“Warya Wanyu Wamwaleleke Atthu”
1. Eparakha xeeni yuulupale erina ahu?
1 Okhuma voosiisu mpakha okela wa nsuwa, waarya wa nsuwa, onninvuwiha Yehova Muluku. Masi waarya weiwo Yesu aatumerenrya awe awiixutti awe, waari wa muthinto mukina, eyo piiyo, “warya onvaha ekumi”. (Yoh. 8:12) Mutthu onaarya mmoota owo, onnikhalana eparakha yuulupale ni miritti suulupale sa ekristau. Yesu aarumme so: “Warya wanyu wamwaleleke atthu”, wira atthu awo attottele muraarelo. (Math. 5:16) Olelo-va eriyari ya epiphi yuulupale yomunepani, wookhala otthuneya wuulupale wa owooniheriwaka atthu akina waarya orina ahu! Ninrowa omutakiha sai Yesu wira waarya wahu waamwaleeleke atthu?
2. Moota xeeni Yesu oonihenrya awe otthuneya waya waarya womunepani?
2 Nilaleeryaka: Yesu aahirumeela okathi awe, ikuru ni itthu saarina awe, wira owiixuttihe ekeekhai atthu mmaitthokoni mwaya, mphironi, vamwaako, khuta opuro aaphwanya awe. Yesu aanisuwela wira efaita ya owiixuttiha atthu ekeekhai voohimya sa Muluku khenimala. (Yoh. 12:46) Nto wira atthu anceene yiixutte ekeekhai eyo, Yesu ahaatumererya awiixutti awe wira akhale “muthuko w’olumwenku”. (Math. 5:14) Awiixutti ale yaahiiriha muthuko aya waarya, apakaka itthu sooloka wa atthu akina ni owiixuttiha ekeekhai voohimya sa Muluku.
3. Ninrowa wooniherya sai ovaha wahu efaita omwaleya wa ekeekhai?
3 Arumeyi a Muluku annoona okhala etthu yootepexa otthuneya ‘wetta ntoko àna òwarya’, tivonto annilaleerya khuta opuro onaaphwanya aya atthu. (aÉf. 5:8) Okathi woomumula omutekoni wala oxikola, omusoma Biibiliya ni iliivuru sikina sa ekristau, pooti okumiherya okathi woolaleerya. Opaka etthu ntoko eyo waahimwiiriha murokora mwali opaceriha yoosoma ya Biibiliya ni ahaakawela apatthani awe a oxikola iliivuru sowiiraka 12!
4. Xeeni ohimmwaka wira “warya wahu” onihela muhina mweettelo wooloka?
4 Nivaraka Miteko Sooreera: Waarya wahu onihela muhina mweettelo ahu wa khuta nihiku. (aÉf. 5:9) Atthu annoona mweettelo ahu wa ekristau, tivonto eyo ennikumiherya muraarelo woolaleerya omutekoni, oxikola ni mapuro makina. (1 Ped. 2:12) Mwa ntakiheryo, mweettelo wooloka wa mwaana mmosa aarina iyaakha 5 waahimwiiriha prusoore muthiyana owiitthana anamuyari a mwaana ole. Prusoore owo aahimmye so: “Nkinanwehe mwaana ntoko ola orina mweettelo wooloka”. Tthiri muteko ahu wa ekristau vamosa ni mweettelo wooloka onniwiiriha atthu akina ophavela ophwanya “warya onvaha ekumi” nto khiyanvuwiha Yehova Muluku ahu.