Mphentaneke Vanceene Mukina ni Mukhwaawe

1. Nlamulo xeeni nooluluwanya Yesu aavanhe awe awiixutti awe? (Nwehe elatarato ya ekaapa.)

OHIYU aarowa awe wiiviwa, Yesu aahaavaha awiixutti awe nlamulo nooluluwanya. Owo aalenle so: “Sisale miyo kophentalyakani, siso-tho nyuwo muhana ophentana. Atthu othene anosuwela wira mwá awixutti aka, mwaphentanaka mukina ni mukhw’awe”.—Yoh. 13:34, 35.

2. Xeeni vari aya vooloka ophentana mukina ni mukhwaawe?

² Yesu aahimmye wira atthu otheene yanwerya waasuwela atthareli awe akhala wira awo yaamwaaphentaka atthu ntoko Yesu aaphenta awe. Eyo ti etthu yiiraneya eseekulu yoopacerya ni enniiraneya olelo-va. Tivonto vari aya vooloka ophentana mukina ni mukhwaawe hata vavilaka!

3. Mwaha ola, ninrowa woona exeeni?

³ Otheene ahu na atthu oohimalela, nto eyo enniniiriha woonaka ovila ophentana vanceene mukina ni mukhwaawe. Hata vari siiso, nihaana wiimananiha omutakiha Kristu. Mwaha ola ninrowa woona moota ophenta onnikhaliherya aya okhaliha murettele, ohikhalana nthalu ni owaakhela saana aletto. Vaavo ninrowa ahu osomaka mwaha ola, mwiikoheke so: ‘Ankiixuttiha exeeni anna ni arokora yaawo yaavikaninhe ophentana mukina ni mukhwaawe hata vaaxankiha?’

MPHAVELEKE MURETTELE

4. Moovarihana ni Matheyo 5:23, 24, xeeni vari aya vooloka ophavela murettele ni anna ni arokora nihiniiwanana ahu?

⁴ Yesu ooniixuttiha otthuneya waya ophavela murettele ni munna aahiiso ni murokora nihiniiwanana ahu. (Mmusome Matheyo 5:23, 24.) Owo aahittittimiherya wira naaphavelaka omusiveliha Muluku, nihaana okhalana waataana wooloka ni anna ni arokora. Yehova onnihakalala vaavo nniimananiha ahu okhalana murettele ni annihu. Akhala wira noonyoonyihana ni munnihu ni nnakhootta okhaliha murettele, Yehova khonrowa weemererya omukokhorela wahu.—1 Yoh. 4:20.

5. Exeeni yaamwiirinhe munna mmosa onvila okhaliha murettele?

⁵ Okathi mukina pooti onivila okhaliha murettele. Mwaha wa xeeni? Nwehe ele yaamwiiranenle Mark.b Owo aahiriipiwa murima vaavo munna anvaanyinhe awe ni aamoothenrye awe ohoolo wa anna akina a mmulokoni. Mark oonenle sai? Owo onihimya so: “Kaahinanariwa vanceene ni kaahimpwapwela munna ole”. Muhoolo mwaya Mark aahithanana mwaha wa etthu aapanke awe ni aahivekela oleveleliwa ni munna ole wira akhalane murettele. Masi munna ole aahikhootta hata Mark iimananinhe vanceene. Wanipacerya Mark uupuwela so: ‘Munna ole khoniphavela okhalana murettele ni miyo, nto xeeni kiniimananiha aka ophavela murettele?’ Masi mutokweene a esirkwiitu aahimutumererya Mark ohihiya ophavela murettele. Nto Mark aapanke exeeni?

6. (a) Mark iimananinhe sai ophavela murettele? (b) Mark aavarihenle sai muteko malakiheryo ari aKolosi 3:13, 14?

⁶ Nuumala Mark ovarerya muupuwelo awe, aahoona wira aari oowiixinnuwiha ni oona wira okathi wotheene aanikhalana erasau. Owo aahoona wira ahaana oturuka moonelo awe. (aKol. 3:8, 9, 12) Mowiiyeviha aahirowa onvekela muswammaha munna ole mwaha wa mweettelo awe. Nave Mark aahilepa iwarakha, ohimyaka wira aanixanka mwaha wa ele yaakhumelenle ni aaphavela otthikela okhala mpatthani ooloka. Nave-tho Mark, aahithuma itthu saamusivela munna ole wira onvahe. Mooriipiha murima, nlelo munna ole khaaphavela omulevelela Mark ni aahivikaniha onanariwa. Hata vaari siiso, Mark aahivikaniha wiiwelela yooruma ya Yesu ya omphenta ni omulevelela munnawe. (Mmusome aKolosi 3:13, 14.) Ntoko Mark, pooti wira munniimananiha ophavela murettele ni munna aahiiso murokora, nto akhala wira ninnaaphenta atthu ntoko Yesu aaphenta awe, eyo enoonikhaliherya waalevelela ni waavekelela, nikupaliki wira nnootthikela okhalana murettele.—Math. 18:21, 22; aGal. 6:9.

7. (a) Yesu onitumerenrye opaka exeeni? (b) Muxankiho xeeni aarina awe murokora mmosa?

⁷ Yesu oonitumererya wira nihaana waathokorerya atthu akina ntoko nimphavela ahu othokoreriwa. Nave aahihimya wira nihaaphenteke paahi atthu ale anniphenta. (Luka 6:31-33) Munrowa opaka exeeni akhala wira ookhala munna aahiiso murokora nnakhala ohiniphavela wookohani ihaali? Ekeekhai wira eyo kheniiraneya ikwaha sinceene masi pooti wiiraneya. Maana ti etthu yaamwiiranenle Lara. Owo onihimya so: “Murokora mmosa khaakiphavela ni nkaasuwela nthowa naya. Eyo yaanikixankiha vanceene mpakha ophiya okathi wahaakisivela aya orowa omithukumanoni”. Wanipacerya kuupuwela so: ‘Miyo nkimutthekenle murokora ole. Nave atthu akina a mmulokoni anoona wira mweettelo wa murokora ole kholonke’.

8. Exeeni Lara aapanke awe wira okhalihe murettele? Ntakiheryo nawe ninniixuttiha exeeni?

⁸ Murokora Lara aahipaka etthu wira okhalihe murettele. Owo aahinvekela Yehova ni aahilakela ovaanela ni murokora ole. Arokora ale yaahivaanela mwaha ole, yaahilevelelana ni yaahikhalana murettele. Vaakhala ntoko wira itthu sotheene saaneetta saana. Vano Lara onnivikaniha oriki: “Muhoolo mwaya, murokora ole aahitthikela opaka etthu emosaru aapanke awe wanipacerya. Owo khaakiphavela”. Wanipacerya, Lara uupuwela wira aamuhakalalaka akhala wira murokora ole aamuturuka mweettelo awe. Masi nuuvira okathi, Lara aahoona wira etthu yooloka aakhanle awe oopaka waari ovikaniha omuthokorerya moophenta murokora ole ni ‘omulevelela’ ni murima wotheene. (aÉf. 4:32–5:2) Lara aahuupuwela wira ole oniphenta “khanùpuwela sotakhala sìreliwawe. Ole omphenta onnakhurunuwela atthu othene, onnakupali atthu othene, onniroromela vohihiyererya, onnivilela sothene”. (1 aKor. 13:5, 7) Nto eyo yaahimukhaliherya Lara okhalana murettele wa mmuupuweloni. Muhoolo mwaya, murokora ole aahitthikela okhala mpatthani ooloka a Lara. Vaavo muniimananiha anyu ophavela murettele ni anna ni arokora ni ovikaniha waaphenta, mukupaliki ni murima wotheene wira “ophenta ni murettele wa Muluku onokhala ni nyuwo”.—2 aKor. 13:11.

MUHIKHALANEKE NTHALU

9. Moovarihana ni Miteko 10:34, 35, xeeni vanireerela aya ohaakhalela nthalu atthu akina?

⁹ Yehova khonimuthanla mutthu. (Musome Miteko 10:34, 35.) Vaavo hiyo nihinaakhalela ahu nthalu atthu akina, ninnooniherya wira na anaawe. Nave opaka eyo enninikhaliherya wiiwelela yooruma ya omphenta namwaattamanani ahu ntoko nniiphenta ahu. Nave-tho enninikhaliherya okhalana murettele ni anna ni arokora.—aRom. 12:9, 10; Yak. 2:8, 9.

10-11. Murokora Ruth aawenrye sai oxintta moonelo awe woohiloka?

¹⁰ Musuweleke wira ohikhalana nthalu onnaavila atthu akina. Mwa ntakiheryo, nwehe ele yaamwiiranenle murokora oniihaniwa Ruth. Okathi aari awe mwali, aahithokoreriwa voohiloka ni mutthu mmosa a elapo ekina. Murokora ole oonenle sai? Ruth onihimya so: “Kaanimunyokha khula mutthu ni khula etthu ya elapo ele. Kuupuwela wira atthu otheene anikhuma elapo ele arina mweettelo mmosaru waahela muhina anna ni arokora”. Ruth aawenrye sai oxintta moonelo awe woohiloka?

¹¹ Ruth aanisuwela oratteene wira aahaana wiimananiha wira oxintte moonelo awe woohiloka. Nto aahipacerya osoma sowiiraneya ni irelatoorio sa elapo ele eliivuru eniihaniwa Anuário. Vano Ruth ohimmye so: “Tthiri kaahaana wiimananiha wira kuupuweleke mikhalelo sooloka sa atthu a elapo ele. Nto kaahipacerya woona wira anna ni arokora a elapo ele yaaniluttuweliwa ovara muteko wa Yehova. Kaahoona wira otheene ahu nniirela mpantta emusi ya olumwenku wotheene”. Vakhaani-vakhaani, Ruth aahoona wira aahaana wooniherya ophenta wawe. Owo onihimya so: “Vaavo kaasuwela aka anna ni arokora a elapo ele, kaaniimananiha vanceene wira kikhale apatthani aya. Vaavo kaalavula aka ni anna awo kaanaasuwela oratteene”. Nto exeeni yaakhumelenle? Ruth onnivikaniha oriki: “Nuuvira okathi, moonelo aka woohiloka waahimala-mala”.

12. Muxankiho xeeni aarina awe murokora Sarah?

¹² Atthu akina pooti opacerya okhalana nthalu ahisuwelaka. Mwa ntakiheryo, Sarah uupuwela wira khaarina nthalu, mwaha woowi khaathokorerya atthu ottharaka nikhuli naya, yaari thaaciri aahiiso nnaari, elapo ayariwe aya wala miritti arina aya mmutthenkesoni. Masi owo onihimya so: “Kaahoona wira kaanaakhalela nthalu atthu akina”. Moota xeeni? Sarah oyariwe etthoko ya atthu oosoma nto aaphavela weettaka paahi ni atthu asomme vanceene. Vano nihiku nimosa aahimuleela mpatthani awe wira: “Miyo kineetta ni anna ni arokora asomme vanceene. Nto kinnaasyaka ale ahisomme”. Tthiri Sarah aahaana olokiherya moonelo awe. Moota xeeni?

13. Moota Sarah aaturunke awe moonelo awe enniixuttiha exeeni?

¹³ Mutokweene a esirkwiitu aahimukhaliherya Sarah oturuka moonelo awe. Owo onihimya so: “Mutokweene ole aahikittottopela mwaha wa ororomeleya waka, ikomentaario sooloka kaavahaaka ni itthu kaasuwela aka sa mBiibiliyani. Nuumala-vo aahikileela wira vaavo osuwela wahu onincerereya aya nihaana otepa okhalana mikhalelo sa eKristau ntoko wiiyeviha, wiisuumaaliha ni omoriwa ikharari”. Sarah aahivarihela muteko miruku aavahiwe awe ni mutokweene a esirkwiitu. Owo onihimya so: “Kihoona wira etthu yootepa otthuneya okhala mutthu ooreera murima ni oophenta”. Mwaha woopaka eyo, Sarah aahipacerya waathokorerya anna ni arokora mwa enamuna ekina. Owo onitthokiherya so: “Kaahipacerya wuupuwela mikhalelo sinniiriha okhalana efaita vamaithoni va Yehova”. Ankhi hiyo? Nihikhala-khale nuupuwelaka wira nookhalana efaita yinceene mwaha wa osoma wahu! Akhala wira ‘ninnaphenta [vanceene] amus’ihu òwamini’ nnoosyaka waakhalela nthalu.—1 Ped. 2:17.

NWAAKHELEKE SAANA ALETTO

14. Moovarihana ni aHéberi 13:16, Yehova onoonela sai vaavo ninwaakhela ahu aletto?

¹⁴ Yehova onnivaha efaita owaakhela aletto. (Mmusome aHéberi 13:16.) Owaakhela aletto oniirela mpantta okokhorela wahu otepexa wene vaavo nnaathokorerya ahu ale oothoiwa. (Yak. 1:27; 2:14-17) Nave Biibiliya onnintumererya owaakhela “orattene aletto”. (aRom. 12:13) Vaavo ninwaakhela ahu oratteene aletto, ninniwooniherya anna akina wira ninnaakhapelela, ninnaaphenta ni nimphavela okhala apatthani aya. Yehova onnisiveliwa vaavo nnaavaha ahu atthu akina yoowurya aahiiso yoolya wala vaavo ninviriha ahu okathi nri ene hoothe. (1 Ped. 4:8-10) Masi, sookhala itthu sikhanle ooniiriha woona ovila owaakhela aletto.

15-16. (a) Xeeni atthu akina anoovelela aya owaakhela aletto? (b) Marcia aaxinttale sai woovelela owaakhela aletto?

¹⁵ Mikhalelo sahu pooti oniiriha woovelela owaakhela aletto. Mwa ntakiheryo, nkahaya nwehe yowiiraneya ya naamukhweli oniihaniwa Marcia. Ohinathi okhala Namoona, owo khaaphavela weetta ni atthu akina. Marcia uupuwela wira atthu akina yanwerya waakhapelela saana aletto onvikana yena.

¹⁶ Nuumala okhala Namoona a Yehova, Marcia aahituruka muupuwelo awe. Owo aahiimananiha vanceene wira owaakheleke aletto. Marcia onihimya so: “Okathi yaatekiwa aya Empa ahu ya Omwene esya, mutokweene mmosa aahikileela wira aakhala anamathelana amosa yaaphavela orwa okhaliherya oteka Empa ele ya Omwene. Moottharelana, aahikivekela akhala wira kanwerya owaakhela owannyaka isumana piili paahi. Okathi ene yoole, kaahuupuwela moota Yehova aamureelinhe awe naamukhweli a oSarepta”. (1 Mam. 17:12-16) Nto Marcia aaheemererya owaakhela vatthokoni vawe anamathelana ale. Niireke aahiphwanya mareeliho? Aayo, owo onihimya so: “Awo khahiyo paahi yaakhanle ni miyo isumana piili masi yaahikhala myeeri miili. Okathi owo wotheene, naahilipiha waataana wahu ni naahikhala apatthani aalupale”. Marcia aahikhalana-tho apatthani aalupale mmulokoni. Vano Marcia pioneera ni onnihakalala olaleerya vamosa ni atthu aavarana awe muteko otekaka Empa ya Omwene, nuumala-vo onnaalattula owannyawe. Marcia onivikaniha oriki: “Ovaha onnikihakalaliha vanceene! Ohimya ekeekhai, mareeliho kaakhenle aka khareere ni kinnixukhurela vanceene osuwela ekeekhai”.—aHéb. 13:1, 2.

17. Etthu xeeni Luka ni mwaarawe yoonale aya voohimya sa enamuna yaawaakhela aya aletto?

¹⁷ Ekeekhai wira ninniwaakhela aletto. Masi niireke khivaareerela nlelo olokiherya enamuna ahu ya owaakhela aletto? Mwa ntakiheryo, Luka ni mwaarawe annisuwela owaakhela aletto. Awo yaamakela waalattula owannyeya, anamuyari aya, amusi aya, apatthani a vamurimani ni mutokweene a esirkwiitu ni mwaarawe. Masi Luka onihimya so: “Naahoona wira naalattula paahi atthu yaale naahaareere ahu waataana”. Nto Luka ni mwaarawe yaawenrye sai olokiherya inamuna saya sa owaakhela aletto?

18. Luka ni mwaarawe yaalokihenrye sai enamuna yaawaakhela aya aletto?

¹⁸ Luka ni mwaarawe yaahiixutta ele enitaphulela aya owaakhela aletto nuumala wuupuwelela masu a Yesu anihimya wira: “Nyuwo mwaphentaka yaleru anophentani pahi, muntthuna otthuveliwa sai?” (Math. 5:45-47) Anamathelana ale, yaahoona wira yaahaana omutakiha Yehova, yoowo onaavaha atthu otheene. Nto anamathelana ale yaahilakela waalattula anna ni arokora yaahatonko aya waalattula. Luka onihimya so: “Vano otheene ahu ninnihakalala oviriha okathi nri ene vamosa. Tthiri atthu otheene anikhuma alimpe ene vanceene”.

19. Ninrowa wooniherya sai wira na atthareli a Kristu ni mulakenle opaka exeeni?

¹⁹ Mpakha-va noothokorerya moota ophentana vanceene mukina ni mukhwaawe onnikhaliherya aya okhaliha murettele, ohikhalana nthalu ni oowaakhela saana aletto. Nihaana oxintta moonelo woohiloka ni waaphenta anna ni arokora ni murima wotheene. Akhala wira nnoopaka eyo nnoohakalalaka ni nnimooniherya wira na atthareli eekeekhai a Kristu.—Yoh. 13:17, 35.