Mukelaka opioneero

Okhalana soolukama onoonikhaliherya orumeela saana ikuru sahu. (1 aKo 9:26) Ohiya-vo, okhalana soolukama onoonikhaliherya orumeela saana okathi ahu, ohinatthi ophiya wanikisa wa olumwenku ola wootakhala. (aEef 5:15, 16) Okathi woomulompa Muluku vatthokoni nyuwo pooti ovaanela voohimya sa soolukama muniphavela nyu okhalana, mwaakha musya wa muteko onirwa. Wira nwerye opaka eyo, ekaderno ela yookhalana myaha sinceene sinlavula soolukama mukhanle anyu okhalana. Muupuwele oratteene ni munvekele Yehova voohimya sa mwaha owo. — Yak 1:5.

Mwa ntakiheryo, niireke atthu ootheene a etthoko anyu, anoowerya omukhaliherya mutthu mmosa wira okhale pioneero ookilaatheya? Vakhala wira munoona wira khamunwerya ophiyeriha iwoora anivekeliwa aya mapioneero, nvaanele ni mapioneero makina yaarina mixankiho ntoko saawiinyu. (Mir 15:22) Nave, nyuwo pooti omukoha pioneero mmosa okathi woomulompa Muluku vatthokoni. Muupuwelele ni mulepe eprokrama enrowa wookhaliheryani. Akhala wira mootoko orumeela ntoko pioneero, muupuwelele makhalelo anyu a vano ni nwehe vakhala wira munoowerya otthikela.

Niireke nyuwo wala mutthu mmosa a etthoko anyu onoowerya okhala pioneero okhaliherya, mweeri mmosa aahiiso miyeeri sinceene mwaakha wa muteko onirwa? Akhala wira khamuniiwerya-werya, nyuwo pooti olaleerya mahiku ootheene iwoora vakhaani. Akhala wira khamurina okathi munceene mwaha woowi munvara muteko aahiiso munoosoma, nyuwo pooti othanla mweeri orina isumana 5 wala orina iferiado wira mukhale pioneero. Mulepe miyeeri muniphavela anyu orumeela ntoko pioneero okhaliherya, nuumala-vo mpake eprokrama anyu. — Mir 21:5.

NWEHE EVIIDIYU ENI: MULIPIHE MURIMA . . . NYUWO MAPIONEERO, NUUMALA-VO MWAAKHULE NIKOHO:

• Ntakiheryo na murokora Emma, nnooniherya sai wira Yehova onnaakhaliherya ale aniimananiha orumeela ntoko pioneero?