MWAHA WA VAKAAPANI | VANNIREERELA OKHALA OOROROMELEYA?
Ororomeleya: Nlelo Onnivareleya Muteko?
Hitoshi aanivara muteko edepartamento eniweherya musurukhu oJapão. Nto mukwaha aatokosa awe ekontha emosa, xeefi awe aahimuleela Hitoshi wira aahaana opaka erelatoorio yowoothereriwa. Hitoshi aahitthokiherya wira yowuupuxerya awe ya murima khiyamweemererya opaka eyo. Nto, xeefi ole aahimoopopihiwa Hitoshi wira aarowa omoomola muteko. Wanikisa waya Hitoshi aahoomoliwa tthiri.
Nuuvira myeeri vakhaani, Hitoshi aahixanka maana khaasuwela akhala wira amphwanya muteko ahaarowa awe okhanyereriwaka wootha. Okathi aakohiwa awe ni mulopwana mmosa aaphavela anamuteko, Hitoshi aahihimya wira khaaphavela okhala namuteko oohiroromeleya. Nto mulopwana owo ahimmye so: “Muupuwelo anyu khokhanle saana!” Amusi ni apatthani awe Hitoshi yaahimutumererya osyaka wootha, masi saahikhala itthu saamuxankiha. Ikwaha sikina owo aaniikoha so: “Kiireke vannireerela okhala oororomeleya kittharihaka waamini waka?”
Etthu emwiiranenle Hitoshi, ennooniherya wira mooriipiha murima anamunceene khanivaha efaita ororomeleya. Tthiri, atthu akina vanceenexa ale animwiira nakoso anoona wira ororomeleya khonivareleya muteko. Muthiyana mmosa onivara muteko wAfrika do Sul, oni: “Atthu anceene kinivarana aka muteko khaniroromeleya, nto ikwaha sinci vannivila okhala oororomeleya”.
Wootha ti enamuna emosa ya ohiroromeleya yuulanne. Iyaakha vakhaani sivinre, psicólogo a Universidade ya Massachusetts Amherst, Robert S. Feldman, aahiphwanya wira atthu aalupale oowiiraka 60 pursento annootha mwa khuta minutu 10. Feldman, ohimmye so: “Etthu yaakhumelenle yaahinitikiniha vanceene. Hiyo khinaalipelela wira atthu yaamutepaka wootha khula nihiku”. Xeeni wootha wuulanne aya olelo-va nnaamwi atthu anceene enyokhaka yoolema eyo?
Xeeni wootha, wiiya ni inamuna sikina sa ohiroromeleya suulanne aya olelo-va? Niireke ohiroromeleya onnaakumiherya mixankiho atthu otheene? Nto ninrowa osyaka sai inamuna iyo sa oohiroromeleya?