Niireke Nyuwo Munniphavela Opaka Marukunuxo?

1. Oturukeya wa makhalelo a olumwenku onivekela wira nipake marukunuxo xeeni?

¹ Mwa yoolepa ya 1 akorinto 7:31, Biibiliya onnilikanyiha olumwenku ntoko epalku enikumiherya itthu siniturukeya ni atthu aniirela mpantta. Moolikanasa, mwaha wa oturukeya wa itthu molumwenkuni, onnivekela wira nipakeke marukunuxo voohimya sa inamuna sahu soolaleerya, wiitthokiha wahu, ni moolumo ahu. Niireke nyuwo munniphavela opaka marukunuxo?

2. Xeeni vanitthuneya ahu opakaka marukunuxo moovarihana ni nikhuuru nootthokiheya?

² Inamuna Sanyu Soolaleerya: Okhuma khalai, muloko wa eKristau onnipaka marukunuxo. Mwa ntakiheryo, okathi Yesu aarumme awe awiixutti awe wanipacerya, aahaaleela wira ahikuxe murupa wala musurukhu mmurupani mwaya. (Math. 10:9, 10) Masi, muhoolo mwaya owo aahituruka malakiheryo awo, mwaha woowi aahisuwela vahinatthi wira muhoolo awiixutti awe yaarowa olupatthiwa ni wira muteko woolaleerya waarowa omwareela mittetthe sikina. (Luka 22:36) Iyaakha sivinre, nikhuuru nootthokiheya na Yehova naahirumeela inamuna soovirikana sa olaleerya ntoko: olaleerya arumeelaka iwarakha, raadio, ni ikaaro saarumiha ihapari sa Omwene moovarihana ni sootthuneya sa okathi ole. Mahiku ala, mwaha woowi mittetthe sinceene ti soovila waaphwanya atthu vatthokoni vaya, nikhuuru na Yehova ninnittittimiherya otthuneya waya wuncererya yoolimalela ahu ya olaleerya khuta empa, nilaleeryaka mapuro aniphwanyaneya atthu ni olaleerya mohiilokiherya. Nave-tho hiyo ninnitumereriwa orowa olaleeryaka khuta empa makaaripi akhala wira atthu aniphwanyaneya omutekoni voosisu wala othana. Nto vaavo ekaaro ya wiirimu ya Yehova enirukunuwa aya, niireke nyuwo munnivikaniha otthara?​—Ezek. 1:20, 21.

3. Xeeni opaka marukunuxo onnikhaliherya aya okhumela saana mmutekoni woolaleerya?

³ Olaleerya Wanyu: Exeeni enaaxankiha atthu a muttetthe anyu? Niireke, musurukhu? Emusi? Ekhotto? Tthiri ti vootthuneya osuwela mixankiho sa vano ni mikhalelo sa khula nihiku mmuttettheni mwahu wira niwerye otthokiha olaleerya moovarihana ni okathi owo. (1 aKor. 9:20-23) Vaavo axineene etthoko anihimya aya itthu sinaaxankiha, nto ohiya ovikaniha olavula mwaha otthokinhe ahu, ti vooloka orukunuxa olaleerya wahu ni olavula itthu sinaaxankiha.

4. Xeeni vanitthuneya ahu opaka marukunuxo mowaakuveya?

⁴ Moohipisa va, olumwenku ola onoomala nto maxakha maalupale anirowa opacerya. “Okathi onnihalela ori vakhani”. (1 aKor. 7:29.) Nto, ti vootthuneya wira nipake marukunuxo moohipisa, wira niwerye waalaleerya atthu anceene mwa okathi ola vakhaani ohanle!