Isipo sa Niinano Wira Nimulompe Muluku!
1 Muthukumano opakiwe niinano wa khula mwaakha a Sociedade Torre de Vigia de Bíblias e Tratados de Pensilvânia, EUA, 4 a Outubro, 2014, waahilaleiwa wira eliivuru ahu ya isipo enrowa olokiheriwa vasya. Tthiri iyo saari ihapari soohakalaliha! Ale yaarwiiye muthukumano ole, yaahuupuxeriwa efaita erina aya isipo sahu sa Omwene wira nimulompe Muluku.—Esal. 96:2.
2 Waaniheryasa munniikohaka so: ‘Xeeni vanitthuneya aya olokiherya eliivuru ya isipo?’ Ahaavo mathowa manceene. Noopacerya: Wiiwexexa wahu Soolempwa onnivikaniha olokiheriwa, nto eyo enniiriha moolumo a isipo sahu otthuneyaka olokiheriwa. (Mir. 4:18) Nthowa nikina: Moolumo manceene a eliivuru ahu ya isipo, akumihiwe mBiibiliyani Tradução do Novo Mundo a khalai. Nto moolumo awo ahaana olokiheriwa wira avarihaneke ni Biibiliya musya. Okhala wira olokiherya moolumo awo waamutthuneya muteko muulupale, Nikhuuru Noolamulela nihuupuwela wuncererya masipo vakhaani.
3 Niireke nihaana olipelela okumiheriwa eliivuru esya ya isipo wira nipacerye orumeela isipo iyo isya? Nnaari. Ti voohakalaliha wooleelani wira myeeri sinirwa, isipo sikina sa niinano sinoopwehiwa esaite ahu, jw.org. Nuumala okumiheriwa esipo esya, mpantta wookiserya wa Muthukumano wa Orummwa onookhalanaka masu ani: “Nsipo na niinano”.
4 Moota Wowiixutta Isipo sa Niinano: Pooti okhala vooxankiha wiixutta isipo iyo. Masi, ntoko nasalimo, nimphavela wiipa okathi wa mithukumano ohiya omaala. (Esal. 30:13) Moone mavalo anittharelana wira mwiixutte nsipo na niinano.
• Muwiriyane ikwaha sinceene esipo yoogravariwa yeeyo enrowa oheliwa esaite ahu. Akhala wira munoowiriyana esipo eyo ikwaha sinceene, vanimookhweelani wuupuwelela.
• Musome moolumo a isipo iyo imaara sinci wira muhele mmuruni.
• Mutthareke melodia. Mpakeke eyo mpakha olimalela isipo iyo.
• Okathi Onimulompa anyu Muluku vatthokoni mwiimananiheke wunsayari vaweryaneya vale.
5 Okathi onirowa aya okumiheriwaka esipo esya wira niipe wanikisa wa Muthukumano wa Orummwa, ninrowa opaceryaka toko owiriyana nsipo nlo na piano. Moottharelana, ninrowa wiipaka nittharaka melodia, ntoko nilimalenle ahu.
6 Tthiri wiipa okathi wa muthukumano, onniniphwanyiha ohakalala mwaha wa wiiraanela nsu nahu ninvuwihaka Yehova. Nto nihaana osyaka okhumela vate vahitthuneyaka okathi oniipiwa aya nsipo.
7 Ehaavo-tho enamuna ekina yoovaha efaita isipo sa Muluku. Okathi wa asembeleya ni kongresu, onnirumihiwa muusika onivalaanya ipantte. Ikwaha piili vamwaakhani, anna ni arokora anikhuma ipantte soovirikana, annirowa oPatterson, Nova York, erumeelaka musurukhu aya wira yagravari isipo soovara murima seiyo ninrumeela ahu okathi wookokhorela. Nto, vaavo muhooleli a eprograma onnivekela awe okilaathi wira niwiriyane muusika olokiheriwe, nimwiiweleleke. Opaka eyo onoonikhaliherya olokiherya murima ahu wira niwiriyane myaha sinrowa olavuliwa.—Ézi. 7:10.
8 Wanikisa wa muthukumano wa olelo, ninrowa wiipa esipo ya niinano nirina muru oni: “O Reino já Governa!” Esipo eyo ekumiheriwe muthukumano opakiwe niinano wa khula mwaakha, ennittittimiherya iyaakha 100 sa olamulelo wa Omwene.
9 Tthiri, isipo sa niinano ti ‘itthu sorera’ sinkhuma wa Yehova. (Math. 12:35a) Nto niimananihe wiixutta isipo iya sa niinano ni wiipa ni murima wotheene nimuttottopelaka ni onvuwiha Muluku ahu!—Esal. 147:1.