Ele Enniixuttiha Aya Nlikanyiho na Italento

“Mukina amunnyale musurukhu italento thanú, mukina italento pili, aneraru etalento emosá”.​—MATH. 25:15.

MWAAROWA WAAKHULA SAI?

Exeeni yaamwiirinhe Yesu opaka nlikanyiho na italento?

Okathi xeeni Pwiya onirwa awe olokiha ikontha?

Etthu xeeni enniixuttiha aya nlikanyiho nla?

1, 2. Exeeni yaamwiirinhe Yesu opaka nlikanyiho na italento?

NLIKANYIHO na italento naapakiwe ni Yesu ninnooniherya oratteene muritti arina aya atthareli awe oowoottihiwa. Tivonto nihaana wiiwexexa saana yootaphulela ya nlikanyiho nla, okhala wira nnivarihana ni yoolipelela ya maKristau otheene a ekeekhai, akhale ale anirowa wiirimu wala ale anrowa okhalaka valaponi.

² Yesu aapanke nlikanyiho nla na italento ophavelaka waakhula nikoho na awiixutti awe noowi: “Ethonyeryo y’orwa wanyu ni y’omala olumwenku t’ivi?” (Math. 24:3) Mwekeekhai, nlikanyiho nna ninnaakhwanela mahiku ahu ala, ni ninniirela mpantta ekanyeryo yoowi Yesu ohoorwa ni oopacerya olamulela ntoko Mwene.

3. Exeeni enniixuttiha aya malikanyiho alempwale va Matheyo ikapitulu 24 ni 25?

³ Nlikanyiho na italento nniirela mpantta malikanyiho maxexe aromoliwe va Matheyo 24:45 mpakha 25:46. Malikanyiho mararu yaale aniirela mpantta waakhuliwa wa nikoho voohimya sa orwa wa Yesu, taale anilavula sa murumeyi oororomeleya ni a ankhili, imwali muloko ni ipwittipwitthi ni ipuri. Mwa malikanyiho ala maxexe, Yesu aahittittimiherya mikhalelo sinaasuwanyeiha atthareli awe a ekeekhai a mahiku ala ookiserya. Nlikanyiho voohimya sa murumeyi, imwali, ni italento yaahimmwa atthareli oowoottihiwa a Yesu. Nlikanyiho nnilavula sa murumeyi oororomeleya, Yesu aahittittimiherya wira egrupu yaamukhani ya alipa-oowoottihiwa, yeeyo yaavahiwe muteko wa waalyiha anamuteko akina mahiku ala ookiserya, yahaana okhala oororomeleya ni a ankhili. Nlikanyiho na imwali, Yesu aahittittimiherya wira atthareli awe otheene oowoottihiwa yaahaana okhala oolikanela ni okhala oowehaweha okhala wira okathi ni nihiku onirwa awe Yesu awo khanisuwela. Vano nlikanyiho na italento, Yesu aaphavela wooniherya wira alipa oowoottihiwa yaahaana okhalela nthiti ovara muteko wa eKristau yaavahiwe aya. Mwa nlikanyiho nookiserya voohimya sa ipwittipwitthi ni ipuri, Yesu aahimya ale arina nlipelelo na okhala valaponi. Owo aahittittimiherya wira awo yaatthuneya okhala oororomeleya ni waakhaliherya moomalela anna oowoottihiwa a Kristu ari valaponi.a Vano nrowe nithokorerye nlikanyiho na italento.

PWIYA ONNAAVAHERERYA MUHAKHU ANAMUTEKO AWE

4, 5. Ti pani onihimmwa okhala mulopwana wala pwiya, ni esisapo xeeni yaarina aya etalento emosa?

⁴ Mmusome Matheyo 25:14-30. Okhuma khalai iliivuru sahu saanitthokiherya wira mulopwana, wala pwiya onihimmwa nlikanyiho nla ti Yesu ni mukwaha oneetta awe ti orowa wawe wiirimu mwaakha wa 33 EC. Mwa nlikanyiho nikina aalavunle awe vahinatthi, Yesu aahihimya yoolakela ya mukwaha awe oriki, aarowa ‘oheliwa omwene’. (Luka 19:12) Masi Yesu khaakhenle Omwene niinanoru ophiyakaru wiirimu.b Ohiya-vo, owo ‘akilathi mono wolopwana wa Muluku, wa mahiku othene. Weiwo awehereryawe wira Muluku àkhalihe awanani awe ntoko ntthatto na inawu sawe’.​—aHéb. 10:12, 13.

⁵ Mulopwana onihimmwa nlikanyiho nla aarina italento 8, nto owo waari muhakhu munceene.c Ohinatthi weetta mukwaha, owo ahaahiyerya muhakhu awe anamuteko awe, khwaaruma wira amwiireke nakoso okathi ole wotheene. Moolikana ni mulopwana ole, Yesu aahaahiyerya arumeyi awe etthu emosa yaarina efaita yuulupale ovikana musurukhu ole, okathi waarowa awe wiirimu. Yaari exeeni eyo? Waakhuliwa wa nikoho nla onivarihana ni muteko aavanre awe okumi awe wotheene.

6, 7. Sintaphulela exeeni italento?

⁶ Yesu aahivaha efaita yuulupale muteko awe woolaleerya ni wiixuttiha. (Mmusome Luka 4:43.) Muteko ole waamulikana ni olima ematta yaarowa oruwerya vanceene. Ohinathi ophiya okathi ole, owo aahaahimeerya: “Muttukhule maitho, nwehé imatta, mihokorokho sottokottha, sihemphweke”. (Yoh. 4:35-38) Aaphavela ohimya wira yaahaana othukumanyiwa atthu akina ooreera murima yaarowa okhala arummwa awe. Moolikana ni mulimi ooloka, nto Yesu khaarowa ohiya ematta ele ahikhanle atthu yaarowa ohephaka mihokorokho saya. Nuumala ohihimuhixiwa ni ohinatthi orowa wiirimu, owo ahaavaha muteko muulupale arumeyi awe wira: “Vano, murowé, mwawixuttiheke atthu”. (Math. 28:18-20) Nto Yesu ahaavaha awiixutti awe muteko muulupale, eyo piiyo, orummwa wa eKristau.​—2 aKor. 4:7.

⁷ Eyo enniixuttiha exeeni? Okathi Yesu aavanhe awe atthareli awe muteko ole, owo ahaahiyerya “muhakhu awe”, eyo piiyo, italento sawe. (Math. 25:14) Mwa enamuna yookhweya, italento iyo sintaphulela muteko woolaleerya ni waapaka awiixutti.

8. Nnaamwi waavirikanne mwaattelo wa italento khula mutthu saavahiwe awe, exeeni yaaphavela awe pwiya?

⁸ Nlikanyiho na italento nnihimya wira pwiya aahinvahererya italento 5 namuteko mmosa, anenli italento 2, ni aneeraru etalento 1. (Math. 25:15) Khula namuteko aavahiwe mwaattelo woovirikana wa italento, nto pwiya ole aaphavela wira khula mutthu ahaana orumeela osuwela wawe wotheene okathi woolaleerya. (Math. 22:37; aKol. 3:23) Eseekulu yoopacerya, okhuma Pentekositi 33 EC, atthareli a Kristu yaahipacerya omwiira nakoso arumeelaka italento. Nthiti naya na ovara muteko woolaleerya ni waapaka awiixutti noolempwa mBiibiliyani eliivuru ya Miteko.d​—Mit. 6:7; 12:24; 19:20.

ORUMEELA ITALENTO OKATHI WOOKISERYA

9. (a) Exeeni anamuteko ale anli oororomeleya yairinhe aya italento iye, ni eyo enitaphulela exeeni? (b) Muteko xeeni “ipwittipwitthi sikina” sinivara aya?

⁹ Mahiku ala ookiserya, vanceenexa okhuma mwaakha wa 1919, alipa-oowoottihiwa oororomeleya ari valaponi yaanimwiira nakoso arumeelaka italento sa Pwiya. Moolikana ni anamuteko ale anli oopacerya, alipa-oowoottihiwa, anna ni arokora anniimananiha opaka khula etthu aniwerya aya wira akhaliherye muteko ole. Khannitthuneya omananiha waasuwela ale yaavahiwe italento 5 wala 2. Nlikanyiho nle ninnihimya wira anamuteko awo oowanli yaahiphwanya italento sikina soolikana ni mwaattelo yaavahiwe aya wanipacerya, nto yaari a nthiti. Muteko xeeni anivara aya ale arina nlipelelo na okhala valaponi? Tthiri awo anivara muteko wootthuneya! Nlikanyiho na ipwittipwitthi ni ipuri, nooniixuttiha wira ale arina nlipelelo na okhala valaponi, aavahiwa eparakha ya waakhaliherya alipa-oowoottihiwa a Yesu, avaraka muteko woolaleerya ni wiixuttiha. Mahiku ala ooxankiha, igrupu iyo piili sinivara muteko vamosa ntoko “nikoto nimosa”, vaavo vanivara aya muteko wa olaleerya ni waapaka awiixutti.​—Yoh. 10:16.

10. Ekanyeryo xeeni enooniherya wira Yesu oopacerya olamulela?

¹⁰ Tthiri Pwiya onniwehererya mireerelo sa muteko woolaleerya. Ntoko soonale ahu, awiixutti oororomeleya yaahincererya mihakhu sa Pwiya eseekulu yoopacerya. Ankhi mahiku ala ookiserya anaakhwanela aya masu a nlikanyiho na italento? Alipa-oowoottihiwa oororomeya a Yesu, annivara muteko woolaleerya ni wiixuttiha mowiilipiherya sihinatoko awe wiiriwa khalai. Ovara waya muteko mowiiraana onnikumiherya ikonto imiya sinceene sa awiixutti asya anipacerya okhaliherya muteko woolaleerya khula mwaakha, nto aniiriha muteko owo okhala ekanyeryo yoowi Yesu oopacerya olamulela. Tthiri Pwiya onnitteeliwa murima vanceene!

OKATHI XEENI PWIYA VANIRWA AWE OLOKIHA IKONTHA?

11. Exeeni ennooniherya wira Yesu onrowa olokiha ikontha okathi wa maxakha maalupale?

¹¹ Yesu onimoorwa waavekela muhakhu awe anamuteko awe waattamela wanikisa wa maxakha maalupale yaawo ari vakhiviru. Exeeni enniiriha wuupuwelaka siiso? Mwa eprofesia awe elempwale va Matheyo ikapitulu 24 ni 25, Yesu onnilavula sa orwa wawe ikwaha sinci. Olavulaka sa ophukela okathi wa maxakha maalupale, owo aahimyale wira atthu “anomona Mwana a Mutthu arwaka mmekuni”. Owo aahaalopola atthareli awe anikhala mahiku ala ookiserya wira: “Khamusuwenle nihiku ninrwawe pwiy’anyu” ni “Mwana a Mutthu onimorwa okathi ohinùpuwelanyu. (Math. 24:30, 42, 44) Okathi Yesu vaahimyawe wira “pwiy’aya arumeyi awo ahihokolowa, khupajerya olokiha ikontha n’awo”, aahimya okathi aarowa awe ovara muteko wa ophuka wuukiseryani wa olumwenku ola.e​—Math. 25:19.

12, 13. (a) Pwiya aathokorenrye sai arumeyi ale anli oopacerya, ni nthowa xeeni? (b) Alipa-oowoottihiwa anrowa waakhela liini ekanyeryo ya othanliwa waya wookiserya? (Nwehe ekaaxa eni “Ovahererya Ikontha Okathi Onikhwa Aya.”) (c) Etthuvo xeeni enirowa aya ovahiwa ale anrowa wooniwa okhala ipwittipwitthi?

¹² Moovarina ni nlikanyiho nla, vaavo pwiya aaphinye awe, khwaaphwanya arumeyi ale anli oopacerya, ole aavahiwe italento 5 mukina 2, aahoona wira awo yaari oororomeleya, maana yaahincererya italento saya. Nto pwiya ahaahimerya etthu emosaru arumeyi ale iraka so: “Varera sana, murumeyi òrumeya ni òroromeleya. Nyuwo muroromeleiye n’itthu sikhani, kiniwinyeryani itthu sinjene”. (Math. 25:21, 23) Niwehereryeke exeeni okathi Pwiya Yesu onirwa awe ophukela olumwenku?

¹³ Ale anilikana ni arumeyi anli oopacerya, eyo piiyo, arumeyi oowoottihiwa a Yesu, anrowa wiiraka yaakhenle ene ekanyeryo ya othanliwa waya wookiserya, ahinatthi opacerya maxakha maalupale. (Wis. 7:1-3) Ohinatthi ophiya okathi wa Harmagedoni, Yesu onirowa waavaha etthuvo aya wiirimu. Ale arina nlipelelo na okhala valaponi, yaawo yaakhalihenrye annawe Kristu mmutekoni woolaleerya, anrowa wooniwa okhala ipwittipwitthi ni anrowa ovahiwa eparakha ya okhala valaponi alamuleliwaka ni Omwene.​—Math. 25:34.

MURUMEYI OOTAKHALA NI OONYOONYIWA

14, 15. Niireke Yesu aaphavela wooniherya wira anamunceene a alipa owoottihiwa yaarowa okhala otakhala ni oonyonyiwa? Mutthokiherye.

¹⁴ Nlikanyiho nla nnihimya wira namuteko ookiserya aarokuxa etalento khuthipela, ohiya orowa omwiira nakoso wala oroiha obanko. Namuteko ole ahooniherya munepa wootakhala, okhala wira moolakelela aahivaanyiha ele yaarummwale awe ni pwiya awe. Nto pwiya aahimuhimya owo okhala “murumeyi òtakhala ni ònyonyiwa”. Pwiya aahimwaakha etalento ele, nto khunvahererya yoole aarina italento 10. Namuteko ole oothakhala aahiriheliwa “vaté voripa, weiwo ori-wo wunla n’ulumanyiha maino”.​—Math. 25:24-30; Luka 19:22, 23.

¹⁵ Mwaha wa murumeyi mmosa a pwiya ole othipela etalento, niireke Yesu aaphavela ohimya wira mpantta wa neeraru wa alipa-oowoottihiwa yaarowa okhala ootakhala ni oonyonyiwa? Nnaari. Nithokorerye makhalelo a okathi yaalavuliwe aya masu ala. Nlikanyiho nla na murumeyi oororomeleya ni a ankhili, Yesu aahihimya wira aahikhala murumeyi ootakhala aamanakasa anamuteko akhwaawe. Yesu khaaphavela ohimya wira yaamukhumelela egrupu yootakhala murima. Masi owo aaphavela waalopola arumeyi awe oororomeleya wira ahikhale atakhali. Vamosa-ru, nlikanyiho na imwali 10, Yesu khaaphavela ohimya wira nimeya ya atthareli awe oowoottihiwa yaarowa olikanaka ni aximwali 5 alolo. Ohiya-vo, aaphavela waalopola axinnawe oomunepani ele yaarowa waakhumelela vakhala wira yaamuhiya okhala oowehaweha ni okhala oolikanela.f Makhalelo awo anninooniherya mathowa anniiriha okupaliki wira mwa nlikanyiho na italento, Yesu khaaphavela ohimya wira anna awe anceene oowoottihiwa mahiku ala ookiserya yaarowa okhala ootakhala ni oonyonyiwa. Masi Yesu aalopola athareli awe wira vannitthuneya okhalana nthiti ‘amwiiraka nakoso’, ni okhootta mweettelo ni muupuwelelo waarowa wooniherya okhala namuteko ootakhala.​—Math. 25:16.

16. (a) Exeeni eniixutta ahu nlikanyiho na italento? (b) Moota xeeni mwaha ola olokihenrye awe wiiwexexa wahu nlikanyiho na italento? (Nwehe ekaaxa eni “Wiiwexexa Nlikanyiho na Italento.”)

¹⁶ Itthu xeeni piili siniixutta ahu nlikanyiho nla na italento? Yoopacerya, Pwiya, Kristu, ahaavahererya alipa-owoottihiwa etthu emosa yaarina efaita yuulupale, eyo piiyo, muteko woolaleerya ni waapaka awiixutti. Yanenli, Kristu oniphavela wira otheene ahu nikhaleleke nthiti muteko woolaleerya. Vakhala wira hiyo ninnikhalela nthiti muteko ola, nto niwehereryeke wira Pwiya onrowa onithuvela mwaha wa okhala wahu oowehaweha ni oororomeleya.​—Math. 25:21, 23, 34.

[Inoota]

[Ekaaxa epaaxina 21]

Ovarihana Okhanle wa Nlikanyiho na Italento ni Musurukhu

Malikanyiho a italento ni musurukhu aakhalana itthu sinceene sinilikana aya. Malikanyiho ala oomanli animuhimya mulopwana orina okhulupale yoowo oniphavela orowa mukwaha, masi ohinatthi ovenya onniwiitthana anamuteko awe khiyaavahererya musurukhu awe, khwaahimeerya wira emwiireke nakoso. Nuumala mulopwana ole otthika, onaakoha ikontha anamuteko awe wira oone moota khula namuteko sirumeelale awe musurukhu. (Math. 25:14-30; Luka 19:12-27) Mwa malikanyiho ala manli, pwiya (1) onitaphulela Yesu, ni anamuteko (2) anitaphulela arumeyi awe oowoottihiwa. Mwa khula nlikanyiho, pwiya onnaahiyerya anamuteko awe musurukhu (3), yoowo onitaphulela eparakha yuulupale ya waapaka awiixutti. Sowiraaneya iya sookhalana-tho yoolopala voohimya sa ele yaarowa okhumelela vakhala wira awiixutti a Kristu yaamukhalana makhalelo a namuteko ootakhala murima.

[Ekaaxa epaaxina 23]

Ovahererya Ikontha Okathi Onikhwa aya

Okhuma eseekulu yoopacerya, awiixutti oowoottihiwa aavahereriwa italento, nto ahaana ovahererya ikontha sa moota awo avanre aya muteko woolaleerya. Yaale anikhwa aryeene oororomeleya ahinatthi opacerya maxakha maalupale anirowa wiiraka yaakhenle ene ekanyeryo ya othanliwa waya wookiserya okathi onikhwa aya. Masi, nlikanyiho na Yesu na italento ninlavula sa ovahereriwa wa ikontha wookiserya, wa alipa-oowoottihiwa anirowa wiiraka ari akumi valaponi okathi wa maxakha maalupale.

[Ekaaxa epaaxina 24]

Wiwexexa Nlikanyiho na Italento

Okathi Pwiya Onrowa Awe Waatthuvela Anamuteko Awe.

Otthokiheriwa wa khalai: Mwakha wa 1919, Yesu aahatthuvela arumeyi awe oowoottihiwa valaponi aavahaka muteko munceene.

Otthokiheriwa wa naanano: Okathi onirwa awe Kristu muhoolo, onrowa waatthuvela arumeyi awe oowoottihiwa oororomeleya aarowanaka wiirimu.

Murumeyi Ootakhala ni Oonyoonyiwa

Otthokiheriwa wa khalai: Murumeyi ootakhala ni oonyoonyiwa yaahimmwa alipa oowoottihiwa yaale mwaakha wa 1914 yaakhoottale ovara muteko woolaleerya.

Otthokiheriwa wa nanaano: Yesu khaaphavela ohimya vahinatthi wira egrupu emosa ya awiixutti awe oowoottihiwa yaarowa okhala ntoko arumeyi ootakhala. Ohiya-vo owo aaphavela waalopola awiixutti awe voohimya sa ele yaarowa okhumelela, vakhala wira awo yaarowa wuupuwela ni opaka itthu mwa enamuna yaarowa omwiiriha owoona okhala ntoko murumeyi ootakhala ni oonyoonyiwa.