‘Muhové’

1. Ntoko Yeremiya, woova xeeni oniwerya oniphwanya?

¹ Vaavo Yeremiya aathanliwa awe okhala profeta, owo oonale wira khaawerya okhala profeta. Masi Yehova aahimulipiha oriki: “muhiwové atthu”, nto mooreerela murima khumulipiha wira omalelihe muteko ole. (Yer. 1:6-10) Olelo-va, woova aahiiso wiixoona ohikhala etthu pooti oniiriha ohimakelaka orowa olaleerya. Woova nuupuwelaka wira atthu khanrowa onaakhela saana aahiiso wiixoona ohikhala etthu, pooti oniiriha ikwaha sikina ohirowa olaleerya. Ninrowa oxintta sai woova iwo, nto mareeliho xeeni anrowa onikhumelela?

2. Moota xeeni wiireherya vahinatthi onikhaliherya aya ovukula woova naalaleeryaka?

² Mwiireherye Vahinatthi: Wiireherya saana nihinatthi orowa olaleerya, pooti ovukula woova orina ahu. Mwa ntakiheryo, akhala wira okathi oniireherya ahu ninnuupuwela moota wowaakhula ale annikwasa masu, hiyo nnooreherya moota wowaakhula atthu awo. (Mir. 15:28) Xeeni ohirumeelaka okathi wa Omulompa Muluku Vatthokoni wira munsayari etthu yoohimya mwaakwasiwaka masu oxikola ni mmuteko woolaleerya?​—1 Ped. 3:15.

3. Moota xeeni omuroromela Yehova onnikhaliherya aya oxintta woova?

³ Mmuroromeleke Yehova: Omuroromela Yehova, tonrowa onikhaliherya oxintta woova. Yehova onnilipiherya wira onrowa onikhaliherya. (Yes. 41:10-13) Tthiri, Yehova ti ntthyawelo nahu nuulupalexa! Nave-tho, Yesu onnilipiherya wira hata ekhumelelaka etthu yootutuxerya, munepa wootteela wa Muluku onrowa onikhaliherya olaleerya mookhalela. (Mar. 13:11) Tivonto, okathi wotheene nohaana ovekelaka munepa wootteela wa Yehova.​—Luka 11:13.

4. Mareeliho xeeni aniphwanya ahu mwaha woovilela mmuteko woolaleerya, hata nikumanaka mixankiho?

⁴ Mareeliho: Vaavo vanivilela ahu mmuteko woolaleerya hata nikumanaka mixankiho, hiyo ninnilipa wira nikhumele saana mwa soweeha sa muhoolo. Ovilela iwo onniniiriha okhala oohoova ni oolipa murima, mikhalelo seiyo sinikumiheriwa ni munepa wootteela. (Mit. 4:31) Nave-tho, vaavo Yehova vannikhaliherya awe oxintta woova wahu, hiyo ninnilipiha nroromelo nahu ni okupali woopola wa Muluku. (Yes. 33:2) Ninnihakalala-tho osuwela wira ele enipaka ahu etthu enimusivela Tiithi ihu ori wiirimu. (1 Ped. 4:13, 14) Tivonto, nrowe nilaleye mitthaka sa Omwene moolipa murima ni mohoova, niroromelaka okhaliheriwa ni Yehova!