihaana wuupuwelelaka mareeliho arina ahu ni omuxukhuru Yehova mwaha wa eparakha erina ahu ya okhala atthu awe.​—Musome Esalimo 27:4.

OKATHI ONNIKHUMELELA AYA MIXANKIHO

9. Okathi onnikhumelela aya muxankiho muulupale, xeeni wuupuwelela mareeliho arina ahu onrowa aya onilipiha?

⁹ Okhalana munepa wooxukhuru onoonikhaliherya oxintta mixankiho suulupale. Tthiri ti vooxankiha vakhala wira enninikhumelela etthu yootutuxerya mweekumini mwahu ntoko oraruweliwa ni ole othelanne awe, oretta muulupale, okhweliwa mutthu onimphenta ahu, wala ophwanyiwa ni ehasara ya ephattu. Okathi owo hiyo nnoophwanya yoomaaliha ni olipa murima, vakhala wira ninnuupuwelela mareeliho arina ahu. Vano nrowe nithokorerye itthu sitonko waakhumelela atthu.

10. Mureerelo xeeni aaphwannye awe Irina mwaha wa wuupuwelela mareeliho aarina awe?

¹⁰ Irinaa yoowo aari pioneera ookilaatheya mpantta onikela epheyo wAmerica, aatheliwe ni mutokweene mmosa yoowo muhoolo mwaya aamuhiyale Irina vamosa ni anaawe. Exeeni yaamukhalihenrye Irina ovikaniha omurumeela Yehova moororomeleya? Owo onihimya so: “Kinnimuxukhuru Yehova mwaha wa okikhapelela wawe. Mwaha wa wuuluulaka mareeliho arina aka khula nihiku, kinniwerya woona wira eparakha yuulupale osuweliwa ni ophentiwa ni Tiithi ahu a wiirimu Yehova. Kinnisuwela wira owo khonirowa okinyanyala”. Nnaamwi saamukhumelenle mixankiho suulupale mweekumini mwawe, munepa woohakalala wa Irina onnimukhaliherya owo, waalipiha atthu akina.

11. Etthu xeeni yaamukhalihenrye Kyung-sook oxintta muxankiho wa oretta aarina awe?

¹¹ Kyung-sook, yoowo onikhala wAsia, aahivara muteko wa opioneero ni aiyawe mwa iyaakha 20. Owo aahiphwanyaniwa oretta wa kanser a mmasasuni ni aahileeliwa wira aarowa okhwa muhina mwa myeeri miraru wala 6. Nnaamwi owo ni aiyawe saakhumelele mixankiho suulupale ni saamukhaani, awo yaanimuroromela Yehova wira amwaakhaliherya. Amuthiyana onihimya so: “Oretta ole waahikixankiha vanceene, miyo koona wira kaahiyeleela itthu sotheene ni kaari oowoova”. Exeeni yaamukhalihenrye Kyung-sook oxintta muxankiho ole? Owo onihimya so: “Khula ohiyu kihinatthi orowa orupa, kaanirowa esaala ya vasulu va empa ahu wira kapake nivekelo mowiiwanyeya, kiromolaka itthu thanu seiyo sinimuxukhurela aka Yehova nihiku nle. Nuumala-vo, kinnikhala oolipa ni kinniwerya omooniherya Yehova wira kinnimphenta”. Mureerelo xeeni Kyung-sook aaphwannye awe mwaha wa opaka mavekelo ale ohiyu? Owo onihimya so: “Naahiwerya woona wira tthiri Yehova aaninikhaliherya okathi wa muxankiho ole ni naahikhalana mareeliho manceene ovikana mixankiho saarina ahu”.

12. Jason aaphwannye sai nimaaliho nuumala okhweliwa mwaarawe?

¹² Jason, yoowo aarumeela efiliyaali emosa wAfrika, aahivara muteko wa orummwa wa okathi wotheene mwa iyaakha sinivikana 30. Owo onihimya so: “Iyaakha 7 sivinre kookhweliwa amwaaraka, nto eyo ennikiwereya vanceene. Murima onnitepa okiwereya kuupuwelaka ohaawa wotheene waamukhumelenle mwaaraka okathi aawereiwa awe kanser”. Nto etthu xeeni emukhalihenrye Jason oxintta muxankiho ole? Owo onihimya so: “Emaara ekina kaanuupuwelela okathi woohakalaliha waavirinhe aka ni mwaaraka, nto kaanimuxukhuru Yehova mmavekeloni mwaka. Eyo yaanikiphwanyiha nimaaliho ni kaahipacerya omuxukhuru Yehova khula nihiku mwaha wa okathi ole wooloka waavirinhe aka ni mwaaraka. Oxukhuru iwe wookiphwanyiha mireerelo sinceene. Ekeekhai wira nlelo kinninla mwaha wa okhweliwa waka, masi nlelo kinniwerya omuxukhuru Yehova mwaha wa ekasamento ele yooloka yaarina aka ni eparakha yuulupale ya omurumeela Yehova ni mutthu yoowo amphenta vanceene, nto eyo ennikikhaliherya olokiherya muupuwelelo aka”.

13. Exeeni yaamukhalihenrye Sheryl oxintta muxankiho wa opweteiwa amusi awe anceene?

¹³ Okathi waakhumelenle awe munamukhaya muulupale elapo ya oFilipina, wookiseryani wa mwaakha wa 2013, Sheryl, yoowo aarina iyaakha 13 paahi okathi ole, aahipweteiwa itthu sotheene saarina awe. Owo onihimya so: “Kaahipweteiwa enupa ni amusi aka anceene”. Ameyawe ni apapawe, omuhela muhina murokorawe ni axihima awe anli yaahikhwa okathi wa munamukhaya ole muulupale. Exeeni yaamukhalihenrye owo okhala mutthu oohakalala nnaamwi saamukhumelele ihasara iye sotheene? Okhala wira owo ookhalana munepa wooxukhuru ni onniweha mareeliho arina awe nlelo. Owo onihimya so: “Kaahiwoona anna ni arokora anceene yaawo yaarwiiye waakhaliherya ni waalipiha atthu ale yaatthuneya okhaliheriwa. Kaahoona wira anna a olumwenku wotheene yaanikivekelela. Kinnixukhurela vanceene osuwela wira Yehova ti Muluku aka. Owo khula okathi onninivaha khula etthu ennithowa”. Tthiri, osuwelexa wira nookhalana mareeliho ti murette onrowa onikhaliherya osyaka oxinttiwa ni oriipiwa wahu murima. Murima wooxukhurela onrowa onikhaliherya hata sinikhumelelaka mixankiho sinceene.​—aÉf. 5:20; mmusome aFilipi 4:6, 7.

‘MIYO KINROWA OTTELIWA MURIMA NI YEHOVA’

14. Itthu xeeni sooloka siniwehererya ahu? (Nwehe elatarato yoopacerya.)

¹⁴ Okhuma khalai arumeyi a Yehova annitteeliwa murima mwaha wa mareeliho anivahiwa aya. Mwa ntakiheryo, nuumala aIsarayeli waakiheriwa Farawo ni anakhotto awe Ephareya Yooxeerya, awo yaahooniherya otteeliwa waya murima amutthapelaka ni omuxukhurela Yehova. (Okhum. 15:1-21) Olelo-va, eriyari ya mareeliho arina ahu ti yoowehererya ahu ya woopoliwa itthu sotheene sinnikumiherya mixankiho. (Esal. 37:9-11; Yes. 25:8; 33:24) Nkahaya mmananihe wuupuwelela ohakalala onrowa ahu ophwanya vaavo Yehova onrowa awe waapwetexa awanani ahu ni onivaha elapo esya ya murettele ni exariya. Tthiri owo onrowa okhala okathi muulupale wa omuxukhurela Yehova!​—Wis. 20:1-3; 21:3, 4.

15. Exeeni elakenle anyu opaka mwaakha wa 2015?

¹⁵ Tthiri hiyo ninniwehererya mareeliho manceene a Yehova mwaakha wa 2015. Ekeekhai wira okathi mukina pooti onikhumelela mixankiho. Voohicikha etthu sa itthu sinrowa okhumelela, hiyo noosuwelexa wira Yehova khonrowa oninyanyala. (Otum. 31:8; Esal. 9:10, 11) Owo onrowa ovikaniha onivaha khula etthu enitthuneya wira nimurumeele moororomeleya. Tthiri hiyo nihaana okhalana makhalelo ooloka a omunepani ntoko ale yaarina awe profeta Habakuki, yoowo aahimmye so: “Ekhwelí wira mirí khasimphuwa, nnákhala khasinvaha mihokorokho; olivera khunvaha-tho makhura, imatta khasinìma solya, mihuwo sinnilakaseya munsisini, inyompe khasinòneya-tho mmathalani. Nto miyo kinrowa otteliwa murima n’Apwiya, kinrowa otthapa mwaha wa Muluku onikòpola”. (Hab. 3:17, 18) Tthiri mwaakha onirwa, hiyo nihaana wuupuwelela mareeliho manceene avahiwe ahu ni wiiwelela nlattulo na yoolepa ya mwaakha wa 2015, yeeyo eni: ‘Mmutthapele Yehova, mana t’òrera murima’.​—Esal. 106:1.

[Enoota]

[Eponto yuulupale epaaxina 8]

Yoolepa ya mwaakha wa 2015: ‘Mmutthapele Yehova, mana t’òrera murima’.​—Esalimo 106:1

[Eponto yuulupale epaaxina 12]

“Kinnixukhurela vanceene osuwela wira Yehova ti Muluku aka”.​—Sheryl