Yehova Ookhaliherya Soothanla Saka

Miyo kiyariwe 19 a Maio a 1940, epooma eniihaniwa Amioûn, oLíbano. Nuuvira iyaakha vakhaani muhoolo mwaya, naahithaamela epooma ya oTripoli, nto kihuuwale etthoko ya atthu oophenta ni oohakalala, yaawo yaamusuwela ni yaamukokhorela Yehova. Miyo kikisenrye oyariwa, nri 5, athiyana araru ni alopwana anli. Anamuyari aka khiyaavaha efaita yinceene ophwanya musurukhu munceene wala okhala athaaciri. Nto makhalelo ahu yaari omusoma Biibiliya, orowela mithukumano ni olaleya ihapari sooreera sa Omwene.

Muloko ahu, yaahikhala anna anceene oothanliwa. Mmosa a anna awo aari Michel Aboud, owo taahoolela Yoosoma ya Muloko. Michel iixuntte ekeekhai oNova York, nuumala-vo aahirowa owiixuttiha atthu ekeekhai oLíbano wanipacerya wa iyaakha sa 1920. Muloko ahu waahiwaakhela aximwali anli yaasomme Exikola ya oGileadi, Anne ni Gwen Beavor. Kinnuupuwela moota Michel aakhaliherya awe ni waattittimiha, nto naahikhala apatthani aalupale. Nuuvira iyaakha sinceene muhoolo mwaya kaahihakalala vanceene omphwanya Anne wEstados Unidos. Nuuvira okathi vakhaani muhoolo mwaya kaahimphwanya-tho Gwen, yoowo aatheliwe ni Wilfred Gooch ni yaarumeela eBetheli ya oLondres wInglaterra.

OLALEERYA OLÍBANO

Okathi kaari aka mmiravo, oLíbano yaari Anamoona a Yehova vakhaani paahi. Hiyo naaniluttuweliwa vanceene olaleerya, naanaaleela atthu ikeekhai sa mBiibiliyani hata naalupatthiwa ni ahooleli a itiini. Mpakha-va kinnuupuwela itthu sikina saanikhumelenle.

Nihiku nimosa, miyo ni murokora aka Sana naamulaleerya epereetiyu emosa. Nto paatiri aahirwa mpakha antaari naalaleerya ahu. Vanikhala ntoko wira ookhala mutthu aamwiitthanne paatiri ole. Nave paatiri ole aahipacerya omuruwana murokora aka. Okhala wira aahinanariwa, paatiri ole, aahimukakha Sana mpakha exikatta yaari vathi, nto Sana aahivulala. Okathi ene yoowo, ookhala mutthu aalikarenle mapoliisia. Nuumala mapoliisia ale ophiya, mooreerela murima, yaahinvekela mutthu wira omukhapelele murokora aka Sana ni yaahimukuxa paatiri ole khumuroiha okumanto. Nto nuumala ophiya okumanto, yaahoona wira paatiri ole aahikhalana kapwitthi. Mapoliisia ale, yaahimukoha paatiri ole wira: “Nyuwo mwa pani? Mwa muhooleli a etiini wala mwa muhooleli a mapantiitu?”

Miyo kinnuupuwela-tho okathi omosa, muloko ahu waalukanre aya ekaaro wira nalaleerye nipuro noothowa anamalaleerya ni noorakamela opooma. Itthu saaneetta saana mpakha ophiya okathi paatiri a mapuro ale aiwale awe wira hiyo naamulaleerya muttetthe ole. Nto owo, aahikhuma ni ekrupu emosa khurwa onituphela. Yaahipacerya onivonyakasa maluku ni yaahinvulaliha vanceene paapa aka. Kinnuupuwela vaavo kanwenhe aka paapa aka osareyale ene ephome owiitho. Owo ni maama aka yaahitthikela mukaaroni, nto hiyo naanaatthara ottuli. Nuumala-vo, kaahiweha etthu kihinrowa aka oliyala. Vaavo maama aka aamurapiha awe owiitho paapa aka, aahihimya so: “Yehova, xontte mwaalevelele atthu ala, awo khansuwela etthu enipaka aya”.

Etthu ekina, yaakhumelenle vaavo naaronwe ahu waaxukurya amusi ahu epooma niyariwe ahu. Nuumala ophiya etthoko ya ataata, kaahimphwanya pispu oottittimihiwa vanceene. Nto pispu ole, aanisuwela wira anamuyari aka yaari Anamoona a Yehova. Nnaamwi kaarina iyaakha 6 paahi, owo aahikiweha, okikoha wira: “We woopatisiwa?” Miyo, kaahimwaakhula wira, nlelo nkireere oyeva. Wira kipatisiwe, kihaana omusuwela oratteene Biibiliya ni olipiha waamini waka. Moota kaamwaakhunle aka pispu ole khivaamusivenle nto aahimuleela taata aka wira mwaana ola khonittittimiha.

Moohakalaliha, sowiiraneya ntoko iya saari vakhaani. Okhala wene atthu ooLíbano toopatthaneya ni osuwela owaakhela aletto. Naanivaanela oratteene ni atthu voohimya sa myaha sa mBiibiliyani ni naaniiriha soosoma sa Biibiliya sinceene.

OTHAAMELA ELAPO EKINA

Nlelo kisomaka, mmiravo mmosa a oVenezuela aahirwa onixukurya. Owo aahirwa oweha mithukumano muloko ahu ni nuuvira okathi aahipacerya onamorari ni murokora aka Wafa. Muhoolo mwaya awo yaahithelana ni yaahirowa okhala oVenezuela. Wafa aaninkheliwa vanceene ni hiyo, nto okathi aalepa awe ikaarta owo aaniimananiha omwiiriha paapa aka othaama ni emusi ahu yotheene wira nakhaleke oVenezuela. Nuuvira okathi, owo aahiwerya nto naahithaamela oVenezuela!

Naaphiyale oVenezuela mwaakha wa 1953 ni naakhala ebairo ya oCaracas waattamela empa aakhala awe presidenti. Okhala wira kaari mmiravo, waanikisivela vanceene onweha presidenti oviraka ori ene ni ekaaro awe ya musurukhu munceene. Khivaakhweelale anamuyari aka olimalela elapo esya, nttaava nsya, soolema, yoolya ni makhalelo a okathi oovirikana. Masi vaavo “naapacerya ahu olimalela makhalelo a elapo ele”, yaahikhumelela etthu yooriipiha murima.

ONIKHUMELELA EHASARA

Paapa aka aahipacerya owereiwa. Nto eyo yaaninixankiha mwaha woowi paapa ahu aari mutthu oolipa ni aarina okumi wooloka. Nkaatonko onweha paapa aka owereiwaka. Paapa aka aahiphwanyaniwa cancer de pâncreas, nto aahaana wooperariwa. Mooriipiha murima, nuuvira esumana emosa, aahikhwa.

Nkirina moolumo a moota woohimya moota nahaareere ahu oriipiwa murima mwaha wa etthu ele yaanikhumelenle. Okathi ole miyo kaarina iyaakha 13 paahi. Hiyo naahixanka vanceene, nuupuwela wira khinaarowa otthikela ohakalala. Waahivira okathi munceene maama aka ohikupaliki wira iyawe aahikhwa. Masi naahoona wira mookumini sinnikhumelela mixankiho sinceene ni Yehova aahinikhaliherya ovilela okathi ole wooxankiha. Okathi kaarina aka iyaakha 16, kaahimaliha osoma oCaracas, nto kaaphavela opaka etthu wira kaakhaliheryeke amusi aka.

Okathi ene yoowo murokoraka Sana aahitheliwa ni Rubén Araujo yoowo asomme Exikola ya oGileadi ni atthikenle oVenezuela. Awo yaahithanlasa otthikela oNova York. Emusi aka yaahoona wira kaahaana orowa osoma wUniversidade oNova York. Nto kaahirowa okhala vamosa ni murokoraka ni mulamu aka. Okathi kaakhala aka naawo yaahikikhaliherya vanceene okela vahoolo mwa omunepani. Ohiya-vo, hiyo naari muloko waalavuliwa Espanhol oBrooklyn nto yaahikhala anna anceene oolipa mwa omunepani. Nto kaahikhalana eparakha ya waasuwela anna anli Milton Henschel ni Frederick Franz yaawo yaarumeela oBetheli ya oBrooklyn.

Kihalaka omaliha mwaakha woopacerya kaasoma aka wUniversidade oNova York, kaahipacerya wuupuwela moota kaakhanle aka oorumeela okumi aka. Miyo kaahisoma mwaha mmosa erevista Owehaweha waalavula sa okhalana soolukama sa omunepani. Nto vaavo kaaweha aka mapioneero ni anna yaarumeela oBetheli yaari muloko aka, kaanoona wira yaanihakalala vanceene, nto miyo kaaphavela okhala ntoko awo. Masi kiira nlelo kihipatisiwe. Kaahoona efaita erina aya wiivahererya wa Yehova. Nto kaahipaka eyo ni kaahipatisiwa 30 a Março a 1957.

SOOTHANLA SA EFAITA YINCEENE

Nuumala opaka nivalo nne na efaita yinceene, kaanuupuwela opaka nivalo nikina, eyo piiyo, okela muteko wa Muluku wa okathi wotheene. Khula okathi, yoophavela aka ya okhala pioneero yaaninnuwa vanceene. Masi kaanisuwela wira vaamukixankiha vanceene okhala pioneero. Kaarowa owerya sai okhala pioneero okathi omosaru kisomaka wUniversidade? Miyo ni amusi aka kaamakela olepa ikaarta sirowaka oNova York ni oVenezuela kimutthokiheryaka maama aka ni axulupale aka wira kaaphavela ohiya osoma wUniversidade ni otthikela oVenezuela wira kakhale pioneero.

Kaahitthikela oCaracas Junyo a 1957. Masi kaahoona wira makhalelo a amusi aka khiyaalonke. Nto vaanitthuneya mutthu mukina mweemusini mwahu ovaraka muteko. Kaarowa waakhaliherya sai? Kaahiphwanya muteko obanko. Masi, nlelo kaaniphavela vanceene okhala pioneero. Maana eyo ti etthu yaakirinhe otthikela oVenezuela. Nto kaahithanla opaka itthu soopiili, ovara obanko ni okhala pioneero. Saahivira iyaakha sinceene kivaraka obanko ni okathi omosaru kiri ene pioneero. Okathi ole kaanaatteliwa miteko, masi hata vaari siiso, kaanihakalala vanceene!

Etthu ekina yincerenrye ohakalala waka, waari omusuwela Sylvia murokora ooreera a wAlemanha yoowo onimphenta vanceene Yehova. Owo aathaamenle oVenezuela ni anamuyari awe. Nuuvira okathi naahithelana, nuumala-vo naahaayara anamwane anli. Mwanihu mwaamulopwana Michel (Mike) ni mwanihu mwaamuthiyana Samira. Nave kaahaana omukhapelela maama aka, nto kaahimukuxa wira okhaleke ni hiyo. Okhala wira kaahikhalana miritti sinceene vatthokoni vaka, kaahaana ohiya okhala pioneero. Hata vaari siiso, nkaahiyale osiveliwa muteko wa opioneero. Nto okathi wa ifeeriya, miyo ni Sylvia naanikhala mapioneero ookhaliherya.

YOOTHANLA EKINA YA FAITA YINCEENE

Okathi yaakhumelenle aya yowiiraneya kilavunle aka wanipacerya, anaaka nlelo yiira asomaka oxikola. Ohimya ekeekhai, makhalelo aka wala okumi aka waari wooloka. Miyo kaanittittimihiwa vanceene ni atthu yaavara obanko. Masi etthu kaaphavela waari othokoreriwa ni atthu akina wira ka murumeyi a Yehova. Nto muupuwelo ole kaarina aka khiwaakhumme mmuru mwaka. Nto miyo ni mwaaraka naahikilaathi khuthokorerya oratteene musurukhu naarina ahu. Vaakhanle wira kaamuhiya ovara obanko kaamwintiminisariwa musurukhu munceene. Okhala wira khinaakhompe musurukhu, kinoona wira nuumala ohiya muteko, nlelo naamukhalana musurukhu waaphiyerya wira nirumeeleke mwa okathi munceene.

Khivaakhweyale opaka yoothanla eyo, masi mwaaraka kinimphentexa aka ni maama aka yaahikikhaliherya vanceene. Nto kaamuthikela ovara muteko wa Muluku wa okathi wotheene ntoko pioneero. Kaahihakalala vanceene! Nto naanilipelela itthu soohakalaliha muhoolo. Masi ohivinre okathi munceene naahaakhela ihaapari soohakalaliha nahaalipelela ahu.

YAAHIIRANEYA ETTHU YOOHAKALALIHA NAHAALIPELELA AHU!

Nihiku nimosa, meetiku ahu aahinileela wira Sylvia aahirupala. Eyo yaahinitikiniha oowanli ahu! Masi hata vaari siiso, khinaareere ohakalala. Hata vaari siiso nlelo kaanuupuwela yoothanla ele kaapanka aka ya okhala pioneero. Niireke nlelo kanwerya okhala pioneero? Hiyo naahipaka marukunuxo, nto moowaakuveya naahoona wira nammwaakhela mutthu mukina vatthokoni vahu. Masi ankhi palano ole kaapanke aka a okhala pioneero?

Nuumala ovaanela oratteene voohimya sa soothanla sahu, naahithanla ohimuhiya palano ahu oopacerya. Nto mwanihu Gabriel oyariwe Abril a 1985. Nto kaahihiya ovara obanko ni kipacerya orumeela ntoko pioneero ookilaatheya okhuma Junyo a 1985. Nuuvira okathi, kaahivahiwa eparakha ya wiirela mpantta ekomisau ya efiliyaali. Masi okhala wira eBetheli khiyaakhala oCaracas, nto ikwaha piili wala tthaaru vasumanani kaahaana weetta mukwaha wa ikiloomu 80 wira kiphiye oBetheli.

OTTHIKELA OTHAAMA

EBetheli yaari epooma ya La Victoria. Nto wira naattamele eBetheli, hiyo naahithaamela epooma ya La Victoria. Opaka eyo, naahinixankiha otheene ahu. Kinnaaxukhurela vanceene amusi aka mwaha wookikhaliherya, maana moonelo aya wooloka wookikhaliherya vanceene mookumini mwaka. Murokoraka Baha aahiivahererya wira ammukhapelelaka maama ahu. Mike aahithela masi Samira ni Gabriel yaahaana ovikaniha okhala ni hiyo. Nto othaamela oLa Victoria, waataphulela waahiya apatthani aya otheene oCaracas. Ohiya-vo, mwaaraka kinimphentexa aka Sylvia aahaana olimalela okhala epooma yaamukhaani, ohiya okhala epooma yuulupale nave otheene ahu naahaana olimalela okhala empa yaamukhaani. Moohaanyiherya othaama oCaracas nirowaka oLa Victoria waari muxankiho muulupale.

Masi itthu saahitthikela oturekeya. Gabriel aahithela nto Samira ahaana okhala mekhawe. Nuumala-vo, miyo ni Syliva naahilattuliwa okhala ni emusi ya oBetheli mwaakha wa 2007. Nto okhuma mwaakha ole mpakha-va ninrumeela oBetheli. Mwanihu oopacerya Mike mutokweene ni onirumeela ntoko pioneero ni mwaarawe oniihawaniwa Monica. Nave Gabriel mutokweene ni onikhala wItália ni mwaarawe oniihaniwa Ambra. Vano Samira pioneera ni onikhaliherya oBetheli.

KINNIHAKALALA MWAHA WA SOOTHANLA KAAPANKE AKA

Mookumini mwaka koopaka marukunuxo manceene. Nave nkinthanana mwaha woopaka marukunuxo awo. Vaakhanle wira vaaniweryaneya, miyo kaamutthikela opaka marukunuxo mamosaru, kiire so, kinnihakalala mwaha wa soothanla kaapanke aka. Miyo kinnixukhurela ni murima wotheene mwaha wa iparakha ni miteko kivahiwe aka mmutthenkesoni mwa Yehova. Mwa iyaakha sivinre, kihoona efaita erina aya olipiha waataana wahu ni Yehova. Nto vaavo nimpaka ahu etthu ekhale yaamukhaani wala yuulupale Muluku onoonivaha ‘murettele onvikana osuwela wotheene wa apinaatamu’. (aFil. 4:6, 7) Miyo ni Sylvia, ninnihakalala vanceene orumeela oBetheli nave nnoona wira Yehova ooreeliha soothanla sahu mwaha woowi okathi wotheene naanimuupuwela Yehova nihinatthi opaka soothanla.