Niireke Miruku Soowi ‘Muthelaneke Akristu-ru’ Nlelo Sinnivara Muteko?

“Miyo nkiniwerya omphwanya mutthu ooreerela othelana mmulokoni, kinoona wira kinimuuluvala kihitheliwe”.

“Alopwana akina ahikhanle Anamoona tooreera murima ni tooloka. Awo khanithanya etiini aka ni anikhala ntoko toolokexa waavikana anna akina”.

Arumeyi akina a Muluku annilavula masu oolikana ni awo voohimya sa omphwanya mutthu oothelana. Masi, awo annisuwela miruku sa Paulo seiyo sini ‘muthelaneke aKristu-ru’, tthiri miruku iya anivahiwa maKristau otheene. (1 aKor. 7:39) Masi exeeni eniwiiriha atthu awo olavulaka siiso?

XEENI ANAMUNCEENE ANOOVA AYA WIRA KHANIROWA OTHELIWA

Atthu anilavula moota ola woonasa wene anuupuwela wira ari alopwana vakhaani ooloka waavikana arokora mmulokoni. Ilapo sinceene eyo ekeekhai. Muthokorerye matakiheryo manli: Elapo ya oCoreia, wa khula Anamoona 100 oohithela, 57 arokora nto 43 tari anna. Elapo ya oColombia, vannihimmwa wira ipursento 66 sa Anamoona a elapo ele arokora, nto ipursento 34 paahi tari anna.

Mapuro manceene yookhala etthu yoolema yooxankiha, okhala wira anamuyari ahikhanle anamoona aanivekela oliviwa musurukhu munceene ni mulopwana oniphavela omuthela mwanaya, nto eyo enniwiiriha anna ahirina musurukhu munceene wooceelaka othela. Nto okathi oniweha awe mixankiho iyo, murokora pooti opacerya wuupuwelaka wira vanoovila omphwanya mutthu oothelana ‘aKristu-ru’. Murokora moota owo pooti opaceryaka wiikoha, “Ti vookhalela owehereryaka omphwanya mutthu ooreerela othelana mmulokoni mwa eKristau”?a

TI VOOTTHUNEYA OMUROROMELA YEHOVA

Vakhala wira mootoko wuupuwela mwa enamuna eyo, musuweleke wira Yehova onnisuwela makhalelo anyu. Tthiri owo onnisuwela moota sinoonela anyu mwaha owo.​—2 Wah. 6:29, 30.

Hata vari siiso, malakiheryo a Yehova ari mBiibiliyani a othelana aKristu-ru nlelo annivara muteko. Nthowa xeeni? Okhala wira owo onnisuwela etthu eri yooloka wa atthu awe. Khonipaka eyo mwaha woophavela waakhoottiherya arumeyi awe otthara ephiro yoohiloka paahi, masi oniphavela wira akhaleke oohakalala. Mahiku a Nehemiya, vaavale aYuda anceene yaathenle aya athiyana amalapo yahaamurumeela Yehova, Nehemiya aahiromola ntakiheryo noohiloka na Salomoni. Nnaamwi Salomoni ‘aphentiwa ni Muluku awe, . . .’ owo ahitthekihiwa n’athiyana àmalapo’. (Neh. 13:23-26) Mwaha wa ophavela mureerelo wa arumeyi awe, Muluku onnaavaha malakiheryo arumeyi awe wira athelaneke aKristu-ru. (Esal. 19:8-11; Yes. 48:17, 18) MaKristau a ekeekhai aanixukhurela niphento nawe ni anniroromela malakiheryo anivahiwa aya ni Muluku. Mwaha wa omwiiwelela ntoko Mwene aya, annooniherya wira annisuwela wira owo ti Namalamulela a Olumwenku Wotheene.​—Mir. 1:5.

Tthiri nyuwo khamuniphavela ‘watana’ ni mutthu okhanle owoothweelelihani murowaka ottaiwene ni Muluku. (2 aKor. 6:14) MaKristau anceene olelo-va anniiwelela miruku sivahiwe aya ni Muluku ni annoona wira aathanla otthara ephiro yooloka. Masi atthu akina annikhootta wira siiso.

NLELO SINNIVARELEYA MUTEKO

Murokora oniireliwa Maggy,b a wAustralia, onnithokiherya ele yaakhumelenle vaavo aapacenrye awe osiveliwa ni mutthu ahaakhanle kristau: “Kaahiyeleela mithukumano sinceene kiphavelaka okhala ni yena. Kaahipacerya ohisiveliwa ni itthu sa Muluku”. Ratana a wIndia aahipacerya osiveliwa ni mwaapara awe a oxikola, nto owo aahipacerya omusoma Biibiliya. Masi, voohipisa ahooniherya wira aaphavela omuthela mwali ole paahi. Muhoolo mwaya aahihiya ekeekhai khukela etiini ekina wira otheliwe ni mulopwana ole.

Ntakiheryo nikina ti na Ndenguè a oCamarões. Owo aarina iyaakha 19 okathi waatheliwe awe. Iyawe ole aahimuleiherya wira owo aarowa ovikaniha weettela etiini awe. Masi nuuvira isumana piili nuumala othelana, iyawe aahimukhoottiherya orowa omithukumanoni sa eKristau. Owo onihimya so: “Kaahipacerya wunla mwaha wa omeekha. Kahoona wira nkaawerya-tho weettiha okumi aka. Kaaniivaha nthowa nuulupale”.

Ekeekhai wira atthu otheene oohaamini khahiyo ootakhala murima. Hata nyuwo muhihaawaka mwaha wa othelana ni mutthu oohaamini, masi mwaarowa okhalana makhalelo xeeni ohoolo wa Tiithi anyu a wiirimu? Mwaarowa woonela sai okathi waarowa anyu osuwela wira khamutharihenle miruku sivahiwe anyu? Etthu yootepexa otthuneya mwiikoheke so: Muluku orowa woonela sai yoothanla aka?​—Mir. 1:33.

Anna ni arokora ari olumwenku wotheene anneemererya wira othelana “aKristu-ru” ti enamuna yooloka ekhanle. Ale ahithenle wala otheliwa aalakela omutteeliha murima Muluku, vaavo vaniwehererya aya omphwanya mutthu ooreerela othelana mmulokoni. Michiko aJapão ti murokora mmosa oohitheliwa yoowo anamuyari awe yaamukhanyererya wira otheliwe ni mutthu ohikhanle namoona. Ohiya okhanyereriwa iwo paahi, anaaweha apatthani ni amusi awe yaaphwanyaka atthu oothelana mmulokoni. Owo onihimya so: “Miyo kaanuupuwela mmansaka wira, okhala wira Yehova ‘Muluku ohakalala’ nto ohakalala wahu khonilipa ni otheliwa wala ohitheliwa wa mutthu. Ni kaanikupali wira Yehova onninivaha itthu sotheene siniphavela murima ahu. Nto vakhala wira khannimphanya mutthu ooreerela othelana hata niphavelaka otheliwa, ti vooloka okhala ekumi yotheene nihitheliwe”. (1 Tim. 1:11) Nto nuuvira okathi Michiko ootheliwa ni munna mmosa ooloka ni onnitteeliwa murima mwaha wa osuwela wawe owehererya.

Anna akina anniwehererya nave wira amphwanye ole oreerela othelana. Eyo temukhumelenle Bill a wAustralia. Owo onihimya wira wookhala okathi aapacenrye awe osiveliwa aximwali a ota wa muloko. Masi owo aanisyaka wiiraana vanceene ni atthu awo. Nthowa xeeni? Okhala wira owo khaaphavela opaka etthu yaarowa omwiiriha othelana ni “mutthu òhamini”. Muhina mwa iyaakha sinceene aakhala arokora yaaphavela awe masi awo khiyaamutthuna. Bill aahiwehererya iyaakha 30 wira omphwanye mutthu ooreerela othelana. Bill onihimya so: “Miyo nkiniikhupanyerya”. Owo onihimya-tho so: “Vano kooreelihiwa vanceene okhala wira komphwanya mutthu oolaleeryana, oomusomana Biibiliya ni oomulompana Muluku hoothe. Kinnitteeliwa murima waasuwela ni oviriha okathi vamosa ni apatthani a mwaaraka, okhala wira otheene ahu ninnimurumeela Yehova. Ninnilipiha ekasamento ahu nirumeelaka malakiheryo alempwale mBiibiliyani”.

OKATHI ONINWEHERERYA ANYU YEHOVA

Vano munrowa opakaka exeeni okathi oniwehererya anyu wira Yehova wookhaliheryeni? Etthu ekhanle anyu owuupuwelela ti nthowa ninwiirihani ohithela wala ohitheliwa. Vakhala wira munnoona wira nthowa nuulupale ti nle nri mBiibiliyani noowi “muthelaneke aKristu-ru”, nto nyuwo munireerela ottottopeliwa mwaha wa wiiwelela wanyu yooruma ya Muluku. Musuwelexeke wira Yehova onnitteliwa murima mwaha wa wiimananiha wanyu opaka itthu siniwiirihani wiiwelela Nuulumo nawe. (1 Sam. 15:22; Mir. 27:11) Vano nvikanihe ‘omuhimerya ovelavela wanyu wothene’ Muluku okathi onipaka anyu mavekelo. (Esal. 62:9) Mavekelo anyu anookhalana yootaphulela yuulupale vakhala wira munnivekela ni murima anyu wotheene ni moohihiyererya. Wataana wanyu ni Muluku onrowa wunnuwaka nihiku ti nihiku, vaavo vanrowa anyu wiimananihka oxintta mixankiho sotheene sinoophwanyani. Mwaaminiki wira Muluku Muulupalexa onnisiveliwa ni arumeyi awe oororomeleya ni wira onnoovahani efaita yuulupale. Owo onnivaha efaita itthu sinoothowani ni siniphavela anyu. Ekeekhai wira Yehova khonimulaiherya omutheliha mutthu. Hata vari siiso, vakhala wira nlelo munnimphavela mutthu oothelana, Muluku onnisuwela moota wowoophwanyihani itthu sotheene sinoothowani.​—Esal. 145:16; Math. 6:32.

Okathi mukina nyuwo poori opaceryaka woona ntoko Davidi yoowo aahimmye so: “Apwiya! Mukàkhule, mukàkuvele! Eroho aka ehanle okitthyawa. Muhikinyanyalé”. (Esal. 143:5-7, 10) Okathi owo, munvahe eparakha Tiithi anyu a wira owooniheryene yootthuna awe wa nyuwo. Nyuwo pooti opaka eyo musukaka okathi wira musome Nuulumo nawe ni otthokelela ele enisoma anyu. Munoosuwela malamulo awe ni munimoona moota owo saakhapenlenle awe atthu awe khalai. Omwiiwelela wanyu Yehova, onimookhaliheryani okhala oororomeleya ni okhalana ankhili.

Exeeni enrowa wiiriha iyaakha siniviriha anyu muri mekhinyu okhala soohakalaliha ni sookumiherya mureerelo? Nyuwo pooti orumeela iyaakha iyo wira munnuuherye ankhili, ovaha, nthiti, oreera murima, omoova Muluku, ni nsina nooloka seiyo siri mikhalelo sooloka sinikumiherya ohakalala vatthokoni. (Maph. 24:16-21; Ruth. 1:16, 17; 2:6, 7, 11; Mir. 31:10-27) Mpaceryeke ophavela Omwene ni okhalela nthiti muteko woolaleerya ni miteko sikina sa eKristau; wira siiso onimookhaliheryani. Bill, yoole oromoliwe wanipacerya, ohimyaka iyaakha iye saavinrye ophavelaka othela oni: “Iyo saahivira mowaakuveya! Kaahirumeela okathi ole mmutekoni wa Yehova kivaraka muteko wa opioneero”.

Tthiri “othelana aKristu-ru”, nlelo etthu yooloka. Wiiwelela yooroma eyo onimookhaliheryani onvuwiha Yehova ni ophwanya mareeliho ahinimala. Biibiliya onihimya so: “Òreriwa t’ale anattittimiha Apwiya ni owova, ale anitthara ikano saya n’usiveliwa. Amusi aya anokhalana ekumi yinjene n’uthajiri, exariy’aya enolekela wa mahiku othene”. (Esal. 112:1, 3) Vano mpake okhala yoolakela anyu wiiwelela yooruma yoowi “muthelaneke aKristu-ru”.

[Inoota]