MAKHALELO A MAKRISTAU

Yehova Onnaaphenta Atthu Ooratta

Anamuyari anniimananiha vanceene owiixuttiha anaaya okhala atthu ooratta. Ikwaha sinceene awo annaaruma anaaya ehimyaka so: “Munyaweke. Mpweheke saana itthu sa okwaartu wanyu. Muhiruseke vakhaamani. Muhihiyeke ikokhola okwaartu wanyu”. Nuupuwelela saana nnooweha wira malakiheryo awo a oratta anikhuma wa Yehova. (Okh 30:18-20; Otu 23:14; 2 aKor 7:1) Vaavo ninrattela ahu erutthu ahu ni mireerelo sahu, ninninvuwiha Yehova. (1 Pe 1:14-16) Ankhi voohimya sa empa ahu ni muttetthe onikhala ahu? Moovirikana ni atthu akina anirihela ikokhola mustaraatani ni mmuro, maKristau anniimananiha wira oreeriha etthaya wira ekhale yooratteleya. (Esa 115:16; Wis 11:18) Hata ni itthu saamukhaani, hiyo pooti wooniherya akhala wira na atthu ooratta wala nnaari. Mwa ntakiheryo, mwaarowa oyeeherya woowi makattapha wala makutuphe a mattuvi, mihali, mattonka wala ilaata sa refresco? Mwa inamuna sotheene sa mookumini mwahu, nihaana okhala ooratta sintoko arumeyi a “Muluku”.—2 aKor 6:3, 4.

NWEHE EVIIDIYU ENI: MULUKU ONNAAPHENTA ATTHU OORATTA, NUUMALA-VO MWAAKHULEKE MAKOHO ALA ANITTHARELANA:

Mathowa xeeni atthu akina anoothererya aya wira enyaleleke mireerelo saya?
Nlamulo na Moise nooniherya sai moonelo wa Yehova voohimya sa oratta?
Ninrowa onvuhiwa sai Yehova hata nihilavulaka etthu?

Paapa mmosa owelaka ekaaro ya mwanawe yoosareya ntthupi; paapa omooniherya aka mwaanawe malakiheryo a Yehova voohimya sa oratta; alipa a mukuttho anli a wIsarayeli wa khalai yaattamenle ene ekamela ya eweero yeeyo yaarumeeliwa wira sirapihiweke inawu; Munna mmosa orapihaka ekaaro enirowa orumeeliwa ni egrupu ya anna anirowa olaleerya — Kinrowa wooniherya sai wira kookhalana moonelo mmosaru ni Yehova voohimya sa oratta?