Murumeeleke Saana Ipakeliwo sa Eliivuru Biibiliya Oniixuttiha Exeeni

Vaavo ole onimusomiha ahu vaniixutta awe ele Biibiliya eniixuttiha awe tthiri, nto onavarihela muteko, owo onimunnuwa ni wiimiha muhokorokho wa omunepani. (Esal. 1:1-3) Hiyo nnoowerya waakhaliherya ale anaasomiha ahu Biibiliya wunnuwa omunepani vakhala wira nnoorumeela saana ipakeliwo sa eliivuru Biibiliya Oniixuttiha Exeeni.

Makoho Ari Wanipacerya: Wanipacerya wa khula muru wa eliivuru eyo aakhala makoho anaakhuliwa ni yoosoma eyo. Nyuwo pooti opaka makoho awo wira mmwiirihe ole onimusomiha anyu osiveliwa ele enrowa othokoreriwa muru owo. Wala nyuwo pooti onvekela wira aakhule moohipisa khula nikoho. Vakhala wira owo onnaakhula voohireerela, khivanitthuneya onvaanyiha. Waakhula wawe makoho awo onimookhaliheryani woona iponto sinitthuneya ottittimiherya saana okathi woosoma.​—Mir. 16:23; 18:13.

Apendise: Vakhala wira ole onimusomiha anyu onniiwexexa ni weemererya iponto sinitthokiheriwa okathi onisoma anyu muru owo, nyuwo pooti omutumererya paahi wira omusomeke mekhawe apendise onivarihana ni muru owo. Mukwaha onitthikela anyu osoma, murumeele minutu vakhaani wira nwehe vakhala wira owo ohiiwexexa sotheene osomme awe mekhawe. Vakhala wira munnoona oreerela, murumeele okathi wa yoosoma wira muthokorerye masu a apendise, musomaka khula ettima nto khiyapaka makoho alokihenrye anyu khalairu.

Ekaaxa ya Wuuluula: Ekaaxa ya wuuluula eri wanikisa wa khula muru yookhalana masu anaakhula makoho yaale ari wanipacerya wa muru owo. Nyuwo muhaana orumeela ekaaxa eyo wira moone vakhala wira ole onimusomiha anyu ohiiwexexa ni onniwerya otthokiherya iponto suulupale sa muru owo. Musomeke hoothe khula eponto ni yoolepa eri vaavo. Nuumala-vo, munvekeleke ole onimusomiha anyu wira orumeele soolepa iyo wira otthokiherye ovarihana okhanle wa yoolepa eyo ni masu awo.​—Mit. 17:2, 3.