Makoho Owaakhuliwa

◼ Malakiheryo xeeni a Biibiliya anivareleya muteko voohimya sa omurumeela celulari okathi wa mithukumano sa Ekristau ni okathi woolaleerya?

“Itthu Sothene . . . Sokhalana Okathi Aya”. (Mus. 3:1): Acelulari annaavaha eparakha atthu ya olepa mensage wala olavula ni akina khula okathi aniphavela aya. Masi, wookhala okathi maKristau ahintthuneya aya waakanyeriwa ni telefoni aya. Mwa ntakiheryo, mithukumano sahu siri okathi woomukokhorela Yehova, waakhela sowiixuttiha sa omunepani, ni olipihana mukina ni mukhwaawe. (Otum. 31:12; Esal. 22:23; aRom. 1:11, 12) Nto, vannireerela omuttipiha telefoni ahu okathi oniphiya ahu omuthukumanoni, vano khiyaakhula mensage nuumala mithukumano iyo. Akhala wira ninlipelela olavula ni mutthu mukina nto khiyatthuneya ohinwala telefoni ahu, nihaana omuregulari wira ohaanyoonyihe akina.

‘Mwìre Itthu Sothene Mwaha wa Ihapari Sorera’. (1  aKor. 9:23): Okathi mukina, ti vooreerela omurumeela celulari mmuteko woolaleerya. Mwa ntakiheryo, munna onihoolela muteko woolaleerya, pooti omurumeela celulari wira osuwele aryaaya anna akina mmuttettheni mmo. Nave, anamalaleerya pooti omurumeela celulari wira alavule ni mutthu osiveliwe ekeekhai wala ole animusomiha aya, ahinatthi orowa omuxukurya, vanceenexa akhala wira owo onikhala ottaiwene. Nto, akhala wira noomukuxa celulari, nihaana okhalana ephoole wira ohinaakanyerye okathi ninlavula ahu ni mwaneene etthoko. (2 aKor. 6:3) Okathi nnaalipelela ahu anna akina, ohiya otelefonari wala omulepela mensage mpatthani ahu, vanooreerela othokorerya muteko ahu woolaleerya ni ale anilaleeryana ahu.

Mwaathokoreryeke Akina. (1 aKor. 10:24; aFil. 2:4): Hiyo nihinyoonyeriweke ophiya okathi wooreerela wa mithukumano sa orowa olaleerya, nuupuwelaka wira pooti otelefonari wala olepa mensage wira nisuwele opuro anna anilaleerya aya. Vaavo nimpisa ahu ophiya, ikwaha sinceene egrupu enitthuneya otthokihiwa-tho. Ekeekhai wira okathi mukina, pooti onikhumelela etthu yahuupuwela ahu enirowa oniiriha opisa ophiya. Masi, vaavo nimpaka ahu yoolema ya ophiya okathi wooreerela, ninnittittimiha marehereryo a Yehova, munna onihoolela, ni anamalaleerya akhwiihu.