Eviidiyu: As Maravilhas da Criação Revelam a Glória de Deus
Anamunceene waasivela oweha itthu sipattuxiwe. Masi atthu vakhaani paahi tanisuwela wira itthu iyo sinooniherya muupuwelo ni moonelo wa Mpattuxa ahu Muulupale. (aRom. 1:20) Khalai, Davidi aahiixutta voohimya sa Yehova orweela mwa Nuulumo nowuupuxeriwa na Muluku. Masi-tho, orweela mwa ‘oweha’ itthu sipattuxiwe, Davidi ahaataana ni Muluku. (Esal. 8:4, 5) Eviidiyu eni: As Maravilhas da Criação Revelam a Glória de Deus (Soopattuxiwa Sootikiniha Sinnuupulula Ovuwa wa Muluku) enninikhaliherya hiyo, aniihu, ni ale aniwiixuttiha ahu Biibiliya oweha itthu kamosa-kamosa sipattuxiwe ni Yehova. Nave-tho, eviidiyu ela ennikhaliherya osuwela mikhalelo ni omutthu wa Mpattuxa ahu Muulupale, etthu yeeyo enniiriha wataana nuuwo. Nuumala oweha eviidiyu ela, moone mwaaweryaka waakhula makoho ala anittharelana.
(1) Moota xeeni wunnuwa ni makhalelo a erimu oniwiirihaayani ovaha efaita miteko sa Yehova? (Yes. 40:26) (2) Vaavo nintokosa ahu maasi oratteene, exeeni nniixutta ahu voohimya sa Ole opattunxe maasi awo? (Wis. 14:7) (3) Moota xeeni wunnuwa wa elapo ni muthinto erekamenle aya nsuwa enooniherya aya wira Yehova tamiruku? (4) Muteko xeeni onivara aya mweeri? (Esal. 89:38) (5) Moota xeeni Yehova aapanke awe apinaatamu wira epuheke okumi? (6) Exeeni ekhanle emoleekula DNA, (ácido desoxirribonucleico)? (Esal. 139:16) (7) Moota xeeni apinaatamu anivirikana aya ni itthu sotheene sipattuxiwe valaponi? (Maph. 1:26) (8) Etthu xeeni enilipelela anyu moohakalala elapo esya?
Ipantte Sikina sa Eviidiyu: (9) Moota xeeni sinipakeya aya ikoore? (10) Moota xeeni maasi aniwerya aya ovira muhina mwa mwiri mpakha ophiya mmakukhuni? (11) Muteko xeeni maasi anivara aya mwerutthuni mwahu? (12) Nvahe matakiheryo anooniherya wiiwanana okhanle eriyari ya itthu sikumi. (13) Moota xeeni itthu sipattuxiwe sinisuwela aya wiiraana ni itthu sikina? (14) Exeeni ekhanle “Ângulo de ouro”, ni moota xeeni Ângulo owo onoonihereya awe orweela mwa itthu sipattuxiwe?
‘Nkawehani’ Saana Itthu Sipattuxiwe ni Yehova: Yesu oonitumererya ‘waweha axinuni [axipalame] anvava musulu’ ni ‘wona waleya wa ithutu sa mmathalani’. (Math. 6:26, 28) Opaka eyo onimunnuuherya waamini wahu, onooniiriha omuroromela Mpattuxa, vamosa ni ovaha efaita miruku sa Yehova, ikuru sirina awe sa owoopola atthu awe ni niphento nawe. Ohiya okuxeya ni itthu sa mulaponi, mwiivahe okathi wira mwiimananihe oweha miteko sootikiniha sa Yehova, ni muupuwelele moota itthu iyo sinniixuttiha aya etthu voohimya sa Muluku ahu.—Esal. 19:1.