Moota Woolimalela Muloko Musya

Nicolas ni Céline yaahikhalana muxankiho mukina. EBeteeli ya oFrança yaahaathanlela muloko musya. Awosa anihimya so: “Woopaceryani, khinaareere ohakalala, masi nuuvira okathi naahipacerya wunkheliwa ni apatthani ahu. Nlelo niira nihaapanke apatthani asya”.a Nnaamwi vahikhweyaka, exeeni enrowa onikhaliherya okhala oohakalala okathi ninthaamela ahu muloko musya? Atthu akina anrowa okhaliherya sai? Moota xeeni munrowa anyu olipihiwa ni waalipiha anna a muloko anyu musya?

MALAKIHERYO MAXEXE ANROWA WOOKHALIHERYANI OLIMALELA MULOKO MUSYA

1. Mmuroromeleke Yehova. (Esal. 37:5) Murokora mmosa a ojapão oniitthaniwa Kazumi, aahiviriha iyaakha 20 orumeelaka muloko awe. Masi vano aahaana othaama okhala wiira iyawe aahiphwanya muteko elapo ekina. Moota xeeni owo ‘aamuroromenle awe’ Yehova? Owo onihimya so: “Kaninvekela vanceene Yehova kimuleelaka itthu saakixankiha. Miyo kuupuwela wiira kaari mekhaka nave kaanixanka vanceene. Nto khula okathi kanvekela aka, Yehova aanikivaha ikuru kaapirisari aka”.

Exeeni mukhanle anyu oopaka wiira mmuroromeleke vanceene Yehova? Wiira mwiri wunnuwe, onipirisari maasi ni etturumu. Mwa enamuna emosa-ru, wiira waamini wahu okhale woolipa, Nihaana opaka etthu. Nicolas, yoowo nimuromonle ahu ettima evinre, aahilipiha waamini wawe, uupuwelelaka ntakiheryo na Abrahamu, Yesu ni Paulo. Alopwana awo, yaaniimananiha vanceene opaka ele Muluku oniphavela awe. Eprokrama ya omusoma Biibiliya khula nihiku, khahiyo wiira enrowa wookhaliheryani paahi oxintta mixankiho sa mookumini mwanyu, masi munimwiixutta itthu sinceene mukhanle anyu oorumeela wiira mwaalipihe atthu akina a muloko muthaamenle anyu.

2. Muhilikanyiheke muloko anyu wa khalai ni muloko anyu wa niinaano. (Mus. 7:10) Jules yoowo aathaamale oBenin, wÁfrica othaamelaka wEstados Unidos aahiweha wiira ikultuura saahitepa ovirikana. Owo onihimya so: “Miyo kaaniphavela omuleela yoowiiraneya aka khula mutthu kamphwanyaka”. Mwaha wa ovirikana wa ikultuura iwo aahipacerya wiivalaanya ni anna ni arokora a mmulokoni. Masi nuumala waasuwela saana anna ni arokora awo, owo aahituruka muupuwelo awe. Onihimya-tho so: “Miyo kinnikupali wiira moohicikha opuro ninkhala ahu, ootheene ahu nnoolikana. Masi etthu enivirikana paahi, malavulelo ahu ni moota nimpaka ahu itthu. Nto etthu yooloka, ori weemererya makhalelo aya nnaamwi ari ene oovirikana ni awihu”. Tivonto ninreerela ahu osyaka olikanyiha muloko ahu wa khalai ni wa niinaano. Murokora mmosa pioneera oniitthaniwa Anne-Lise, onihimya so: “Miyo kaathaamale mwaha woophavela wiixutta itthu isya, ohiya mwaha woophavela ophwanya mireerelo sooloka ovikana iye kaarinaka khalai”.

Nave axitokweene ahaana osyaka olikanyiha muloko aya wa khalai ni muloko aya wa niinaano. Hata anna a muloko aya wa niinaano apakaka itthu mwa enamuna yoovirikana ni moota yaalimalenle aya, eyo khentaphulela wiira awo anipaka itthu soohiloka. Nihinatthi ovaha moonelo ahu, ti vooloka osuwela makhalelo a muttetthe owo. (Mus. 3:​1, 7b) Ohiya waakhanyererya muupuwelo ahu, ti vooloka waavaha ntakiheryo nooloka. — 2 aKor. 1:24.

3. Mwiimananiheke. (aFil. 1:27) Othaama muloko pooti oniiriha oviriha okathi munceene nikhulumunwe ene. Masi nihaana wiimananiha ohicompela orowela mithukumano Empa ya Omwene. Vakhala wiira anna a muloko ahu musya, khanniweha Empa ya Omwene, awo anrowa onikhaliherya sai? Murokora Lucinda yoowo onikhala wÁfrica do Sul, owo vamosa ni anaawe anli axithiyana yaahithaama erowaka epooma yuulupale ya elapo ele. Owo onihimya so: “Axipatthani aka yaanikitumererya waapaka apatthani anna ni arokora a muloko aka ole musya, kivaraka muteko woolaleerya hoothe ni okathi wa mithukumano sa mmulokoni. Nave naaheemererya wiira anna ni arokora, athukumaneke owannyihu wiira nikhumeke nrowaka muteko woolaleerya”.

Etthu enrowa wookhaliheryani wiilimaleliha muloko anyu musya, ori “wiimananiha” ovara miteko hoothe ni anna ni arokora a muloko owo. Nave eyo enimookhaliheryani olipiha “waamini wanyu” ni waamini wa atthu akina. Axitokweene a murokora Anne-Lise, nimulavunle ahu wanipacerya, yaahimutumererya ovara muteko woolaleerya ni khula namalaleerya a muloko awe musya. Yookhumelela aya? Owo onihimya so: “Moowaakuveya kaahoona wiira ele ti yaari enamuna yooloka ya wiilimaleliha muloko ole”. Vakhala wiira munimwiivahereryaka ovara miteko ntoko orattela Empa ya Omwene ni olokiherya, munimooniherya wiira muloko owo nave ti waawinyu. Nto vaavo muniimananiha anyu ovara miteko iyo, moowaakuveya munimoona wiira anna ni arokora animoolimalelani nave nyuwo munoolimalela emusi eyo esya.

4. Mwaapakeke apatthani asya. (2 aKor. 6:​11-13) Enamuna emosa mukhanle anyu oowaapaka apatthani asya, ori waacalaka atthu, munoowerya opaka eyo mphiyaka Empa ya Omwene sihinatthi opacerya mithukumano nave nvirihaka okathi mwaalavulihaka, vaavo sinimala aya mithukumano. Mwapaka eyo munoowerya olavula ni atthu anceene ni waasuwela oratteene. Mwiimananiheke wiira muheleke mmuruni masina aya. Vakhala wiira khamuniliyala masina aya, okhala ooreera murima ni ookhweya olavulana munimoona wiira atthu akina animoolimalelani moowaakuveya ni munimwaapaka apatthani moohipisa.

Muhixankeke ni mweemereryeke anna woosuwelani, eyo enihela muhina anna ni arokora osuwela mikhalelo sanyu. Mpakeke etthu emosa-ru Lucinda aapanke awe, yoowo onihimya so: “Vannikhweya waapaka apatthani vakhala wiira ninnipaceriha waalattula wiira nitthekule naawo owannyihu”.

“MWAAKHELANEKE MUKINA NI MUKHWAAWE”

Atthu anceene annoovelela okela Empa ya Omwene mwaha wookhala atthu anceene ahinaasuwela aya. Nto munrowa owerya sai waakhaliherya atthu anamphiyaru muloko anyu wiilimaleliha? Murummwa Paulo ohimmye wiira “mwaakhelaneke mukina ni mukhwaawe, siisaale Kristu nave owaakhenlyaaweni”. (aRom. 15:7) Axitokweene pooti waakhaliherya atthu akina woona wiira annaakheliwa. Yapaka eyo, awo anrowa ottharaka ntakiheryo na Kristu. (Nwehe ekaaxa eni: “Moota Wookhweiherya Othaamela Muloko Mukina”.) Atthu ootheene a mmulokoni waahela muhina anamwane, pooti waakhaliherya ale anamphiyaru woona wiira annaakheliwa.

Owaakhela atthu akina onihela muhina waalattula owannyu ni waakhaliherya mwaavahaka itthu sikina anipirisari aya. Mwa ntakiheryo, murokora mmosa aahiwerya omukhaliherya murokora mukina amphiyaru muloko ole, omusuwelihaka mapuro makina a muttetthe ole ni moota woorumeela ikaaro siniweetta a xaapa. Nto murokora ole aaphiyale niinaano, vaahimusivela vanceene moota akhaliheriwa awe nave eyo yaahimukhaliherya olimalela muloko ole.

MOOTA WOOLIPIHA WAMINI WANYU

Vakhala wiira esoope eniphavela ovava, eyo ehaana wiilipiherya otapuruxa mapupha aya. Mwa enamuna emosa-ru, vakhala wiira moothamela muloko musya, muhaana wiimananiha wiira muxintte woova weiwo okhanle oowiirihani ohiwerya ovava, eyo piiyo, ohiwerya ovara miteko sa Yehova. Nicolas ni Céline, yaawo naalavunle ahu wanipacerya anihimya so: “Othaamela muloko mukina enamuna yooloka ya wiixutta. Nave wiira niwerye olimalela elapo ekina ni waalimalela atthu oovirikana, nihaana wiixutta ni okhalana mikhalelo isya”. Jean-Charles yoowo nimulavunle ahu wanipacerya, onnihimya mareeliho yena ni emusi awe yaaphwannya aya. Onihimya so: “Nuumala ophiya muloko ahu musya, aniihu yaahilipiha waamini waya nave ompatthani aya ni Yehova waari woolipa. Nuumala miyeeri vakhaani, mwanihu mwaamuthiyana aahiivahererya okhaliheryaka ipantta sa muthukumano wa eriyari ya esumana, nave mwaamulopwana aahiivahererya okhala namalaleerya oohipatisiwa”.

Ankhi vakhala wiira muniphavela othaamela mapuro oothowa anamalaleerya masi makhalelo anyu ehinaweemereryani? Nyuwo pooti orumeela malakiheryo niixuntte ahu mwaha ola, mmulokoni mwanyu. Mwapaka eyo, vanakhala wiira muri muloko musya. Nto mmuroromeleke Yehova, mukhaleleke nthiti ovara miteko sa mmulokoni, ntoko orowa muteko woolaleerya ni anamalaleerya oovirikana, waapaka apatthani asya ni olipiha waataana wanyu ni apatthani anyu a khalai. Nave nyuwo pooti opaceriha waakhaliherya ale anipirisari aahiiso aphiyale niinaano mwaavahaka itthu anipirisari aya. Opaka eyo enimookhaliheryani olipiha waamini wanyu, maana ophenta mukhalelo onaasuwanyeiha makristau a ekeekhai. (Yoh. 13:35) Mukupaliki wiira itthu iyo siri ntoko “mikuttho, ni sinnimuhakalaliha vanceene Muluku”. — aHeeb. 13:16.

Nnaamwi sikhalaka mixankiho, anna ni arokora anceene aawerya olimalela muloko aya musya nave nyuwo munoowerya! Anne-Lise onihimya so: “Othaamela muloko mukina wookikhaliherya okhalana apatthani asya”. Nave Kazumi onihimya wiira “Yehova oomukhaliherya mwa enamuna aahuupuwela awe nuumala othaamela muloko mukina”. Ankhi Jules onihimya exeeni? Owo onihimya so: “Apatthani aka aakikhaliherya olimalela muloko ole musya. Okhala wiira nenna-va koolimalela muloko ola, kinoona wiira vanookixankiha othaama”.