Nilokiherye Inamuna Sahu Soolaleerya​—Olaleerya Muttetthe Oniiriwa Nakoso

Otthuneya Waya: Okhala wira atthu anceene anniviriha iwoora sinceene avaraka muteko, nto enamuna yooloka yowaalaleerya muhupi wa Omwene atthu awo waarowela omutekoni waya. Olaleerya muttetthe oniiriwa nakoso ti woohakalaliha ni onnikumiherya mireerelo, okhala wira mutthu khoniphiya nipuro khuhimphwanya mutthu ni anamuteko annimukhapelela khula mutthu oratteene, maana animoona wira aarwenle othuma etthu. Wira akhumele saana, anamalaleerya ahaana okhala a ankhili, owara ni wiitthokiha saana. (2 aKor. 6:3) Ti maana aya, mutokweene oniweherya muteko woolaleerya ohaana okhalana ephoole wira muttetthe oniiriwa nakoso olaleeriweke oratteene ni waathanla ale anireerela orowa olaleerya mapuro awo.

Moota Woopaka Eyo:

• Mulokiherye enamuna yoolaleerya yoohipisa. Vakhala wira ninniviriha okathi munceene nilavulanaka namuteko mmosa, woonasa wene khinnirowa weemereriwa otthikela olavulana muhoolo.

• Muthanleke okathi ohinaatta atthu mapuro aniiriwa nakoso, ntoko vaasiisu.

• Mwiimananiheke opacerya olavulana xeefi a khula nipuro. Mulavuleke moohakalala ni moopatthaneya. Woonasa wene nyuwo pooti ohimya so: “Hiyo nnaaxukurya atthu mapuro anivara aya muteko, okhala wira narowa mmawaani khinnaaphwanya”. Nto nvaaneleke mowaakuveya, munvaheke efolyeeto, irevista, wala eliivuru ekina enoona anyu oreerela. Wira nihaanyonyihe ale animwiira nakoso khivanireerela oromola misonkheryo, vahikhanle wira arookoha vanikhuma awe musurukhu onivareliwa muteko ahu.

• Vakhala wira xeefi a mapuro awo tooreera murima, munvekele wira muniphavela ovaanela ni anamuteko akina voohipisa. Mapuro makina, vaamureerela ovekela wira nihiye iliivuru nipuro aniphumurya aya anamuteko wira ahale asomaka.

• Mukhaleke a ankhili ni oowiixaakuviha. Mwa ntakiheryo vakhala wira namuteko owo onilavula ni mutthu mukina onithuma etthu, munwehereryeke mpakha omaliha, nto mulavulaneke.

Mweererye Ela Mweeri Yoola:

• Okathi onrowa anyu Omulompa Muluku Vatthokoni, mulokiherye enamuna yoolaleerya yookhweya ekhanle anyu oorumeela vakhala wira munnirummwa orowa olaleerya mapuro aniiriwa nakoso.