Mwaatakiheke Maprofeta—Sofoniya
1. Okathi xeeni Sofoniya aarumenle awe ntoko profeta, ni onivanhe sai ntakiheryo nooloka?
1 Eriyari ya eseekulu 7 AEC, Bayali aanikokhoreliwa vanceene oYuda. Nave, Mwene ootakhala Amoni iira iiviwe ene niinano, nto Mwene musya Yosiya yoowo aari mmiravo, aahipacerya olamulela. (2 Wah. 33:21–34:1) Nto okathi yoowo, Yehova aahimuruma Sofoniya wira alaleye ihapari soophukela. Waaniheryasa, Sofoniya iirela mpantta emusi ya mamwene oYuda. Masi hata vari siiso, owo khaavukunle ihapari soophukela aarummwale awe ni Yehova wira aaleele makhulupale a nloko nle. (Sof. 1:1; 3:1-4) Moolikanasa ni Sofoniya, hiyo nikhaleke oolipa murima. Nave, niheemyeke wira omusi okhaleke wootepa otthuneya ovikana omukokhorela wahu Yehova. (Math. 10:34-37) Nto ihapari xeeni Sofoniya aalaleya awe, ni aakhumenle sai?
2. Nipakeke exeeni wira noopoliwe nihiku na onanariwa wa Yehova?
2 Mumphavele Yehova: Yehova paahi toniwerya owoopola atthu nihiku ninviruwa awe. Tivonto Sofoniya aatumerenrye awe aYuda omphavela Yehova, ophavela exariya, ni wiiyeviha, okathi ohinatthi omala. (Sof. 2:2, 3) Moolikanasa ni Sofoniya, hiyo ninnaatumererya atthu omphavela Yehova. Masi-tho, nihaana opakaka etthu wira nihimuhiye ‘omutthara’ Yehova. (Sof. 1:6) Hiyo ninnimphavela Yehova okathi ninsoma ahu Nuulumo nawe ni onvekela miruku. Ninniphavela exariya nikhalanaka mweettelo wooloka. Nave, ninniphavela wiiyeviha vaavo nniiwelela ahu malakiheryo a nikhuuru nootthokiheya na Yehova.
3. Xeeni vanitthuneya ahu okhalana moonelo wooloka voohimya sa olaleerya?
3 Mireerelo: AYuda akina yaahiiwelela ihapari soophukela sa Sofoniya. Mwa ntakiheryo, Yosiya aahipacerya omphavela Muluku oryeene mwaamukhaani. Muhoolo mwaya, Yosiya aahipaka ekampaanya ya omala-maliha okokhorela wowootha oYuda. (2 Wah. 34:2-5) Olelo-va, nnaamwi ipyo sikina sa Omwene simorelaka mphironi, opuro vari maluku, wala etthaya yowaatta miiwa, ipyo sikina sinnimorela etthaya yooreera eniima mihokorokho. (Math. 13:18-23) Moohaaniherya, Yehova onoovikaniha onireeliha vaavo vaniluttuweliwa ahu olaleerya.—Esal. 126:6.
4. Xeeni nintthuneya ahu ovikaniha olipelela nihiku na Yehova?
4 AYuda akina yuupuwela wira Yehova khaarowa opaka etthu. Masi, owo aahilipiherya wira nihiku nawe nuulupale naari vakhiviru. (Sof. 1:12, 14) Owo anwoopola atthu yaale yaarowa otthyawela wa yena. (Sof. 3:12, 17) Nto, vaavo ninlipelela ahu nihiku na Yehova, nikhaleke oohakalala nimurumeelaka Muluku ahu hoothe ni axinnihu!—Sof. 3:8, 9.