Nyuwo Mwaanisuwela?

Okathi wa Biibiliya Murumeyi Aavara Muteko Xeeni?

OKATHI wa Biibiliya, murumeyi taakhapelela empa aahiiso mireerelo sa pwiya awe. Nuulumo na eHeeberi ni eGriki noowi “murumeyi” ikwaha sikina nintaphulela namuteko a vatthokoni.

Okathi Yosefe mwaana a Yakobe aari awe epottha wExiitu, nuuvira okathi aahikhala murumeyi a Potifari. Nto Biibiliya onihimya wira Potifari: “ahinvahererya Yosefe miteko sawe sothene”. (Maph. 39:2-6) Nave muhoolo mwaya okathi aari awe mukhulupale a wExiitu, Yosefe aahikhalana arumeyi awe.​—Maph. 44:4.

Okathi wa Yesu, axineene imatta yaakhala ipooma soorakamela imatta saya. Nto imatta iyo yaanaahiyerya arumeyi aya wira akhapeleleke ni yaawehaweheke anamuteko yaavara mmatta mmo.

Tani aareerela okhala murumeyi? Namalepa mmosa oniihaniwa Columela, yoowo aakhala eseekulu yoopacerya ohimmye wira epottha yaathanliwa okhala namuteko wala murumeyi, aahaana okhala mutthu “iixuntte saana ovara muteko”. Nto aahaana okhala mutthu “aarowa ovaraka saana muteko moohinyoonyeriwa nnakhala ohaahaaxaka atthu akina. Tthiri mutthu owo aahaana okhalana mikhalelo iya, ohuupuwelaka wira mutthu oosuwela variki ohisuwelaka ni aahaana ophavelaka wiixutta”.

Nuulumo na Muluku ninnilikanyiha muteko wa murumeyi ni miteko sinivariwa mmulokoni mwa eKristau. Mwa ntakiheryo, murummwa Pedru onnaatumererya maKristau otheene oriki: “Khula mutthu àrumeleke akhw’awe, . . . ntoko murumeyi òroromeleya a iparakha sohilikana sa Muluku”.​—1 Ped. 4:10.

Okathi Yesu aari awe valaponi, aahirumeela nlikanyiho na murumeyi nri yoolepa ya Luka 16:1-8. Nave-tho, eprofesia emosa yooniherya okathi aarowa awe orwa ntoko Mwene, Yesu aahaaroromeliha atthareli awe wira ammuthanla “murumeyi òroromeleya ni ànkhili”. Nto muteko muulupalexa wa murumeyi owo, waarowa okhala waavaha yoolya ya omunepani okathi wotheene maKristau makhwaawe okathi ola wookiserya. (Math. 24:45-47; Luka 12:42) Tthiri hiyo ninnixukhurela vanceene okhala egrupu ya atthu a olumwenku wotheene anaakhela yoolya ya omunepani, enilokiheriwa ni murumeyi ororomeleya ni aankhili.