MWAHA WA VAKAAPANI | NIIREKE OVEKELA ONNIKHALIHERYA?

Xeeni Atthu Anivekela Aya?

Samuel,a ooKenya ohimmye so: “Omweetta jooku oneemexeriwa musurukhu waari okumi aka. Miyo kaanivekela wira kiphwanyeke musurukhu munceene. Masi eyo khiyiiraneya”.

Teresa, ooFilipina ohimmye so: “Oxikola naahaana wiixutta ni ohela mmuruni mavekelo naaxuttihiwa ahu”.

Magdalene, ooGana onihimya so: “Kinnivekela okathi wa mixankiho. Nave-tho kinnivekela wira Muluku okilevelele itampi saka ni okhala muKristau ooloka”.

Masu alavuliwe ni Samuel, Teresa, ni Magdalene, anooniherya wira atthu annivekela mwa mathowa oovirikana; akina a atthu ala annivekela mwa mathowa ookhalela. Mavekelo makina anikhuma vamurimani; masi makina anisukiwa mmuruni paahi. Masi, pooti atthu evekelaka okathi anipaka aya iporova oxikola, wala ovekela wira egrupu aya enimmana boola ekhumele saana, ophwanya malakiheryo a Muluku anikhaliherya emusi, aahiiso mathowa makina, imilyau sinceene sa atthu annoona wira ti vootthuneya ovekela. Tthiri sootokosa sinooniherya wira hata atthu ahirina etiini annivekela.

Niireke nyuwo munnivekela? Akhala wira ti siiso, ti pani muninvekela anyu? Hata nyuwo mmakelaka ovekela wala nnaari, pooti wiikoha so: ‘Niireke ovekela onnikhaliherya? Ohaavo oniwiriyana?’ Mulipa oolepa mmosa, aahimyale wira ovekela onlikana ni “enamuna emosa ya murette . . . ntoko olavula ni ehopa eri mmaasini”. Mameediku makina aakhalana moonelo mmosaru; awo anihimya wira ovekela ti enamuna ekina ya “olooliwa ohirumeelaka murette wa oxipitali”. Munoonela sai, niireke atthu anivekela ntoko yoolimalela paahi, aahiiso aniphavela mureerelo ntoko murette?

Masi, Biibiliya onihimya wira mavekelo tootthuneya ovikana murette. Nave onnooniherya wira ohaavo onwiriyana mavekelo anipakiwa mwa enamuna yooloka ni mathowa ooreerela. Niireke eyo ekeekhai? Nrowe niwehe.

[Enoota]