YOWIIRANEYA YA MWEEKUMINI
Koophwanya Murettele ni Muluku ni Maama Aka
Elavuliwe Ni Michiyo Kumagai
MAAMA aka aahikikoha oriki: “Xeeni ohiphavelaka waakokhorela amuhavinre anyu? Khamusuwenle wira yahaari yaawo nyuwo khimwaayariwa? Niireke khamunoona oreerela waaxukhurela? Muniwerya sai ohicalela soolema seiye sipacenrye ahu khalai weettela? Okhootta waattittimiha amuhavinre ahu, vanlikana ni ohimya wira okokhorela wahu ti weelolo”. Nuumala-vo, maama aka aahipacerya wunla.
Okhala wene Maama aka khonalavule siiso. Ohiya-vo, owo taakaavenrye yoosoma ya Biibiliya, nnaamwi okaaverya wawe yoosoma eyo yaari enamuna ya okhootta yena osoma. Okhala wene okisivela omwiiwelela, nto vaanikivila okhootta omwiiwelela ekwaha ela. Hata vari siiso, okathi ola kaahaana omwiiwelela Yehova. Nto vaakhanle wira Yehova khokivanhe ikuru sa opaka eyo, nkaarowa owerya.
OPACERYA OMUSUWELA YEHOVA
Ntoko anamunceene oJapão, hiyo niirela mpantta etiini eniitthaniwa Budista. Masi nuumala oviriha myeeri miili paahi kimusomaka Biibiliya ni Anamoona a Yehova, kaahikupali wira koophwanya ekeekhai. Kaahiixutta wira ookhala Tiithi a wiirimu, nto kaahiphavela omusuwela oratteene. Miyo ni maama aka naanivaanela itthu kaixutta aka. Kaahipacerya orowela mithukumano Empa ya Omwene Ettiminku. Okathi wiiwexexa waka ekeekhai waacerereya aya, kaahimuleela maama aka wira nkaaphavela-tho wiirela mpantta soolema sa eBudista. Nto nuumala wiiwa masu ale, maama aka aahinanariwa vanceene, khwiira so: “Okhalana mutthu vatthokoni vaka ohineettela soolema sa amuhavinre ahu, etthu yowuuliha muru”. Nto aahikileela wira kaahaana ottharuwa omusoma Biibiliya ni orowa omuthukumanoni. Nto nkuupuwela wira maama aka aamulavula sisaale! Owo khaatonko onanariwa ni miyo sisaale.
Yoolepa ya aÉfeso ekapitulu 6, kaahiixutta wira Yehova oniphavela wira kiwiiweleleke anamuyari aka. Nave paapa aka aaneemererya muupuwelo wa maama aka. Wuupaceryani kuupuwela wira akhala kinoowiiwelela, awo nave yaarowa okiiwelelaka okathi kaarowa aka olavulaka, nto waamukhala murettele wa vatthokoni vale. Ohiya vo, saanaattamela isaame oxikola, nto kaahaana wiilokiheryaka. Nto kaheemererya ohirowa omuthukumanoni myeeri miraru, masi kaahimuleela Yehova wira kaamutthikela orowa omuthukumanoni nuumala opaka isaame oxikola.
Masi yoothanla aka khiyaalonke mwaha wa mathowa manli. Noopacerya, koona wira nkaarowa omuliyala Yehova hata sivinre ene myeeri miraru. Moohipisa kaahipacerya okhalana etala yomunepani, nave kaamutepa omuliyala Yehova. Nthowa na nenli, anamuyari aka ohiya okikhaliherya, khula okathi yaanikikhoottiherya opaka khula etthu enivarihana ni okokhorela wekeekhai.
OKHALIHERIWA NI OLUPATTHIWA
Omuthukumanoni, kaahaaphwanya atthu anceene yaawo yaalupatthiwa ni amusi aya. Awo yaahikileela wira Yehova aamukivaha ikuru. (Math. 10:34-37) Nto awo yaahikooniherya wira kanwerya waakhaliherya amusi aka awo woopowa muhoolo. Nto kaahipacerya okhalela nthiti ovekela ni kaaniimananiha wiixutta moota woomuroromela Yehova.
Anamuyari aka yaahipacerya okilupattha mwa inamuna soovirikana. Maama aka aaneererya okixonttela ni okooniherya wira nkuupuwenle saana. Okathi aalavula awe, miyo kammaala paahi. Okathi navaanela ahu naaninyakulihana, okhala wira khula mutthu aaphavela wooniherya wira owo tonihimya etthu yookhalela. Kinoona wira kahaana ottittimiha muupuwelo wa maama aka ni sookupali sawe, woonasa wene itthu khisaarowa ophiya vaavo! Nto anamuyari aka yaanikivaha miteko sinceene vatthokoni wira kihiweryeke okhuma vate. Ikwaha sikina kaaniwaleliwa ota wala nkaahiyeriwa yoolya.
Maama aka aahivekela okhaliheriwa ni atthu akina. Nto aahirowa okumana ni prusoore aka a oxikola, masi owo aahikhootta wiihela muhina. Aahikikuxa okiroihaka wa xerenti awe omutekoni, nto xerenti owo aahipacerya okileela wira itiini sotheene ti soowoka. Owaani, maama aka aanaaligarela amusi akina inlaka, ovekelaka okhaliheriwa. Nto eyo yaanikixankiha, masi omithukumanoni, axitokweene yaanikikhaliherya woona wira atthu otheene ale maama aka aalavulana awe, owo aavaha onamoona nnaamwi yena ahaasuwela.
Nuumala-vo kaahikhalana muxankiho mukina: orowa wuniversidade. Nto anamuyari aka yuupuwela wira ela yaari enamuna emosa yoolokiherya mukhalelo wa okumi aka. Yuupuwela wira osoma universidade waamukiphwanyiha muteko wooloka. Okhala wira khivaaweryaneya ovaanela saana myaha iyo, nto kaanilepa ipaphelo kaatthokiheryaka anamuyari aka muupuwelo aka ni soolukama saka. Paapa aka aahinanariwa vanceene khuhimya so: “Okhala wira munihimya siiso, weeso muhaana ophwanya muteko mpakha meelo, masi mwaahiphwanye, mukhumeke vate vaka-va”. Nto kaahinvekela Yehova. Mmeeloni mwaya okathi kaaronwe aka muteko woolaleerya, axirokora anli yaahikivekela wira kaakhapeleleke anaaya. Paapa aka khaasiveliwe ni mirukunuxo saapaka aka, nto aahihiya olavula ni miyo, ni khaapavela-tho okicala. Maama aka aahimmye wira phataari kaari nawiiye masi kihikhanle Namoona a Yehova.
Ikwaha sikina kaaniikoha akhala wira Yehova aaphavela wira kaavilele anamuyari aka mpakha vaniwerya aka. Masi okathi kaavekela aka ni wuupuwelela soolepa sinilavula sa ophenta wa Yehova, waanikikhaliherya okhalana moonelo wooloka voohimya sa olupatthiwa waka, nto kaanoona wira anamuyari aka yaakilupattha mwaha woowi yaanikiphenta. Yehova aahikikhaliherya wuupuwelelaka itthu sooloka ni osuwela yoowiira. Nave, vaavo kaatepa aka olaleerya, kaanitepa osiveliwa ni muteko owo. Vekeekhai, yoolakela aka waari okhala pioneero.
ORUMEELA NTOKO PIONEERO
Okathi axirokora akina vaasuwenle aya wira kaaphavela okhala pioneero, awo yaahikileela wira kaahaana toko waalipelela anamuyari aka omaaleleya. Kaahinvekela Yehova miruku, kaahitokosa, kaahivarerya mathowa aka ni kaahilavulana anna ni axirokora ookhoomala momunepani. Nto kaahilakela wira kiniphavela omurumeela Yehova. Ohiya vo, ohirumeela ntoko pioneero khahiyo ti etthu yaarowa owiiriha anamuyari aka orukunuxa mukhalelo aya.
Kaahipacerya orumeela ntoko pioneero eyaakha yookiserya oxikola. Nto nuumala okela muteko owo kaahikhalana yoolakela ya orumeela mapuro oothowa anamalaleerya. Masi maama aka ni paapa aka khaaphavenle miyo okhuma vatthokoni vale. Nto kaahilipelela ophiyeriha iyaakha 20. Wira kihimuxankihe maama aka, kaahuupuwela othaamela muttetthe yoowo waari amusi aka, nto kaahikohererya efiliyaali ya oJapão akhala wira muttetthe owo waahikhala opuro waatthuneya anamalaleerya.
Tthiri muttetthe ole kaaronwe aka, kaahireelihiwa vanceene mwaha woowi atthu yaawo kaasomiha aka Biibiliya yaahibatiziwa. Okathi ene yoowo, kaaniixutta Enkelexi wira kinnuuherye muteko aka woolaleerya. Anna anli, mapioneero a vameekhaaya, yaari muloko yoowo. Nto kanaaweha moota yaaluttuweliwa aya olaleerya ni waakhaliherya akina. Nto kaahipacerya ophavela okhala pioneera a vameekhaaya. Okathi owo, maama aka aahiwereiwa ikwaha piili. Khula ekwaha kaaleeliwa aka wira anwereiwa, kaanirowa omukhaliherya. Nto maama aka aahitikinihiwa, tivo, aahipacerya orukunuxa mukhalelo awe.
MAREELIHO MANCEENE
Sivinre ene iyaakha 7, kaahaakhelela epaphelo emosa ya munna Atsushi yoowo kimuhimmye aka wira aari pioneero a vameekhaaya. Owo aalempe wira yena anuupuwelela othela, nto aaphavela osuwela makhalelo aka ni akhala wira kaanimphavela. Ohimya ekeekhai, nkuupuwela wira aanikiphavela, ni miyo nkitonko omoonela siiso. Nuuvira mweeri mmosa, kaahimwaakhula wira kaaniphavela omusuwela oratteene. Naahiweha wira oowanli ahu naarina muupuwelo mmosa-ru wa orumeela muteko wa orummwa wa okathi wotheene moovarihani ni makhalelo ahu. Nuuvira okathi, naahithelana. Kaahihakalala vanceene okhala wira maama aka, paapa aka ni amusi aka akina yaahirwa okasamentoni.
Nuumala hiyo orumeela vakhaani muteko wa opioneero wookilaatheya, Atsushi aahivekeliwa okhala namaranttela a mutokweene a esirkwitu. Voohipisa naahireelihiwa-tho. Naahithanleliwa okhala mapioneero a vameekha aya, ohoolo waya khukhala mutokweene a esirkwitu. Nuumala oxukurya miloko sotheene sa muttetthe ole, naahiligareliwa ni efiliyaali. Nto naahikohiwa so: ‘Niireke munnemererya orowa oNepal wira mwarumeelase muteko wa esirkwitu?’
Kaanuupuwela moota anamuyari aka yaarowa aya woonela wiiwa wira kaarowa nipuro noorakamela. Kaahaaligarela. Paapa aka taamwaakhunle telefoni, nto owo aakilenle so: “Nyuwo munrowa nipuro nootepexa oreera”. Esumana emosa kihinatthi omuligarela, mpatthani awe paapa aka aahinvaha eliivuru yeeyo yaalavula sa oNepal, tivonto aasuwenle awe wira elapo ele yaari yooreera.
Naahihakalala vanceene mwaha wowaaphwanya apatthani anceene oNepal, masi nahaakhela-tho mareeliho makina. Esirkwitu ahu yaahela muhina oBangladesh, elapo yowaattamela oNepal, masi hata vari siiso, makhalelo a elapo ele, yaari oovirikana. Ni inamuna sa olaleerya saari soovirikana. Sivinre ene iyaakha thanu, naahithanleliwa otthikela oJapão, weiwo vano ninrumeela ahu muteko wa esirkwitu.
Orumeela oJapão, oNepal ni oBangladesh, wookiixuttiha itthu sinceene voohimya sa Yehova. Khuta elapo exukunrye ahu, atthu aakhalana mikhalelo soovirikana. Kooweha moota Yehova onimoonela awe khula mmosa, ni moota oniweemererya awe, waakhaliherya ni waareeliha ale animukokhorela.
Kilavulaka sa moota kinoonela aka, Yehova ookireeliha mwaha woomusuwela yena, onvarela muteko, ni okiphwanyiha mulopwana oororomeleya. Muluku onnikikhaliherya opaka soothanla sooloka, vano kookhalana opatthani wooloka ni yena ni emusi aka. Kinnimuxukhurela vanceene Yehova, maana miyo ni maama aka nootthikela okhala apatthani aalupale. Kinnixukhurela vanceene mwaha wookhalana murettele ni Muluku vamosa ni maama aka.
[Eponto yuulupale epaaxina 30]
Yehova aahikikhaliherya wuupuwelelaka itthu sooloka ni kaanisuwela yoowiira