Atthu Otheene Mmulokoni Anoowerya Waakhaliherya Anaxikola a Biibiliya Okela Vahoolo Mpakha Opatisiwa

1-2. Tani anrowa waakhaliherya ale anisomihiwa Biibiliya okela vahoolo mpakha opatisiwa?

MUROKORA oniihaniwa Amy onikhala oFiji onihimya so: “Saanikisivela vanceene itthu kiixutta aka okathi kaasomihiwa aka Biibiliya. Nto kaanisuwela wira ele kiixutta aka yaari ekeekhai. Masi kaapacenrye opaka marukunuxo ni okela vahoolo, nuumala opacerya orowela mithukumano. Nto muhoolo mwaya kaahipatisiwa”. Moolumo a Amy anniniixuttiha etthu yuulupale. Etthu ene tiila: Wira ale anisomihiwa Biibiliya akele vahoolo mpakha opatisiwa, ahaana okhaliheriwa ni atthu otheene a mmulokoni.

² Khula namalaleerya onoowerya okhaliherya muloko okela vahoolo. (aEef. 4:16) Pioneera oniihaniwa Leilani, yoowo onikhala oVanuatu onihimya so: “Vanihimmwa wira atthu otheene a mmuttettheni annikhaliherya omuhuwa mwaana. Kinoona wira muupuwelo mmosaru onnivareleya muteko mmulokoni, maana vanitthuneya muloko wotheene wira mutthu eemererye ekeekhai”. Tthiri anamuyari, amusi, apatthani ni maprusoore annikhaliherya wira mwaana innuwe saana. Awo annipaka eyo amwiixuttihaka itthu sooloka ni sa faita yinceene. Mwa enamuna emosaru, anamalaleerya pooti waavaha miruku, waalipiha ni waavaha ntakiheryo nooloka ale anisomihiwa Biibiliya. Opaka eyo, animwaakhaliherya okela vahoolo mpakha opatisiwa.—Mir. 15:22.

3. Itthu ohimmye awe Ana, Dorin ni Leilani, siwiixuttinheni exeeni?

³ Anamalaleerya otheene a mmuloko anoowerya waakhaliherya ale anisomihiwa Biibiliya. Nto anamalaleerya arina soosoma sa Biibiliya ahaana oxukhurela okhaliheriwa ni anamalaleerya akina. Mwaha wa xeeni? Nwehe etthu ohimmye awe pioneera a vameekhaaya a oMoldávia oniihaniwa Ana. Owo onihimya so: “Vannivila mutthu mekhawe paahi omukhaliherya ole onisomihiwa Biibiliya itthu sotheene oniphavela awe wira okele vahoolo”. Nave Dorin, pioneero a vameekhaawe onirumeela oMoldávia onihimya so: “Okhala wene, anamalaleerya akina annihimya etthu eninvara murima ole kinimusomiha aka Biibiliya, okathi mukina etthu yeeyo kihuupuwela aka wira kaamuhimya”. Leilani onnihimya etthu ekina enaakhaliherya ale anisomihiwa Biibiliya oriki: “Vaavo ole onisomihiwa Biibiliya onoona awe wira onniphentiwa ni othokoreriwa saana ni anna ni arokora a mmulokoni, owo onnoona wira hiyo na atthu a Yehova”.—Yoh. 13:35.

4. Mwaha ola, ninrowa othokorerya exeeni?

⁴ Woonasa wene, nyuwo munniikoha so: “Kinrowa waakhaliherya sai ale anisomihiwa Biibiliya okela vahoolo kihikhanle wira ti miyo kinaasomiha Biibiliya?” Mwaha ola, ninrowa oweha etthu nikhanle ahu oopaka vaavo munna onnilattula awe wira niirihe yoosoma awe ya Biibiliya. Nave ninrowa woona etthu nikhanle ahu oopaka vaavo ole onisomihiwa Biibiliya onipacerya awe orowela mithukumano. Wanikisa waya, ninrowa woona etthu axitokweene akhanle aya oopaka wira yaakhaliherye ale anisomihiwa Biibiliya okela vahoolo mpakha opatisiwa.

VAAVO MUNILATTULIWA ANYU WIIRIHA YOOSOMA YA BIIBILIYA

5. Vaavo munilattuliwa anyu wiiriha yoosoma ya Biibiliya, muritti anyu tuuvi?

⁵ Okathi eniirihiwa aya yoosoma ya Biibiliya, ole onimusomiha Biibiliya torina muritti woomukhaliherya naxikola awe wiiwexexa oratteene Nuulumo na Muluku. Vaavo munna wala murokora onoolattulaweni orowa wiiriha yoosoma awe ya Biibiliya, nyuwo munoomuhoola. Nto muritti anyu omukhaliherya paahi. (Mus. 4:9, 10) Etthu xeeni mukhanle anyu oopaka wira yoosoma eyo ekhumele saana?

6. Vaavo munimuhoola anyu mutthu wiiriha soosoma sa Biibiliya, munrowa otthara sai malakiheryo ari Miruku 15:22?

⁶ Mwiilokiheryeke wira mwiirihe yoosoma ya Biibiliya. Wanipacerya, munvekeleke ole onimusomiha Biibiliya wira ooleeleni itthu vakhaani sa naxikola owo. (Musome Miruku 15:22) Nyuwo pooti omukoha so: “Itthu xeeni munisuwela anyu sa naxikola anyu? Mwaha xeeni ninrowa ahu othokorerya? Tiivi eri yoolakela ya mpantta owo? Yookhala etthu kinreerela aka olavula, ohilavula opaka wala ohipaka okathi wa yoosoma? Etthu xeeni kinreerela aka opaka wira kimukhaliherye okela vahoolo?” Ekeekhai wira ole onimusomiha Biibiliya khonrowa wooleelani isiiri sa naxikola awe. Masi itthu onrowa awe wooleelani sinimookhaliheryani vanceene. Misionaaria oniihaniwa Joy onimakela ovaanela myaha iyo ni murokora onimuhoola wiiriha soosoma sawe sa Biibiliya. Owo onihimya so: “Onnikisivela omulela itthu iyo murokora kinrowana aka olaleerya, maana kinnimukhaliherya omuthokorerya saana naxikola aka a Biibiliya ni woona moota okhanle awe ookhaliherya okathi wa yoosoma”.

7. Hata murowaka omuhoola mutthu wiiriha soosoma sa Biibiliya, xeeni vari aya vooloka olokiherya oratteene yoosoma eyo?

⁷ Akhala wira munnilattuliwa omuhoola munna wala murokora wiiriha yoosoma awe ya Biibiliya, vaamuloka nyuwo olokiherya oratteene mpantta onrowa othokoreriwa. (Ézi. 7:10) Dorin nimulavunle ahu wanipacerya onihimya so: “Vannikisivela vaavo ole onkihoola onlokiherya awe oratteene mpantta ninrowa ahu osoma. Eyo ennimukhaliherya ovaha ikomentaario sooloka ni soovareleya muteko”. Ohiya-vo, akhala wira nyuwo ni ole onimusomiha Biibiliya munniilokiherya saana, munninvaha ntakiheryo nooloka ole munimusomiha anyu, maana onoolokiheryaka yoosoma awe. Hata muhiweryaka olokiherya mpantta wotheene, muhaana waavya okathi wira nwehe iponto suulupale sa yoosoma eyo.

8. Munrowa opaka sai mavekelo oovara murima okathi wa yoosoma ya Biibiliya?

⁸ Okathi wa yoosoma ya Biibiliya, nivekelo nookhalana efaita yinceene. Nto muhaana wuupuwela vahinatthi itthu munrowa anyu ohimya okathi munipaka anyu nivekelo, akhala wira ole onimusomiha Biibiliya onimoovekelani opaka nivekelo. Mwiira siiso, woonasa wene nivekelo nanyu nnonvara murima vanceene. (Esal. 141:2) Nkahaya nwehe etthu yaamwiiranenle Hanae, yoowo onikhala oJapão. Okathi aamusoma awe Biibiliya, murokora aamusomiha aanimukuxa murokora mukina. Mpakha olelo-va, Hanae onnuupuwela mavekelo murokora ole aapaka awe. Owo onihimya so: “Kaanoona wira aahikhalana waataana wooloka ni Yehova, nto miyo kaaphavela okhala ntoko murokora ole. Nave okathi wotheene aaromola awe nsina naka ovekelaka, kaanoona wira kinniphentiwa vanceene”.

9. Moovarihana ni Yakobo 1:19, etthu xeeni mukhanle anyu oopaka wira mmukhaliherye ole onimusomiha Biibiliya okathi wa yoosoma?

⁹ Mmukhaliheryeke ole onimusomiha Biibiliya okathi wa yoosoma. Pioneera a vameekhaaya oniihaniwa Omamuyovbi a oNigéria onihimya so: “Munna wala murokora ooloka onnihoola yoosoma ahu ya Biibiliya, tuule onivaha ephoole. Owo onnivaha ikomentaario sooloka okathi wa yoosoma ni khonlavula vanceene, maana onnisuwela wira ole onimusomiha Biibiliya tonihoolela yoosoma eyo”. Nto okathi xeeni munireerela anyu olavula? Etthu xeeni mukhanle anyu oohimya? (Mir. 25:11) Nvaheke ephoole vaavo onilavula awe ole onimusomiha Biibiliya ni ole onisomihiwa. (Mmusome Yakobo 1:19.) Mwiira siiso, munoowerya okhaliherya mwa enamuna yooloka ni okathi wooreerela. Ekeekhai wira muhaana okhalana ankhili. Mwa ntakiheryo, nyuwo khamukhanle oolavula vanceene, nnakhala omukwasa masu wala muupuwelo ole onimusomiha Biibiliya nnakhala oturuka mwaha. Hata vari siiso, nyuwo munoowerya wiiwanyeiha eponto enithokoreriwa, nvahaka ekomentaario yookhuveya, nlikanyiho wala opaka nikoho. Okathi mukina, nyuwo munimoona wira khivanireerela ohimya etthu wala waacererya etthu okathi wa yoosoma eyo. Akhala wira ti siiso, mmuttottopeleke ni mmuthokoreryeke saana ole onisomihiwa Biibiliya. Mwiira siiso, eyo enoomukhaliherya ole onisomihiwa Biibiliya okela vahoolo.

10. Yowiiraneya anyu, enrowa omukhaliherya sai ole onisomihiwa Biibiliya?

¹⁰ Mulavuleke yowiiraneya anyu. Akhala wira vannireerela, nyuwo pooti olavula yowiiraneya anyu. Mmuleeleke naxikola owo moota mwiixuntte anyu ekeekhai, moota muxinttale anyu mixankiho ni moota Yehova ookhalihenryaweni mookumini mwanyu. (Esal. 78:4, 7) Woonasa wene, yowiiraneya anyu, pooti okhala etthu enrowa omukhaliherya vanceene. Nave pooti olipiha waamini ni omukhaliherya okela vahoolo mpakha opatisiwa. Nave-tho pooti omukhaliherya oxintta mixankiho. (1 Ped. 5:9) Gabriel yoowo onikhala oBrasil ni olelo-va onirumeela ntoko pioneero, onnuupuwela etthu yaamukhalihenrye vanceene okathi aasomihiwa awe Biibiliya. Owo onihimya so: “Okathi kaawiriyana aka sowiiraneya sa anna, kaanoona wira Yehova onnisuwela mixankiho sahu. Tthiri akhala wira anna awo aawerya oxintta mixankiho iyo, ni miyo kinoowerya”.

VAAVO ONIPACERYA AWE OROWELA MITHUKUMANO

11-12. Xeeni vari aya vooloka owaakhela saana ale anipacerya orweela mithukumano sahu?

¹¹ Wira naxikola a Biibiliya okele vahoolo mpakha opatisiwa, ohaana orowela mithukumano sotheene ni ottottela mureerelo. (aHeeb. 10:24, 25) Woonasa wene, ole onimusomiha Biibiliya onoomulattula naxikola awe orowela mithukumano. Nto vaavo naxikola owo onirowela awe mithukumano empa ya Omwene, otheene ahu nihaana omutumererya ohihiya orowela mithukumano. Ninrowa owerya sai opaka eyo?

¹² Nwaakheleke ni murima wotheene ale anisomihiwa Biibiliya okathi wa mithukumano. (aRom. 15:7) Tthiri, akhala wira ole onisomihiwa Biibiliya onnoona wira onnaakheliwa oratteene okathi wa mithukumano, woonasa wene, eyo enoomukhaliherya ohihiya orowela mithukumano Empa ya Omwene. Nto ohiya omusyaka, muhaana omukoha ihaali ni omusuweliha anna akina a mmulokoni. Muhuupuweleke wira anna otheene aalavulana. Pooti wira ole onimusomiha Biibiliya nlelo khaasuwelinhe anna akina wala ooluttuweliwa ovara miteko sikina empa ya Omwene. Nto okathi onilavula awe munvaheke ephoole ni mmooniheryeke wira munninvaha efaita. Omwaakhela saana naxikola a Biibiliya okathi wa mithukumano, onrowa omukhaliherya sai? Nkahaya nwehe ele yaamwiiranenle Dmitrii. Owo opatisiwe iyaakha vakhaani sivinre ni olelo-va onirumeela ntoko murumeyi ookhaliherya. Owo onnuupuwela etthu yaamwiiranenle nihiku noopacerya aarowenle awe mithukumano. Dmitrii onihimya so: “Miyo keemenle ota wa empa ya Omwene kixankale ene vanceene. Nto mooreerela murima munna mmosa aahirwa okikuxa mpakha mpaani mwa Omwene. Anna anceene yaahirwa okikoha ihaali. Kaahisiveliwa vanceene ni kaaniphavela wira naakhalana mithukumano khula nihiku vasumanani. Miyo kaahoona etthu kihaatonko aka woona nipuro nikina”.

13. Ntakiheryo ni mweettelo anyu wooloka, onrowa omukhaliherya sai ole onisomihiwa Biibiliya?

¹³ Mwaavaheke ntakiheryo nooloka. Ntakiheryo nanyu ni mweettelo anyu wooloka, onoomukhaliherya ole onisomihiwa Biibiliya woona wira oophwanya ekeekhai. (Math. 5:16) Pioneero a oMoldávia oniihaniwa Vitalii onihimya so: “Miyo kaaniweha moota anna ni arokora a mmulokoni yaakhala aya, yuupuwela aya ni yaapaka aya itthu. Eyo yaahikikupaliha wira Anamoona a Yehova aneetta ni Muluku eekeekhai”.

14. Ntakiheryo nanyu ninrowa waakhaliherya sai atthu akina okela vahoolo?

¹⁴ Ohinatthi opatisiwa, ole onisomihiwa Biibiliya ohaana ovarihela muteko mookumini mwawe ele oniixutta awe. Opaka eyo khivanikhweya. Masi vaavo naxikola anyu a Biibiliya onoona awe wira munnittottela mureerelo ovarihela muteko malakiheryo ni malamulo a Biibiliya, eyo enoomukhaliherya wootakihani. (1 aKor. 11:1) Nkahaya nwehe ntakiheryo na Hanae nimulavunle ahu. Owo onihimya so: “Anna ni arokora a mmulokoni, yaanivarihela muteko itthu kiixutta aka. Kihiixutta moota wowaalipiha ni waamaaliha atthu akina, waalevelela ni waaphenta. Okathi wotheene anna ni arokora yaanaalavula vooloka atthu akina. Nto miyo kaaphavela okhala ntoko awo”.

15. Moovarihana ni Miruku 27:17, xeeni vari aya vooloka opaka opatthani ni atthu ale anisomihiwa Biibiliya?

¹⁵ Mukhaleke mpatthani aya. Vaavo ole onisomihiwa Biibiliya ohinihiya awe orowela mithukumano, mmuthokoreryeke ni murima wotheene. (aFil. 2:4) Mwaavyeke okathi wira nvaanele ni naxikola owo. Nto vaavo munivaanela anyu, mmuttottopeleke mwaha wa marukunuxo onipaka awe ni mmukoheke moota eneetta aya yoosoma awe ya Biibiliya, emusi awe ni muteko awe. Ovaanela mwa enamuna eyo, enimookhaliheryani otheene anyu okhala apatthani. Nave eyo pooti omukhaliherya naxikola owo okela vahoolo mpakha opatisiwa. (Musome Miruku 27:17.) Olelo-va, Hanae onirumeela ntoko pioneera ookilaatheya. Owo onnuupuwela etthu yaamwiiranenle okathi aapacenrye awe orowela mithukumano. Hanae onihimya so: “Vaavo kaapaka aka apatthani anna ni arokora kaanoona opisa ophiya nihiku na mithukumano. Hata kikhulumunwe ene vanceene, kaanirowela mithukumano. Waanikisivela vanceene okhala ni apatthani aka ale asya. Nto eyo yaahikikhaliherya ohiya weetta ni atthu ahinimurumeela Yehova. Miyo kaaphavela okhalana waataana wooloka ni Yehova ni anna ni arokora a mmulokoni. Nto kaahilakela opatisiwa”.

16. Etthu xeeni ekina mukhanle anyu oopaka wira mmukhaliherye ole onisomihiwa Biibiliya okhala ootaphuwa mmulokoni?

¹⁶ Vaavo ole onisomihiwa Biibiliya ohinihiya awe orowa vahoolo ni opaka marukunuxo, mmukhaliheryeke woona wira onniirela mpantta muloko. Enamuna emosa mukhanle anyu oopaka eyo ori omwaakhela vatthokoni vanyu. (aHeeb. 13:2) Uupuwelaka okathi aasomihiwa awe Biibiliya, Denis yoowo onirumeela oMoldávia onihimya so: “Ikwaha sinceene anna ni arokora yaanikilattula miyo ni mwaaraka wira natthekule. Nto okathi owo naatthekula ahu anna awo yaaninileela moota Yehova aakhalihenrye awe. Nto eyo yaaninlipiha vanceene. Okathi ole naatthekula ahu waahinikhaliherya woona wira omurumeela Yehova waamuniphwanyiha mireerelo sinceene mookumini mwahu”. Nave vaavo ole onisomihiwa Biibiliya oniphwanelela awe okhala namalaleerya, mmukuxeke wira mwalaleerye hoothe. Namalaleerya a oBrasil oniihaniwa Diego, ohimmye so: “Anna anceene yaanikilattula orowa olaleerya hoothe. Ele yaari enamuna yooloka ya waasuwela anna ale. Anna ale yaahikiixuttiha itthu sinceene ni kookhalana waataana wooloka ni Yehova ni Yesu”.

AXITOKWEENE ANROWA OKHALIHERYA SAI?

17. Axitokweene anrowa waakhaliherya sai ale anisomihiwa Biibiliya?

¹⁷ Nviriheke okathi muri ene ni anaxikola a Biibiliya. Axitokweene musuweleke wira waaphenta ni waathokorerya ale anisomihiwa Biibiliya onimwaakhaliherya okela vahoolo mpakha opatisiwa. Munoonela sai oviriha okathi vakhaani khula muthukumano nvaanelaka ni ale anisomihiwa Biibiliya? Vaavo anipacerya aya okomentari nwiitthaneke muromolaka nsina naya. Mwiira siiso, eyo enimwaakhaliherya woona wira munnaathokorerya saana. Okathi mukina nyuwo pooti opaka eprokrama wira mwaahoole anamalaleerya vaavo anrowa aya wiiriha soosoma sa Biibiliya. Opaka eyo enoomukhaliherya vanceene ole onisomihiwa Biibiliya. Pioneera onikhala oNigéria oniihaniwa Jackie onihimya so: “Atthu anceene kinaasomiha aka Biibiliya annihakalala vaavo anoona aya wira munna kirina aka mutokweene”. Mutthu mmosa kinimusomiha aka aakilenle so: “Apastore aka khiyaarowa opaka eyo. Okathi wotheene anaaxukurya athaaciri, akhala wira annaaliva musurukhu munceene!” Vano naxikola ole a Biibiliya onnirowela mithukumano sotheene.

18. Axitokweene anrowa owerya sai ovara muteko aya onilavuliwa Miteko 20:28?

¹⁸ Nwiixuttiheke ni mwaalipiheke anamalaleerya. Axitokweene, nyuwo mookhalana muritti muulupale wowaakhaliherya anamalaleerya osuwela olaleerya ni wiiriha soosoma sa Biibiliya. (Musome Miteko 20:28.) Pooti wira namalaleerya owo onnuuliwa muru wiiriha yoosoma ya Biibiliya muri ene vaavo. Akhala wira eyo enimwiiraneya, nyuwo pooti wiivahererya wiiriha yoosoma eyo ya Biibiliya. Jackie nimulavunle ahu onihimya so: “Ikwaha sinceene axitokweene annikikoha voohimya sa atthu ale kinaasomiha aka Biibiliya. Vaavo kinikhalana aka mixankiho sa moota woowiiriha soosoma sa Biibiliya, awo annikivaha malakiheryo ooloka”. Axitokweene aakhalana muritti muulupale wowaakhaliherya anamalaleerya ni waalipiha wira ahikhulumuwe. (1 aTes. 5:11) Jackie onincererya oriki: “Onnikisivela vanceene vaavo axitokweene anikilipiha aya ni ankileela aya wira annivaha efaita muteko kinvara aka. Okittottopela waya ni moolumo aya oolipiha annikikhaliherya ohihiya ohakalala vaavo kiniiriha aka soosoma sa Biibiliya”.—Mir. 25:25.

19. Ohakalala xeeni otheene ahu nikhanle ahu oophwanya?

¹⁹ Hata nihimusomihaka mutthu Biibiliya, nnoowerya waakhaliherya ale anisomihiwa Biibiliya okela vahoolo mpakha opatisiwa. Akhala wira munnilattuliwa wiiriha yoosoma ya Biibiliya, mwiilokiheryeke oratteene wira nvahe ikomentaario sooloka sinimukhaliherya ole oniiriha yoosoma ya Biibiliya. Nave muhaana okhalana ephoole wira muhilavuleke vanceene. Ohiya-vo, mukhaleke mpatthani aya ale anisomihiwa Biibiliya anirowela mithukumano Empa ya Omwene ni mwaavaheke ntakiheryo nooloka. Akhala wira mwa mutokweene mwaalipiheke ale anisomihiwa Biibiliya nvirihaka okathi nvaanelaka naawo. Mwaalipiheke anamalaleerya nwiixuttihaka ni waattottopela. Akhala wira munoopaka eyo, moohaanyiherya nyuuwo munoohakalalaka osuwela wira moomukhaliherya mutthu omphenta ni omukokhorela Tiithi ahu, Yehova.