Nsina Na Muluku Tani?

Okathi nimphavela ahu omusuwela mutthu, etthu yoopacerya nimmukoha ahu ti ela: “Nsina nanyu tani?” Vaakhanle wira moomukoha Muluku nikoho nla, aarowa waakhula sai?

“Miyo kà Yahvéh [Yehova], nla ti nsina naka”.​—Yesaya 42:8, Biblya Exirima.

Niireke mootoko wiiwa nsina nlo? Akhala wira khamutonko, woonasa wene mwaha woowi anamataphulela anceene a Biibiliya, ikwaha sinceene khanirumeela nsina na Muluku. Awo anirantteliha ni mwiihaneliwo woowi: “APWIYA”. Hata vari siiso, nsina na Muluku ninniphwanyaneya ikwaha soowiiraka 7.000 iliivuru sa nttaava noopacerya naarumeliwe okathi aalempwa awe Biibiliya. Nsina nlo mwa nttaava na eHeeberi nirina ileetera 4, ni ninlempwa YHWH wala JHVH. Okhuma khalai, ileetera iyo mwa nttaava na emakhuwa sintaphuleliwa so: “Yehova”.

Nsina na Muluku ninniphwanyaneya soolempwa sa eHeeberi ni iliivuru sikina

XEENI VANIREERELA AYA OSUWELA NSINA NA MULUKU?

Muluku onnivaha efaita vanceene nsina nawe. Khuuvo mutthu onvanhe nsina Muluku, owo iivanhe mmansawe. Yehova onihimya so: “Nla ti nsina naka wa mahiku othene: nla ti nsina ninrowaya okìhanela maloko othene”. (Okhuma 3:15) MBiibiliyani, nsina na Muluku ninniphwanyaneya mapuro manceene ovikana maihaneliwo otheene, sintoko Oowerya Sotheene, Tiithi, Apwiya, wala Muluku ni masina makina aatthu, sintoko Abrahamu, Moise, Davidi, wala Yesu. Nto xeeni Yehova oniphavela awe wira nsina nawe nisuweliwe? Biibiliya onaakhula so: “Ni esuwele wi nyuwo nsina nanyu ti Yahvéh [Yehova], nyuwo mekhinyu mwà Namusulú velaponi vothene”.​—Esalimo 83:19, Biblya Exirima.

Yesu aanittittimiha vanceene nsina nlo. Okathi Yesu aapaka awe nivekelo nenle ninsuweliwa okhala Tiithi Ihu, Muri Wirimu, aahiwiixuttiha atthareli awe onvekela Muluku, ehimyaka so: “Nsina nanyu nivuwihiwe”. (Matheyo 6:9) Nave-tho Yesu aahinvekela Tiithi awe ohimyaka so: “Tithi, nvuwihe nsina ninyu!” (Yohani 12:28) Yesu aahivuwiha nsina na Muluku vaavo aahenle awe opuro woopacerya mookumini mwawe, ti maana aya owo aahimmye awe so: “Miyo kihasuweliha nsina nanyu, nave kinotepa wasuweliha”.​—Yohani 17:26.

Atthu animusuwela Muluku annittittimiha nsina nawe. Arumeyi a Muluku a khalai, yaanisuwela wira paahi okhapeleliwa waya ni woopoliwa, waalipa ni nsina na Muluku. “Nsina n’Apwiya namukattha òlipihiwa: naxariya atthyawelá weiwo, onophwanya wopowa”. (Miruku 18:10) “Mahiku awo, othene ale anrowa oromola nsina n’Apwiya [Yehova], animopowa”. (Yoweli 3:5) Biibiliya onooniherya wira nsina na Muluku tinaarowa waasuwanyeiha atthu animurumeela. “Atthu a ilapo sikina annimwettela khula elapo muluku aya: vano hiyo owettela Apwiya Muluku ahu mpakha mahiku othene”.​—Mikeya 4:5; Miteko 15:14.

YOOTAPHULELA YA NSINA NLO

Nsina nlo ti na Muluku Paahi. Asomi anceene aaweha wira nsina na Muluku nintaphulela wira: “Owo Onniiriha Okhumelela”. Yehova Muluku aahooniherya yootaphulela ya nsina nawe vaavo aamulenle awe Moise wira: “Miyo Kinniiriha Okhala Khula Etthu Eniphavela Aka”. (Okhuma 3:14, Tradução do Novo Mundo) Ohikhanle paahi onisuweliha itthu sinceene voohimya sa yena okhala Mpattuxa a itthu sotheene, nsina na Muluku ninniniixuttiha itthu sikina. Nsina nawe ninthoonyerya owerya wiiriha okhumelela khula etthu yootthuneya enivarihana ni yootthuna awe. Nnaamwi maihaneliwo ethoonyeryaka mukhalelo wa Muluku, okhulupale awe, aahiiso owerya, nsina nawe paahi Yehova ninthoonyerya wira owo onniikhaliha khula etthu eniphavela awe, ni enniiraneya.

Nsina na Muluku nnooniherya wira Muluku onninithokorerya. Yootaphulela ya nsina na Muluku enooniherya wira owo onnikhapelela itthu opattunxe awe onihela muhina hiyo. Nto okhala wira Muluku onnaasuweliha atthu nsina nawe, eyo enooniherya wira owo oniphavela wira hiyo nimusuwele. Muluku mmansawe topacenrye onileela nsina nawe nnaamwi hiyo nihimukonhe. Vanooneya wira Owo oniphavela wira nimuthokoreryeke yena sintoko Mutthu eekeekhai ohiya sintoko amuluku ahinivareleya muteko wala eethiru.​—Esalimo 73:28.

Okathi ninrumeela ahu nsina na Muluku nnooniherya wira ninnimuthokorerya. Nitakiherye wira munninvekela mutthu munuupuwela anyu okhala mwaapara anyu wira owiitthanekeni orumeelaka nsina nanyu. Masi mwarowa woonela sai vaakhanle wira mutthu owo onnikhootta orumeela nsina nanyu? Nuuvira okathi woonasa wene mwampacerya wiikoha akhala wira tthiri owo onniphavela osuweliwa ni nyuwo. Etthu emosaru enniiraneya ni Muluku. Yehova oonisuweliha nsina nawe, ni onninitumererya orumeela nsina nlo. Vaavo ninrumeela ahu nsina nawe, ninnimooniherya wira nimphavela omwaattamela, maana owo onniwerya waaweha atthu “anuupuwelela nsina nawe”!​—Malakhiya 3:16, NM.

Etthu yoopacerya nikhanle ahu oopaka wira nimusuwele Muluku, osuwela nsina nawe ni yootaphulela aya. Nave nihaana osuwela Omutthu awe ni itthu sinimusivela.