Makoho Oowaakhuliwa

◼ Exeeni Anamwane Enitthuneya Aya Wiixutta Wira Yinnuwe Momunepani?

Anamuyari a eKristau anniimananiha vanci wira yaahuwe anaaya yaalakaka ni owiixuttiha ikano sa Yehova. (aÉf. 6:4) Mwa ntakiheryo, anamuyari anci annoona okhala vooloka othokorerya ni anaaya yoolepa ya nihiku khula voosisu. Okathi wa omulompa Muluku vatthokoni ni okathi mukina, imusi pooti woona eviidiyu nto khiyavaanela ele yiixuntte aya; olavula sa myaha sinikhuma muliivuruni Os Jovens Perguntam; opaka eteatro ya mwaha wa mBiibiliyani wala itthu siniireya khuta nihiku. Masi wira ‘aphwanye mwixuttiho w’atthu alupale’, anamwane ahaana wiixutta-tho ikeekhai suulupale sa Biibiliya.​—aHéb. 6:1

Muthokorerye ele ninwiixuttiha ahu ale anaalaleerya ahu. Mwa ekwaha yoopacerya wala ekwaha yootthikela, hiyo ninniilipiherya opaceriha yoosoma nirumeelaka eliivuru Biibiliya Oniixuttiha Exeeni Tthiri?. Nuumaliha eliivuru eyo, ninnirumeela eliivuru “Mukhaleke Mophentani Mwa Muluku”. Mwaha aya? Eliivuru Biibiliya Oniixuttiha Exeeni ennimukhaliherya ole oniixutta osuwela ikeekhai soopacerya sa Biibiliya. Eliivuru ‘Omphenta Muluku’ ennimwiixuttiha moota woorumeela malakiheryo a Biibiliya. Osoma iliivuru iyo soopiili, onnaakhaliherya ale asya omutthara Kristu saana ni ‘olipa mowaaminini’. (aKol. 2:6, 7) Nto iliivuru iya sinimwaakhaliherya aniihu. Awo anitthuneya wiixutta voohimya sa yowoopola, Omwene, ni mukhalelo wa alipa-ookhwa. Nave-tho, anamwane ahaana osuwela nthowa naya Muluku oneemererya awe ohaawa ni exeeni enooniherya wira ninkhala mahiku ookiserya. Awo ahaana okupali wira Anamoona aakhalana ekeekhai. Nave, amiravo ahaana wiiwexexa malakiheryo a Biibiliya ni owiixuttiha “ankhili aya”. (aHéb. 5:14) Ekeekhai wira anamuyari ahaana othokorerya munnuwelo ni wiiwexexa wa anaaya. Masi anamwane anci anniwerya wiixutta ikeekhai suulupale sa Biibiliya hata nlelo aryeene acikhaani.​—Luka 2:42, 46, 47.

Wira akhaliheriwe anamuyari, esaite jw.org enoruuhaka myaha sinivarihana ni eliivuru Biibiliya Oniixuttiha Exeeni?. Myaha iyo siniphwanyaneya opuro oni: ENSINOS BÍBLICOS > ADOLESCENTES. Muhoolo sinookumiheriwaka-tho myaha sinivarihana ni eliivuru ‘Omphenta Muluku’. Nave-tho pooti orumeeliwa iliivuru sene. Anamuyari pooti othanla akhala wira anrowa orumeela myaha iyo okathi wa Omulompa Muluku Vatthokoni, vaavo animusomiha aya mwanaya wala okathi animwiixuttiha aya opaka yoosoma awe ya omwaneene.