Ikaruma Sinnikhaliherya Wiixuttiha
1. Moota xeeni maKristau anilikanyihiwa aya ni muratti onisuwela orumeela ikaruma sawe?
1 Mulipa ooratta onnirumeela ikaruma soovirikana wira ovare muteko awe. Owo onnikhalana ikaruma sinitthuneya ovareliwa miteko sooluluwanya, nto sikina sinnivareliwa muteko khula okathi. Muratti oosuwela ovara muteko onnikhalana ikaruma sawe sa khula nihiku vakhiviru vawe, nto okhala wene mutthu onisuwela ovara muteko owo tonirumeela paahi. Biibiliya onnimutumererya khula Kristau wiilipiherya ovara muteko woolaleerya ni okhala “namuteko ohinùleliwa muru ovara muteko awe”. (2 Tim. 2:15) Vano ekaruma xeeni ekhanle yuulupalexa? Nuulumo na Muluku, Biibiliya, tekhanle ekaruma yuulupalexa enirumeela ahu wira ‘nawixuttiheke atthu’. (Math. 28:19, 20) Tivonto vanireerela ahu wiimananiha wira nilaleyeke “vophwanela ehapari y’ekekhai”. Masi sookhala ikaruma sinceene sinirumeela ahu khula okathi wira niixuttihe sinireerela aya maKristau otheene wiixutta orumeela saana wira awiixuttihe ekeekhai atthu.—Mir. 22:29.
2. Ikaruma xeeni sootthuneya sinnikhaliherya wiixuttiha?
2 Ikaruma Sahu Sootthuneya sa Wiixuttiha: Omuhiya Biibiliya, ikaruma xeeni sikina sinirumeela ahu? Ekaruma yuulupalexa enirumeela ahu wira niixuttihe ekeekhai ya mBiibiliyani ti eliivuru Biibiliya Oniixuttiha Exeeni Tthiri? Nuumaliha omusomiha mutthu eliivuru eyo, hiyo ninnirumeela-tho eliivuru“Mukhaleke Mophentani mwa Muluku”, wira nimwiixuttihe moota woottharihela miruku sa mBiibiliyani khula nihiku. Ti maana aya vanitthuneya ahu osuwelexa orumeela iliivuru iyo piili. Khivanivaanyihaniwa wira sookhala ibroxura sikina sinirumeela ahu wira niixuttihe. Emosa ya ibroxura iyo ti Ihapari Sooreera Sinikhuma wa Muluku!, enirumeela ahu wira nipacerihe soosoma sa Biibiliya. Vakhala wira mmuttettheni mwahu aakhala atthu ahinisuwela osoma saana wala atthu anilavula nttaava nikina nenno nihirina ahu iliivuru sinceene, nto hiyo pooti orumeela ebroxura Munwiriyaneke Muluku wala Munwiriyaneke Muluku Wira Mphwanye Ekumi Ehinimala. Ekaruma ekina yootthuneyexa eniwooniherya ale anaasomiha ahu otthokeya wa Yehova ti ebroxura Tani Anipaka Yootthuna ya Yehova Olelo-va? Sihaavo iviidiyu sinikhaliherya vanceene muteko wa waapaka awiixutti ntoko ele eni “Xeeni Vanitthuneya Ahu Omusoma Biibiliya?, Exeeni Eniiraneya Mmithukumano sa Empa ya Omwene? ni Niireke Muluku Ookhalana Nsina?”, tthiri vannireerela osuwela orumeela saana ikaruma iyo.
3. Myaha xeeni sinrowa okumiheriwa muhoolo sa Orummwa Ahu wa Omwene sinirowa onikhaliherya?
3 Myaha sinrowa okumiheriwa muhoolo sa Orummwa Ahu wa Omwene sinrowa onikhaliherya osuwela orumeela oratteene ikaruma sahu suulupale sa wiixuttiha. Okathi onrowa ahu wiimananihaka wira niixutte orumeela oratteene ikaruma iyo, nto ninrowa wiiwelelaka miruku sowuupuxeriwa seiyo sini: “Mwipasope mmansinyu n’itthu sinixuttihanyu; mukhalele nthiti itthu seiyo. Mwirá siso, munimòpowa mmansinyu vamosá n’ale aniwìwani”.—1 Tim. 4:16.