BIIBILIYA ONNIRUKUNUXA MIRIMA SA ATTHU

Makoho mararu yaahirukunuxa okumi aka

Elavuliwe ni Doris Eldred

MWAAKHA OYARIWE AWE: 1949

ELAPO OYARIWE AWE: WESTADOS UNIDOS

MWAHA ENE: KAAVYA OSUWELA YOOLAKELA YA OKUMI

MWEETTELO AKA WA KHALAI: Kiyariwe epooma yaamukhaani ya Ancram, oNova York, EUA. Epooma aka yaahisareya atthu yaakhapelela inama khuta nihiku. Tthiri, saahikhala inyompe sinci waavikana atthu.

Emusi ahu yaaneetta ekerexa ya epooma ele. Ettiminku vaasisu ataata yaanipuputtha ixapattho saka; nuumala-vo kinarowa oxikola wa ekerexa kimukunxe ene Biibiliya mwaamukhaani ootteela kaavahiwe aka ni apiipi. Miyo ni axinnaka naahiixuttihiwa ovara muteko mooluttuweliwa, waattittimiha ni waakhaliherya anamwaattamanani ni oxukhurela mareeliho ahu.

Nuumala wunnuwa, kaahithaamela opuro mukina nto kikhala prisoori. Kaahikhalana makoho manceene voohimya sa Muluku ni okumi. Anaxikola aka akina yaari oosuwela itthu. Akina nnaari, masi yaaniimananiha vanci. Nave-tho akina yaari aretta, masi akina yaari akumi. Eyo yaari etthu yootakhala. Ikwaha sikina, anamuyari aya anamwane awo yaahimya so: “Muluku oniphavela siiso”. Kaaniikoha nthowa naya Muluku oneemya awe wira anamwane akina ayariweke ari ene aretta, masi ahitthenke etthu.

Nave-tho, kaaniikoha so: ‘Etthu xeeni yooloka ekhanle aka oopaka mookumini mwaka?’ Kaanoona wira okumi khiwaapisa. Kaayariwe emusi yooloka, kaahisoma ixikola sooloka, nave kaanivara muteko waakisivela. Masi okumi aka khiwaarina yoolakela. Kuupuwela paahi otheliwa, okhalana empa yooloka, waayara anamwane, ovara muteko mpakha oreformari, nto muhoolo othaamela empa enikhapeleliwa atthu oowuuluvala. Kaaniikoha akhala wira ehaavo etthu ekina yoopaka mookumi.

MOOTA BIIBILIYA ORUKUNUNXE AWE OKUMI AKA: Ekwaha emosa elimwe, kaahirowa wEuropa ni maprisoori makina. Naahixukurya mapuro ntoko Westminster Abbey, Notre-Dame de Paris, oVaticano, ni ikerexa sinci saamukhaani. Khula opuro, kaanipaka makoho. Nuumala otthikela owaani oSloatsburg, oNova York, kaahixekurya ikerexa sinci. Masi khuuvo aakhula makoho aka.

Nihiku nimosa, naxikola aka aarina iyaakha 12 aahikikoha makoho mararu. Wanipacerya, aahikikoha akhala wira kaanisuwela wira owo aari Namoona a Yehova. Miyo kaahaakhula wira aayo. Moottharelana, aahikikoha akhala wira kaaniphavela waasuwela saana Anamoona a Yehova. Kaahaakhula-tho wira aayo. Vaneeraru, aahikikoha opuro waakhala aka. Okathi kaamulenle aka opuro ene, naahoona wira naarimwaattamana. Nkaasuwela wira makoho ale mararu a mwaaruusi ole yaamurukunuxa okumi aka.

Nuuvira mahiku vakhaani, mwaaruusi ole aahimweettiha bisikleta awe khurwa owannyaka nto khupacerya okisomiha Biibiliya. Kaahipaka makoho yaale kaakohale aka ahooleli anci a itiini. Masi, moovirikana naawo, ole aahikooniherya waakhula waya omurumeelaka Biibiliya aka. Nkaasuwela wira Biibiliya aanaakhula makoho awo!

Ele kaaxuttaka yaanikihakalaliha vanceene. Kaahitikinihiwa vaavo kaamusomme aka 1 Yohani 5:19, yoowo oni: “Elapo yothene enniweriwa ni Mutakhali”. Kaahihakalala mwaha woosuwela wira khahiyo Muluku tonikumiherya itthu sootakhala, masi ti Satana; ni wira moohipisa Muluku onoomaliha itthu iyo. (Wisupulula 21:3, 4) Kaahoona wira Biibiliya onnivareleya muteko vaavo onitthokiheriwa awe saana. Nnaamwi Namoona aakisomiha aarina paahi iyaakha 12, kaahoona wira ekeekhai ti ekeekhai pooti okhalaka mwaaruusi oniixuttiha.

Hata vari siiso, kaahiphavela osuwela akhala wira Anamoona anneettela ele anilaleya aya. Nihiku nimosa, mwaaruusi ole aahihimya wira maKristau eekeekhai annooniherya opixa murima ni oreera murima. (aGalasia 5:22, 23) Kaahilakela omweehererya. Nihiku nimosa, moolakela kaahipisa ophiya opuro kaasomaka. Kaahiikoha so: ‘Kiireke onoowerya okilipelela? Akhala wira aayo, kiireke khonnanariwa? Okathi kaakhurunwe aka mukaaroni, kahinweha akilaathale ene owannyaka akilipelelaka. Aahikitthimakela khulavula so: “Kaahala vakhaani otthikela owaani waavekela amaama wira nirowe oxipitali ni opoliisia wira nasuwele akhala wira mwamukumi, maana nyuwo khamutonko opisa ophiya okathi wa yoosoma anyu. Kaahixanka vanci.

Okathi omosa, kaahimukoha itthu seiyo kuupuwelaka wira mwaana a iyaakha 12 khaarowa owerya waakhula. Kuupuwela wira aarowa opakelela. Vaavo kaamukonhe aka makoho awo, owo aahikiwehexexa ni khuhimya so: “Nikoho nlo ti nooxankiha. Kinoolepa wira kaakohe anamuyari aka”. Nihiku nikina arwiiye awe okiixuttiha aahiruuha erevista Owehaweha yeeyo yaakhula makoho aka. Eyo ti etthu yaakiirinhe okhala Namoona, kiire so, iliivuru saya seiyo sinimutthokiherya Biibiliya saahaakhula makoho aka otheene. Kaahivikaniha osoma ni mwaaruusi ole nto nuuvira mwaakha mmosa kaahibatiziwa khukhala Namoona a Yehova.a

MOOTA OTTOTTENLE AKA MUREERELO: Nuuphwanya waakhuliwa wa makoho aka, kaahiphavela waaleela atthu akina ele yaaxuttale aka. (Matheyo 12:35) Wanipacerya, amusi aka yaahikilupattha, masi nuuvira okathi yaahihiya opaka eyo. Amaama yaahipacerya omusoma Biibiliya ehinatthi okhwa. Nnaamwi akhwiiye ene ehinatthi obatiziwa, kinnikupali wira yaahithanla omurumeela Yehova.

Eyaakha ya 1978, kaahitheliwa ni Elias Kazan. Nto eyaakha ya 1981, naahilattuliwa wiirela mpantta emusi ya oBetheli ya wEstados Unidos.b Mooriipiha murima, Elias aahikhwa nuuvira iyaakha 4 paahi. Nnaamwi kaari naamukhweli kaanivikaniha orumeela oBetheli, muteko yoowo waakilipiha ni okiiriha waatteliwa miteko.

Eyaakha ya 2006, kaahitheliwa ni Richard Eldred, a emusi ya oBetheli. Nto ninnivikaniha ohakalala ni eparakha ya orumeela oBetheli. Omusoma Biibiliya wookikhaliherya ophwanya waakhuliwa wa makoho aka, ni okhalana yoolakela ya okumi; masi sotheene iya saapacenrye ni makoho mararu a mwaaruusi!

[Inoota]