Nniixutta Exeeni ni Mwiiriirya wa Ephaawu Yesu Aapanke Awe?

1. Biibiliya oniphavela ohimya exeeni ni moolumo oowi ephaawu?

EPHAAWU, yaari etthu ya faita yinceene yaarumeeliwa ni atthu aniromoliwa mbiibiliyani. (Maph. 14:18; Luka 4:4) Ikwaha sikina, Biibiliya onnirumeela nuulumo noowi “ephaawu” ophavelaka ohimya iyoolya sikina. (Math. 6:11; Mit. 20:7) Miiriirya miili sootepexa osuweliwa Yesu aapanke awe, saahela muhina ephaawu. (Math. 16:9, 10) Mwiiriirya mmosa ori Yohani ekapiitulu 6. Mwaha ola, nnoothokorerya yoowiiraneya eyo ni nnooweha etthu nniixutta ahu.

2. Atthu akavi yaapirisari ovahiwa eyoolya?

² Arummwa a Yesu, khiyaareere okhulumuwa nuumala weetta mukwaha alaleeryaka ni avaraka miteko sikina, nto yaanipirisari ophumurya. Nuumala-vo, Yesu ni awiixutti awe yaahikhuruwa mukalawani, anarowa opuro woomaaleleya. (Mar. 6:7, 30-32; Luka 9:10) Nto awo yaahiphiya nipuro noomaaleleya waattamela oBethisaida. Moohipisa, atthu anceene yaahiphiya opuro ole wiira akumaane ni Yesu. Owo khaawoomonle atthu ale. Mwaha wa owoonela othunku, aahiwiixuttiha voohimya sa Omwene ni aahaapenuxa iretta saya. Okhala wiira vaaniila, awiixutti ale yaahipacerya okohana moota atthu ale yaarowa aya ophwanya yoolya. Woonasa wene, akina yaahikhalana eyoolya aya vakhaani, masi akina yaahaana orowa mmawaani wiira yathume eyoolya. (Math. 14:15; Yoh. 6:4, 5) Yesu aarowa opaka exeeni?

MWIIRIIRYA WA EPHAAWU

3. Etthu xeeni Yesu aarumme awe awiixutti awe wiira apakeke? (Nwehe eteseenyu ya vakaapani.)

³ Yesu aahaaleela awiixutti awe oriki: “Khinikhanle nthowa na waamwarya atthu ala, mwaavaheke nyuwo yoolya”. (Math. 14:16) Tthiri, owo waari muxankiho muulupale okhala wiira yaahikhala alopwana oowiiraka 5.000. Nave naahela muhina athiyana ni anamwane yaari opuro ole, woonasa wene yaahikhala atthu oowiiraka 15.000. (Math. 14:21) Andreya aahimmye so: “Ookhala-va mmiravo mmosa orina iphaawu thanu ni ihopa piili saamukhaani. Niireke sinimwaaphiyerya atthu oowaatta siisa?” (Yoh. 6:9) Ephaawu ya esevaata, yaari eyoolya yaalyiwa khula nihiku nave ihopa saamukhaani, woonasa wene, saari sa maakha ni soowuuma. Nave iphaawu aarina awe mmiravo ole, saari vakhaani ni khivaarowa oweryaneya atthu ootheene ophwanya!

4. Yohani 6:11-13, onniixuttiha exeeni? (Nwehe ifootu.)

⁴ Ooniheryaka wiira aahaakhela muttitthi ole, Yesu aahiruma okilaathi vamalaxini makithi ari ene ikurupu sene. (Mar. 6:39, 40; mmusome Yohani 6:11-13.) Yoowiiraneya ela, ennooniherya wiira Yesu aahimuxukhuru Tiithi awe mwaha wa iphaawu ni ihopa. Vaari vooloka omuxukhurela Tiithi awe, maana owo taakumihenrye eyoolya ele. Tthiri nla, ntakiheryo nooloka ninreerela ahu otthara na ovekela nihinatthi olya, hata niri ene mekhihu aahiiso ni atthu akina. Nto Yesu aahiruma okaiwa eyoolya ele, ni atthu ootheene yaari opuro ole yaahilya ni yaahivona. Nave saahihala ipetaasu sa iphaawu seiyo aarumme awe wiira sittotteliwe. Owo aahirumiha wiira sittotteliwe para orumeeliwa okathi mukina. Yesu oovaha ntakiheryo na moota wookhapelela mireerelo sahu. Vakhala wiira mwa paapa, pooti orumeela yoowiiraneya ela wiira nwiixuttihe aniinyu, efaita erina aya ovekela ahinatthi olya, okhala oowaakhela aletto ni waavaha itthu atthu akina, ntoko Yesu aapanke awe.

5. Atthu yaaphavela omwiiriha exeeni Yesu nuumala oweha itthu aapaka awe, nave yena aapanke exeeni?

⁵ Atthu yaanitikinihiwa vanceene ni moota Yesu iixuttiha awe ni miiriirya aapaka awe. Awo yaanisuwela wiira Moise aahihimya wiira aamwaavaha profeta muulupale, nto woonasa wene, awo yuupuwela wiira Yesu aari profeta yoowo. (Otum. 18:15-18) Nave woonasa wene, awo yuupuwela wiira Yesu aarowa okhala mwene ooloka yoowo aarowa oweryaka waavaha eyoolya aIsarayeli ootheene. Tivonto, muttitthi ole ‘waaphavela omukhanyererya okhala mwene aya’. (Yoh. 6:14, 15) Vaakhanle wiira Yesu aheemererya okhala mwene, owo aarowa okhaliheryaka ipoliitika sa ayuda, seiyo saalamuleliwa ni aRoma. Niireke wiira yena aaheemererya? Nnaari. Biibiliya onihimya so: ‘Aahirowa omwaako mekhawe’. Nnaamwi aakhanyereriwa ni atthu akina, owo khiirenle mpantta ipoliitika. Tthiri nla ntakiheryo nooloka ninreerela ahu otthara!

6. Ninrowa otthara sai ntakiheryo na Yesu? (Nwehe eteseenyo.)

⁶ Ekeekhai wiira atthu khanrowa onivekela wiira nitatuxe ephaawu, waapenuxa atthu mwa mwiiriirya aahiiso ovekeliwa okhala namalamulela. Masi awo pooti onivekela wiira nikhaliheryeke epoliitika, ni onikhanyererya onvotari mutthu animoona aya wiira onrowa okhala namalamulela ooloka. Tthiri Yesu oonivaha ntakiheryo nooloka. Owo aahikhootta wiirela mpantta myaha sa epoliitika vaavo aahimmye awe so: “Omwene aka khahiyo wa olumwenku ola”. (Yoh. 17:14; 18:36) Ntoko Yesu, nihaana wiimananiha otthara ntakiheryo nawe. Hiyo ninniroromela ni okhaliherya omwene wa Muluku. Nave ninnaaleela atthu akina voohimya sa Omwene owo ni ninnivekela wiira orwe. (Math. 6:10) Nrowe ntthikele othokorerya mwiiriirya Yesu aakumihenrye awe ni oweha itthu sikina nniixutta ahu.

“YOOTAPHULELA YA MWIIRIIRYA WA IPHAAWU”

7. Etthu xeeni Yesu aapanke awe, nave awiixutti awe yoonenle sai? (Yohani 6:16-20)

⁷ Nuumala Yesu olyiha muttitthi ole, awiixutti awe yaahirowa ophareya ewela ekalawa enarowa oKafarnawu, nave aahirowa omwaako mekhawe osyakaka okhalihiwa mwene. (Mmusome Yohani 6:16-20.) Yeettaka siisaale, ephareya yaaninyakula okhala wiira yaanoopa epheyo yuulupale ni yaanikhumela mawimpi ootupa. Yesu aahaakhumelela eettaka vasulu va maasi. Yesu aahimuleela Pedru wiira eetteke vasulu va maasi orowaka opuro aari awe. (Math. 14:22-31) Nuumala Yesu okela mukalawani, epheyo yaahimaala. Nto awiixutti yaahitikinihiwa vanceene, mpakha ohimya so: “Veekeekhai, nyuwo mwa Mwaana a Muluku”.a (Math. 14:33) Masi hata vari siiso, awo khiyaawenhe ovarihana waakhanle mwiiriirya ole ni etthu ele Yesu aapakenle awe muttitthi ole. Incereryaka yoowiiraneya eyo, Marko onihimya so: “Awiixutti yaahitikinihiwa vanceene, maana khiyaiwexenxe yootaphulela ya mwiiriirya wa iphaawu. Tthiri awo khiyaawerya wiiwexexa”. (Mar. 6:50-52) Veekeekhai, awiixutti ale khiyaawenrye wiiwexexa owerya Yehova anvanhe awe Yesu a opaka miiriirya. Moottharelana, Yesu aahitthikela-tho olavula sa mwiiriirya wa ephaawu ni ooniixuttiha etthu ekina.

8-9. Xeeni muttitthi ole waamwaavya aya Yesu? (Yohani 6:26, 27)

⁸ Muttitthi ole Yesu aavanhe awe yoolya, itthu saatepa aya ovaha efaita, saari itthu sa weerutthuni. Moota xeeni? Nihiku naattharelana, muttitthi ole waahiweha wiira Yesu ni awiixutti awe yaahikhuma opuro ole. Muttitthi ole waahiwela ikalawa sikina seiyo saakhuma oTiberiyade, anarowa oKafarnawu omwaavya Yesu. (Yoh. 6:22-24) Niireke muttitthi ole waapanke eyo mwaha wa ophavela owiriyana ihapari sa Omwene? Nnaari. Awo yuupuwela paahi soophavela saya sa weerutthuni, ntoko okhuura ephaawu. Ninsuwela sai eyo?

⁹ Nwehe etthu yaakhumelenle nuumala muttitthi ole okumana ni Yesu okafarnawu. Yesu aahaaleela wiira itthu yaahela aya nipuro noopacerya, saari soophavela saya sa weerutthuni seiyo sahaarowa opisa. Nto owo aanisuwela wiira muttitthi ole waamwaavya mwaha wa ‘iphaawu yaakhuurale aya mpakha ovona’ ni ‘eyoolya enintta’. Owo aahaatumererya wiira avareke muteko mwaha wa ‘eyoolya enikhala, enivaha okumi woohimala’. (Mmusome Yohani 6:26, 27.) Yesu, aahihimya wiira Tiithi awe amwaavaha eyoolya eyo. Nto muupuwelo woowi eyoolya yamwaavaha ekumi yoohimala, wahaatikiniha vanceene. Eyoolya xeeni yaarowa waavaha okumi woohimala? Nave atthu ale yanwiriyana Yesu, yaarowa owerya sai ophwanya yoolya eyo?

10. Atthu ale yaahaana opaka exeeni wiira aphwanye “okumi woohimala”?

¹⁰ Woonasa wene, ayuda ale yuupuwela wiira yaahaana ovara muteko wiira yaakhele eyoolya eyo. Pooti wiira yuupuwela ‘miteko’ seiyo nlamulo na Moise naahimya aya. Tivonto, Yesu aalenle awe so: “Muteko okhanle anyu onvarela Muluku tuula: “Mooniheryeke wira munnimwaamini ole omurumme awe”. (Yoh. 6:28, 29) Omwaamini ole Muluku omurumme awe, ti etthu enipirisari wiira mutthu okhalane “okumi woohimala”. Eyo ti etthu Yesu aahimmye awe. (Yoh. 3:16-18, 36) Nave-tho, Yesu aahilavula ikwaha sinceene etthu yaareerela aya opaka, wiira aphwanye okumi woohimala. — Yoh. 17:3.

11. Ayuda yoonihenrye sai wiira etthu yaavaha aya efaita saari itthu sa weerutthuni paahi ntoko eyoolya? (Esaalimu 78:24, 25)

¹¹ Ayuda ale khiyeemerenrye yoowiixuttiha ya Yesu voohimya sa “muteko akhanle aya onvarela Muluku”. Yaahimukoha ahimyaka so: “Mwiiriirya xeeni munrowa anyu opaka, wira noone ni nookupalini?”. (Yoh. 6:30) Awo yaahimmye wiira okathi wa Moise, atthu yaahaakhela emana yeeyo yaari eyoolya aya ya khula nihiku. (Neh. 9:15; musome Esaalimu 78:24, 25.) Vannooneya wiira, etthu yaatepa aya ovaha efaita yaari eyoolya paahi, eyo piiyo, ephaawu ya ekeekhai. Hata nuumala Yesu olavula sa “ephaawu yeekeekhai, yeeyo enikhuma wiirimu”, moovirikana ni emana, ephaawu eyo yamwaavaha okumi woohimala. Masi awo khiyaaphavenle osuwela etthu Yesu aaphavela awe ohimya. (Yoh. 6:32) Okhala wiira yaawehexexa paahi soophavela saya sa weerutthuni, awo khiyaaphavenle osuwela ele Yesu iixuttiha awe sa okumi woohimala. Exeeni nniixutta ahu ni yoowiiraneya ela?

ETTHU NINREERELA AHU OVAHAKA EFAITA

12. Etthu xeeni erina efaita yuulupale yeeyo Yesu aahimmye awe?

¹² Yohani ekapiitulu 6, onniniixuttiha etthu yuulupale. Etthu ninreerela ahu ovahaka efaita, ori ophavela omusuwela Muluku. Muhiliyale wiira Yesu aanimusuwela saana Muluku, nto eyo yaahimukhaliherya omukhootta Satana. (Math. 4:3, 4) Okathi Yesu aalavula awe mwaha awe vamwaako, aahittittimiherya efaita erina aya okhalana wataana woolipa ni Muluku. (Math. 5:3) Mwiikoheke so: ‘Enamuna enikhala aka, kiireke kinnooniherya wiira kinnivaha efaita waataana waka ni Yehova ovikana soophavela saka sa weerutthuni?’

13. a) Niireke ophavelasa okhalana eyoolya etthu yootthekeya? b) Exeeni ninreerela ahu okhalana ephoole? (1 aKorinto 10:6, 7, 11)

¹³ Khahiyo vootthekeya onvekela Yehova itthu nimpirisari ahu wiira nihakalaleke. (Luka 11:3) Muteko ninvara ahu, onninikhaliherya “olya n’uwurya”, nave onniniphwanyiha ohakalala, itthu seiyo “sinikhuma wa Muluku”. (Mus. 2:24; 8:15; Yak. 1:17) Masi hata vari siiso, niheemererye opweha nipuro noopacerya mweekumini mwahu itthu sa weerutthuni. Nnoowerya wiixutta etthu ni ele murummwa Paulo aalepenle awe makristau a oKorinto. Owo aahilavula ntakiheryo noohiloka na aisarayeli okathi yaari aya moothakoni, ohela muhina itthu yaapaka aya. Ahaaleela makristau ale wiira ‘ahiphaveleke opaka itthu sootakhala, ntoko atthu awo yaaphavenle aya’. (Mmusome 1 aKorinto 10:6, 7, 11.) Mwa mwiiriirya, Yehova aahikumiherya eyoolya khwaavaha aisarayeli ale. Masi mwaha wa moonelo aya woohiloka voohimya sa eyoolya, aisarayeli yaaniweha itthu Yehova aapakela awe mwa mwiiriirya ntoko “itthu sootakhala”. (Moth. 11:4-6, 31-34) Okathi yaamukokhorela aya mwaanyompe a eweero, aisarayeli yaahooniherya ele yaavahexa aya efaita, eyo piiyo, eyoolya, owurya ni ophavela wiihakalaliha ohiya omwiiwelela Yehova. (Okhu. 32:4-6) Murummwa Paulo, aahilavula ntakiheryo nla aaroihelaka makristau yaawo yaakhala waattamela okathi Yerusalemu ni etemplo saarowa aya opwetexiwa mwaakha wa 70 Nuumala Kristu Orwa. Nave-tho hiyo, ninkhala waattamela wanikisa wa makhalelo ala ootakhala. Ti maana aya ninreerela ahu ovaha ephoole miruku sa murummwa Paulo wiira nihipake etthu emosa-ru yoohiloka, yeeyo aisarayeli yaapanke aya.

14. Exeeni Biibiliya onihimya awe sa eyoolya elapo esya?

¹⁴ Okathi Yesu iixuttiha awe ovekela voohimya sa “yoolya ahu ya nihiku nla”, ni wiira ‘yiireye vathi-va ntoko wiirimu ele Muluku oniphavela awe’, owo aahinitumererya opakaka eyo khula okathi. (Math. 6:9-11) Niireke munniwerya wuupuwelela moota makhalelo a olumwenku ola anrowa aya okhala? Biibiliya, onihimya wiira ele Muluku oniphavela awe, enihela muhina elapo yootheene okhala eyoolya yooloka. Moovarihana ni Yesaya 25:6-8, atthu anoorowa okhalana eyoolya yinceene, yooreerexa memmo anrowa aya opuhaka alamuleliwaka ni Omwene wa Yehova. Esaalimu 72:16, enihimya so: “Elapo enooruwerya ipyo sinceene, vasulu va miyaako sinoosareya ipyo”. Niireke munnilipelela ni murima anyu wootheene okathi munrowa anyu waapeyaka eyoolya anyu enoosivelani vanceene? Nave-tho, munnilipelela okathi munrowa anyu ophatteyaka miri sanyu ni olya mihokorokho saya. (Yes. 65:21, 22) Atthu ootheene a valaponi, anrowa ottottelaka mureerelo mareeliho awo a Yehova.

15. Ale anrowa ohihimuxiwa, anrowa wiixuttihiwaka exeeni? (Yohani 6:35)

¹⁵ Mmusome Yohani 6:35. Exeeni enrowa owiiraneela atthu ale yaakhurale ephaawu ni ihopa Yesu aakumihenrye awe? Hata ale yahaamwaamini Yesu, akina a yaawo anoorowa ohihimuxiwa. (Yoh. 5:28, 29) Atthu awo, anoorowa osuwela yootaphulela ya masu a Yesu ani: “Miyo ka ephaawu ya okumi. Ole onirwa wa miyo, khonrowa ovoliwa-tho etala”. Awo anrowa opirisariki waamini mukuttho wa Yesu, eyo piiyo, waamini wiira owo oovaha okumi awe wiira owoopole. Nto ale anrowa ohihimuxiwa vamosa ni anamwane anrowa oyariwaka elapo esya, anrowa wiixuttaka voohimya sa Yehova ni ele oniphavela awe. Tthiri waakhaliherya atthu awo okhalana waataana wooloka ni Yehova, enrowa okhala etthu yoohakalaliha vanceene ovikana okhuura ephaawu yoosiva elapo eyo esya.

16. Mwaha onittharela ninrowa othokorerya exeeni?

¹⁶ Mwaha ola, noothokorerya soowiiraneya vakhaani siri Yohani ekapiitulu 6, masi Yesu aahikhalana itthu sinceene wiira iixuttihe voohimya sa “okumi woohimala”. Ayuda ale Yesu aalavulana awe, yaahaana ovaha ephoole ele aahimya awe. Nave-tho etthu emosa-ru enniiraneya ni hiyo olelo-va. Mwaha onittharelana, nnoorowa otthikela othokorerya ekapiitulu 6 ya Yohani.