Mulipeleleke!
“Wapisá ohikhumelenle, mulipeleleke!”—HAB. 2:3.
MWAAROWA WAAKHULA SAI?
Mathowa xeeni arina ahu anniiriha okupaliki wira ninkhala mahiku ookiserya?
Xeeni vahinreerela ahu ohiya olipelela hata oviraka okathi munceene?
Ninrowa wooniherya sai wira ninnilipelela omala wa makhalelo ala a itthu sotakhala?
1, 2. Mukhalelo xeeni orina aya anamakokhorela a Yehova okhuma khalai?
ANAMAKOKHORELA a Yehova akhumme khalai olipelela wiiraneya wa iprofesia siri mBiibiliyani. Mwa ntakiheryo, Yeremiya aahipaka eprofesia yaahimya wira muttetthe wa oYuda wampwetexiwa ni aBabilonia, mwaakha wa 607 AEC, tthiri eyo yaahikhumelela. (Yer. 25:8-11) Yesaya, uupuxeriwaka ni Yehova aahihimya vahinatthi wira atthu a Muluku yaamutthikela elapo aya, oriki: “Òreriwa t’ale anetta emuroromelaka Muluku”. (Yes. 30:18) Mikeya, yoowo iprofesia sawe saahimya atthu a Muluku khalai, aahipaka yoolakela ela: “Vano miyo kinnawehererya Apwiya [Yehova]”. (Mik. 7:7) Mwa iseekulu sinceene, arumeyi a Muluku yaanilipelela waakhwanela wa iprofesia saamuhimya Mesiya, wala Kristu.—Luka 3:15; 1 Ped. 1:10-12.a
2 Arumeyi a Yehova a mahiku ala annilipelela nave wiiraneya wa iprofesia sinimuhimya Mesiya nlelo sihinatthi waakhwanela. Orumeelaka Omwene wa Mesiya, Yehova voohipisa onrowa omaliha ohaawa wa apinaatamu ni opwetexa olumwenku ola wootakhala onilamuleliwa ni Satana. (1 Yoh. 5:19) Tivonto vanireerela aya hiyo ohela mmuruni wira olumwenku ola voohipisa onoophiya wanikisa waya.
3. Nikoho xeeni ninkhumelela vakhala wira nipacenrye khalai olipelela omala wa olumwenku ola?
3 Hiyo nikhanle arumeyi a Yehova, ninniphavela vanceene woona yootthuna ya Muluku yiiraneyaka ‘wirimu ni vathí-va’. (Math. 6:10) Nuuviriha okathi munceene alipelelaka wanikisa wa makhalelo ala ootakhala, aakhala atthu akina anikoha so: ‘Niireke nookhalana mathowa ooloka a ovikaniha olipelela?’ Nrowe nimananihe wiiwexexa.
VANNIREERELA OVIKANIHA OLIPELELA?
4. Nthowa xeeni nuulupale ninniiriha ovikaniha olipelela?
4 Biibiliya onnilavula mowiiwanyeya moonelo wooloka voohimya sa opwetexiwa wa makhalelo ala oohiloka. Yesu aahaahimeerya awiixutti awe wira “mulipeleleke” ni “muhirupé”. (Math. 24:42; Luka 21:34-36) Okhala wira Yesu ooniruma ovikaniha olipelela, nto nlo nthowa nuulupale ninniiriha opaka eyo! Nikhuuru nootthokiheya na Yehova noovaha ntakiheryo nooloka. Ninnikumiherya iliivuru sinnilopola siiraka: ‘nwehereryeke nihiku n’Apwiya, mwakuvihaka orwa waya’ ni wira niwehereryeke elapo esya eleiheriwe ni Muluku.—Mmusome 2 Pedru 3:11-13.
5. Xeeni varyaaya vootepexa otthuneya ohirupa mahiku ala?
5 Nnaamwi olipelela nihiku nlo yaari etthu yootthuneya wa maKristau yaakhala iseekulu sivinre, nto okathi ahu ola ti vootepexa otthuneya olipelela. Nthowa xeeni? Okhala wira hiyo ninkhala okathi wa orwa wa Kristu. Ekanyeryo ya orwa wawe epacenrye wooneya oratteene mwaakha wa 1914. Nave ekanyeryo erina ithoonyeryo sinceene, enihela muhina ohononeya wa makhalelo valaponi ni olaleeriwa Omwene elapo yotheene, nto itthu iyo sinooniherya wira hiyo ninkhala ‘okathi w’omala olumwenku’. (Math. 24:3, 7-14) Okhala wira Yesu khaahimmye okathi waarowa ovira ohirwiiye, nto hiyo nintthuneya olipelela ni ohirupa.
6. Xeeni vaniwehererya ahu wira mixankiho sinrowa wuncerereyaka valaponi vaavo vanaattamela ahu wanikisa?
6 Woonasa wene hiyo pooti wiikohaka so: Niireke ‘okathi w’omala olumwenku’ onihimmwa okathi onirwa muhoolo yoowo makhalelo a valaponi anrowa aya otepa ohononeya? Ekeekhai wira Biibiliya onnihimya wira itthu sotakhala sinrowa oomutepaka “okathiwokiserya”. (2 Tim. 3:1, 13; Math. 24:21; Wis. 12:12) Tthiri ninniwehererya wira mixankiho valaponi sinrowa wuncerereyaka ovikana siryaaya olelo-va.
7. Eliivuru ya Matheyo 24:37-39 enihimya exeeni enrowa okhumelela mahiku ookiserya?
7 Masi munoona wira mixankiho sinrowa wuncerereya mpakha vai ahinatthi okhumelela “maxakha malupale”? (Wis. 7:14) Mwa ntakiheryo, nyuwo munuupuwela wira enookhumelela ekhotto ya ilapo sotheene, othowa yoolya, wala okhumelela iretta khula etthoko? Vaakhanle wira saamwiiraneya itthu iyo, nto atthu otheene naale anivaanyiha yanwerya woona wira iwo waakhwanela wa eprofesia ya mBiibiliyani. Masi, Yesu aahimyale wira anamunceene khanrowa ‘wanyiherya etthu’ wira owo ohoorwa, nto anrowa ovikaniha ovara miteko sa khula nihiku mpakha okathi omala. (Mmusome Matheyo 24:37-39.) Tthiri, Biibiliya onnooniherya wira mahiku ookiserya mixankiho khasinrowa otepexa vanirowa aya owiiriha atthu otheene osuwela ni waamini wira wanikisa woophiya.—Luka 17:20; 2 Ped. 3:3, 4.
8. Etthu xeeni enaakhaliherya ale aniiwelela yooruma ya Yesu ya ‘olipelela’?
8 Hata vari siiso, ekanyeryo eyo enoovara muteko aya, waakhwanela waya onimwaakhaliherya ale animwaamini Yesu okhala ‘olipelela’. (Math. 24:27, 42) Nto eyo enniiraneya okhuma mwaakha wa 1914. Okhuma mwaakha ole orwa nno, ekanyeryo ennooneya saana ni ennaakhwanela. Tthiri, hiyo ninkhala‘womalani wolumwenku’ eyo enitaphulela wira nri vakhiviru ni okathi onrowa aya opwetexiwa makhalelo ala ootakhala.
9. Mathowa xeeni arina ahu anniiriha olipelelaka omala wa olumwenku ola?
9 Nto, xeeni maKristau olelo-va anitthuneya aya ovikaniha olipelela? Mwaha wa omwiiwelela Yesu Kristu, hiyo ninnivikaniha olipelela. Nave, ninniwerya woona ekanyeryo ya orwa wa Yesu. Yoolipelela ahu khahiyo etthu ya ethiru wala khannilikana ni alolo ale anikupali khula etthu aniiwa aya, masi enlipa ni soohimmwa siri mBiibiliyani sinnitumererya okhala oowehaweha, ohirupa ni olipelela wira noone wanikisa wa olumwenku ola.
MPAKHA LIINI?
10, 11. (a) Exeeni Yesu aalakihenrye awe arumeyi awe? (b) Exeeni Yesu yaahimenrye awe awiixutti awe vakhala wira yaanoona wira owo aanipisa orwa? (Nwehe elatarato yoopacerya.)
10 Anamunceene a hiyo annivikaniha ohirupa omunepani mwa iyaakha miloko sinceene. Hata vari siiso, niheemererye wira okathi owo munceene ovinre otteettheihe yoolakela ahu ya ovikaniha olipelela nihiku nlo. Hiyo nihaana okhala oolikanela nimulipelelaka Yesu yoowo onrowa Omala-maliha makhalelo ala a itthu. Muupuweleke wira Yesu ahaatumererya awiixutti awe oriki: “Mwipasope, nwehereryeke, mana khamunsuwela nihiku nene. Vari ntoko mutthu mmosá orina ekwah’awe, ahinatthi ovenya vaté vawe, onnahiyerya arumeyi awe miteko sa vaté; khula mutthu muteko awe. Khumuruma mulipa a mukhora, wira alipeleleke, ahirupé. Vano nyuwo-tho, mulipeleleke, muhirupé. Khamunsuwela okathi omphiyawe mwanene etthoko. Onrwá makáripi, walá ohiyu eriyari, khinó vanìpa muthupi, nnákhala vaxaka? Kahiki. Vahìraneye wira, arwaka nananoru, òphwanyeni murupaka. Itthu iya kinohimeryakani nyuwo, kinahimerya atthu othene: Mulipeleleke, muhirupé”.—Mar. 13:33-37.
11 Nuumala osuwela wira orwa wa Kristu waapacenrye mwaakha wa 1914, atthareli a Yesu yaahipacerya wiilokiherya yoonaka wira wanikisa wamphiya okathi yoole. Awo yaapanke eyo yincereryaka muteko aya woolaleerya Omwene. Yesu ahooniherya wira vanweryaneya owo orwa “vanìpa muthupi, nnákhala vaxaka”. Nto vaakhanle wira eyo yaahikhumelela, atthareli ale yaarowa ophwanyiwa aryeene sai? Owo aahimmye so: “Mulipeleleke”. Tthiri oviriha okathi munceene awehereryaka khiwaarowa owiiriha ohiyererya olipelela walaoliyala ele yaalipelela aya.
12. Nikoho xeeni Habakuki aamukonhe awe Yehova, masi Muluku aakhunle sai?
12 Nkathokoreryani ntakiheryo na profeta Habakuki, yoowo aarummwale ohimya vahinatthi opwetexiwa wa Yerusalemu. Owo aahiviriha iyaakha sinceene alaleyaka muhupi owo. Makhalelo yaahihononeya mpakha ‘Atthu òtakhala wawerya anaxariya, ni exariya yahihononeya’. Tivonto vahinintikiniha aya osuwela etthu yaamwiirinhe Habakuki okoha so: “Nyuwo Apwiya! Kinokhuwela mpakha lini, muhikìwaka?” Ohiya waakhula mooluluwanya nikoho nle, Yehova aahimulipiherya profeta ole oororomeleya wira opwetexiwa wa muttetthe ole khiwaarowa ‘wunteya’. Muluku aahimuruma Habakuki wira “mulipeleleke”.—Mmusome Habakuki 1:1-4; 2:3.
13. Muupuwelelo xeeni woohiloka woonasa wene aarowa awe okhalana Habakuki, nto xeeni vaaryaaya vowoopiha okhalana muupuwelo owo?
13 Nkahaya muupuwele vaakhanle wira Habakuki aahikhulumuwa mpakha wuupuwela so: ‘Kipacenrye khalai olaleya wira Yerusalemu onoopwetexiwa vano soovira iyaakha sinci. Ankhi muttetthe ola waahipwetexiwe ninaano? Naaso khivanireerela ovikaniha olaleya wira muttetthe ola onrowa opwetexiwa. Kinimwaahiyerya atthu akina wira alaleyeke’. Tthiri vaakhanle wira Habakuki ahuupuwela moota owo, aamuyeleela ophentiwa wawe ni Yehova, ni woonasa wene aamwiiviwa okathi aBabilonia yaarowa aya opwetexa oYerusalemu!
14. Xeeni vanaamini ahu wira navikaniha olipelela khaninrowa opweteiwa?
14 Niryeene elapo esya, ninrowa okhalana okathi wa wuupuwelela itthu sotheene saahimmwale vahinatthi sa wuumalani wa makhalelo ala a itthu sotakhala. Nto wuupuwelela moota itthu iyo sinrowa aya wiiraneya onoolipiha omuroromela wahu Yehova ni waakhwanela wa soolaiherya sawe. (Mmusome Yoxuwa 23:14.) Moohaaniherya ninrowa omuxukhuru Muluku yoowo othanlale “okathi walá mahiku”, ni onitumererya wira nikhaleke nisuwelaka wira “omala wa itthu sothene ori vakhiviru”.—Mit. 1:7; 1 Ped. 4:7.
OLIPELELA ONITAPHULELA NTHITI!
15, 16. Moota xeeni okhalela nthiti muteko woolaleerya eryaaya enamuna ya wooniherya wira ninnisuwela okathi onikhala ahu?
15 Hiyo ninnaamini wira otthokeya wa Yehova onrowa ovikaniha onuupuxerya wira nihaana omurumeela Muluku nisuwelaka wira nri wanikisa. Soowuupuxerya iyo khannivaheriwa wira nikhaleleke nthiti miteko sa Muluku paahi, masi sinninikhaliherya osuwela wira ethoonyeryo ya orwa wa Kristu ennaakhwanela. Vano etthu xeeni enrowa ahu wira noopaka nooniheryeke wira ninnisuwela okathi onikhala ahu? Tthiri khiivo etthu ekina ohikhanle opacerya ophavela Omwene wa Muluku ni exariya aya, nikhalelaka nthiti muteko woolaleerya ihapari sooreera!—Math. 6:33; Mar. 13:10.
16 Murokora mmosa onihimya so: “Vaavo vanilaleerya ahu ihapari sooreera sa Omwene wa Muluku . . . nnookhaliherya owoopola atthu ehasara enrowa okhumelela olumwenku ola wotheene”. Murokora owo onnisuwela oratteene ele enitaphulela aya woopoliwa ehasara, okhala wira owo ni aiyawe yaahoopowa okathi yaakhumelenle aya ehasara yuulupale ya pakiti oovuwa, eyo piiyo, Wilhelm Gustloff mwaakha wa 1945. Hata okathi ole wa ehasara atthu akina khiyaasuwelexa etthu yaari yootepexa otthuneya. Murokora owo onnuupuwela wira aahikhala muthiyana mmosa aakhuwela oriki: “Maala aka!, Maala aka! Mihakhu saka! Mihakhu saka sotheene sihanle mpakitini. Koopweteiwa itthu sotheene sa faita kaarina aka!” Masi, aakhala atthu akina oreera murima yaalenve ekumi aya wira yaakhaliherye atthu akina woopola ikumi saya, avaraka muteko woovila okhala wira atthu ale yaamorenle ephareya yooxelareya. Nto moolikana ni atthu ale yaalenve ekumi aya, niimananihe wira naakhaliherye atthu akina. Tthiri nihaana ovara muteko woolaleerya mwa nthiti wira naakhaliherye atthu akina woopowa okhala wira okathi ohanle wira ekhumelele ehasara olumwenku ola ori vakhaanixa.
17. Mathowa xeeni arina ahu anniiriha okupaliki wira wanikisa pooti ophiyaka mootutuxerya?
17 Itthu siniiraneya valaponi olelo-va, sinnooniherya wira iprofesia sa mBiibiliyani sinniiraneya ni wira ohanle ophiya wanikisa wa makhalelo ala ootakhala. Hiyo nihuupuweleke wira onrowa ovira okathi munceene mpakha “manyaka mulokó” ni “nxeni” ninromoliwa eliivuru ya Wisupulula 17:16, omurukunuwela Babilonia Muulupale, yoowo ori olamulelo wa itiini soowoka moolumwenkuni. Musuweleke wira Muluku tonrowa ohela “mmurimani mwaya otthuna wo wira itthu sintthunawe” nto owo onrowa owiiriha opaka itthu mowaakuveya ni okathi oniphavela awe! (Wis. 17:17) Omala wa olumwenku ola khokhanle ottaiwene. Nto nookhalana mathowa maalupale anniiriha wiiwelela yoolopola ya Yesu yoowi: “Mwipasope, wira mirima sanyu sihilemeliwe ni sonanara, ni sohapala ni sovelaveliha s’ekumi, ni wira nihiku nenlo nihotutuxeni, mana ninrowa wamorela, ntoko ntthavi, atthu othene ankhala mulaponi mothene”. (Luka 21:34, 35; Wis. 16:15) Vano nrowe nimurumeele Yehova mwa nthiti nisuwelaka wira owo ‘onowopola ale animurumela’.—Yes. 64:4.
18. Nikoho xeeni ninrowa othokoreriwa muru onittharelana?
18 Vaavo vanlipelela ahu omala wa olumwenku ola wootakhala, nrowe nittharihele masu yuupuxeriwe awe mwiixutti Yuda yaawo ani: “Nto nyuwo, apatthani aka, mutepeke wunnuwa mowamini mwanyu mowaryexa. Mulompeke n’uwerya w’Eroho Yowarya. Mukhaleke mophentani mwa Muluku, muroromelaka wira Yesu Kristu Pwiy’ahu n’urera wawe murima onimovahani ekumi yohimala”. (Yuda 20, 21) Nto ninrowa wooniherya sai wira ninnilipelela elapo esya eleiheriwe ni Muluku ni wira ninniphavela okhala-mo? Eyo enrowa othokoreriwa muru onittharelana.
[Enoota]
a Mwaphavela woona iprofesia sa mBiibiliyani sinimuhimya Mesiya ni wiiraneya waya, nwehe epaaxina 200 ya eliivuru Biibiliya Oniixuttiha Exeeni Tthiri?