Yehova Onniniixuttiha Wira Nilaleeryeke
1. Vaavo Yehova onaavaha awe muteko apinaatamu, exeeni onipaka awe-tho?
1 Vaavo Yehova onaavaha awe muteko apinaatamu, owo onnaakhaliherya wira awerye ovara muteko owo. Mwa ntakiheryo, okathi Yehova aamurumme awe Nowe ovara muteko ahaatonko awe, eyo piiyo, ompaka pakiti, Muluku aahimulakiherya moota wompaka. (Maph. 6:14-16) Nave-tho, okathi Moise yoowo ari makampusi oowiimaaliha, aarummwale awe orowa olavula ni makhulupale a Isarayeli ni Farawo, Yehova aahimulipiherya oriki: “Miyo kinrowa okhala ni nyuwo mwalavulaka: kinrowa wohimeryakani entthunanyu ohimya”. (Okhum. 4:12) Nto okathi onilaleya ahu ihapari sooreera, Yehova onninivaha malakiheryo. Yehova onniniixuttiha moota woolaleerya, orumeelaka Exikola ya Orummwa wa Muluku ni Muthukumano wa Orummwa. Ninrowa ottottela sai mureerelo malakiheryo ala?
2. Ninrowa ottottela sai mureerelo Exikola ya Orummwa wa Muluku?
2 Exikola ya Orummwa wa Muluku: Muhaana osomaka vahinatthi myaha sinrowa othokoreriwa khula muthukumano. Nto okathi muniwoona anyu anna ni arokora arumeelaka iponto sa Exikola vaavo anilavula aya myaha saya, nyuwo munoovikaniha wiixutta moota woosomiha saana. (Mir. 27:17) Mwaarowaka omuthukumanoni wa Exikola ya Orummwa wa Muluku, mukuxeke eliivuru anyu Escola do Ministério, ni murumeeleke ntoko eliivuru eniwiixuttihani moota woolaleerya. Okathi muhooleli a exikola onittittimiherya awe iponto suulupale siri muliivuruni nuuvira khuta mwaha wa naxikola, nyuwo muhaana okhwenyenyaka iponto suulupale muniphavela anyu orumeela. Nave, murumeeleke ipantte sa okerekhere wa eliivuru eyo wira mulepeke itthu sinitthuneya. Masi, enamuna yooreerexa ya ottottela mureerelo muthukumano ola, ori okomentari. Nyuwo muhiilepiha exikola? Mwaakhela mwaha, muhaana olokiherya saana ni ovarihela muteko miruku munivahiwa anyu. Mwarowa olaleerya, murumeeleke ele mwiixuntte anyu.
3. Exeeni enirowa onikhaliherya ottottela mureerelo Muthukumano wa Orummwa?
3 Muthukumano wa Orummwa: Nnoowerya wuupuwelela saana malakiheryo a muthukumano niixuntte ahu, akhala wira nnoosoma myaha sotheene ni olokiherya ikomentaario vahinatthi. Akhala wira khaninrakamiha ikomentaario sahu, nto nnoowiiriha atthu akina okomentariki. Nwiriyaneke saana okathi onipakiwa aya sowooniherya; nave-tho murumeeleke malakiheryo munoona anyu wira animookhaliheryani mmuteko anyu. Musukeke saana Orummwa Ahu wa Omwene, yoowo munoona anyu wira onookhaliherya muteko anyu woolaleerya.
4. Xeeni vanitthuneya ahu orumeelaka saana malakiheryo anivahiwa ahu ni Muluku?
4 Moolikanasa ni muteko aavahiwe awe Nowe ni Moise, olaleya ihapari sooreera olumwenku wotheene etthu yooxankiha. (Math. 24:14) Tthiri, akhala wira nnoomuroromela Yehova, Mwiixuttihi ahu Muulupalexa, nirumeelaka malakiheryo onnivaha awe a moota woolaleerya nnookhumela saana.—Yes. 30:20.