Mutakiheke Enamuna Yehova ni Yesu Anuupuwela Aya

1-2. Omphenta Yehova onihela muhina exeeni, nave Yesu oonihenrye sai eyo?

YESU aahitthokiherya tiivi yaari yooruma yuulupale ya Nlamulo aavahiwa awe Moise oriki: “Mumphenteke Yehova Muluku anyu ni murima anyu wotheene, ni okumi anyu wotheene, ni ikuru sanyu sotheene ni muupuwelo anyu wotheene”. (Luka 10:​27) Moone wiira omphenta wahu Yehova, onihela muhina murima ahu, itthu nimphavela ahu, moonelo ni muupuwelo ahu. Nave eyo, enihela muhina omukokhorela ni murima ahu ni ikuru sahu sootheene. Ohiya-vo, omphenta Yehova, onnivarihana ni muupuwelo ahu, eyo piiyo, enamuna nnuupuwela ahu. Ekeekhai wiira, khaninwerya osuwela voomalela muupuwelo wa Yehova. Masi nnoowerya osuwela oratteene muupuwelo wa Yehova, vakhala wiira nnoosuwela toko oratteene “muupuwelo wa Kristu”. Yesu aanisuwela oratteene muupuwelo wa Tiithi awe ni aanitakiha voomalela. — 1 aKor. 2:16.

² Yesu aanimphenta Yehova ni muupuwelo awe wootheene. Owo aanisuwela etthu Muluku aaphavela awe wiira opakeke, ni aari oolikana ene opaka eyo hata saarowa omphwanya mixankiho. Etthu Yesu aaphavela awe, yaari omuhakalaliha Tiithi awe. Tivonto, owo kheemerenrye etthu nnakhala mutthu omukhoottiheryaka opaka eyo.

3. Eparakha xeeni Pedru aarina awe ni etthu xeeni aatumerenrye awe makristau opaka? (1 Pedru 4:1)

³ Pedru ni arummwa akina, yaahikhalana eparakha ya oviriha okathi munceene ari ene ni Yesu, yiixuttaka enamuna Yesu uupuwela awe. Okathi Pedru aalempe awe ekarta awe yoopacerya, owo aahaatumererya makristau olokiherya muupuwelo aya ntoko Kristu, eyo piiyo, wuupuwela ntoko Yesu. (Mmusome 1 Pedru 4:1.) Pedru aahirumeela nuulumo naarumeeliwa ni atoropa vaavo aahimmye awe so: “Mwiilokiherye”. Nto vakhala wiira makristau anookhalana muupuwelo ntoko wa Yesu, anoowerya oxintta soophavela soohiloka ni anooxintta olumwenku wa Satana. — 2 aKor. 10:​3-5; aEef. 6:12.

4. Mwaha ola ninrowa othokorerya exeeni?

⁴ Mwaha ola, nnoorowa oweha iponto tthaaru: 1) Moota nikhanle ahu oowiixutta wuupuwela ntoko Yehova, yoowo onrowa onikhaliherya okhalana muupuwelo wooloka, 2) wiiyeviha ni 3) okhalana muupuwelo wooloka nimuroromelaka Yehova ni ovekela. Wiira niwerye opaka eyo, nrowe nithokorerye enamuna Yesu uupuwela awe ni moota nikhanle ahu ootakiha.

MUUPUWELEKE NTOKO YEHOVA ONUUPUWELA AWE

5. Okathi xeeni Pedru ahaatthanre awe moonelo wa Yehova?

⁵ Okathi omosa, Pedru aahikhalana moonelo woovirikana ni wa Yehova. Yesu aahaaleela arummwa awe wiira aarowa oYerusalemu weiwo ahooleli a itiini yaarowa aya omutthukwa, omuhaaxa ni omwiiva. (Math. 16:​21) Pedru aanisuwela wiira Yesu aari Mesiya aaleiheriwe, yoowo aarowa owoopola atthu a Muluku. Owo vaaninvila okupali wiira Yehova aaheemererya wiira mwanawe ohaawe mpakha okhwa. (Math. 16:​16) Pedru aahimwiitthana Yesu onamuleela so: “Pwiya, mwiireerele murima. Itthu iyo khasinrowa wookhumelelani nnakhala vakhaani”. (Math. 16:​22) Yesu kheemerenrye eyo, mwaha woowi Pedru khaarina muupuwelo wa Yehova.

6. Yesu oonihenrye sai wiira aanitakiha moonelo wa Yehova?

⁶ Yesu aanitakiha voomalela moonelo ni muupuwelo wa Tiithi awe. Ti maana aya aamulenle awe Pedru wiira: “Mukhume ohoolo waka, Satana! Nyuwo mwa nluku ninkikwattuliha, maana murina miyuupuwelo sa apinaatamu, ohiya sa Muluku”. (Math. 16:​23) Yesu aahikhootta miruku sa Pedru nnaamwi woonasa wene, owo aamananiha omukhaliherya. Maana Yesu aanisuwela wiira Yehova khaaphavela wiira yena iisuupuweleke mmensawe paahi. Okathi ole, Pedru aahiixutta wiira aanipirisari okhalana muupuwelo ntoko wa Muluku. Nave eyo ti etthu hiyo nniixuttiha ahu.

7. Moota xeeni Pedru aalokihenrye awe muupuwelo awe wiira olikaneke ni wa Yehova? (Nwehe eteseenyu ya vakaapani.)

⁷ Nuuvira okathi, Pedru aahooniherya wiira aaniphavela wiixutta wuupuwela ntoko Yehova onuupuwela awe. Eyo yaahooneya nuumala ophiya okathi wiira ale yahaakhanle ayuda, yiireleke mpantta emusi ya Muluku. Yehova aahimuruma Pedru orowa omulaleerya Kor­neelio wiira okhale mukristau, nnaamwi ahaakhanle muyuda. Ayuda yaanaathanya ale yahaakhanle ayuda. Nto Pedru aanipirisari oturuka enamuna uupuwela awe. Nuumala Yehova omukhaliherya Pedru osuwela ele aaphavela awe, Pedru aahituruka moota aawoonela awe ale yahaakhanle ayuda ni aahirowa omuxukurya Korneelio ‘ohihoveryaka etthu’. (Mit. 10:​28, 29) Moohakalaliha, Pedru aahirowa omulaleerya Korneelio ni atthu ootheene a vatthokoni vawe, nto ootheene aya yaahipatisiwa. — Mit. 10:​21-​23, 34, 35, 44-​48.

8. Ninrowa wooniherya sai wiira ninnitthara moonelo wa Yehova? (1 Pedru 3:8)

⁸ Nuuvira iyaakha, Pedru aahaatumererya makristau okhala atthu ‘oowiiwanana’, aahiiso okhalana muupuwelo mmosa-ru. (Mmusome 1 Pedru 3:8.) Hiyo nnoowerya okhalana muupuwelo mmosa-ru ni anna ni arokora, akhala wiira nnookhalana muupuwelo wa Yehova yoowo nniixutta ahu mbiibiliyani. Mwa ntakiheryo, Yesu aahaatumererya awiixutti awe ohela nipuro noopacerya Omwene wa Muluku mookumini mwaya. (Math. 6:​33) Nuupuwelelaka eyo, munna aahiiso murokora a muloko ahu, pooti othanla orumeela ntoko pioneero aahiiso ovara muteko mukina wa Muluku wa okathi wootheene. Khanikhanle oolavula aahiiso opaka etthu, ekhanle oomukhulumula aahiiso omwiiriha wiixinnuwiha munna wala murokora owo. Ohiya opaka eyo, nihaana onvaha malakiheryo anrowa omukhaliherya omaleliha yoothanla awe.

MWIIYEVIHEKE

9-10. Yesu oonihenrye sai wiira toowiyeviha?

⁹ Ohiyu ole aarowa awe wiiviwa, Yesu aahimwiixuttiha Pedru ni arummwa akina, efaita erina aya wiiyeviha. Nto okathi vakhaani waavinre, Yesu aahimuruma Pedru ni Yohani wiira yalokiherye eyoolya ya Paasikha. Etthu emosa arummwa ale yaarowa aya opaka, waari oruuha epasiya ni etuwalya wiira mutthu orapiheke inawu sa arummwa akina ahinatthi olya. Masi tani aarowa wooniherya wiiyeviha orapihaka inawu sa arummwa akina?

¹⁰ Yesu khuulelinwe muru ovara muteko ole, owo aahooniherya wiira aari oowiiyeviha. Arummwa ale, yaahitikinihiwa vanceene okhala wiira muteko ole wa orapiha inawu, okhala wene, waavariwa ni ipottha. Biibiliya onihimya wiira Yesu aahirula nlaya nawe, aahikuxa etuwalya otthukwelela muyuununi mwawe, aahiitthela maasi mpasiyani ni onapacerya orapiha inawu sa awiixutti awe. (Yoh. 13:​4, 5) Yesu aahirapiha inawu sa arummwa awe 12, omuhela muhina Yuda yoowo muhoolo mwaya anvarinhe. Woonasa wene, waahivira okathi munceene Yesu ovaraka muteko ole, masi moowiiyeviha owo aahimaliha. Nuumala-vo, moopixa murima Yesu aahaatthokiherya oriki: “Nyuwo munnisuwela etthu ewiirenlyaakani? Nyuwo munnikihimya okhala ‘Mwiixuttihi’ ni ‘Pwiya’, nto enihimya anyu ekeekhai. Tthiri miyo ka Mwiixuttihi ni Pwiya. Tivonto, akhala wira miyo, kiri Pwiya ni Mwiixuttihi, koorapiha inawu sanyu, nyuwo-tho muhaana orapihanaka inawu”. — Yoh. 13:​12-​14.

11. Pedru oonihenrye sai wiira aahiixutta okhala mutthu oowiiyeviha? (1 Pedru 5:5) (Nwehe eteseenyu.)

¹¹ Pedru aahiixutta etthu ni wiiyeviha wa Yesu. Nuumala Yesu otthikela wiirimu, Pedru aahipaka mwiiriirya mmosa. Owo aahimpenuxa mulopwana aayariwe oorakala ene. (Mit. 1:​8, 9; 3:​2, 6-8) Muttitthi muulupale wa atthu, waahiweha mwiiriirya ole ni waahimurukurerya murummwa Pedru. (Mit. 3:​11) Masi Pedru khaaphavela ovuwihiwa ni atthu ale, hata aahuuwale eriyari ya atthu yaavaha efaita yinceene efaama aahiiso okhulupale. Ohiya opaka eyo, Pedru aahiiyeviha ni aahaaleela atthu ale wiira anvuwiheke Yehova ni Yesu, ohimyaka wiira: “Mwa nsina na Yesu, ni mwaha woowi hiyo ninnaamini nsina nawe, metto sa mulopwana ola munimoona anyu ni munimusuwela anyu, soolipihiwa”. (Mit. 3:​12-​16) Ekarta emosa aaroihenle awe makristau, Pedru aahaatumererya okhala atthu oowiiyeviha. Nto eyo enninuupuxerya okathi yoole Yesu oonihenrye awe wiiyeviha, okuxaka etuwalya wiira orapihe inawu sa awiixutti awe. — Mmusome 1 Pedru 5:5.

12. Sintoko Pedru, ninrowa ohihiya sai okhala atthu oowiiyeviha?

¹² Nnoowerya otthara ntakiheryo na Pedru, nihihiyaka okhala atthu oowiiyeviha. Muhiliyale ela: Wiiyeviha weekeekhai, khahiyo paahi olavula moolumo ooloka. Maana nuulumo Pedru orumenle awe noowi “wiiyeviha”, nin­hela muhina muupuwelo ahu ni moota ninwoonela ahu atthu akina. Ninniwiirela itthu sooreera atthu akina mwaha woowi ninnimphenta Yehova ni atthu, ohiya mwaha woophavela wooniwa. Hiyo ninnooniherya wiira naatthu oowiiyeviha mweekeekhai, vaavo nim­murumeela ahu Yehova ni waapakela itthu sooreera anna ni arokora, hata atthu akina ahisuwelaka itthu nipanke ahu. — Math. 6:​1-4.

“MUKHALANEKE MUUPUWELO WOOLOKA”

13. ‘Okhalana muupuwelo wooloka’, onihela muhina exeeni?

¹³ Exeeni enihela muhina ‘okhalana muupuwelo wooloka’? (1 Ped. 4:7) Mukristau orina muupuwelo wooloka, onnipaka khula etthu oniwerya awe, wiira opake soothanla sooloka sinivarihana ni ele Muluku oniphavela awe. Owo onnisuwela wiira, khiivo etthu erina efaita yuulupale enivikana waataana wawe ni Yehova. Ohiya-vo, owo onnirekonyeseri wiira khonisuwela itthu sootheene. Mutthu orina muupuwelo wooloka, onnimuroromela Yehova nave okathi wootheene onnitthara malakiheryo a Yehova.a

14. Okathi xeeni Pedru ahaamuroromenle awe Yehova?

¹⁴ Ohiyu omosa ohinatthi wiiviwa, Yesu aahaalopola atthareli awe, ohimyaka wiira: “Ohiyu ola otheene anyu munookikhootta”. Okhala wiira Pedru aaniiroromela vanceene, owo aakhunle so: “Hata otheene yoohiyakani, miyo nkinoohiyani!” Ohiyu ene yoole, Yesu aahaavaha miruku awiixutti awe akina ohimyaka so: “Muthipeleleke owehaweha, nvekeleke voohihiyererya”. (Math. 26:​31, 33, 41) Vaakhanle wiira Pedru aahitthara miruku iye, woonasa wene, moolipa murima aamuhimya wiira aari mutthareli a Yesu. Masi owo aahimukhootta Pwiya awe, nuumala vo, aahiriipiwa murima mwaha wa etthu aapanke awe. — Math. 26:​69-​75.

15. Etthu xeeni yaamukhalihenrye Yesu, ohihiya okhalana muupuwelo wooloka ohiyu wookiserya ohinatthi wiiviwa?

¹⁵ Yesu aanimuroromela voomalela Yehova. Nnaamwi aari oohittheka, owo aahivekela ikwaha sinceene ohiyu ole ohinatthi wiiviwa. Eyo yaahimwiiriha olipa murima, wiira opake ele Yehova aaphavela awe. (Math. 26:​39, 42, 44; Yoh. 18:​4, 5) Moohaanyiherya, Pedru khaaliyanle moota Yesu ahaareere awe ovekela ohiyu ole aarowa awe wiiviwa.

16. Exeeni ennikupaliha wiira Pedru aahikhalana muupuwelo wooloka? (1 Pedru 4:7)

¹⁶ Nuuvira okathi, Pedru aahooniherya wiira aanimuroromela Yehova ovekelaka malakiheryo awe. Nuumala Yesu ohihimuxiwa, owo aahimuleiherya Pedru ni arummwa akina wiira yaamwaakhela munepa woowaarya, wiira ahihiye olaleya ihapari sooreera. Masi Yesu aahaavekela wiira ahale oYerusalemu, mpakha waakhela owerya onikhuma wiirimu. (Luka 24:​49; Mit. 1:​4, 5) Olipelelaka wiiraneya eyo, etthu xeeni Pedru aapaka awe? Owo ni anna akina, “yaanikhalela nthiti ovekela”. (Mit. 1:​13, 14) Muhoolo mwaya, ekarta awe yoopacerya, Pedru aahaatumererya makristau okhala atthu arina muupuwelo wooloka ni khula okathi avekeleke malakiheryo a Yehova. (Mmusome 1 Pedru 4:7.) Pedru aahiixutta omuroromela Yehova, ni aanaakhaliherya vanceene anna ni arokora. — aGal. 2:9.

17. Moohicikha itthu ninsuwela ahu opaka, etthu xeeni nimpirisari ahu ohihiya opaka? (Nwehe efootu.)

¹⁷ Moohicikha itthu ninwerya ahu opaka, wiira nikhalane muupuwelo wooloka, nihaana ohihiya onvekela Yehova. Vaavo nimpaka ahu soothanla sirina efaita yuulupale, ninvekeleke Yehova malakiheryo awe niroromelaka wiira owo onnisuwela etthu eri yooloka para hiyo.

18. Ninrowa omutakiha sai Yehova?

¹⁸ Ti voohakalaliha, osuwela wiira Yehova onipattunxe wiira niweryeke otakiha mikhalelo sawe! (Maph. 1:​26) Ekeekhai wiira khaninwerya omutakiha Yehova moomalela. (Yes. 55:9) Ntoko Pedru, nimphavela wiira khula okathi nikhalaneke moonelo wa Yehova, niiyeviheke ni nikhalaneke muupuwelo wooloka.