Mwaatakiheke Maprofeta—Habakuki
1. Xeeni vanitthuneya ahu wiilikanihaka ni profeta Habakuki?
1 Vaavo vanitepa ahu woona otakhala wa elapo ela wuncerereyaka, hiyo pooti wiilikanihaka ni Habakuki, yoowo aamukonhe Yehova iiraka: “Munkoniherya-ni sotakhala? Nyuwo munniwona atthu apuheriwaka, khuhiyàwakiha”. (Hab. 1:3; 2 Tim. 3:1,13) Wuupuwelela masu ni waamini wa Habakuki onoonikhaliherya ovilela mixankiho nilipelelaka nikiku noophukela na Yehova.—2 Ped. 3:7.
2. Nooniheryeke sai wira nookhalana waamini olelo-va?
2 Nikhaleke Oowaamini: Ohiya wuupuwelelaka mixankiho sawe paahi, Habakuki aahivikaniha olipiha makhalelo awe a omunepani. (Hab. 2:1) Yehova aahimuroromeliha profeta ole wira masu Awe animwiiraneya tthiri, okathi anaxariya anrowa aya ‘okhalana ekumi mwaha w’omwiwelela Muluku’. (Hab. 2:2-4) Anitaphulela exeeni masu oowi maKristau anikhala okathi wookiserya? Khivaniphiyerya paahi osuwela wira waanikisa onoophiya, masi nihaana okupaliki wira onoophiya tthiri. Waamini onoonikhaliherya ovikaniha okhala oowehaweha ni ohela nipuro noopacerya muteko woolaleerya.—aHéb. 10:38, 39.
3. Xeeni varyaaya vooloka ovikaniha omurumeela Yehova mootteeliwa murima?
3 Nitteeliweke Murima ni Yehova: Okathi Gogi ni Magogi anrowa aya waatuphela arumeyi a Yehova, waamini wahu onrowa okhala wooweehereriwa. (Ezek. 38:2, 10-12) Ekhotto ennikumiherya mixankiho sinceene, hata ale anixintta. Waaniheryasa pooti othowaka eyoolya, oyelela mireerelo, ni makhalelo a okumi pooti ovukuwa. Nto nooneleke sai okathi sinikhumelela aya mixankiho iyo? Habakuki anisuwela wira sammukhumelela mixankiho, nto eyo yaahimwiiriha ovikaniha omurumeela Yehova mootteeliwa murima. (Hab. 3:16-19) “Otteliwa murima onrwa” wa Yehova onoonikhaliherya ovilela mixankiho sa muhoolo.—Neh. 8:10; aHéb. 12:2.
4. Eparakha xeeni erina ahu olelo-va, ni enirowa ahu okhalana muhoolo?
4 Nuuvira nihiku noophukela na Yehova, ale anrowa woopoliwa anoovikaniha wiixuttihiwa sooruma sa Mukulu okumi aya wotheene. (Hab. 2:14) Hata atthu anrowa ohihimuxiwa animwiixuttihiwa vohimya sa Yehova. Nto olelo, nihaana orumeela saana okathi ahu wira nimulaleye Yehova ni miteko sawe!—Esal. 34:2; 71:17.