Ophenta ni Exariya Vaavo Ninthokoreriwa Ahu Voohixariya (Mpantta 3 sa Myaha 4)

1-3. (a) Ntoko enihimya aya Esalimo 5:5-7, Yehova onoonela sai otakhala? (b) Xeeni ohimyaka wira waarupiha anamwane khonivarihana ni “ikano sa Kristu”?

YEHOVA MULUKU onninyokha inamuna sotheene sa otakhala. (Musome Esalimo 5:5-7.) Nave onninyokha orupihiwa anamwane, maana onnoona okhala etthu yootakhala ni yoohiirya! Okhala wira na Anamoona a Yehova, nimutakihaka yena ninninyokha orupihiwa anamwane ni khaninwemererya mmulokoni atthu anaarupiha anamwane.​—aRom. 12:9; aHéb. 12:15, 16.

² Khula enamuna ya waarupiha anamwane khenivarihana ni “ikano sa Kristu”! (aGal. 6:2) Nthowa xeeni? Nthowa noowi, ntoko niixuntte ahu mwaha ovinre, ikano sa Kristu, eyo piiyo, itthu sotheene Yesu iixuttinhe awe ni ntakiheryo nawe, sinlipa ni ophenta ni sintumererya exariya. Attharaka ikano sa Kristu, maKristau eekeekhai annaakhapelela anamwane. Eyo enniwiiriha anamwane awo woonaka wira anikhapeleliwa ni ophentiwa. Nto yoolema ya orupihiwa anamwane ti yoohiloka maana enniwiiriha anamwane wuupuwelaka wira kharina efaita, khanikhapeleliwa ni khaniphentiwa.

³ Mooriipiha murima, olumwenku wotheene ohuulaana orupihiwa anamwane, nto muxankiho owo onnaaphwanya maKristau eekeekhai. Moota xeeni? Mwaha woowi olumwenku wotheene aasareya “atthu òtakhala murima ni òwòtha”, nto atthu awo annikela mmulokoni. (2 Tim. 3:13) Nave atthu akina aniihimya omurumeela Yehova anneemererya ophavela waya orupihana woohiloka owiirihaka waarupiha anamwane. Vano nrowe niwehe nthowa naya waarupiha anamwane eri aya etampi yuulupale. Nuumala-vo, ninrowa woona etthu axitokweene anipaka aya akhala wira munna aahiiso murokora onnipaka etampi yuulupale ntoko waarupiha anamwane. Wanikisa waya, ninrowa osuwela etthu anamuyari akhanle aya oopaka wira yaakhapelele anaaya.b

ETAMPI YUULUPALE

4-5. Xeeni mutthu onimurupiha mwaana onimutthekela awe mwaana owo?

⁴ Owereya onikhumelela mwaha woorupihiwa anamwane pooti oviriha iyaakha sinceene. Ohiya paahi mwaana owo orupihiwe, oriipiwa murima onnaaphwanya atthu akina animphenta ntoko anamuyari awe, amusi awe, anna ni arokora mmulokoni. Tivonto omurupiha mwaana etampi yuulupale.

⁵ Mutthu ommurupiha mwaana, onnimutthekela mwaana owo. Omuhasula mutthu aahiiso omukumiherya mixankiho etampi yuulupale. Ntoko ninrowa ahu woona mwaha onittharelana, mutthu onimurupiha mwaana onnimwiiriha mwaana owo oriipiwa murima ni onnimukumiherya mixankiho sinviriha okathi munceene. Mutthu owo omurupinhe onnimwiiriha mwaana owo ohihakalala ni ohaaroromela atthu akina. Anamwane ahaana okhapeleliwa wira ahirupihiwe, nto akhala wira mwaana oorupihiwa ohaana olipihiwa, omaalihiwa ni okhaliheriwa.​—1 aTes. 5:14.

6-7. Xeeni mutthu onimurupiha mwaana (a) onitthekela awe muloko? (b) onimutthekela awe guvernu ni eri aya ekrime?

⁶ Mutthu onimurupiha mwaana onnitthekela muloko. Munna aahiiso murokora onimurupiha mwaana onninanariha nsina na muloko, maana atthu annipacerya oninyohola. (Math. 5:16; 1 Ped. 2:12) Tthiri eyo etthu yoohiloka mwaha woowi anna ni arokora anceene oororomeleya ‘anniwanela waamini’ waya! (Yuda 3) Nto khanimphavela wira nnakhala mutthu mmosa ohonone nsina na muloko. Tivonto, vaavo mutthu onipaka awe etthu yoohiloka ohinattharuwa, ohaana okumihiwa mmulokoni wira muloko okhaleke saana.

⁷ Mutthu onaarupiha anamwane onnimutthekela guvernu. Makristau ahaana owiiwelela “alupale anettiha elapo”. (aRom. 13:1) Ninnooniherya wira ninniwiiwelela makhulupale a mulaponi vaavo nniiwelela ahu ni otthara malamulo a guvernu ahinhonona malamulo a Muluku. Akhala wira munna aahiiso murokora khoniiwelela malamulo ni onnipaka ekrime ntoko waarupiha anamwane, onnimutthekela guvernu. (Mulikanyihe ni Miteko 25:8.) Axitokweene khaneemiheriwa omuhukhumu mutthu arumeelaka malamulo a guvernu. Masi hata vari siiso awo khanimwaakiha mutthu omurupinhe mwaana okathi guvernu onimuhukhumu awe, maana eyo ekrime. (aRom. 13:4) Mutthu owo opanke etthu yoohiloka ohaana ohepha etthu aalale awe.​—aGal. 6:7.

8. Yehova onoonela sai vaavo mutthu onimutthekela awe mukhwaawe?

⁸ Mutthu onaarupiha anamwane onnimutthekela Muluku. (Esal. 51:6) Vaavo mutthu onimutthekela awe mukhwaawe, onnimutthekela Yehova. Nwehe ntakiheryo na Nlamulo Muluku aavanhe awe aIsarayeli. Nlamulo naahimya wira mutthu aamwiiyerya aahiiso anwoka mukhwaawe, owo aanimutthekela Yehova. (Onam. 5:21-24) Moolikanasa, vaavo munna aahiiso murokora onimurupiha awe mwaana, owo onnimwiiriha mwaana owo ohihakalala ni onnimutthekela Yehova. Maana mutthu owo onnihonona nsina na Yehova. Tivonto mutthu onaarupiha anamwane onnimutthekela vanceene Muluku.

9. Malakiheryo xeeni mutthenkeso wa Yehova onnivaha awe ni nthowa xeeni?

⁹ Okhuma khalai, mutthenkeso wa Yehova onninivaha malakiheryo a mBiibiliyani a moota woothokorerya myaha sa orupihiwa anamwane. Mwa ntakiheryo, myaha sinikumiheriwa erevista Owehaweha ni Nvenye! sinnooniherya wira ale arupihiwe mookhanyereriwa annipisa oliyala etthu yiireliwe aya. Nto nihaana waakhaliherya ni waalipiha atthu ale arupihiwe mookhanyereriwa, nave anamuyari ahaana waakhapelela anaaya wira ahirupihiwe. Ohiya-vo, axitokweene anniixuttihiwa moota akhanle aya oothokorerya myaha sa orupihiwa anamwane. Nto vaareerelaka, mutthenkeso ahu onnituruka aahiiso wuncererya malakiheryo awo. Etthu xeeni eniiriha opakiwa eyo? Eyo ennaakhaliherya axitokweene ovarihela muteko ikano sa Kristu ntoko ophenta ni exariya vaavo munna aahiiso murokora onimurupiha awe mwaana.

AXITOKWEENE AMPAKA EXEENI VAAVO MUNNA OMPAKA AWE ETAMPI YUULUPALE?

10-12. (a) Okathi munna aahiiso murokora ompaka awe etampi yuulupale, axitokweene aahaana wuupuwela exeeni? Tiivi eri yoolakela aya? (b) Moovarihana ni Yakobo 5:14, 15, etthu xeeni axitokweene anireerela aya opaka?

¹⁰ Okathi axitokweene anthokorerya aya mwaha wa munna aahiiso murokora opanke etampi yuulupale, ahaana wuupuwela ikano sa Kristu, amuthokoreryaka moophenta ni opaka ele Muluku onihimya awe okhala ya xariya ni yooloka. Nto vaavo axitokweene ansuwela aya wira munna aahiiso murokora oopaka etampi yuulupale, awo annithokorerya itthu sinceene sa mwaha owo. Etthu yuulupale axitokweene aniphavela aya, ori oheemererya etthu yoohiloka ehononaka nsina na Yehova. (Onam. 22:31, 32; Math. 6:9) Etthu ekina axitokweene aniphavela aya, ori waakhapelela momunepani anna ni arokora wira avikaniheke okhalana waataana wooloka ni Yehova. Nave axitokweene anniimananiha omukhaliherya, omulipiha ni ommaaliha mutthu orupihiwe mookhanyereriwa.

¹¹ Nave-tho, axitokweene anniimananiha oweha akhala wira mutthu owo opanke etthu yoohiloka oottharuwa ni murima wotheene ni anneererya omukhaliherya otthikela okhalana waataana wooloka ni Yehova. (Mmusome Yakobo 5:14, 15.) MuKristau onipaka etampi yuulupale mwaha woophavela itthu soohiloka, owo onlikana ni mutthu oniwereiwa momunepani. Eyo entaphulela wira mutthu owo khorina waataana wooloka ni Yehova.c Nto okathi axitokweene animukhaliherya aya, awo ankhala ntoko mameediku. Maana animurumeela Biibiliya wira amukhaliherye “muretta, [eyo piiyo, ole opanke etampi] wira okhale mukumi” ni wira otthikele okhalana waataana wooloka ni Yehova. Eyo enimwiiraneya akhala wira mutthu owo opanke etampi onnittharuwa ni murima wotheene.​—Mit. 3:19; 2 aKor. 2:5-10.

¹² Vannooneya wira axitokweene aakhalana muritti muulupale. Awo anniphenta ni okhapelela muloko wa Muluku yoowo aavahereriwe aya osuka moophenta ni mwa xariya. (1 Ped. 5:1-3) Aniphavela wira anna ni arokora yooneke wira annithokoreriwa saana mmulokoni. Nto vaavo ansuwela aya wira ookhala opanke etampi yuulupale ohela muhina waarupiha anamwane, annaakuvela omukhaliherya natampi owo. Vano nwehe makoho ari wanipacerya wa ittima 13, 15, ni 17.

13-14. Akhala wira malamulo anihimya wira atthu anaarupiha anamwane ahaana okaxariwa, axitokweene apakeke exeeni? Mutthokiherye.

¹³ Niireke axitokweene annitthara malamulo a guvernu anihimya wira mutthu omurupinhe mwaana ohaana okaxariwa? Aayo. Ilapo sikina aakhala malamulo anihimya wira atthu ahaana okaxari akhala wira mwaana oorupihiwa. Nto axitokweene a mapuro awo anniiwelela malamulo awo a guvernu. (aRom. 13:1) Malamulo awo khanvirikanya malamulo a Muluku. (Mit. 5:28, 29) Tivonto, vaavo axitokweene ansuwela aya wira ookhala mwaana orupihiwe, moohipisa annilikarela oBetheli wira avahiwe malakiheryo.

¹⁴ Okathi axitokweene anivaanela aya ni mwaana orupihiwe, anamuyari awe aahiiso mutthu mukina osuwenle etthu eyo yoohiloka, mooreerela murima aahaana waaleela wira aakhalana ehakhi ya okaxari. Ankhi akhala wira mutthu owo okaxanri munna aahiiso murokora ni mwaha owo woosuweliwa mmuttettheni? Niireke mutthu ohimmye etthu eyo yoohiloka ooveehiha nsina na Muluku? Nnaari. Mwaha woowi mutthu ole opanke etthu yoohiloka toveehinhe nsina na Muluku.

15-16. (a) Ntoko onihimya awe 1 Timótheyo 5:19, xeeni vanireerela aya okhala atthu anli asuwenle mwaha owo, ahinatthi axitokweene opaka ekomisau wira amphukele? (b) Axitokweene anipaka exeeni yasuwela wira ookhala munna aahiiso murokora omurupinhe mwaana?

¹⁵ Xeeni axitokweene anipaka aya ekomisau ya ophukela yakhala atthu anli asuwenle saana wira munna oopaka etampi yuulupale? Mwaha woowi, Biibiliya onnihimya eyo ni onnitumererya exariya. Akhala wira ookhala mutthu onihimmwa wira oopaka etampi yuulupale, masi yena onakhootta, axitokweene ahaana opaka ekomisau wira amphukele yakhala atthu anli asuwenle oratteene mwaha owo. (Otum. 19:15; Math. 18:16; mmusome 1 Timótheyo 5:19.) Niireke eyo eniphavela ohimya wira mutthu ohaana okaxari paahi akhala wira aakhala atthu anli asuwenle mwaha owo? Nnaari. Maana waaphavela atthu anli asuwenle mwaha owo, onivarihana paahi ni myaha sa mmulokoni. Nto axitokweene khanimukhoottiherya mutthu ohimya aahiiso okaxari akhala wira ookhala opanke ekrime.

¹⁶ Akhala wira munna aahiiso murokora onihimmwa wira oomurupiha mwaana, axitokweene khanimphukela attharaka malamulo a guvernu. Masi amurumeelaka Biibiliya, awo annitokosa mwaha owo wira asuwele vaareerelaka opaka ekomisau wira mutthu owo ophukeliwe. Nto yamukoha mutthu owo akhala wira oopaka etampi yuulupale, vano yena onakhootta, axitokweene annaaphavela atthu anli asuwenle saana mwaha owo. Nto yakhala atthu anli asuwenle mwaha owo, aahiiso anihimya wira mutthu owo ootoko waarupiha anamwane, axitokweene ahaana opaka ekomisau wira amphukele.d Waaphavela atthu anli asuwenle mwaha owo khontaphulela wira mutthu ole oopacerya onimootha. Hata akhala wira atthu anli khanihimya wira mutthu oopaka etampi yuulupale aahiiso oomurupiha mwaana, axitokweene pooti woona wira mutthu owo oopaka etthu yoohiloka aahiiso ohaakumiherya mixankiho atthu akina. Nto axitokweene anoovikaniha omukhaliherya mutthu okumiheriwe mixankiho. Nave-tho, anoovikaniha ovaha ephoole wira akhapelele muloko.​—Mit. 20:28.

17-18. Mutthokiherye etthu eniiriha opakiwa ekomisau ya ophukela.

¹⁷ Xeeni enipakiwa aya ekomisau ya ophukela? Nuulumo noowi “ophukela” khanintaphulela wira axitokweene anrowa ohimya wira mutthu ohaana ohukhummwa ni guvernu mwaha woopaka ekrime eyo. Maana axitokweene khaneemiheriwa omuhukhumu mutthu omurupinhe mwaana arumeelaka malamulo a makhulupale a mulaponi, awo ahaana ohiya wira makhulupale awo akhale tammuhukhumu. (aRom. 13:2-4; Tito 3:1) Etthu axitokweene anipaka aya ori omphukela mutthu owo wira asuwele akhala wira pooti aahiiso nnaari ovikaniha okhala mmulokoni.

¹⁸ Okathi axitokweene aniirela aya mpantta ekomisau ya ophukela, muteko aya onivarihana ni etiini aahiiso waataana wa mutthu owo ni Muluku ni maKristau akhwaawe. Amurumeelaka Biibiliya, annimphukela mutthu omurupinhe mwaana wira asuwele akhala wira oottharuwa aahiiso nnaari. Akhala wira khottharunwe, owo ohaana okumihiwa mmuloko. Nuumala-vo anoohimya mmulokoni wira mutthu owo khahiyo Namoona a Yehova. (1 aKor. 5:11-13) Masi akhala wira oottharuwa ni murima wotheene, owo pooti ovikaniha okhala munna aahiiso murokora. Nto akhala wira ti siiso, axitokweene anoomuleela moowiiwanyeya wira khonrowa okhalana nnaakhala eparakha emosa mmulokoni mpakha ovira okathi munceene aahiiso okumi awe wotheene. Okhala wira axitokweene tanikhapelela muloko, awo anoopaka etthu wira yaakhapelele anamwane. Mwa ntakiheryo, awo pooti ovaanela ni anamuyari arina anamwane acikhaani wira yaakhapeleleke ni wakasoopa anaaya. Masi okathi anipaka aya eyo, khanrowa ohimya nsina na mutthu aamurupinhe mwaana khuttharuwa ni murima wotheene.

MOOTA WOWAAKHAPELELA ANIINYU

19-22. Anamuyari ahaana opaka exeeni wira yaakhapelele anaaya? (Nwehe efootu ya ekaapa.)

¹⁹ Ti pani orina muritti wowaakhapelela anamwane wira ahirupihiwe? Ti nyuwo anamuyari.e Musuweleke wira aniinyu yoovaha enikhuma wa Yehova. (Esal. 127:3) Nave muupuweleke wira Yehova ohoovahani muritti wowaakhapelela aniinyu. Munrowa waakhapelela sai aniinyu wira ahirupihiwe?

²⁰ Yoopacerya, musuweleke itthu voohimya sa orupihiwa anamwane. Muhaana osuwela inamuna atthu ale anaarupiha anamwane anipaka aya wira yaawoke. Mwaasuwele atthu aahiiso mikhalelo sikhanle oowiiriha aniinyu orupihiwa. (Mir. 22:3; 24:3) Musuweleke wira ikwaha sinceene atthu anaarupiha anamwane ti yaale anamwane awo yaalimalenle aya.

²¹ Ya nenli, nvaaneleke mootaphuwa ni aniinyu. (Otum. 6:6, 7) Opaka eyo enihela muhina waawiriyana saana aniinyu okathi anilavula aya. (Yak. 1:19) Muupuweleke wira anamwane akhanyereriwe orupihiwa, annuuliwa muru ohimya etthu yiirihiwe aya. Awo pooti wuupuwelaka wira khanrowa okupaliwa, aahiiso mutthu ole omurupinhe oomoopopiha wira ahimya enoomukhumelela etthu yootakhala. Moonaka wira yookhala etthu yoohiloka mwaninyu iirihiwe awe, mmukoheke mooreerela murima ni munwiriyaneke saana vaavo onrowa awe waakhulaka makoho anyu, masi muhimoopopiheke nnakhala ompwapwela.

²² Ya neeraru, mmwiixuttiheke mwaninyu. Moovarihana ni iyaakha mwaninyu orina awe, mmuleeleke itthu onireerela awe osuwela voohimya sa orupihana. Mmwiixuttiheke etthu yoohimya ni yoopaka akhala wira ookhala mutthu oniphavela onvara mapuro ahinireerela. Murumeeleke iviidiyu ni iliivuru ninvahiwa ahu ni mutthenkeso wa Yehova wira mwaakhapelele aniinyu.​—Nwehe ekaaxa eni: “Etthu Nyuwo ni Aniinyu Munireerela Anyu Osuwela”.

23. Hiyo Anamoona a Yehova nnoonela sai orupihiwa anamwane? Mwaha onittharelana ninrowa othokorerya exeeni?

²³ Waarupiha anamwane ekrime ni etampi yuulupale, tivonto hiyo Anamoona a Yehova ninninyokha vanceene. Niiwelelaka ikano sa Kristu, khanimmukhapelela nnakhala omwaakiherya mutthu onaarupiha anamwane wira ohihukhummwe mwaha wa etthu yootakhala opanka awe. Masi ninrowa waakhaliherya sai ale atupheliwe khurupihiwa? Mwaha onittharelana ninrowa waakhula nikoho nno.