Makoho Oowaakhuliwa

◼ Niirihaka Yoosoma ya Biibiliya neemenle ene, vannireerela ovekela?

Okathi oniiriha ahu yoosoma ya Biibiliya, opacerya ni omaliha ni nivekelo onnikumiherya mireerelo. Vaavo ninvekela ahu okathi oniiriha ahu yoosoma ya Biibiliya, nninvekela Yehova wira onivahe munepa awe wira okhaliherye yoosoma ahu. (Luka 11:13) Ohiya-vo, mavekelo annimukhaliherya ole onimusoma Biibiliya osuwela wira ele eniixutta awe ti yekeekhai; nave annimwiixuttiha moota woovekela. (Luka 6:40) Tivonto, vanooloka ovekela akhala wira mutthu owo oheemererya omusoma Biibiliya. Masi, okhala wira mikhalelo sinnivirikana, ole oniiriha yoosoma eemenle ene ohaana okhala a miruku wira osuwele akhala wira vannireerela ovekela okathi oniiriha awe yoosoma eyo.

Etthu ekina yootthuneya othokorerya, ti opuro oniiriwa aya yoosoma eyo. Akhala wira opuro muniiriha anyu yoosoma mweemenle ene ti wookhalela, ni munnivikaniha wiiriha yoosoma eyo, pooti opaka nivekelo noohipisa wanipacerya ni wanikisa wa yoosoma. Masi akhala wira opuro owo khahiyo woomaaleleya, wala opaka nivekelo onnimwiiriha owo onimusomiha anyu wuuliwa muru, vanooreera ohipacerya ovekela mpakha ophwanya opuro woomaaleleya. Ohiya paahi okhalana ephoole opuro oniiriha ahu yoosoma, masi-tho nihaana okhala a miruku wira niwehe vaareerelaka opacerya yoosoma ya Biibiliya ni nivekelo.—Nwehe Orummwa Ahu wa Omwene a Marso 2005 a ekunya, epaaxina 4.