Mwaatakiheke Maprofeta—Nahumi
1. Exeeni enixutta ahu sa eliivuru ya Nahumi?
1 Milepe sa oNiinive wa khalai, sinnooniherya wira Yehova onnaahukhumu awanani Awe, moovarihana ni eprofesia ya Nahumi. Nave, hata awanani awo atakhalaka vanci, awo khaniwerya omuxintta Muluku. (Nah. 1:2, 6) Nto, othokorerya eprofesia ya Nahumi, onoonikhaliherya mmutekoni woolaleerya.
2. Moota xeeni ihapari sahu sinaalipiha aya atthu?
2 Ennihakalalia ni Ovaha Nlipelelo: Wanipacerya, eliivuru ya Nahumi enikhala ntoko eprofesia yoophukela ya oNiinive, ekapitaali ya khalai ya Asiria oowiixinnuuha. (Nah. 1:1; 3:7) Masi, wa atthu a Yehova a khalai, eprofesia ela yaahikhalana ihapari sooreera. Nsina noowi Nahumi, nintaphulela “Omaaliha” wala “Olipiha”. Owo aahaalipiha aYuda wira awanani aya yaarowa opwetexiwa moohipisa! Nave, aahaaleela wira Yehova ‘onnasuka atthu awe nihiku n’oxanka’. (Nah. 1:7) Moolikanasa, hiyo ninnilaleya ihapari sooreera ni waatumererya atthu omphavela Yehova.—Nah. 2:1.
3. Ninrowa omutakiha sai Nahumi voohimya sa orumeela matakiheryo ni malikanyiho?
3 Murumeele Matakiheryo ni Malikanyiho: Yehova aahimuleela Nahumi wira opwetexiwa wa Niinive waarowa olikanasa ni epooma ya wEjiitu ya Thebe, (No-amon), yeeyo yaapwetexiwe ni Asiria. (Nah. 3:8-10) Okathi onaaleela ahu atthu sa omala wa olumwenku ola wootakhala, nittittimiheryeke iprofesia sinooniherya wira Yehova onnimaliherya sotheene sinihimya awe. Mwa ntakiheryo, okathi aBabilonia ni aMedia yaaphavela aya opwetexa epooma ya oNiinive mwaakha wa 632 AEC, epula yuulupale yaahiiriha osareya Muro Tigre, nto khumoroxaka ixiri soorakama sa epooma ele. Nto Niinive aahixinttiwa mowaakuveya, ntoko Yehova aahimyale awe.—Nah. 1:8; 2:7.
4. Ninrowa orumeela sai moolumo ookhweya ni aniiweya saana okathi woolaleerya?
4 Moolumo Ookhweya ni Aniiweya Saana: Eliivuru ya Nahumi elempwale mwa enamuna yookuxa murima ni malikanyiho. Itthu saahimya awe saari soowiiweya. (Nah. 1:14; 3:1) Moolikanasa, nihaana orumeelaka masu ookhweya naalaleeryaka. (1 aKor. 14:9) Nihiku noopacerya, muhimyeke saana nthowa naya munimuxukurya anyu mutthu owo. Okathi munimusomiha anyu Biibiliya, mwaakhaliheryeke atthu omwaamini Yehova ni Nuulumo nawe, ni oweha moota ele eniixutta aya enaakhaliherya aya.—aRom. 10:14.
5. Etthu xeeni yoolipiha eniphwanya ahu mwa eprofesia ya Nahumi?
5 Nahumi aaniroromela wira nuulumo na Yehova naamwiiraneya. Eyo ennooneya mwa eliivuru ya Biibiliya enikuxa nsina nawe. Nto vaavo olumwenku wa Satana oniphiya aya wanikisa, ninnihakalala mwaha wa yooleiherya ela ya Muluku eni: “[Ehasara khenrowa-tho] orukunuwela imara pili”.—Nah. 1:9.