Munna Musya a Nikhuuru Noolamulela

Namararu voosiisu 24 a Janero 2018, emusi ya oBetheli ya wEstados Unidos ni oCanadá yaahihakalala wiiwa yoohimmwa yoowi: Munna Kenneth Cook, Jr., oothanliwa wiirela mpantta Nikhuuru Noolamulela na Anamoona a Yehova.

Munna Cook oyariwe ni ohuuwale centro-sul de Pensilvânia wEstados Unidos. Owo iixuttihiwe ekeekhai ni murokora aasomana awe, ohalaka omaliha exikola secundária, ni obatiziwe 7 a Junyo a 1980. Cook opacenrye muteko wa Muluku wa okathi wotheene ntoko pioneero ookilaatheya 1 a Setembro a 1982. Nuumala orumeela ntoko pioneero iyaakha piili, owo aahilattuliwa orowa orumeela eBetheli ya oWallkill, oNova York, 12 a Outubro a 1984.

Mwa iyaakha 25, Munna Cook oorumeela idepartamento soovirikana ntoko wimpirimiri iliivuru ni Eskritoorio ya oBetheli. Owo omuthenle mwaarawe oniihaniwa Jamie, mwaakha wa 1996, nto yaahipacerya ovara vamosa eBetheli ya oWallkill. Dezembro a 2009, Murokora ni Munna Cook yaahiroihiwa oCentro Educacional ya Torre de Vigia, oPatterson, weiwo Munna Cook aathanleliwe awe ovara muteko Edepartamento Enilepa Ikarta. Nto Abril a 2016, moohipisa nuumala otthikela oWallkill, Murokora ni Munna Cook yaahithaamiheriwa oBrooklyn, oNova York. Nuuvira myeeri 5, awo yaahiroihiwa eseedi ahu ya olumwenku wotheene oWarwick, oNova York. Nto Janero a 2017, Munna Cook aahithanliwa wira okhale namakhaliherya a Ekomisau Yoolepa ya Nikhuuru Noolamulela.