Kristu Ti Owerya wa Muluku
“Kristu ti owerya” wa Muluku”.—1 AKOR. 1:24.
MUNOOWERYA OTTHOKIHERYA?
Exeeni Yesu oonihenrye awe okathi waathatunxe awe maasi khukhala eviinyu ofestani ya ekasamento?
Exeeni yaamwiirinhe Yesu opaka mwiiriirya onihimmwa eliivuru ya Matheyo 14:14-21?
Exeeni Yesu oonihenrye awe okathi waamaalinhe awe epheyo yuulupale mphareya?
1. Exeeni yaamwiirinhe Paulo ohimya wira “Kristu ti owerya” wa Muluku?
YEHOVA aahooniherya ikuru sawe suulupale orweela mwa Yesu Kristu. Ivangelyo sooxeexe sinnihimya itthu sinceene sa miiriirya saapakiwe ni Kristu seiyo sinilipiha waamini wahu. Nave, owo aahipaka miiriirya sikina. (Math. 9:35; Luka 9:11) Tthiri Yesu aahooniherya ikuru sa Muluku. Tivonto murummwa Paulo aalavunle awe oriki: “Kristu ti owerya” wa Muluku. (1 aKor. 1:24) Masi mireerelo xeeni miiriirya sa Yesu sinikumiherya aya mweekumini mwahu?
2. Exeeni enniixuttiha aya miiriirya sa Yesu?
2 Murummwa Pedru aahimmye wira Yesu aahipaka miiriirya, wala “sotikiniha”. (Mit. 2:22) Mitikiniho Yesu saapanke awe okathi aaryaawe valaponi saari yowooniherya ya mareeliho maalupale anrowa awe okumiherya muhoolo okathi onirowa awe olamulelaka elapo. Iyo saari eruku ya miiriirya sinirowa awe opaka Yesu elapo esya ya Muluku yotheene! Miiriirya sawe sinninooniherya makhalelo awe ni a Tiithi awe. Vano nrowe nithokorerye miiriirya saapanke awe Yesu wira noone ele enikumiherya aya mweekumini mwahu olelo-va ni muhoolo.
MWIIRIIRYA ONNIIXUTTIHA OVAHA
3. (a) Mutthokiherye makhalelo yaamwiirinhe Yesu opaka mwiiriirya awe woopacerya. (b) Moota xeeni ovaha wa Yesu waattittimiheriwe aya oKanani?
3 Yesu aahipaka mwiiriirya awe woopacerya oniirani na ekasamento yaapakiwe oKanani wa oGalileya. Woonasa wene niira nle yaahirwa atthu anceene ovikana ale yaalipeleliwa. Tivonto, eviinyu yaamanle aya. Eriyari ya anamalattuliwa awo aahikhala Maria, maama awe Yesu. Mwa iyaakha sinceene, Maria moohaaniherya aanuupuwelela yooleiherya ya eprofesia yaamuhimya mwanawe ole, yoowo iireliwa “Mwana a Muluku mulupalexa”. (Luka 1:30-32; 2:52) Niireke owo aanikupali wira Yesu aahikhalana ikuru sahaasuweliwa nlelo? Eyo yaahoonihereya oKanani, vaavo Maria ni Yesu, yammorenle aya ikharari mulopwana ole aamuthelaru ni yaaphavela aya onvukula wuuliwa muru. Yesu aanisuwela wira mahiku ale owaakhela saana aletto, yaari yooruma yuulupale. Tivonto aapanke awe mwiiriirya, khithatuxa iliituru 380 sa maasi khukhala “evinyu yosiva sana”. (Mmusome Yohani 2:3, 6-11.) Niireke Yesu aarookhanyereriwa opaka mwiiriirya ole? Nnaari. Owo aawoonela othunku atthu ale ni aamutakiha Tiithi awe a wiirimu yoowo oovaha.
4, 5. (a) Etthu xeeni enniixuttiha aya mwiiriirya woopacerya wa Yesu? (b) Moota xeeni mwiiriirya waapakiwe oKanani onnooniherya aya ele enrowa okhumelela muhoolo?
4 Mwiiriirya wa Yesu waahikumiherya eviinyu yoosiva saana, yinceene yaawuriwe ni atthu oowaatta. Niireke nyuwo munniwerya woona ele enniixuttiha awe mwiiriirya ola? Mwaha wa Yesu opaka wawe mwiiriirya ole moohikhanyereriwa ennooniherya wira owo ni Tiithi awe annivaha efaita okhala saana wa atthu. Yesu ni Tiithi awe khahiyo anamilili. Vano nkahaya muupuwelele moota Yehova onrowa awe orumeela owerya wawe mooreera murima okathi onrowa awe opaka efesta ya yoolya yinceene aavahaka “atthu a maloko othene” a valaponi.—Mmusome Yesaya 25:6.
5 Vano muupuwelele ela! Onoophiya okathi onirowa aya okumiheriwa itthu sotheene sinnithowa ntoko yoolya yooloka ni mapuro ookhala ooreerela aniphiyerya atthu otheene. Tthiri otteeliwa wahu murima onnincerereya vaavo vanuupuwelela ahu itthu iyo sooloka sinrowa okumiheriwa ni Yehova mParayiisu valaponi.
6. Yesu aarumeela ikuru sawe sa opaka miiriirya ophavelaka mureerelo wawani, nto ninrowa omutakiha sai?
6 Ti vooreerela wuupuwelela wira okathi Diabo aamweeherenrye awe Yesu wira othatuxe maluku akhale iphaawu, Kristu aahikhootta orumeela ikuru sawe mmureerelo awe paahi. (Math. 4:2-4) Masi owo aanirumeela ikuru sawe wira aaphwanyihe mureerelo atthu akina. Nto ninrowa omutakiha sai Yesu yoowo aathokorerya atthu mooreera murima? Owo ahaatumererya arumeyi a Muluku otheene wira “mwavaheke akhw’inyu”. (Luka 6:38) Niireke hiyo nnoowerya wooniherya wira na atthu oovaha naalattulaka akina wira arwe vatthokoni vahu olya yoolya ya werutthuni ni omunepani? Niireke hiyo nnoowerya ovaha okathi ahu wuumalani wa mithukumano wira nimukhaliherye mutthu onitthuneya, ntoko onwiriyana munna oninsayari mwaha onirowa awe olavula mmulokoni? Nikhaliheryo xeeni nikhanle ahu oowaavaha ale ahilimalenle muteko woolaleerya? Hiyo nnimooniherya wira nihiixutta etthu ni ovaha wa Yesu vakhala wira ninnaavaha atthu akina mireerelo sahu, ni nikhaliheryo na omunepani atthu akina khula okathi oniwerya ahu.
“ATTHU OTHENE YAHILYA MPAKHA OVONA”
7. Muxankiho xeeni onrowa ovikaniha okhala mwaha wa makhalelo ala ootakhala?
7 Osikhini khopacenrye naanano. Yehova ahaahimeerya aIsarayeli khalai wira khula okathi yaamukhalanaka amasikhini mulaponi mwaya. (Otum. 15:11) Iseekulu sinceene muhoolo mwaya, Yesu aahihimya wira: “Vekekhai alipa-òhawa mokhalana eriyari anyu mahiku othene”. (Math. 26:11) Niireke Yesu aaphavela ohimya wira elapo epakeliwe okhaliwa ni amasikhini paahi? Nnaari, owo aaphavela ohimya wira makhalelo ala ootakhala ahimanle, tthiri anookhalaka atthu oohaawa valaponi. Ti maana aya, vannitteeliha aya murima osuwela wira miiriirya sa Yesu saari ethoonyeryo sa okathi wooloka Moomweneni muhoolo, vaavo atthu otheene anrowa aya okhalana yoolya yowaatta ni olya saana!
8, 9. (a) Exeeni yaamwiirinhe Yesu opaka mwiiriirya wa waalyiha atthu ikonto sinceene? (b) Exeeni enootikinihani voohimya sa mwiiriirya wa waalyiha atthu ikonto sinceene?
8 Omuhimyaka Yehova, nasaalimo mmosa aalavunle so: “Munnitthukula matat’anyu, munnavaha yolya atthu othene anaphentanyu”. (Esal. 145:16) Omutakihaka Tiithi awe, ‘Kristu owerya’ wa Muluku, ikwaha sinceene aahitthukula matata awe nto khwaaphwanyiha atthareli awe itthu saathowa. Owo khaapaka itthu iyo ophavelaka wooniherya wira okhalana ikuru paahi. Yaamwiiriha waari owoonela othunku atthu akina. Nrowe nithokorerye ele elempwale eliivuru ya Matheyo 14:14-21. (Mmusome.) Awiixutti a Yesu yaahirowa omuleela muxankiho wa yoolya waarina aya. Etala khiyaavonle yaawo paahi, masi yawoonela othunku atthu a muttitthi ole muulupale yaamutthara Yesu yeettaka mwentto akhumaka mittetthe saya. (Math. 14:13) Nto Yesu aapanke exeeni?
9 Orumeelaka iphaawu thanu ni ihopa piili, Yesu aahaalyiha alopwana 5.000, waahela muhina athiyana ni anamwane! Niireke hiyo khannitikinihiwa moota Yesu aarumeelale awe owerya wawe opaka miiriirya alyihaka imusi iye sotheene, waahela muhina anaaya? “Atthu othene yahilya mpakha ovona”. Eyo enooniherya wira yaahikhumelela yoolya yowaatta. Yesu mooreera murima khaakumihenrye iphaawu paahi, masi owo aahikumiherya yoolya yowaatta, yaaphwanyinhe ikuru atthu ale wira awerye otthikela mmaitthokoni mwaya. (Luka 9:10-17) Nto yoolya yaahanle yaahisareya ithokwa 12!
10. Murukunuxo xeeni voohimya sa osikhini onrowa okhumelela voohipisa?
10 Olelo-va atthu imilyau imiya sinceene khaniwerya ophwanya itthu sinaathowa mwaha wa ohixariya wa apinaatamu anilamulela. Nnaamwi anna akina arineene etthu yoowiikhuuriha, nlelo ‘khanivona’ oratteene. Masi, voohipisa onoophiya okathi apinaatamu owiiwelela anrowa aya okhalaka elapo ehikhanle atakhali ni osikhini. Vaakhanle wira nyuwo munniwerya, niireke khimwaarowa omaliha mixankiho sa apinaatamu? Muluku Oowerya Sotheene ookhalana owerya ni onniphavela opaka eyo voohipisa. Tthiri woopoliwa wahu ori vakhiviru!—Musome Esalimo 72:16.
11. Exeeni enookupalihani wira Kristu onrowa orumeela owerya wawe wira okumiherye mireerelo valaponi, nto eyo enootumereryani opaka exeeni?
11 Okathi Yesu aaryaawe valaponi, aavanre muteko mapuro ni okathi vakhaani paahi, mwa iyaakha tthaaru nnimeya. (Math. 15:24) Vano ntoko Mwene oovuwihiwa, owo onrowa wunnuuherya opuro onrowa awe olamulelaka mpakha omalenle elapo. (Esal. 72:8) Miiriirya aapanke awe Yesu sinninikupaliha wira ookhalana owerya ni onniphavela orumeela okhulupale awe wira okumiherye mireerelo valaponi. Ekeekhai wira hiyo khanniwerya opaka miiriirya, masi nnoowerya waathoonyerya atthu mwa nthiti Nuulumo nuupuxeriwe ni Muluku. Iprofesia sa mBiibiliyani sinnileiherya wira onookhala okathi wooloka muhoolo. Hiyo nikhanle Anamoona a Yehova oobatiziwa, ninsuwela itthu iyo sooloka sa muhoolo, nto khamunoona wira nookhalana muritti muulupale wa waaleela atthu akina? (aRom. 1:14, 15) Tthiri wuupuwelela eyo oniiriheke ophavela waalaleerya akina ihapari sooreera sa Omwene wa Muluku.—Esal. 45:2; 49:4.
YESU AANIWERYA ORUMA IKURU SEEPHATTU VALAPONI
12. Exeeni enniiriha okupaliki wira Yesu onnisuwela oratteenexa mweettelo wa itthu sotheene siri valaponi?
12 Okathi Muluku waapattuxa awe elapo ni itthu sotheene siri muumu, Mwanawe mmoseene aari vaavo ntoko funti a “miteko iye sothene”. (Mir. 8:22, 30, 31; aKol. 1:15-17) Tthiri, Yesu aanisuwela mweettelo wa itthu soopattuxiwa siri valaponi. Owo onnisuwela orumeela, okhapelela ni okawa mireerelo siri valaponi mmukhalelo woolokexa.
13, 14. Nvahe ntakiheryo nnooniherya wira Yesu aaniwerya oruma ikuru seephattu?
13 Okathi aaryaawe valaponi, Yesu aahooniherya wira owo ti “owerya” wa Muluku okhala wira aaniwerya oruma wala wettiiherya ikuru seephattu. Moone moota aathokorenrye awe epheyo yoowali yaahala vakhaani owiiva awiixutti awe. (Mmusome Marko 4:37-39.) Musomi onitokosa itthu soolempwa mBiibiliyani onihimya wira: “Nuulumo na eGriki noowi [“epheyo yowali” nirumeeliwe eliivuru ya Marko 4:37] enihimmwa epheyo yuulupalexa wala munamukhaya. Eyo khenihimya eyuupuri paahi . . . masi enihimya epheyo yuulupale enikhuma eriyari ya meeku ni itari suulupale, epula yowaatta yeeyo eniwerya wuutuwanyerya khula etthu”. Eliivuru ya Matheyo enniwanyeiha epheyo ele eriki “mwanamukhaya” muulupalexa.—Math. 8:24.
14 Nwehe ele yaakhumelenle: Yesu aarookhulumuwa mwaha wa muteko woolaleerya waavara awe. Mawimpi maalupale yaanimana ekalawa ele, nto maasi ni nipheru yaanikela mukalawani mme. Hata waakhumelenle onyakula wa epheyo ni ottikinyeya wa ekalawa ele, Yesu aahivikaniha orupa. Erutthu awe yaatthuneya ophumurya. Awiixutti ale oowoova ene yaahirowa onvenxa Yesu khumuhimeerya wira: “Pwiya, munòpole! Nihokhwa!” (Math. 8:25) Ovenyaka vaarupa awe, Yesu aahipwapwela epheyo ele ni ephareya ni masu ala: “Mmàle! Mwikhalele!” Naananoru epheyo yahiikhalela. (Mar. 4:39) Tthiri Yesu aarooruma epheyo ele ni ephareya wira emaaleleye. Nto exeeni yaakhumelenle? Waahikhumelela “omàleleya wulupale”. Tthiri Yesu aahooniherya ikuru suulupale!
15. Moota xeeni Muluku Oowerya Sotheene woonihenrye awe wira onoowerya oruma ikuru seephattu muhoolo?
15 Yehova tanvanhe Kristu ikuru iye sotheene, nto nookhalana mathowa manceene anniiriha okupali wira Muluku Oowerya Sotheene onniwerya oruma moomalela ikuru sa ephattu. Muthokorerye matakiheryo vakhaani. Ehinatthi okhumelela Epula ya Mutaaseke, Yehova aahimmye so: “Yavirá mahiku mathanu na manli, kinorupiha epula mpakha mahiku miloko mixexe, othana n’uhiyu”. (Maph. 7:4) Vamosaru, eliivuru ya Okhuma 14:21, ninsoma so: “Apwiya [Yehova] yahòpiha epheyo yulupale mphareya memmo, ekhumaka oniphattuwa nsuwa. . . Ephareya yahùma”. Ni hiyo ninnisoma eliivuru ya Yona 1:4: “Nto Apwiya yahikumiha mphareya memmo epheyo yulupale, khukhumelela mwanamukhaya mulupale. Ekalawa yahanle vakhani ophweya”. Ti voohakalaliha osuwela wira Yehova onniwerya oruma ikuru seephattu. Nto vannooneya oratteene wira elapo ela enrowa okhapeleliwaka saana.
16. Xeeni varyaaya voohakalaliha osuwela wira Mpattuxa ahu ni Mwanawe oopacerya oyariwa anniwerya oruma ikuru seephattu?
16 Tthiri ti voolipiha woona ikuru sa Mpattuxa ahu ni funti awe a “miteko”. Okathi awo anrowa aya okhapelelaka elapo moomalela, mwa iyaakha ekonto emosa, atthu otheene anrowa okhalaka oovareleleya. Ihasara sa ephattu sinrowa omala-mala. Atthu khanirowa woovaka ovulalihiwa ni munamukhaya, atsunami, avulkau wala itetere akhalaka elapo esya. Tthiri tivootteeliha murima wuupuwelela okathi ohinrowa aya okhwaaka wala orakala atthu mwaha wa ihasara sa ephattu okhala wira “empa ya Muluku [enrowa okhala] variyari v’atthu”! (Wis. 21:3, 4) Nihaana okupali wira owerya wa Muluku onrowa orumeeliwa ni Kristu wira orume ikuru seephattu okathi wa olamulelo wa iyaakha ekonto emosa.
MMUTAKIHEKE MULUKU NI KRISTU NENNA-VA
17. Enamuna xeeni ekhanle ahu oomutakiha Muluku ni Kristu nenna-va?
17 Ekeekhai wira hiyo noovirikana ni Muluku ni Yesu, khanniwerya okhoottiherya okhumelela ihasara seephattu, masi nookhalana owerya vakhaani. Ninrowa orumeela sai owerya iwo? Enamuna emosa ti ottharihela ele enihimmwa eliivuru ya Miruku 3:27. (Musome.) Okathi sinaakhumelela aya mixankiho anna, hiyo nnoowerya orowa waamaaliha naavahaka nikhaliheryo na werutthuni, mmuupuweloni ni omunepani. (Mir. 17:17) Mwa ntakiheryo, hiyo nnoowerya waakhaliherya ale yaakhumelenle ehasara yeephattu. Nwiriyane masu a naamukhweli mmosa aalavunle awe oxukhurelaka nikhaliheryo naavahiwe awe nuumala ophwanyiwa ni munamukhaya yoowo aapwanyunle empa awe wira: “Miyo kinnixukhuru vanceene mwaha wa okhala mootthokeyani mwa Yehova, ohiya paahi mwaha wa mireerelo sivahiwe aka, masi mwaha wa nikhaliheryo na omunepani”. Nkahaya nwehe-tho masu a murokora mmosa oohitheliwa yoowo aari ooxankiheya okathi waaweha awe enupa awe emonre ene mwaha wa epheyo yuulupalexa. Nuumala okhaliheriwa, owo aalavunle so: “Nkiniwerya ohimya moota kitteeliwe aka murima! Tthiri nkinoona yoohimya . . . Kooxukhuru Yehova!” Ninnitteeliwa murima mwaha wa wiirela mpantta nikhuuru nimosa na anna oowiiraana anikhapelelana mooreerela mukina ni mukhwaawe. Etthu yuulupale enniiriha ohakalala osuwela wira Yehova ni Yesu Kristu annaakhapelela oratteene atthu aya.
18. Exeeni enoovarani murima voohimya sa ele yaamwiirinhe Yesu opaka miiriirya?
18 Okathi waalaleerya awe valaponi, Yesu ahooniherya wira owo aari “owerya” wa Muluku. Masi exeeni yaamwiiriha Yesu opaka itthu iye? Okhala wene Yesu khonarumeele owerya wawe mmureerelo awe paahi. Masi miiriirya sotheene aapanke awe sahooniherya ophenta wawe emusi ya apinaatamu. Ninrowa othokorerya eyo muru onittharelana.