Mutakihe Wiiyeviha ni Oreera Murima wa Yesu

“Okhala wira Kristu ohohawelani-tho nyuwo, ni siso ohothonyeryani ephiro, wira mmutthareke yowo munvirawe”.​—1 PED. 2:21.

MWAAROWA WAAKHULA SAI?

Xeeni vanireerela aya omutakiha Yesu?

Munrowa omutakiha sai Yesu mooniheryaka wiiyeviha?

Munrowa omutakiha sai Yesu mooniheryaka oreera murima?

1. Moota xeeni omutakiha Yesu onnikhaliherya aya omwaattamela Yehova?

OKHALA wene vanninisivela waatakiha atthu yaale arina mweettelo ni anipaka itthu sinoona ahu okhala sooloka. Mwa apinaatamu otheene atonko okhala valaponi khuuvo ooreerela omutakiha oninvikana Yesu Kristu. Mwaha wa xeeni? Okhala wira Yesu mwaneene aahihimya wira: “Ole okònne miyo, owònne Atithi”. (Yoh. 14:9) Yesu aahitakiha makhalelo a Tiithi awe moomalela, nto omoona Mwaana waamulikana ni omoona Tiithi. Tivonto vanihimmwa aya wira omutakiha Yesu, onniniiriha omwaattamela Yehova, yoowo okhanle Mukhulupale a olumwenku wotheene. Tthiri nnoophwanya mureerelo muulupale vakhala wira nnootakiha makhalelo ni miteko sa Mwaana a Muluku!

2, 3. (a) Xeeni Yehova ohalaka orumiha wira alempwe mBiibiliyani makhalelo a Mwanawe, ni exeeni owo eniwehererya awe wira nipakeke? (b) Ninrowa othokorerya exeeni muru ola ni onittharelana?

² Vano ninrowa osuwela sai makhalelo a Yesu? Hiyo nooreeriwa okhala wira nookhalana masu oolempwa anooniherya makhalelo a Yesu. Yehova ookumiherya masu oolempwa ntoko ale aniphwanyaneya Soolempwa sa eKristau sa eGriki, okhala wira owo oniphavela wira hiyo nimusuwele Mwanawe ni nimutakiheke yoowo. (Mmusome 1 Pedru 2:21.) Biibiliya onnilikanyiha ntakiheryo na Yesu ni “mavalo” wala ephiro. Tthiri Yehova omphavela onihimeerya wira hiyo nihaana omutthara Yesu nimananihaka onyakela nipuro nenne ninyakenle awe. Mwekeekhai, Yesu oonihiyerya ntakiheryo noolokexa, nnaamwi hiyo nihikhanle oomalela. Masi Yehova khoniwehererya wira nitthariheleke moomalela mavalo a Yesu. Ohiya-vo, Tiithi oniphavela wira nimutakiheke Mwaana mwa enamuna eniwerya ahu ntoko apinaatamu oohimalela.

³ Vano nrowe nithokorerye mikhalelo sooloka sa Yesu. Muru ola ninrowa othokorerya wiiyeviha ni oreera murima wa Yesu; ni muru onittharelana ninrowa othokorerya olipa murima ni ankhili a Yesu. Voohimya sa khula mukhalelo onrowa ahu othokorerya, ninrowa waakhulaka makoho ala mararu: Eyo enitaphulela exeeni? Yesu oonihenrye sai makhalelo awo? Hiyo ninrowa omutakiha sai?

YESU TOWIIYEVIHA

4. Mwaarowa otthokiherya sai nuulumo noowi wiiyeviha?

⁴ Wiiyeviha exeeni? Olumwenku ola osarenye atthu oowixinnuwiha, akina anoona wira wiiyeviha onitaphulela okhala mutthu oolosowa wala ohiniiroromela. Masi wiiyeviha woovirikana ni olosowa. Wooniherya wiiyeviha onivekela okhala oolipa murima. Wiiyeviha onnihimmwa okhala “mweettelo onivirikanya wiixinnuwiha ni wiitthuna”. Soolempwa sa eKristau sa eGriki, sinnitaphulela nuulumo noowi “wiiyeviha” mwa enamuna ela, “wiixoona okhala mwaamukhaani”. (aFil. 2:3) Wiiyeviha onipacerya mwa enamuna eniixoonela ahu hiyo mmansihu. Disionaario mmosa onitthokiherya masu a mBiibiliyani onihimya so: “Wiiyeviha onikhala mutthu osuwela wira owo mwaamukhaani ohoolo wa Muluku”. Vakhala wira ninniixoona okhala mwaamukhaani ohoolo wa Muluku, nto nnoowerya okhoottela muupuwelo wowiixoonaka okhala aalupale ohoolo wa apinaatamu akhwiihu. (aRom. 12:3) Tthiri khivanikhweya apinaatamu oohimalela okhala oowiiyeviha. Masi hiyo nnoowerya wiixutta okhala oowiiyeviha, vakhala wira nnimuupuwelela makhalelo ahu ohoolo wa Muluku ni otthara mavalo a Mwanawe.

5, 6. (a) Ti pani ori Mikhayeli nlaikha nuulupale? (b) Moota xeeni Mikhayeli oonihenrye awe wiiyeviha?

⁵ Yesu oonihenrye sai okhala oowiiyeviha? Mwaana a Muluku ohooniherya okhala oowiiyeviha okhuma khalai, ohooniherya wiiyeviha iwo, okathi aaryaawe yoopattuxiwa ya omunepani wiirimu ni okathi aaryaawe pinaatamu oomalela valaponi. Muthokorerye matakiheryo vakhaani.

⁶ Muupuwelo awe. Mulipa oomulepa Biibiliya Yuda aahilepa ntakiheryo na wiiyeviha wa Yesu ohinatthi orwa valaponi. (Mmusome Yuda 9.) Ntoko Mikhayeli, nlaikha nuulupale, Yesu ‘ahivanyihana ni Satana’ wala “owana” ni mutakhali. Etthu ene yaawiiriha ovaanyihana waari “murutthu wa Moise”. Hiyo ninnisuwela wira nuumala okhwa Moise, Yehova aahivitha murutthu awe nipuro nahaasuweliwa. (Otum. 34:5, 6) Woonasa wene Diabo aaphavela orumeela murutthu wa Moise wira atthu ale akokhoreleke ilatarato. Wa khula etthu yootakhala Diabo yuupuwela awe wiiriha murutthu ole, Mikhayeli aahooniherya olipa wawe murima khomukhoottiherya. Eliivuru emosa enooniherya wira nuulumo na eGriki nenno nitaphuleliwe “ovanyihana” ni “owanela” ninnirumeeliwa-tho “omilattuni” ni ninnooniherya wira Mikhayeli ‘ahinvanyiha Diabo omulelaka wira kharina ehakhi ya okuxa murutthu wa Moise’. Masi, Mukhulupale ole a Malaikha aahisuwela wira khaarina eparakha ya omphukela Diabo. Ohiya-vo owo aahimuhiyerya mulattu ole Namaphuka Muulupale, Yehova. Yesu kheemerenrye opaka etthu yaari ota wa okhulupale aavahiwe awe, hata okathi yoole aapaciwe awe. Tthiri iwo wiiyeviha wuulupale wa Yesu!

7. Inamuna xeeni Yesu oonihenrye awe wiiyeviha mwa ilavulelo ni miteko sawe?

⁷ Okathi aaryaawe valaponi, Yesu aahilavula ni opaka itthu mwa enamuna yooniherya wiiyeviha wuulupale. Malavulelo awe. Owo khaahimya itthu ophavelaka wiivuwiha paahi. Ohiya-vo, khula etthu yaapaka awe aaphavela onvuwiha Tiithi awe. (Mar. 10:17, 18; Yoh. 7:16) Owo khaatonko waaramusa awiixutti awe wala owuulihiha muru. Ohiya-vo, owo aanaattittimiha, waattottopela mwaha wa ele yooloka yaapaka aya ni anaaleela wira anaaroromela. (Luka 22:31, 32; Yoh. 1:47) Miteko sawe. Yesu aahithanla okuxa ekumi ya mutthu owiiyeviha ni ohirina mihakhu sinceene. (Math. 8:20) Owo aneemererya ovara miteko seiye okhala wene sinivariwa ni arumeyi wala ipottha vatthokoni. (Yoh. 13:3-15) Mowaavikana atthu otheene, owo ahooniherya wiiyeviha wawe mwaha wa okhala owiiwelela. (Mmusome aFilipi 2:5-8.) Moovirikana ni atthu oowiixinnuwiha anikhootta wiiwelela, Yesu moowiyeviha aahiiwelela yoovekela ya Muluku, khukhala owiiwelela “mpakha okhwa”. Tthiri eyo ennooniherya wira Yesu, Mwaana a mutthu, aari “òwiyeviha!”—Math. 11:29.

MUTAKIHEKE WIIYEVIHA WA YESU

8, 9. Ninrowa wooniherya sai wira hiyo naatthu oowiiyeviha?

⁸ Ninrowa omutakiha sai Yesu nooniheryaka okhala oowiiyeviha? Muupuwelo ahu. Wiiyeviha onninikhoottiherya opaka itthu moovikaniha okhulupale ovahiwe ahu. Vakhala wira hiyo ninnaakhulela wira khineemereriwe okhala anamaphukela, nto khannirowa okhala oowaakuva waavanyiha atthu akina, wala ohiwaamini wira omurumeela waya Muluku ti wekeekhai. (Luka 6:37; Yak. 4:12) Wiiyeviha onoonikhaliherya osyaka wiixoona okhala “òrera murima” waavikana atthu akina, nto nnapacerya waaramusaka ale ahirina osuwela wala iparakha sirina ahu. (Mus. 7:16) Axitokweene oowiiyeviha khaniixoona okhala aalupale waavikana anna akina mmulokoni. Ohiya-vo, amakampusi awo ‘anniwonela vatthu akhw’aya vovikana mmansaya’, nto annooniherya okhala acikhaani mmulokoni.​—aFil. 2:3; Luka 9:48.

⁹ Muthokorerye ele yiiranenye ni munna W. J. Thorn, yoowo ari peregrino, wala mutokweene ooweetteetta okhuma mwaakha wa 1894. Nuuviriha iyaakha sinceene ovaraka muteko ole, aahiihaniwa nipuro niiriwa Ematta ya Omwene, oNova York, nto aahirummwa ovara muteko nipuro naahuuwa ilyakhu. Owo onihimya so: “Khula okathi kaapacerya aka wiixoona wira kaari muulupale, kaanirowa okhwipi kinailaka mmansaka kiiraka: ‘Nyuwo ntthupi. Exeeni erina anyu wira mwiixinnuuheke moota owo?’” (Mmusome Yesaya 40:12-15.) Tthiri ole waari muupuwelelo woowiiyeviha!

10. Ninrowa wooniherya sai wira hiyo toowiiyeviha mwa ilavulelo ni miteko sahu?

¹⁰ Malavulelo ahu. Vakhala wira hiyo naatthu oowiiyeviha vamurimani vahu, nto masu ahu animooniherya wiiyeviha iwo. (Luka 6:45) Okathi onivaanela ahu ni atthu akina, hiyo ninrowa osyaka omakela olavula itthu sinisuwela ahu opaka, wala iparakha sirina ahu. (Mir. 27:2) Ohiya-vo, hiyo ninrowa omananihaka oweha ele erina aya anna ni arokora wira naattottopele mwaha wa makhalelo ooloka, osuwela waya opaka itthu ni okhumela waya saana mweekumini. (Mir. 15:23) Miteko sahu. Makristau owiiyeviha khaniphavela okhala oovuwa olumwenku ola onikhala ahu. Masi awo annikuxa ekumi yohaattiheriwa itthu, okathi mukina avaraka miteko seiye atthu a moolumwenkuni anoona aya okhala itthu sa elolo, wira awerye omurumeela Yehova ni murima aya wotheene. (1 Tim. 6:6, 8) Etthu yootepexa otthuneya ori wooniherya wiiyeviha wahu mwaha wa wiiwelela. Vanitthuneya okhala mutthu oowiiyeviha wira ‘Niwìweleleke ale aniholela’ mmulokoni ni ottharihela malakiheryo anivahiwa ahu ni otthokeya wa Yehova.​—aHéb. 13:17.

YESU TOOREERA MURIMA

11. Muhimye ele enitaphulela aya masu oowi oreera murima?

¹¹ Oreera murima exeeni? Masu oowi “oreera murima” anitaphuleliwa so: “osuweliwa okhala mutthu onipaka itthu, wala onooniherya moonelo awe mwa enamuna yooreerela”. Oreera murima, enamuna emosa ya niphento ni enivarihana ni “okhala ooloka”, omoriwa ikharari ni othunku. Biibiliya onniromola osareya “othunku”, “ikharari”, ni “ophenta”. (Luka 1:78; 2 aKor. 1:3; aFil. 1:8) Elavulaka sa ele Biibiliya onitumererya awe voohimya sa othunku, eliivuru emosa enihimya so: “Yootumererya eyo khahiyo yoovekela paahi, masi etthu yootthuneya. Eyo enihela muhina opaka etthu enrowa waakhaliherya atthu akina olokiherya ekumi aya wira atthareke ephiro esya yooloka”. Oreera murima wookhalana ikuru siniwiiriha atthu opaka etthu. Mutthu ooreera murima tuule onisiveliwa opaka itthu sinrowa waaphwanyiha mureerelo atthu akina.

12. Exeeni enooniherya wira Yesu aanaamorela ikharari atthu, nto oreera wawe murima waamwiirinhe opaka exeeni?

¹² Moota xeeni Yesu oonihenrye awe okhala ooreera murima? Oreera wawe murima ni itthu saapanke awe. Yesu aaniwoonela othunku atthu. Okathi waamoonale awe mpatthani awe, Maria ni atthu akina amunlelaka Laazaro, Yesu “ahiripiwa murima” ni aahinla. (Mmusome Yohani 11:32-35.) Oriipiwe ene murima, ntoko okathi yoole aamuhihimunxe awe mwaana a naamukhweli, Yesu aahimuhihimuxa Laazaro. (Luka 7:11-15; Yoh. 11:38-44) Mwaha wa oreera wawe murima, Yesu aahinvaha Laazaro eparakha ekina ya okhala mukumi. Okathi mukina, Yesu aahaamorela “ikharari” atthu anceene yaamutthara. Mwaha wa oreera wawe murima “ahipajerya owixuttiha itthu sinjene”. (Mar. 6:34) Tthiri atthu ale yaiwelenle sowiixuttiha sa Yesu yaahiphwanya mureerelo muulupale! Mooneke wira oreera murima wa Yesu waari wootepexa wunnuwa; nto waanimwiiriha ophavela waakhaliherya atthu.​—Math. 15:32-38; 20:29-34; Mar. 1:40-42.

13. Mwa inamuna xeeni Yesu aalavula awe mowaareerela murima atthu akina? (Nwehe elatarato yoopacerya.)

¹³ Masu yooniherya oreera wawe murima. Oreera murima wa Yesu waahimwiiriha olavula ni atthu akina mooreerela, vanceenexa ale yaahasuliwa. Murummwa Matheyo aahilavula voohimya sa Yesu orumeelaka masu ari va Yesaya wira: ‘Owo khanrowa osinsa mutathi wowunteyene khalayi, khanrowa ottipiha ntthampo nintthuwa mwixi’. (Yes. 42:3; Math. 12:20) Yesu aanaalavuliha atthu awo mwa enamuna yaaphwanyiha ohakalala yaale yaalikanyihiwa ni mutathi woowunteya wala ntthampo na ekhanttiyero yaaheliwa makhura, ehalaka ottipha. Yesu aahilaleya muhupi waaphwanyiha nlipelelo “alipa-òhaxiwa”. (Yes. 61:1) Aahaalattula ale yaari ‘okhulumuwa ni yalemeliwe miritti sulupale’ owiitthanaka wira arwe ‘amumulihe’. (Math. 11:28-30) Aahaahimeerya awiixutti awe wira Muluku aaniwoonela othunku anamakokhorela awe otheene, waahela muhina ale “axikhani” anooniwa ohikhalana efaita vamaithoni va olumwenku ola.​—Math. 18:12-14; Luka 12:6, 7.

MUTAKIHEKE OREERA MURIMA WA YESU

14. Ninrowa owerya sai owoonela othunku atthu akina?

¹⁴ Ninrowa omutakiha sai Yesu nooniheryaka oreera murima? Waareerela wahu murima atthu akina. Hiyo khannirowa okhalana makhalelo awo mmansihu-ru, masi Biibiliya onnintumererya wunnuuherya makhalelo awo. “Murima w’othunku” oniirela mpantta omutthu wa naanano yoowo maKristau otheene anitumereriwa aya owara. (Mmusome aKolosi 3:9, 10, 12.) Munrowa owoonela sai othunku atthu akina? Mutthukule murima anyu. (2 aKor. 6:11-13) Nwiriyaneke oratteene vakhala wira ookhala mutthu onooleelani muxankiho awe wala etthu ekina. (Yak. 1:19) Murumeele muupuwelelo anyu ni mwiikoheke so: ‘Vaakhanle wira etthu ele ekikhumelenle miyo, kaarowa woonela sai? Etthu xeeni kaarowa aka ophavela wiireliwa’?​—1 Ped. 3:8.

15. Exeeni ekhanle ahu oopaka wira naakhaliherye ale anilikana ni mutathi woowunteya ni ntthampo nihanle ottipha?

¹⁵ Miteko sahu sinooniherya oreera murima. Oreera wahu murima onooniiriha ophavela opaka etthu enaaphwanyiha mureerelo akina, vanceenexa yaale anikhala mwa mutathi woowunteya wala ntthampo nihanle ottipha. Ninrowa waakhaliherya sai? Yoolepa ya aRoma 12:15 enihimya so: “mujikuleke vamosá n’ale anìkhupanyerya”. Atthu ooriipiwa murima vannaasivela wooneliwa othunku ohiya ohimeeriwa itthu soopaka. Murokora aalipihiwe ni anna akina nuumala okhweliwa mwanawe mwaamuthiyana onihimya so: “Miyo vaahikisivela waaweha apatthani arwaaka ni apaceryaka wunla ni miyo”. Nnimooniherya oreera wahu murima vaavo vanipaka ahu itthu sooloka. Niireke munnimusuwela naamukhweli orina etthu enitthuneya olokiheriwa vatthokoni vawe? Niireke ookhala Kristau oowunnuwela a mmulokoni mwanyu onitthuneya opakhiriwa wira orowe mithukumano, muteko woolaleerya, wala oxipitali? Hata nipakaka etthu yaamukhaani pooti omukumiherya mureerelo muulupale munna wala murokora a mmulokoni. (1 Yoh. 3:17, 18) Enamuna yootepexa otthuneya wira nooniherye oreera wahu murima ori waalaleerya atthu akina. Tthiri eyo ti enamuna yuulupale ya waaphwanyiha mureerelo atthu ale arina murima wooloka!

16. Exeeni ekhanle ahu oohimya wira naalipihe atthu ariipiwe murima?

¹⁶ Masu ahu anooniherya oreera murima. Othunku ahu onooniiriha ‘walipiha murima ale ahilimpe’. (1 aTes. 5:14) Ninrowa ohimya exeeni wira naalipihe atthu awo? Nyuwo munoowerya waalipiha vakhala wira munniwoonela othunku. Hiyo pooti waattottopela mwaha wa makhalelo aya ooloka ni itthu sinisuwela aya. Nihaana owuupuxerya wira Yehova onvahererya mwanawe mwaha wa atthu awo, ni onniwoona okhala a faita vanceene. (Yoh. 6:44) Hiyo nihaana waaroromeliha wira Yehova onnaakhapelela arumeyi awe yaale ariipiwe murima, wala arina muxankiho. (Esal. 34:19) Masu ahu anooniherya othunku, pooti waalipiha ale ariipiwe murima.​—Mir. 16:24.

17, 18. (a) Yehova oniphavela wira axitokweene akhapeleleke sai ipwittipwitthi sawe? (b) Ninrowa othokorerya exeeni muru onittharelana?

¹⁷ Nyuwo axitokweene, Yehova oniphavela wira mukhapeleleke ipwittipwitthi sawe mooreera murima. (Mit. 20:28, 29) Musuweleke wira muteko anyu olyiha, olipiha ni okhapelela ipwittipwitthi sawe. (Yes. 32:1, 2; 1 Ped. 5:2-4) Tivonto mutokweene onikhapelela ipwittipwitthi mooreera murima, khonaakhanyererya anna wira avareke miteko sinceene ahirina makhalelo aniweemererya wiira siiso. Ohiya-vo owo onnimananiha wira anna akhaleke oohakalala, ororomelaka wira omphenta waya Yehova onrowa owiiriha opaka sotheene siniwerya aya wira amurumeele.​—Math. 22:37.

¹⁸ Okathi onuupuwelela ahu wiiyeviha ni oreera murima wa Yesu, tthiri ninniphavela ovikaniha otthara mavalo awe. Muru onittharelana, ninrowa othokorerya mikhalelo sikina sa Yesu soovara murima ntoko olipa murima ni ankhili awe.