Ninrowa Otakiha Sai Olevelela wa Yehova?

1-2. a) Okathi xeeni nnoona ahu okhala vooxankiha omulevelela mutthu mukina? b) Moota xeeni Denise oonihenrye awe olevelela?

NIIREKE vannooxankihani waalevelela atthu akina? Anamunceene a hiyo vanninixankiha omulevelela mutthu olavunle aahiiso opanke etthu eniwereyale. Tivonto, sookhala itthu ninrowa ahu othokorerya sinrowa onikhaliherya ohiya okhala ooriipiwa murima ni owerya waalevelela atthu akina. Mwa ntakiheryo, nrowe nthokorerye yoowiiraneya ya murokora mmosa oniitthaniwa Denise,a yoowo oonihenrye olevelela weekeekhai. Mwaakha wa 2017, Denise ni emusi awe, yaahixukurya Eseedi ya Olumwenku Wootheene ya Anamoona a Yehova, yeeyo yiinakurariwe niinano. Nto okathi yaakhuma aya oseedi erowaka owaani, yaahimwiira asitenti. Ekaaro ya Denise ni emusi awe yaahimaniwa ni ekaaro ekina yeettihiwa ni mutthu yahaamusuwela aya. Denise aahitismayari mwaha wa asitenti ole. Nto okathi aavennye awe, owo aahoona wiira anaawe yaahivulalasa vanceene, nave iyawe aihaniwa Brian, aahikhwa. Uupuwelelaka itthu saamwiranenle okathi ole, Denise onihimya so: “Kaahiriipiwa murima vanceene ni oxanka”. Muhoolo mwaya, aahisuwela wiira mulipa-aamukumihenrye asitenti ole, khahiyo aavara itthu sikina saamuxeleliha. Nuumala osuwela eyo, Denise aahinvekela Yehova wiira omukhaliherye okhalana murettele.

² Mulopwana ole, aahitthukweliwa olipelelaka ophukiwa mulattu awe mwaha wa omwiiva mutthu. Nto vaakhanle wiira aahiphwanyiwa orina ene nthowa mwaha wa asitenti ole, owo aamulamuliwa otthukiwa. Masi alipa-oophuka mulattu, yaahimuleela Denise wiira mulopwana ole aamulamuliwa otthukweliwa aahiiso ohitthukweliwa moovarihana ni etthu aarowa awe ohimya okathi waarowa aya ophukiwa mulattu ole. Denise onihimya so: “Vaakhala ntoko wiira mutthu mukina iitthenle maakha vanikhwattani vaka, nto kinoona owereya vanceene, maana eyo yaahikiiriha wuupuwela itthu sootheene siiraneyale okathi ole wooxankiha wa mookumini mwaka”. Isumana vakhaani muhoolo mwaya, Denise aari otiripunaali ni iilokiheryaka wiira alavule ni motorista ole aakumihenrye mixankiho emusi awe. Exeeni Denise aahimmye awe? Owo aahinvekela mulipa-oophuka mulattu ole, wiira omulevelele motorista ole.b Nto okathi Denise aamalinhe awe olavula, mulipa-aaphuka mwaha ole aahipacerya wunla. Owo onihimya so: “Kooviriha iyaakha 25 kivaraka muteko ola, masi nkinawehe mwaha ntoko ola. Miyo nkinawehe emusi ekumiheriwe asitenti, evekelaka wiira mulipa omukumihenrye omoreliwe ikharari. Nave nkitonko wiiwa moolumo oophenta ni oolevelela ntoko a Denise”.

3. Exeeni yaamukhalihenrye Denise omulevelela mulopwana ole?

³ Exeeni yaamukhalihenrye Denise omulevelela mulopwana ole? Mwaha woowi owo aanuupuwelela olevelela wa Yehova. (Mik. 7:18) Nto vakhala wiira ninnixukhurela moota Yehova onnilevelela awe, eyo enooniiriha waalevelelaka atthu akina.

4. Exeeni Yehova oniphavela awe? (aEefeso 4:32)

⁴ Yehova oniphavela wiira naaleveleleke atthu akina ntoko yena onnilevelela awe. (Mmusome aEefeso 4:32.) Nave owo oniphavela wiira naaleveleleke ale annitthekela. (Esal. 86:5; Luka 17:4) Mwaha ola nnooweha itthu tthaaru sinrowa onikhaliherya okhala oolevelela.

MUTHOKORERYEKE MIYUUPUWELO SANYU

5. Moovarihana ni Miruku 12:18, ninkhala sai okathi mutthu mukina onnitthekela awe?

⁵ Hiyo ninniriipiwa murima vanceene vaavo mutthu mukina onilavula awe aahiiso opaka etthu eniwereyale, otepexa wene akhala wiira mutthu owo mpatthani ahu wala mmusi a vatthokoni vahu. (Esal. 55:​12-14) Ikwaha sikina owereya nnoona ahu, vanoolikana ni ohommwa ni mwaalo. (Musome Miruku 12:18.) Woonasa wene, hiyo pooti wiimananiha ohicala aahiiso wooniheryaka wiira etthu ele kheniwereyale. Masi opaka eyo, pooti olikanaka ni mutthu mukina onihomme ene ni mwaalo nto mwaalo owo nihiya vanikhwattani vaavo. Moolikanasa, vakhala wiira nnoothererya wiira noolevelela, nihuupuweleke wiira oriipiwa wahu murima onoovira.

6. Nnoonela sai okathi mutthu mukina onnitthekela awe?

⁶ Okathi mutthu mukina onnitthekela awe, woonasa wene muupuwelo ahu woopacerya pooti okhala onanariwa ni mutthu owo. Biibiliya onnooniherya wiira ikwaha sikina khahiyo vootthekeya onanariwa. Masi onninlopola wiira nihihiye muupuwelo owo woohiloka onixinttaka. (Esal. 4:4; aEef. 4:26) Mwaha wa xeeni? Mwaha woowi miyuupuwelo iyo, pooti oniiriha opaka itthu soohiloka. Onanariwa, khonniiriha opaka itthu sooloka. (Yak. 1:20) Muhiliyale wiira onanariwa etthu eniiraneya masi othipelela onanariwa yoothanla ya khula mutthu.

7. Miyuupuwelo xeeni nikhanle ahu ookhalana, okathi mutthu onnitthekela awe?

⁷ Okathi mutthu mukina onnithokorerya awe moohixariya, hiyo pooti okhalanaka miyuupuwelo sikina soohiloka. Mwa ntakiheryo, murokora mmosa oniitthaniwa Ann, onihimya so: “Okathi kaari aka mwaana, paapa aka aahimwalana ni maama aka ni omuthela muthiyana yaanvekenle aya wiira okikhapeleleke. Miyo kaaniixoona ntoko mwaana oonyanyaliwa. Muhoolo mwaya, awo yaahaayarasa anamwane, nto miyo nkaixoona okhala mwaana a vatthokoni vale. Miyo kannunwe kiixoonaka okhala mwaana ohiniphaveliwa”. Murokora oniitthaniwa Georgette, onnihimya moota aariipiwe awe murima nuumala iyawe oraruwa ni muthiyana mukina. Owo onihimya so: “Miyo ni iyaka naari apatthani okhuma enamwane ahu. Nave naarumeela hoothe muteko wa opioneero! Nto nuumala okiraruwela eyo yaahikiwereya vanceene ni naahimwalana”. Nave murokora oniitthaniwa Naomi, onihimya so: “Miyo nkaatonko wuupuwela wiira iyaka ampaka etthu yaarowa okinyoonyiha. Okathi aakisuwelinhe awe wiira aaniweha epornokrafia ni aapaka eyo voohisuweliwa, kaahiriipiwa murima ni nkaamuroromela-tho”.

8. a) Xeeni ninreerela ahu waalevelela atthu akina? b) Mireerelo xeeni nimphwanya ahu mwaha wa waalevelela atthu akina? (Nwehe ekaaxa eni: “Vakhala Wiira Noonyoonyihiwa ni Mutthu Mukina”.)

⁸ Hiyo khaninwerya waakhoottiherya atthu akina itthu annihimeerya aya aahiiso annipakela aya. Masi nnoowerya okhapelela moolumo ahu. Nto ikwaha sinceene etthu ekhanle ahu oopaka ori waalevelela. Mwaha wa xeeni? Mwaha woowi ninnimphenta Yehova nave owo oniphavela wiira naaleveleleke atthu akina. Nto akhala wiira khaninhiya onanariwa ni khinnaalevelela, eyo pooti oniiriha opaka soothanla soohiloka ni wiihaaxa. (Mir. 14:17, 29, 30) Nkawehani ele onihimya awe murokora oniitthaniwa Christine. Owo onihimya so: “Okathi kininyoonyihiwa aka aahiiso kiniriipiwa aka murima, nkinitheya vanceene, nkiniwerya olya saana ni nkinrupa vanceene. Nto vannikivila okhapelela miyuupuwelo saka, nave eyo ennikumiherya mixankiho ekasamento aka, ohela muhina waataana waka ni atthu akina”.

9. Xeeni ninreerela ahu ohiya onanariwa?

⁹ Hata mutthu ole onitthekenle ohinivekelaka muswammaha, hiyo pooti opaka etthu wiira nihitepe oxanka. Moota xeeni? Georgette, yoowo nimulavunle ahu ittima sivinre, onihimya so: “Nnaamwi vahaakhweyale, nuuvira okathi kaahihiya onyoonyiheya ni ole aakithenle, nto eyo yaahikiiriha okhalana murettele”. Okathi ninhiya ahu onanariwa, eyo enniniiriha osyaka miyuupuwelo soohiloka saakhanle oowaakumiherya mixankiho atthu akina. Nave vakhala wiira khanimpweha mathowa vamurimani, hiyo nnoophwanya murettele ni okhalana okumi woohakalaliha. (Mir. 11:17) Masi ankhi vakhala wiira nyuwo khamuniwerya olevelela?

MUHIYEKE ONANARIWA

10. Xeeni nimpirisari ahu oviriha okathi wiira nixintte onanariwa? (Nwehe ifootu.)

¹⁰ Exeeni mukhanle anyu oopaka wiira muhiye onanariwa? Pooti ovira okathi wiira nihiye onanariwa. Mwa ntakiheryo, mutthu ovulanle pooti ovira okathi wiira makhwatta awe evole. Mwa enamuna emosa-ru, hiyo pooti oviriha okathi munceene wiira nixintte onanariwa aahiiso miyuupuwelo soohiloka, nihinatthi omulevelela mutthu owo ni murima wootheene. — Mus. 3:3; 1 Ped. 1:22.

11. Ovekela onrowa wookhaliheryani sai okhala oolevelela?

¹¹ Munvekeleke Yehova wiira ookhaliheryeni okhala mutthu oowaakuva olevelela.c Ann, nimulavunle ahu ittima sivinre, onnitthokiherya moota ovekela waamukhalihenrye aya. Owo onihimya so: “Miyo kaahinvekela Yehova wiira omulevelele khula mutthu a emusi aka, mwaha wa itthu soohiloka aalavunle awe aahiiso aapanke awe. Nuumala-vo, kaahilepa ekarta para apaapa ni amwaara aya kaaleelaka wiira kahaalevelela mwaha wa itthu yaapanke aya”. Ann, onihimya wiira opaka eyo khivaakhweyale. Owo onitthokiherya-tho so: “Miyo kinnilipelela wiira mwaha wa otakiha olevelela wa Yehova, eyo enoowiiriha apaapa ni amwaaraya opacerya wiixutta voohimya sa Yehova”.

12. Xeeni ninreerela ahu omuroromelaka Yehova ohiya miyoonelo sahu? (Miruku 3:​5, 6)

¹² Mmuroromeleke Yehova, ohiya ororomela osuwela wanyu. (Musome Miruku 3:5, 6.) Khula okathi, Yehova onnisuwela itthu sooloka para hiyo. (Yes. 55:8, 9) Owo khonikhala-khala opakaka etthu ekhanle oonikumiherya mixankiho. Nto mukupaliki wiira okathi onnitumererya awe okhala atthu oolevelela, eyo etthu enrowa oniphwanyiha mireerelo. (Esal. 40:4; Yes. 48:17, 18) Nto vakhala wiira nnoororomelaka miyuupuwelo sahu, hiyo pooti ohiwerya waalevelela atthu akina. (Mir. 14:12; Yer. 17:9) Naomi, nimulavunle ahu ittima sivinre, onihimya so: “Waanipacerya, kuupuwela wiira kaahikhalana erasau wiira kihaalevelele aiyaka mwaha wooweha epornokrafia. Miyo kuupuwela wiira kaalevelela, yaamutthikela okinyoonyiha-tho aahiiso yaamuliyala etthu ele yoohiloka yaakipakenle aya. Miyo kaanoona wiira Yehova aanisuwela mixankiho saka. Nave, kaahipacerya woona wiira hata Yehova osuwelaka moota kaariipiwaka murima, eyo khiyaataphulela wiira yena aaneemererya ele kuupuwelaka opaka. Yehova onnisuwela moonelo aka ni onnisuwela wiira onnivira okathi wiira muupuwelo woohiloka omala-male. Masi hata vari siiso, owo oniphavela wiira kaaleveleleke atthu akina”.d

MOOTA WOOKHALANA MIYUUPUWELO SOOLOKA

13. Moovarihana ni aRoma 12:​18-21, etthu xeeni ninreerela ahu opaka?

¹³ Okathi nimmulevelela ahu mutthu onitthekenle vanceene, hiyo nihaana opaka itthu sikina ohiya paahi osyaka olavula itthu onipakenle awe. Akhala wiira mutthu onitthekenle munna aahiiso murokora, hiyo nihaana wiimananiha okhaliha murettele. (Math. 5:23, 24) Nto nihaana wiimananiha orantteliha onanariwa ni othunku, opweha mathowa vamurimani ni olevelela. (Mmusome aRoma 12:18-21; 1 Ped. 3:9) Exeeni enrowa onikhaliherya opaka eyo?

14. Etthu xeeni ninreerela ahu wiimananiha opaka ni mwaha wa xeeni?

¹⁴ Hiyo nihaana wiimananiha omuthokorerya mutthu onitthekenle ntoko Yehova onimuthokorerya awe. Yehova oniwehexexa mikhalelo sooloka mutthu orina awe ohiya soohiloka. (2 Wah. 16:9; Esal. 130:3) Okhala wene, mutthu omphavelasa etthu onniphwanya: Sikhale itthu sooloka aahiiso soohiloka. Nto vakhala wiira nnoowehexexaka mikhalelo sooloka sa atthu akina, vanookhweyaka waalevelela. Mwa ntakiheryo, munna oniitthaniwa Jarrod, onihimya so: “Miyo onnikikhweela omulevelela munna, vakhala wiira kinnilikanyiha itthu okipakenle awe ni elista ya itthu sooloka onipaka awe”.

15. Xeeni vari aya va faita omuleela mutthu onitthekenle wiira kihoolevelelani?

¹⁵ Etthu ekina ya efaita ninreerela ahu opaka, ori omuleela mutthu owo wiira noomulevelela. Mwaha wa xeeni? Nwehe etthu Naomi, yoowo nimulavunle ahu waanipacerya onihimya awe: “Iyaka aahikikoha vakhala wiira kaahimulevelela. Okathi kaaphavela aka omuleela wiira koomulevelela, miyo nkaawerya. Nto kaahoona wiira nkaamulevelenle iyaka ni murima wootheene. Ovinre ene okathi, kaahiwerya omuleela moolumo ala oovara murima, ani: ‘Kihoolevelelani’. Nto nuumala omulevelela iyaka, owo aahipacerya wunla ni kaahitikinihiwa oweha wiira moolumo aka yaahimwiiriha iyaka ohakalala. Nave eyo yaahikikhaliherya okhalana murettele, omuroromela, nto nenna-va nootthikela okhala apatthani ooloka”.

16. Etthu xeeni mwiixuntte anyu voohimya sa olevelela?

¹⁶ Yehova oniphavela wiira naaleveleleke atthu akina. (aKol. 3:13) Hata vari siiso, pooti onivilaka waalevelela atthu akina. Masi nnoowerya, vakhala wiira nnoosyaka miyuupuwelo soohiloka ni wiimananiha osyaka onanariwa. Napaka eyo, nnookhalana miyuupuwelo sooloka ni moonelo wooloka. Nwehe ekaaxa eni: “Itthu Tthaaru Sinrowa Onikhaliherya Waalevelela Atthu Akina”.

MAREELIHO ANIKHUMELA MWAHA WOOKHALA ATTHU OOLEVELELA

17. Mareeliho xeeni nimphwanya ahu mwaha wa okhala atthu oolevelela?

¹⁷ Nookhalana mathowa manceene, anniiriha waalevelela atthu akina. Nrowe nithokorerye mathowa ene. Noopacerya, okathi ninlevelela ahu ninnimutakiha Tiithi ahu oomoriwa ikharari, Yehova. (Luka 6:36) Na nenli, ninnooniherya oxukhurela wahu enamuna Yehova onnilevelela awe. (Math. 6:12) Ni na neeraru, ninnikhalana okumi wooloka, nave opatthani ahu ni atthu akina onnilipa.

18-19. Exeeni eniiraneya okathi nnaalevelela ahu atthu akina?

¹⁸ Okathi nnaalevelela ahu atthu akina, sinnikhumelela itthu sooloka nahaalipelela ahu. Mwa ntakiheryo, nwehe etthu yiiraneyale ni Denise, nimulavunle ahu wanipacerya. Denise, khaasuwela wiira mulopwana ole aamukumihenrye asitenti, aaphavela wiixiiva nuumala ophukeliwa. Masi mulopwana ole, aahitikinihiwa vanceene ni olevelela wa Denise. Mwaha wa yeeyo, owo aahipacerya omusoma Biibiliya ni Anamoona a Yehova.

¹⁹ Hiyo pooti wuupuwelaka wiira omulevelela mutthu mukina, ti vootepa oxankiha. Masi olevelela, pooti okhala yoothanla yootepa ohakalaliha. (Math. 5:7) Nto nihaana wiimananiha opaka sootheene ninwerya ahu, wiira nitakihe oolevelela wa Yehova.