Niireke Nyuwo Mookhalana Munnuwelo Woomalela wa Kristu?

“Ninrowa okhalana . . . munnuwelo womalela wa Kristu”.​—AÉF. 4:13.

ISIPO: 11, 42

MWAAROWA OTTHOKIHERYA SAI?

Moota xeeni maKristau oolipa omunepani anrowa aya ottottela mureerelo osuwela wa ekeekhai?

MaKristau oolipa omunepani anrowa okhaliherya sai muloko okhala wowiiraana?

Mureerelo xeeni aniphwanya aya ale aniphavela okhala Kristau oolipa omunepani vaavo vaneetta aya ni Makristau ooloka?

1, 2. Munnuwelo xeeni anitthuneya aya okhalana maKristau otheene? Nvahe ntakiheryo.

OKATHI muthiyana ootheliwa onithanla awe mihokorokho omerkaatu, owo khonithanla mihokorokho suulupale paahi wala soopuntthiwa. Ohiya-vo, owo onithanla seiye soottokottha saana. Owo oniphavela othuma mihokorokho soosiva, soowunkhela saana ni siniphwanyiha ekumi. Tthiri owo onithanla mihokorokho sikhoomanle ni sittokontthe oratteene.

² Nuumala mutthu orowa vahoolo mpakha obatiziwa, owo onnivikaniha wunnuwa. Yoolakela awe okhala murumeyi a Muluku oolipa omunepani. Ottokottha onihimya ahu khahiyo wa werutthuni, masi ninhimya okhoomala omunepani. Murummwa Paulo aahaalepela maKristau a wEefeso owooniheryaka otthuneya waya wunnuwa omunepani. Owo aahimmye so: “Ninrowa okhalana wamini omosaru, nitepaka omusuwela Mwana a Muluku, nikhalaka atthu òkhomala murohoni, nikaweliwaka munnuwelo womalela wa Kristu”.​—aÉf. 4:13.

3. Makhalelo xeeni yaari muloko wa wEefeso yaawo-tho aniphwanyaneya eriyari ya atthu a Yehova olelo-va?

³ Okathi Paulo aalepa awe epaphelo ela, muloko wa wEefeso wira ovirinhe iyaakha sinceene nuumala opakiwa. Awiixutti anceene a muloko ole yaari oolipa saana omunepani. Masi aakhala akina yaatthuneya wunnuwa omunepani nlelo. Makhalelo a Anamoona a Yehova olelo-va annilikana vanceene ni ale yaari okathi ole. Anna ni arokora anceene apacenrye khalai omurumeela Muluku, nto ahinnuwa saana omunepani. Masi aakhala akina ahiphiiye vaavo munnuwelo aya. Mwa ntakiheryo, atthu asya ikonto sinceene annibatiziwa khula mwaakha, tivonto akhanle aya nlelo atthu anitthuneya wunnuwa omunepani. Ankhi nyuwo muri sai?​—aKol. 2:6, 7.

MUNNUWELO WA EKRISTAU

4, 5. Exeeni eniwiiriha maKristau oolipa omunepani okhala oovirikana, masi etthu xeeni enaamulikana aya? (Nwehe elatarato yoopacerya.)

⁴ Okathi onithanla anyu mihokorokho soottokottha omerkaatu, munniwerya woona wira ittokotthelo sa mihokorokho iyo ti soovirikana. Hata vari siiso, mihokorokho sotheene sookhalana makhalelo anooniherya wira soottokottha. Vamosaru, maKristau oolipa omunepani pooti okhala a elapo ekina, mahuweliwo oovirikana, ekumi yoovirikana, munnuwelo ni ovirikana itthu sinisuwela aya. Awo annivirikana omutthu aya ni soolema saya. Hata vari siiso, ale otheene oolipa omunepani aakhalana makhalelo oolikana anooniherya wira awo toolipa. Moota xeeni?

⁵ Murumeyi oolipa omunepani a Yehova onnikhalana mweettelo mmosaru aarina awe Yesu, yoowo onithoonyenrye ephiro wira ‘nimutthareke yowo munvira awe’. (1 Ped. 2:21) Etthu xeeni Yesu yaahimmye awe okhala yootthuneya vanceene? Owo aahimmye wira nihaana omphenta Yehova ni murima ahu wotheene, muupuwelo ahu wotheene, ni waaphenta anamwaattamanani ahu ntoko siniiphenta ahu. (Math. 22:37-39) Kristau oolipa omunepani onnimananiha okhala moovarihana ni malakiheryo ala. Owo ookhalana mweettelo onooniherya wira onnivaha efaita wataana wawe ni Yehova ni waaphenta akina ni murima awe wotheene.

6, 7. (a) Makhalelo xeeni animusuwanyeiha Kristau wira toolipa omunepani? (b) Ninrowa othokorerya exeeni?

⁶ Hiyo ninnisuwela wira niphento enamuna emosa ya muhokorokho wa omunepani yoowo onooniheriwa ni Kristau oolipa omunepani. (aGal. 5:22, 23) Mikhalelo sikina sootthuneya ti wiiyeviha, wiisumaaliha ni opixa murima. Makhalelo awo anoomukhaliherya ophuka mixankiho sawe voohinyonyiwa ni ovilela okathi wa maxakha voohiyeleela nlipelelo. Orumeelaka eprograma awe ya omusoma Biibiliya, owo onnivikaniha ophavela miruku sinrowa omukhaliherya osuwela ovirikaniha etthu yooloka ni yoohiloka. Tivonto, okathi onipaka awe soothanla, onnooniherya wira owo toolipa omunepani. Mwa ntakiheryo, owo onnittharihela yowuupuxerya awe ya murima yiixuttihiwe ni Biibiliya. Kristau oolipa omunepani onikhala oowiiyeviha vaavo vanisuwela awe wira iphiro ni malamulo a Yehova khula okathi tooloka ovikana moonele awe.a Owo onnilaleerya mwa nthiti ihapari sooreera ni onnikumiherya wiiraana mmulokoni.

⁷ Hata nivirinhe ene okathi munceene nimurumeelaka Yehova, khula mmosa a hiyo ohaana wiikohaka so: ‘Kiireke sookhala itthu nlelo sinitthuneya aka olokiherya wira kimutthareke vakhiviru vene Kristu kiphavelaka wunnuwa omunepani?’

“YOLYA YOLIPA TI Y’ATTHU ATOKWENE”

8. Ninwerya sai ohimya wira Yesu aanisuwela ni wiiwexexa Soolepa?

⁸ Yesu aaniiwexexa saana Nuulumo na Muluku. Hata okathi aarina awe iyaakha 12 paahi, owo aaniwerya otthokiherya Soolepa ohoolo wa awiixuttihi mpaani mwa Muluku. Tthiri “Othene ale yamwiwa yanithamala, mana Yesu aniwiwa n’usuwela, anakhula ni miruku”. (Luka 2:46, 47) Muhoolo mwaya okathi waavara awe muteko woolaleerya valaponi, Yesu ahaavanyiha atthu yaamunyohola orumeelaka soolepa sooreerela sa Nuulumo na Muluku.​—Math. 22:41-46.

9. (a) Xeeni varyaaya vootthuneya okhalela nthiti omusoma Biibiliya wira ninnuwe omunepani? (b) Tiivi ekhanle yoolakela ya omusoma Biibiliya?

⁹ Moovarihana ni ntakiheryo Yesu ovanhe awe, Kristau oniphavela wunnuwa omunepani khonirowa otteeliwa murima ni osuwela itthu vakhaani paahi sa mBiibiliyani. Owo onrowa ophavelaka khula nihiku ikeekhai suulupale sa mBiibiliyani, okhala wira onrowa osuwelaka wira “yolya yolipa ti y’atthu atokwene”. (aHéb. 5:14) Tthiri Kristau oolipa omunepani tuule oniphavela ‘otepa omusuwela Mwana a Muluku’. (aÉf. 4:13) Niireke nyuwo munnimusoma Biibiliya khula nihiku? Niireke mookhalana eprograma ya opaka yoosoma anyu, mwiimananihaka osuka okathi wira khula esumana mukhalane okathi wa omulompa Muluku vatthokoni vanyu? Okathi onithokorerya anyu Nuulumo na Muluku, mmananiheke woona miruku sa mBiibiliyani, sinrowa wookhaliheryani woona oratteene muupuwelelo ni moonelo wa Yehova. Nuumala-vo mmananihe ottharihela miruku sinikhuma mBiibiliyani, muroromeleke seiyo okathi onipaka anyu soothanla, nto eyo enoowiirihani omwaattamela vanceene Yehova.

10. Moota xeeni osuwela onrowa aya omukhaliherya Kristau khula nihiku?

¹⁰ Kristau oolipa omunepani onnisuwela wira sookhala itthu sinceene sootthuneya ohiya paahi osuwela ele Biibiliya onihimya awe. Nuumala oosuwela ele eri mBiibiliyani, niireke owo onniphenta ele enisuwela awe voohimya sa iphiro ni miruku sa Muluku? Wooniheryaka ophenta iwo, onnikuxa ekumi enimwiiriha ottharihela malakiheryo a Yehova ohiya malakiheryo a apinaatamu. Moohaaniherya, Kristau moota owo oopaka sotheene wira “orule” makhalelo ni mweettelo awe wa khalai. Okathi Kristau onipaka awe murukunuxo owo, nto onniwara omutthu wa naanano onilikana ni ole wa Kristu, yoowo “opattuxiwe alikanyihiwaka ni Muluku, okhalihiwe naxariya, orerihiwe murima n’ikekhai”. (Mmusome aÉfeso 4:22-24.) Biibiliya olempwale orumeeliwaka munepa wootteela wa Muluku. Okathi Kristau oniphavela awe osuwela ni wunnuuherya ophenta wawe itthu siri mBiibiliyani, owo onnitthukula murima awe ni muupuwelo awe wira ohooleliweke ni munepa wootteela. Eyo enoomukhaliherya wunnuwa omunepani.

OKHALA VAMOSA MOWIIRAANA

11. Exeeni yaamukhumelenle Yesu voohimya sa emusi awe ni awiixutti aarina awe?

¹¹ Okathi aaryaawe valaponi ntoko mutthu oomalela, Yesu aakhala ni atthu oohimalela. Owo aahuuwale ni anamuyari oohimalela, ni aahiviriha iyaakha sinceene okhalaka ni atthu oohimalela. Hata atthareli awe a vamurimani okathi mukina yaanikhala ananrima, nenno naarina aya anamunceene yaakhala okathi ole. Mwa ntakiheryo, emakaaripi yeele Yesu aarowa awe wiiviwa, “wahikhumelela-tho ovanyihana yaworu, t’ani a yawo òniwa okhala mulupalexa”. (Luka 22:24) Masi Yesu aanisuwela wira atthareli awe ale oohimalela yaamunnuwa omunepani ni okumiherya muloko mmosa wowiiraana. Emakaaripi yeele nlelo, Yesu aahivekela wa Tiithi awe wira awiixutti awe ale akhale oowiiraana oriki: “Mwiré wira othene ekhale mmosáru, ntoko nyuwo, Tithi, muryanyu, mwa miyo, ni ntoko miyo kiryaka mwa nyuwo, yaawo-tho ekhale mmosáru mwa hiyo . . . wira ekhalé mmosáru, sisale hiyo nryahu mmosáru”.​—Yoh. 17:21, 22.

12, 13. (a) Moota xeeni yoolepa ya aÉfeso 4:15, 16 enittittimiherya aya otthuneya waya wiiraana mmulokoni? (b) Moota xeeni munna mmosa aaxinttale awe muxankiho aarina awe nto khwiixutta wiiraaniha muloko?

¹² Kristau oolipa omunepani onimurumeela Yehova tuule onikumiherya wiiraana mmulokoni. (Mmusome aÉfeso 4:1-6, 15, 16.) Yoolakela ya atthu a Muluku ekhaleke “wiwanana”, ni khula mutthu omukhaliheryeke mukhwaawe. Moovarihana ni Nuulumo na Muluku, wira niwerye opaka eyo nihaana okhala oowiiyeviha. Munna wala murokora oolipa omunepani oowiiyeviha onnimananiha wuuraaniha muloko, hata sikhumelelaka mixankiho mwaha wa ohimalela wa atthu akina. Nyuwo munipaka exeeni vaavo munna wala murokora mmulokoni vanipaka awe etthu enooniherya ohimalela wawe? Ankhi munipaka exeeni vakhala wira mootthekeliwa ni mutthu mmosa a mmulokoni? Niireke eyo yannwiirihani omuthanya mutthu owo ni opacerya ohilavulihana? Wala munrowa otthukula ephiro eniwaataanihani nyuwo ni mutthu owo? Tthiri Kristau oolipa omunepani onrowa omananiha otthukula ephiro ohiya omuthanya mutthu owo.

¹³ Nkahaya muthokorerye ntakiheryo na Uwe. Owo khalai aanaakuva onaanariwa mwaha wa ohimalela wa anna. Owo aahilakela omurumeela Biibiliya ni eliivuru Estudo Perspicaz wira osome voohimya sa Davidi. Xeeni ohalaka omuthanla Davidi? Uwe onitthokiherya so: “Davidi saahimukhumelela itthu sinivirikanya ele elempwale mBiibiliyani saapakiwa ni anna akina. Mwa ntakiheryo, Mwene Sawuli aaphavela omwiiva, aakhala alopwana akina yaaphavela onvonyakasa maluku, hata amwaarawe yaahimuramusa Davidi mukwaha mmosa. (1 Sam. 19:9-11; 30:1-6; 2 Sam. 6:14-22) Masi Davidi khaatonko weemererya wira ohimalela wa atthu akina omwiirihe ovukula omphenta wawe Yehova. Ohiya-vo Davidi aahikhalana murima wa othunku yoowo oniphavelexa aka okhalana. Ele yaaxuntte aka okathi waapaka aka yoosoma ele yaahirukunuxa moonelo aka voohimya sa ohimalela wa anna. Okhuma vaavale nkinilepa khula etthu eniireliwa aka ni anna. Ohiya-vo kinnimananiha ophavela wiiraaniha muloko”. Niireke nyuwo munniphavelasa okumiherya wiiraana mmulokoni?

MPATTHANEKE NI ALE ANIPAKA YOOTTHUNA YA MULUKU

14. Atthu a enamuna xeeni Yesu aathanlale awe wira akhale apatthani awe?

¹⁴ Yesu anaaphenta atthu otheene. Atthu otheene yaanimoona okhala mutthu oopatthaneya, alopwana, athiyana, amiravo, atthu owunnuwela ni axinamwane. Masi okathi waathanla awe apatthani awe, Yesu aanikhalana ephoole yuulupale. Owo aahimeeryale so awiixutti awe: “Nyuwo munokhala apatthani aka, mwettelakaru itthu kinorumakani”. (Yoh. 15:14) Yesu anaathanla wira akhale apatthani awe atthu yaale yaamutthara owo moororomeleya ni yaamurumeela Yehova ni murima aya wotheene. Niireke nyuwo munnimutakiha Yesu okathi onaathanla anyu apatthani anyu, mwaathanlaka ale animurumeela Yehova ni murima wotheene? Xeeni eyo eryaaya yootthuneya?

15. Mureerelo xeeni aniphwanya aya amiravo vaavo vaneetta aya ni maKristau oolipa omunepani?

¹⁵ Mihokorokho sinceene sinnittokottha oratteene okathi sinoopeliwa aya nsuwa. Vamosaru, hiyo ninninnuwa oratteene vaavo vanikhaliheriwa ahu ni anna oolipa omunepani. Woonasa wene nyuwo mwa mmiravo yoowo nlelo ohinatthi othanla ephiro enrowa awe otthara mweekumini. Tthiri mwaamooniherya okhala a miruku vakhala wira mwaamuthanla weetta ni anna aniwoona anyu wira apacenrye khalai omurumeela Yehova ni annikhalela nthiti wiiraaniha muloko! Iyaakha iyo sotheene avirinhe aya amurumeelaka Yehova woonasa wene sootoko waakhumelela mixankiho soovirikana. Anna moota owo anoowerya wookhaliheryani nyuwo othanla ephiro yooloka. Okhala vamosa ni anna awo onimookhaliheryani opaka soothanla sooloka ni ovikaniha orowa vahoolo wira mukhale oolipa omunepani.​—Mmusome aHéberi 5:14.

16. Moota xeeni anna owunnuwela yaamukhalihenrye aya mwali mmosa?

¹⁶ Mwa ntakiheryo Helga, onnuupuwela eyaakha awe yookiserya oxikola, vaavo anaxikola aasomana awe yaahimya aya ele yaaphavela aya mweekumini mwaya. Anamunceene yaanihimya wira yaaphavela orowa wUniversidade nto yamaliha osoma yavareke muteko waarowa waaphwanyiha muhakhu munceene. Helga aahirowa ovaanela mwaha owo ni apatthani awe a mmulokoni. Owo onihimya so: “Anamunceene yaalavulanne aka yaari aalupale okivikana miyo, nto awo yaahikikhaliherya tthiri. Yaahikitumererya okela muteko wa orummwa wa okathi wotheene. Moottharelana kaahiviriha iyaakha thanu kivaraka muteko wa opioneero. Olelo-va, soovira iyaakha sinceene, nto kinnitteeliwa murima okhala wira koorumeela omiravo aka kivaraka muteko wa Yehova. Khiivo etthu enikiiriha wiikhupanyerya mwaha wa opaka eyo”.

17, 18. Moota xeeni okhala oolipa omunepani onrowa aya onikhaliherya othanla ephiro yooloka mweekumini?

¹⁷ Wiimananiha otthara ntakiheryo na Yesu onoonikhaliherya okhala maKristau oolipa omunepani. Eyo enooniiriha omwaattamela Yehova ni enrowa wunnuuherya ophavela wahu omurumeela yena mpakha vaniwerya ahu. Murumeyi a Muluku onoowerya omurumeela moomalela Yehova vakhala wira onnikhala oolipa omunepani, eyo piiyo okhala Kristau ookhoomala. Yesu aahaatumererya atthareli awe oriki: “Warya wanyu wamwaleleke atthu, wira yòneke miteko sanyu sorera, yavuwiheke Atith’inyu ari wirimu”.​—Math. 5:16.

¹⁸ Ntoko noonale ahu, Kristau oolipa omunepani onoowerya okumiherya mireerelo sinceene mmulokoni. Nto munnuwelo owo woomunepani onnooneya vaavo Kristau owo vanisuwela awe orumeela yowuupuxerya ya murima evahiwe awe ni Muluku. Moota xeeni yowuupuxerya ya murima ahu enrowa aya onikhaliherya opaka soothanla sooloka? Ninrowa ottittimiha sai yowuupuxerya ya murima ya anna akina? Makoho ala anrowa waakhuliwa muru onittharelana.

[Enoota]