Mukhaleleke Nthiti Olaleerya Ntoko Yesu

1. Etthu xeeni enaavirikanyiha ale animurumeela Yehova naale aniihimya okhala makristau?

OKHALELA NTHITIa muteko woolaleerya, toniwiiriha Anamoona a Yehova ovirikanaka ni atthu akina aniihimya okhala makristau. (Tito 2:14) Masi ikwaha sikina, pooti woonyoonyakani orowa olaleerya. Nave woonasa wene, murina moonelo mmosa-ru yoowo orina awe mutokweene mmosa, yoowo onikhalela nthiti olaleerya. Owo ohimmye so: “Wookhala okathi onikinyoonya aya olaleerya”.

2. Xeeni ikwaha sikina vanikhala aya voovila okhalela nthiti muteko woolaleerya?

² Hiyo pooti osiveliwaka ovara miteko sikina sa Yehova, masi olaleerya onaninyoonya. Xeeni eyo eniiraneya aya? Okathi ninteka ahu aahiiso olokiherya Empa ya Omwene ni waakhaliherya anna ni arokora aphwanyiwe ihasara, ninnihakalala okhala wiira ninniweha moowaakuveya mareeliho anikhumelela mwaha wa wiimananiha wahu. Nave okathi ninvara ahu ni anna ni arokora, ninnikhalana murettele ni ninniphentana mukina ni mukhwaawe. Ohiya-vo, ninnisuwela wiira anna ni arokora annixukhurela muteko ninvara ahu. Moovirikana ni vo, pooti wiira noolaleerya muttetthe mmosa ikwaha sinceene, masi atthu vakhaani paahi taniphavela owiriyana muhupi ninlaleya ahu. Nave-tho, ninnisuwela wiira vaavo nnaattamela ahu wanikisa wa olumwenku ola wootakhala, atthu anrowa otepaka onilupattha. (Math. 10:22) Exeeni enrowa onikhaliherya ohihiya okhalela nthiti olaleerya?

3. Moovarihana ni Luka 13:​6-9, nniixutta exeeni ni moota Yesu aakhalela awe nthiti muteko woolaleerya?

³ Nnoowerya wiixutta etthu ni ntakiheryo na Yesu na moota wookhalela nthiti muteko woolaleerya. Okathi aari awe valaponi, Yesu aanikhalela nthiti waalaleerya atthu ihapari sooreera. (Mmusome Luka 13:​6-9.) Yesu aahilikanyiha muteko awe woolaleerya, ni mulopwana mmosa aaphatteiye mwiri wa efiiku ematta awe ya ewuuva. Mulopwana owo aahiviriha iyaakha tthaaru okhapelelaka mwiri ole wahiima. Mwa enamuna emosa-ru, Yesu aahiviriha iyaakha tthaaru aalaleeryaka ayuda. Masi anamunceene a yaawo khiyeemerenrye muhupi aalaleya awe. Ntoko siisaale mulopwana ole ahaanyanyanle awe mwiri ole wa efiiku, nave-tho Yesu khaahiyale waalaleerya atthu nave kaakhulumunwe. Moovirikana ni vo, owo aahiivahererya wiira aakhaliherye atthu wiiwa ihapari sooreera.

4. Iponto xeeni 4 sa ntakiheryo na Yesu ninrowa ahu othokorerya?

⁴ Mwaha ola, nnooweha moota Yesu aakhalela awe nthiti muteko woolaleerya, otepexa wene, miyeeri 6 sookiserya aari awe valaponi. (Luka 10:1) Osuwela itthu Yesu iixuttiha awe ni otthara ntakiheryo nawe, sinoonikhaliherya okhalela nthiti muteko woolaleerya. Nrowe nthokorerye iponto 4 ntakiheryo na Yesu ninniixuttiha aya: 1) Owo aanipaka ele Muluku oniphavela awe, 2) aanisuwela iprofesia sa mbiibiliyani, 3) aaniroromela okhaliheriwa ni Yehova ni 4) aanaathokorerya atthu.

YESU AANIIMANANIHA OPAKA ELE MULUKU ONIPHAVELA AWE

5. Yesu oonihenrye sai wiira aanivaha efaita opaka ele Muluku oniphavela awe?

⁵ Yesu aanikhalela nthiti olaleerya “ihapari sooreera sa Omwene”, maana aanisuwela wiira eyo ti etthu Muluku aaphavela awe wiira opakeke. (Luka 4:43) Etthu Yesu aatepexa awe ovahexa efaita, waari olaleerya ihapari sooreera. Hata miyeeri 6 sookiserya sa muteko awe woolaleerya, owo “aaheetteetta ipooma sotheene ni mittetthe sotheene” owiixuttihaka atthu. (Luka 13:22) Yesu, aahiwiixuttiha atthu akina, wiira yalaleyeke ihapari sooreera sintoko yena iira awe. — Luka 10:1.

6. Nnaamwi ninvarelaka miteko sinceene Yehova, xeeni muteko woolaleerya orina aya efaita yuulupale? (Nwehe efootu.)

⁶ Olelo-va, Yehova ni Yesu aniphavela wiira nikhaleleke nthiti olaleya ihapari sooreera, okhala wiira muteko orina efaita yuulupale. (Math. 24:14; 28:​19, 20) Ohimya ekeekhai, khula muteko oninvarela ahu Yehova oniirela mpantta muteko woolaleerya. Mwa ntakiheryo, ninniteka Ipa sa Omwene wiira ale aniphavela wiixutta ekeekhai, akhalaneke opuro woomukokhorela Yehova. Ohiya-vo, miteko sootheene sinivariwa oBeteli, yoolakela aya ori okhaliherya muteko woolaleerya. Okathi anna ni arokora sinaaphwanya aya ihasara sa ephattu, hiyo ninnaakhaliherya naavahaka itthu anipirisari aya, okhala wiira nimphavela wiira awo ahihiye othukumana ni olaleerya. Vaavo nnuupuwela ahu wiira muteko woolaleerya torina efaita yuulupale, ni wiira Yehova oniphavela wiira nipakeke, ninrowa wiimananihaka opaka ele eniwerya ahu wiira nivare muteko owo. Mutokweene mmosa onikhala Hungria, oniihaniwa János, ohimmye so: “Miyo kinnuupuwela wiira khuuvo muteko orina efaita yuulupale, onivikana olaleerya. Tthiri eyo yoothanleliwa ahu ya vameekhaaya”.

7. Xeeni Yehova oniphavela awe wiira nihihiye olaleerya? (1 Timootheyo 2:​3, 4)

⁷ Nnoowerya okhalela nthiti muteko woolaleerya, vakhala wiira ninnaathokorerya atthu ntoko Yehova onaathokorerya awe. Owo oniphavela wiira atthu a makhalelo ootheene yiiwe ni yeemererye ihapari sooreera wiira yoopowe. (Mmusome 1 Timootheyo 2:​3, 4.) Okhala wiira ihapari iyo pooti woopola ikumi sa atthu, Yehova onninikhaliherya olokiherya inamuna ninlavula ahu ni atthu. Mwa ntakiheryo, ebroxuura eni: Waaphenta Atthu — Onimookhaliheryani Waapaka Awiixutti, ennivaha malakiheryo a moota woopaceriha ovaanela ni yoolakela ya opaka soosoma sa Biibiliya. Nto hata atthu ahiphavelaka niinano omurumeela Yehova, woonasa wene, anoowerya opaka eyo muhoolo ahinatthi maxakha maalupale. Tivonto etthu nnaaleela ahu vano, pooti owiiriha opaka yoothanla muhoolo. Masi eyo enooweryaneya vakhala wiira khannihiya olaleerya.

OWO AANUUPUWELELA IPROFESIA SA MBIIBILIYANI

8. Iprofesia xeeni saamukhalihenrye Yesu orumeela saana okathi awe?

⁸ Yesu aanisuwela moota iprofesia sikina sa mbiibiliyani saarowa aya wiiraneya. Mwa ntakiheryo, owo aanisuwela wiira muteko awe woolaleerya waarowa oviriha iyaakha tthaaru nnimeya. (Dan. 9:​26, 27) Nave-tho, owo aanisuwela okathi ni moota aarowa awe wiiviwa. (Luka 18:​31-34) Okhala wiira aanisuwela itthu sootheene saaleiheriwe, owo aanirumeela saana okathi awe okhalelaka nthiti olaleerya wiira omalelihe yoothanleliwa awe.

9. Osuwela iprofesia sa mbiibiliyani, onrowa onikhaliherya sai okhalela nthiti muteko woolaleerya?

⁹ Wiiwexexa iprofesia sa mbiibiliyani, sinoonikhaliherya okhalela nthiti muteko woolaleerya, okhala wiira olumwenku ola wootakhala onoopwetexiwa. Biibiliya aahihimya mweettelo ni itthu saarowa okhumelela mahiku ookiserya, nto iprofesia iyo ninniweha siiraneyaka mahiku ala. Nave-tho, ninniweha ohiiwanana wa epotensia ya olumwenku wootheene Anglo-Americana ni Rússia ni anamalamulela akina animukhaliherya. Eyo ennimaleliha eprofesia enihimya wiira mwene a osuuli onoorowa omutuphela mwene a onorti. (Dan. 11:40) Nihiixutta wiira metto sa elatarato eniromoliwa Daniyeli 2:​43-45, enitaphulela epotensia ya olumwenku wootheene Anglo-Americana. Mwaha wowiiwexexa iprofesia sa mbiibiliyani, ninnikupali wiira, moohipisa Omwene wa Muluku onoopwetexa ikuvernu saapinaatamu. Iprofesia iyo sootheene, sinnooniherya wiira ninkhala wanikisa wa mahiku ookiserya. Nto nihaana orumeela oratteene okathi ahu, nikhalelaka nthiti olaleya ihapari sooreera.

10. Mwa inamuna xeeni sikina, iprofesia sa mbiibiliyani sinnikhaliherya aya olaleerya?

¹⁰ Nave iprofesia sa mbiibiliyani, sinnihimya nlipelelo nooreera nenlo nimphavela ahu wiira atthu akina asuwele. Carrie, murokora yoowo onirumeela oRepública Dominicana, onihimya so: “Okathi kinuupuwela aka sooleiherya sootheene Yehova onrowa awe opaka muhoolo, kinniphavela ni murima aka wootheene waaleela atthu akina. Atthu sinnaaphwanya mixankiho sinceene, nto annipirisari wiiwa ihapari iyo sa Yehova”. Ohiya vo, iprofesia sa mbiibiliyani sinnooniherya wiira khula okathi Yehova onnikhaliherya muteko woolaleerya. Leila, yoowo onikhala Hungria, onihimya so: “Yoolepa ya Yesaya 11:​6-9, ennikuupuxerya wiira khula mutthu onoowerya opaka marukunuxo okhaliheriwaka ni Yehova. Tivonto, kinimwiimananiha vanceene waalaleerya ihapari sooreera atthu ootheene, hata ale anikhala ntoko khaniphavela owiriyana”. Christopher, munna yoowo onikhala oZâmbia, onihimya so: “Marko 13:​10, onihimya wiira ‘atthu a maloko ootheene ahaana olaleeriwa toko ihapari sooreera’, nto ti voohakalaliha okhaliherya wiiraneya wa eprofesia ela”. Ankhi nyuwo, eprofesia xeeni ya mbiibiliyani eniwiirihani ohihiya olaleerya?

YESU AANIMUROROMELA YEHOVA

11. Xeeni Yesu aapirisari awe omuroromela Yehova wiira ohihiye okhalela nthiti olaleerya? (Luka 12:​49, 53)

¹¹ Yesu aanikupali wiira Yehova ammukhaliherya okhalela nthiti olaleerya. Hata Yesu aalavula mwa nttittimiho, owo aanisuwela wiira ihapari sooreera saamukumiherya ohiiwanana ni olupatthiwa. (Mmusome Luka 12:​49, 53.) Ahooleli a itiini, khiyaasiveliwa ni ele Yesu aalaleya awe, nto awo yaaheererya omwiiva ikwaha sinceene. (Yoh. 8:59; 10:​31, 39) Hata vari siiso, Yesu khaahiyale olaleerya okhala wiira aanisuwela wiira Yehova aari ni yena. Yesu ohimmye so: “Nkikhanle mekhaka, masi Tiithi, yoowo okirumme, ori ni miyo. . . . Owo khokihiyale mekhaka, okhala wira okathi wotheene kinnivara itthu sinimusivela”. — Yoh. 8:​16, 29.

12. Yesu aakhalihenrye sai awiixutti awe ohihiya olaleerya hata yaalupatthiwa?

¹² Yesu aahiwuupuxerya atthareli awe wiira yaahaana ororomela wiira Yehova aamwaakhaliheryaka. Ikwaha sinceene, Yesu aanaalipiherya awiixutti awe, wiira Yehova aamwaakhaliheryaka hata okathi woolupatthiwa. (Math. 10:​18-20; Luka 12:​11, 12) Yesu aahaaleela wiira yaahaana okhalana ephoole. (Math. 10:16; Luka 10:3) Owo aahaavaha malakiheryo wiira ahimukhanyereryeke mutthu weemererya ihapari sa Omwene. (Luka 10:​10, 11) Nave-tho aahaaleela wiira yaahaana otthyawa vaareerelaka. (Math. 10:23) Hata Yesu aakhalela nthiti olaleerya ni aamuroromela Yehova, owo aanisyaka itthu ni mapuro oowoopiha. — Yoh. 11:​53, 54.

13. Xeeni munreerela anyu okupali wiira Yehova onimookhaliheryani?

¹³ Olelo-va, ninnipirisari okhaliheriwa ni Yehova wiira nikhaleleke nthiti olaleerya, otepexa wene, okathi ninlupatthiwa ahu. (Wiis. 12:17) Xeeni munreerela anyu okupali wiira Yehova onimookhaliheryani? Mwaha wa nivekelo Yesu aapanke awe niri Yohani ekapiitulu 17. Yesu aahinvekela Yehova wiira aakhapelele arummwa awe, nto Yehova aahaakhula. Eliivuru ya Miteko, ennooniherya moota Yehova aakhalihenrye awe arummwa olaleerya ni nthiti hata yaalupatthiwa. Nivekelo Yesu aapanke awe, aahinvekela-tho Yehova wiira aakhapelele ale yaakela weemererya muhupi arummwa yaalaleya aya. Eyo enoohelani muhina nyuwo! Nave mpakha olelo-va, Yehova onnaakhula nivekelo nno. Owo onimookhaliheryani, ntoko siisale aakhalihenrye awe arummwa. — Yoh. 17:​11, 15, 20.

14. Exeeni ennikupaliha wiira khaninrowa ohiya olaleerya hata okathi wooxankiha? (Nwehe efootu.)

¹⁴ Vaavo wanikisa onaattamela aya, pooti okhala vooxankiha okhalela nthiti muteko woolaleerya. Masi Yesu ooleiherya wiira onoonikhaliherya okhalela nthiti muteko ola. (Luka 21:​12-15) Ntoko siisale Yesu ni arummwa awe, nihaana waahiya atthu athanlaka vakhala wiira anooniwiriyana aahiiso nnaari nihinyakulihanaka naawo. Hata ilapo seiye miteko sa Anamoona a Yehova sinikhoottihiwa aya, anna ni arokora anniwerya olaleerya ihapari sooreera okhala wiira annimuroromela Yehova. Ntoko siisale Yehova aalipinhe awe arumeyi awe khalai, nave-tho olelo-va, owo onoonivaha ikuru wiira ‘nilaleye moolumo ootheene’ moovarihana ni ele oniphavela awe. (2 Tim. 4:17) Tivonto, mmuroromeleke Yehova owo onimookhaliheryani ohihiya okhalela nthiti olaleerya!

YESU AAHIKHALANA MOONELO WOOLOKA

15. Xeeni ninhimya ahu wiira Yesu aanisuwela wiira oolaleerya, waamukumiherya mireerelo sinceene?

¹⁵ Yesu aanikupali wiira yaamukhala atthu akina yaarowa weemererya ihapari sooreera. Nto eyo yaahimukhaliherya ohakalala ni ohihiya olaleerya. Mwa ntakiheryo, nuuvira mwaakha mmosa Yesu olaleeryaka, owo aahisuwela wiira yaahikhala atthu anceene yaaphavela owiriyana ihapari sooreera. Owo aahaalikanyiha atthu awo, ntoko ipyo silikanne wiira sihemphwe. (Yoh. 4:35) Nuuvira mwaakha mmosa, owo aahaaleela awiixutti awe wiira “soolya khasireere mmatta”. (Math. 9:​37, 38) Muhoolo mwaya owo, aahihimya-tho so: “Soolya khasireere mmatta . . . munvekele Mwaneene ematta wira aaruuhe anamuteko”. (Luka 10:2) Yesu aanikupali wiira yaamukhala atthu yaarowa owiriyanaka ihapari sooreera. Okathi yiiraneya aya eyo, owo aanihakalala vanceene. — Luka 10:21.

16. Malikanyiho a Yesu, yaakhalihenrye sai awiixutti okhalana moonelo wooloka voohimya sa olaleerya? (Luka 13:​18-21) (Nwehe efootu.)

¹⁶ Ophavelaka waakhaliherya awiixutti awe ohihiya okhalela nthiti muteko woolaleerya, Yesu aahaaleela wiira muhupi yaalale aya waamukumiherya mireerelo sinceene. Mwa ntakiheryo, nrowe nthokorerye malikanyiho manli aahimmye awe. (Mmusome Luka 13:​18-21.) Noopacerya, Yesu onnilikanyiha mihupi sa Omwene ni enuku yaamukhaanixa ya mostaarta, yeeyo yiirinhe okhumelela mwiri muulupale. Eyo entaphulela wiira atthu anceene yaamweemerenrya ihapari sooreera ni khuuvo muxankiho aakela okhoottiherya eyo. Na nenli, Yesu onnilikanyiha mihupi sa Omwene ni eferemento. Eyo enniiraneya, okhala wiira ihapari sooreera sinnilaleiwa mapuro ootheene a olumwenku, ni sinniwiiriha atthu opaka marukunuxo hata oviraka okathi munceene. Tivonto Yesu aalipinhe awe atthareli awe aahimeeryaka wiira muhupi yaalaleya aya, waamwaakhaliherya atthu anceene.

17. Xeeni ninreerela ahu ohihiya okhalana moonelo wooloka voohimya sa olaleerya?

¹⁷ Okathi nnuupuwela ahu moota muteko woolaleerya onaakhaliherya aya atthu anceene olumwenku wootheene, eyo enniniiriha okhalela nthiti olaleerya. Khula eyaakha, imilyau sinceene sa atthu anisiveliwa ekeekhai, anniweha muthukumano wa Wuupuwelela ni annimusoma Biibiliya ni hiyo. Nave atthu anceene annipatisiwa ni anniirela mpantta muteko ola woolaleerya. Nto khaninsuwela atthu akavi anrowa owiriyana muhupi ninlaleya ahu. Masi etthu ninsuwela ahu okhala wiira Yehova onnaathukumanya atthu a muttitthi muulupale, yaawo ankela woopowa okathi wa maxakha maalupale. (Wiis. 7:​9, 14) Yehova, mwaneene ematta, onnisuwela wiira atthu anceene animweemererya ihapari sooreera. Tivonto, nookhalana mathowa ooloka anniiriha ohihiya olaleerya!

18. Olelo-va, nimphavela wiira atthu anooneke sai?

¹⁸ Etthu emosa yaasuwanyeiha awiixutti a Yesu, waari okhalela nthiti muteko woolaleerya. Mwa ntakiheryo, arummwa yaanilaleerya moolipa murima ni moohakalala mpakha atthu osuwela wiira “yaaneetta ni Yesu.” (Mit. 4:13) Olelo-va, okathi ninlaleerya ahu nimphavela wiira atthu akupaliki wiira nimmutakiha Yesu nikhalelaka nthiti muteko woolaleerya.