Muhakalaleke ni Muteko Anyu
1. Exeeni ekhanle oovukula oluttuweliwa wahu olaleerya?
1 Mutthu opattuxiwe wira ohakalaleke ni muteko onvara awe. (Mus. 2:24) Masi, naahiweheke itthu sooreera sa muteko ahu woolaleerya, ohakalala wahu ni oluttuweliwa olaleerya pooti ovukuwa. Exeeni enirowa onikhaliherya ovikaniha okhalana muupuwelo wooloka?
2. Xeeni vanitthuneya ahu okhalana muupuwelo wooloka voohimya sa muteko woolaleerya?
2 Mukhalane Muupuwelo Wooloka Voohimya sa Olaleerya: Nnaamwi ale yanwirianne Yesu yaari vakhaani, masi muteko awe waari woovara murima. (Yoh. 17:4) Mwa nlikanyiho nawe na mulipa oomisa epyo, Yesu aahihimya wira anamunceene khiyaarowa weemya ihapari sa Omwene seiyo sinilikanyihiwa ni epyo. (Math. 13:3-8, 18-22) Tivonto, wiimananiha wahu olaleerya onnikumiherya mireerelo sinceene.
3. Ninrowa ‘wiimiha [sai] mihokorokho’ hata atthu anceene ahicalelaka muteko ahu woolaleerya?
3 Moota Owiimiha Mihokorokho Sinci: Moovarihana ni nlikanyiho na Yesu, ale aneemya ihapari sa Omwene, ‘annìma mihokorokho’. (Math. 13:23) Nuumala etiriku othapuluwa ni muhokorokho aya ottokottha, ele enikhumelela khahiyo paahi mutathi wa etiriku, masi epyo esya. Tivonto, mihokorokho seiyo maKristau anikumiherya aya, khontaphulela okhala awiixutti asya, masi onitaphulela wuncerereya wa epyo, eyo piiyo, olaleya wahu Omwene. Eyo ti etthu ennihakalaliha vanceene, pooti atthu awiriyanaka wala ahiwiriyanaka ihapari sa Omwene. Ohiya-vo, hiyo ninnikhaliherya otteelihiwa wa nsina na Yehova. (Yes. 43:10-12; Math. 6:9) Nave-tho, ninnikhalana eparakha ya ovara muteko vamosa ni Muluku. (1 aKor. 3:9) Nto ‘mihokorokho [iya sa] murim’ahu’, sinnimuhakalaliha Yehova.—aHéb. 13:15, 16.
4. Mireerelo xeeni nihinsuwela ahu, sinikumiherya aya muteko ahu woolaleerya?
4 Ohiya-vo, olaleerya wahu pooti okumiherya mireerelo sihinoona ahu. Waaniheryasa, atthu akina yaiwale ihapari sa Yesu, khiyaakhanle awiixutti awe mpakha okathi aamalihale awe muteko awe valaponi. Moolikanasa, epyo ya Omwene enaala ahu pooti ohikhalana mitathaari ni wunnuwa vamurimani va mutthu okathi onimulaleerya ahu. Nave-tho mutthu owo pooti wiixutta ekeekhai hiyo nihisuwenle. Tthiri, muteko ahu woolaleerya onnikumiherya mireerelo. Nto, nivikanihe ‘wima mihokorokho sowatta’ wira nooniherye okhala awiixutti a Yesu.—Yoh. 15:8.