Mwaatakiheke Maprofeta—Hoseya
1. Nikoho xeeni waaniheryasa mutonko anyu wiikoha?
1 ‘Kiireke kinniwerya wiileva wira kiiwelele yootthuna ya Yehova?’ Waaniheryasa, nyuwo mootoko opaka nikoho nlo, vaavo muupuwelela anyu sa oreera murima ni omoriwa ikharari wa Yehova. (Esal. 103:2-4; 116:12) Profeta Hoseya, okathi wotheene aaniiwelela ele aarummwa awe ni Yehova, nnaamwi eyo yaavekela wiileva. Ninrowa omutakiha sai Hoseya?
2. Ninrowa omutakiha sai Hoseya nivilelaka mmutekoni woolaleerya?
2 Olaleerya Okathi Wooxankiha: Hoseya aalaleya ihapari sawe epantte ya omwene wa mahimo muloko a Isarayeli. Muttetthe owo, okokhorela wa ekeekhai waahala vakhaani omala-mala. Mwene Yerobowamu a Nenli aanipaka itthu sootakhala vamaithoni va Yehova, ni aanaatumererya atthu omukokhorela mwaanyompe yoowo waapacerihiwe ni Yerobowamu Oopacerya. (2 Mam. 14:23, 24) Nave-tho, mamwene yaamuranttenle, khiyaapanke etthu wira yaakhoottiherye atthu okokhorela woohiloka. Tivonto, omwene owo waahipwetexiwa mwaakha wa 740 A.E.C. Nnaamwi saakhanle mixankiho iyo, Hoseya aahirumeela ntoko profeta oororomeleya mwa iyaakha sowiiraka 59. Niireke hiyo ninnivikaniha olaleerya hata nilupatthiwaka wala ohicaleliwa?—2 Tim. 4:2.
3. Okumi wa Hoseya onooniherya sai omoriwa ikharari wa Yehova?
3 Nittittimiheryeke Omooriwa Ikharari wa Yehova: Yehova aahimuruma Hoseya omuthela “muthiyana namararuwa”. (Hos. 1:2) Mwa anamwane 3 aarina awe mwaarawe, Gomeri, woonasa wene mwaana oopaceriwa paahi taari a Hoseya. Masi, Hoseya aahimulevelela mwaarawe. Eyo yaathoonyerya wira Yehova aamwaamorela ikharari aIsarayeli oottharuwa. (Hos. 3:1; aRom. 9:22-26) Niireke ninnihiya soophavela sahu wira naasuweliwe atthu otheene voohimya sa omoriwa ikharari wa Yehova?—1 aKor. 9:19-23.
4. Ninrowa wiileva sai wira nikhaliherye muteko wa Yehova?
4 Arumeyi akina a Yehova, aahiya miteko yaakhela aya musurukhu munci wira yinnuuherye muteko woolaleerya. Akina aathanla ohithela wala ohitheliwa, aahiiso ohikhalana anamwane ephavelaka okhaliherya Omwene. Vaavo nnuupuwelela ahu okumi wa Hoseya, waaniheryasa hiyo pooti ohimya wira khinaawerya opaka ele yaapanke awe. Masi, nancererya ovaha wahu efaita oreera murima wa Yehova, ni ororomela munepa awe wootteela wira onivahe ikuru, nnoowerya orumeeliwa ni yena mwa enamuna yahuupuwela ahu, ntoko Hoseya.—Math. 19:26; aFil. 2:13.