Yoowiiraneya

Nwooneleke Othunku Atthu Ootheene

Nihiku nimosa murokora a oNova Zelândia, aahiweha eviidiyu eni: “Muthokoreryaneke”, eri musaitini jw.org. Eviidiyu eyo, enittittimiherya wiira ohiya paahi Yehova owoonela othunku atthu, masi onnipaka etthu. (Yes. 63:7-9) Nto owo aaheererya ovarihela muteko ele yiixuntta awe, aakhaliheryaka atthu akina. Nihiku nimosa okathi aari awe omerkaatu, aahimoona muthiyana ahaarina etthu yoolya nto aahithuma khunvaha. Muthiyana owo aahaakhela. Okathi muthiyana ole aatthikela awe owaani okunxe ene eyoolya, murokora ole aahimulaleerya orumeelaka efolyeeto eni: Niireke Ohaawa Onoomala?

Muthiyana ole ahiipacerya wunla. Owo aahimutthokiherya murokora ole wiira ahuuwale ni Anamoona a Yehova masi aahiviriha iyaakha sinceene ohirowelaka mithukumano. Okathi vakhaani waavinre, iira onvekenle ene Yehova wiira omukhaliherye otthikela wa yena. Murokora ole aahinvaha muthiyana ole Biibiliya, ni aaheemererya osomihiwa.a

Nimutakihaka Yehova, nihaana owoonela othunku atthu ootheene, waahela muhina amusi ahu ni anna ni arokora a mmulokoni. Nave nnoowooniherya othunku niphavelasaka okathi wiira naalaleerye voohimya sa Yehova.