Nvahe Onamoona Woomalela Voohimya sa Omwene wa Muluku
1. Okhuma esumana 14 ya Marso, ninrowa othokoreryaka eliivuru xeeni mwa Yoosoma ya Biibiliya ya Muloko?
1 Okhuma esumana 14 ya Marso, 2011, ninrowa othokoreryaka eliivuru “Dê Testemunho Cabal” Sobre o Reino de Deus, mwa Yoosoma ya Biibiliya ya Muloko. Eliivuru ela enithokorerya sowiiraneya sa eliivuru ya Miteko, mwa enamuna enimwiiriha ole onisoma osiveliwa, vaavo vanoona awe itthu sookuxa murima siiraneya khalai silempwale eliivuru ela. Eliivuru ela khenithokorerya khuta eversiikulu, masi ennooniherya ele eniixutta ahu sa eliivuru ya Miteko, ni moota woovarihela muteko ele enisoma ahu.—aRom. 15:4.
2. Mutthokiherye makhalelo makina a eliivuru Testemunho Cabal.
2 Makhalelo a Eliivuru Eyo: Masu oopacerya ari epaaxina 2, ti epaphelo yoohakalaliha ya Nikhuuru Noolamulela, enooniherya ophavela waya wira hiyo nttottele mureerelo eliivuru ela. Okhuma muru wa 2, aakhala masu anooniherya ele enithokoreriwa muhina mwa khula muru; nto yoolepa enittharelana nuumala masu awo, enooniherya mpantta wa eliivuru eyo onrowa othokoreriwa. Miru sinceene sookhalana ikaaxa seiyo sinitthokiherya saana makhalelo a atthu, mapuro, ni sowiiraneya sinihimmwa ni eliivuru ya Miteko. Mukerekhere mwa eliivuru, ookhala opuro ohilempwale etthu, wira nilepeke ele ennisivela. Eliivuru eyo yookhalana ilatarato sinceene sa mBiibiliyani sinnikhaliherya osuwela sowiiraneya suulupale; nto epaaxina yookiserya ookhala indise yoowo orina masu anitthokiherya ele eniiraneya mwa ilatarato siri muliivuruni. Ekaapa yoopacerya ni yookiserya aakhala maapha annikhaliherya woona orowa vahoolo wa maKristau akhwiihu a eseekulu yoopacerya, vaavo awo vaapacenrye aya omwarexa ihapari sooreera “mpakha omalenle elapo”.—Mit. 1:8.
3. Makoho xeeni ootthuneya anrowa waakhuliwa okathi onirowa ahu osomaka eliivuru ya Miteko?
3 Waakhuliwa wa Makoho Ootthuneya: Othokorerya eliivuru ya Miteko onoonikhaliherya woona oratteene waakhuliwa wa makoho ootthuneya voohimya sa muteko wa eKristau. Mwa ntakiheryo, muteko xeeni wala ihapari sinaasuwanyeiha atthareli a ekeekhai a Yesu Kristu? Ti pani oneettiha muteko woolaleerya onivariwa mulaponi motheene, ni oneettiha sai? Olupatthiwa ni ovaanyihiwa wa maKristau waakumihenrye eparakha xeeni ya olaleerya? Munepa wootteela onnikhaliherya sai mmuteko ahu woolaleya?
4. Nipakeke exeeni wira nittottele mureerelo okathi woosoma eliivuru ela?
4 Wira muttottele mureerelo, mureheryeke vahinatthi ittima sinirowa othokoreriwa, ni omananiha okomentari mmulokoni. Muhicompeleke muthukumano ola, ni muupuweleleke ele yiixuntte anyu moota woovarela muteko mwaalaleeryaka. Nto, othokorerya wahu eliivuru ela yookuxa murima, eniirihe ovaha onamoona woomalela voohimya sa Omwene wa Muluku!—Mit. 28:23